[重開][多圖][一年長途遊記] 中南美到南極-西伯利亞至東歐

978 回覆
332 Like 5 Dislike
2020-08-29 12:12:50
留名加速
2020-08-29 14:11:44
無得去旅行要睇遊記止渴,想再睇
2020-08-30 11:50:45
好睇!
生日快樂呀
2020-08-31 00:56:56
[哥斯達黎加-La Fortuna]

除左危地馬拉之外,哥斯達黎加都有唔少火山。晌哥斯達黎加北部既La Fortuna位於火山區,令呢度有唔少溫泉,有野溫泉亦有旅館打理既溫泉,一場黎到我地希望兩種都可以試下!

我地朝早六點由San Jose出發,搭四個鐘巴士就黎到La Fortuna。呢程車大幾港紙30蚊,係當地居民都會搭既車,所以中途站好多,坐位好窄,亦都無冷氣無廁所,但風景就好靚,沿路經過好多鄉村同養牛場


La Fortuna其實係呢度成個區既名,我地住既市中心係個無乜人既小鎮,今次住既地方係小鎮最邊緣位置,旁邊就係一個小樹林同埋溪流。間屋一廳兩房,因為隔離房無人book,所以我地每晚130蚊港紙可以霸哂成間屋,好爽。

話時話中美既花灑(如果有熱水既話)全部都好似上圖咁,係電線外露卷哂電線膠布咁既,而且搵唔到熱水爐,斷估係啲水黎到花灑先加熱,我成日都驚自己沖沖下涼會漏電電死

個host同我地年紀差唔多,同老婆仔女住係隔離屋,好鍾意過黎搵我地傾計。我地放低背囊無耐佢就好與奮咁話要帶我地去後面個樹林仔睇動物,佢話果度住左兩三隻樹懶,其中一隻仲有BB架添,通常呢個時間就會出黎活動,叫我地一齊去睇。

可惜今日樹懶無出黎,佢就話唔緊要,咁我地睇青蛙啦!跟手就拎起支樹枝係草堆了了下,我地心諗呢度啲人都幾趣緻,搵野生動物好似搵自己屋企隻狗咁方便果然兩三下手勢就比佢搵到呢隻青蛙仔

呢隻青蛙好似著左條藍色牛仔褲咁樣,所以佢地叫佢做blue jeans,係哥斯達黎加幾常見既青蛙,雖然只係得指甲咁細粒,但佢係有毒架。玩完一輪之後就問下Chris呢頭有咩好玩,佢話除左睇動物之外,呢度仲有好多zipline,強烈推薦我地試下。係佢既幫忙之下我地好快就定好之後兩日既行程,決定一日join tour去national park行下,一日去玩zipline,兩日完左都會車我地去浸溫泉,感覺幾超值。

搞掂哂之後就出去附近行下買下餸

見到除左牛之外,附近仲養左好多馬。而且啲馬都係放養既,所以會好似流浪狗咁成日係街見到佢地周圍走,就好似呢隻白馬咁,明明無比人綁住但就係好鍾意係我地屋後面打躉

夜晚望出去見到個有頭毛既白色影企係度

都咪話唔驚嚇


呢一日係旅行第100日,我地炆左一烹牛腱黎慶祝,呢度啲牛肉好香好好食呀
2020-08-31 01:06:09
Antigua 真係唔錯,留左一個星期都唔多夠喉 不過啲巷仔都有啲雜要提高警覺
2020-08-31 01:10:29
對於大家的等待表示感動
2020-08-31 03:10:54
唔記得左講呢130蚊房錢仲包埋早餐,每朝Chris都會新鮮滾熱辣咁係佢屋企拎啲早餐過黎。係哥斯達黎加菜標誌性既名物,我叫佢做豆飯

豆飯食落其實無乜特別味,係有啲野咬下咁,早餐有豆飯食都幾好丫,夠哂飽肚,食完就係門口等今日個guide黎接我地。Chris養左兩隻狗仔,一黑一白,成日都跳上黎要人陪佢地玩


等左一陣就有部小巴黎到,導遊係個睇落cool cool地既男人,一黎到就二話不說摘左塊樹葉拍落男朋友條褲度,我心諗做乜鳩之際,佢就笑笑口話呢個係送比男朋友既樹葉紋身

原來呢種蕨有啲白色粉可以印落布度,又幾靚喎。雖然個導遊神神化化,但感覺係個真心熱愛大自然既人,就係咁我地就開始今日Arenal Volcano National Park既hea行團喇。Arenal Volcano係La Fortuna最出名既火山,亦有trail可以行上去,但今次我地只係想係山腳輕鬆行。10月既哥斯達黎加係雨季亦係旅遊淡季,可能因為咁呢團得我地兩個人。
我地係度見到啲大嘴鳥

哥斯達黎加最出名既紅眼樹鞋

佢訓覺既時候青BB一陀野咁唔多覺眼,但了一了佢就會擘大對紅色眼同露出藍色肚皮,真係好靚,我地本中美lonely planet都係用佢黎做封面

呢個國家既青蛙好出名,有啲人黎仲會專程join啲frog watching tour。係度我地又見到隻斷左腳既青蛙仔

呢個時候個guide就崩潰左,不斷對住隻青蛙用BB話講野,問佢點解咁慘慘,係咪有壞人蝦佢...之後佢就壞掉了,全程頹左唔多出聲。見到佢咁悲傷我地都唔打擾佢,而由呢度開始我地都無乜見到其他動物了,就當係普通行山咁行下,其實風景都唔錯既

呢隻蟲仔顏色幾靚


我都未試過咁想個tour快啲完雖然明白個guide咁傷心都係因為佢心地善良,但一路照顧住靈魂出竅偶爾係樹頭發呆既佢,個心有點累,好彩條路線唔長,好快就行完,我地即刻跳上車向有溫泉既地方進發!
2020-08-31 03:37:57
等睇爛尾
2020-08-31 03:39:37
得閒返黎睇
2020-08-31 03:40:30
多謝你連登有愛
2020-08-31 11:42:32
好衰呀
但你永遠不會成功今次我會比心機寫架!
2020-08-31 12:08:09
我想問下南美d apartment or airbnb係唔係都比較平?
如果全程同屋企人住apartment 大概係唔係都係17-20萬左右?
2020-08-31 13:31:45
LM 先
2020-08-31 15:27:47
pishhhhh LM
2020-09-02 00:22:40
開左車20分鐘左右,部小巴就無啦啦停左係乜都無既山路,個guide同我地講落車向谷底行就會見到個野溫泉,個半鐘之後會返黎接我地,就絕塵而去了我地完全R爆頭,果度又無路牌,唯有行去佢指個方向睇下,入草叢爆左陣林就見到呢條渠

呢啲渠水同我地認知既溫泉好唔同,無果陣硫磺味,亦都無感覺好熱既煙飄出黎,我地都懷疑自己係咪行錯路,但都行到落黎喇,不如試下啲水係咪暖既咪知囉。一踩落去,咦,暖架喎

(我唔知點解佢成日都要擺埋啲咁羞恥既舖士)
之不過雖然係野溫泉姐,都唔係成條坑渠咁架嘛,我地就澗水行去上游睇下,穿過左前面條荒廢既石橋開始見到有其他人,就知道去岩地方了


頭先行過黎既路

呢度既水好清澈,溫度亦岩岩好唔會太熱,好似沖涼水咁暖暖地,浸耐啲都唔會覺得頭暈。導遊係失去理智之前話我地知,呢條原本只係條普通既河,但係一次地震之後附近居民就發現呢度河水變暖左,而周圍都有唔少呢種免費既野溫泉,泉水溫度都係30-40度左右

後面好high個瑞士大叔係前一日同我地坐同一部巴士黎既,估唔到係度又撞到佢。佢一見到我地即刻捉住我地吹水,話佢今日係踩單車過黎既,以前都去過香港,最鍾意既就係住重慶大廈同埋睇幻彩詠香江 呢度真係好舒服,水流沖沖下好似晌按摩池咁樣,浸到唔想起身。因為郊外地方無locker,個個都係就咁放啲背囊係樹底,浸浸下仲見到幾隻浣熊走黎摷人地袋入面既零食,好百厭呀。

玩到咁上下我地就搭返歸了。返到去沖好涼曬緊衫既時候,Chris又拎住個望遠鏡過黎叫我地去樹林仔玩,今日一行出去就見到佢啦!

佢好似一舊捲係樹上既垃圾,又似一個啷係樹枝既雀巢,啲毛生滿青苔,好得意 佢一開頭向下爬緊,動作都唔係想像中咁慢,跟著唔知係咪發現左我地,又爬返上樹頂。聽講樹懶一星期只會落一次地去廁所,唔知我地係咪壞左佢大事呢,係既話真係好唔好意思呀


Chris話樹懶分為二趾樹懶同三趾樹懶,除左前爪手趾數目之外,最容易分辨就係睇毛色,二趾樹懶淺色啲,三趾就係深啡色,所以我地見到呢隻係三趾樹懶,而背隻既橙色紋就係雄性三趾樹懶既特徵。我地問阿Chris點解佢咁厲害,啲樹懶好似話見就見到咁,佢話啲樹懶來來去去都係晌果一兩棵樹生活,所以想搵佢地其實唔難。

我地住落之後發現樹懶係哥斯達黎加真係好常見,差不多每家人都會同你講佢屋企隔離棵樹有樹懶,其實都唔使專程join啲咩tour去睇佢地。雖然常見但不減當地人對樹懶既熱愛,拎住個望遠鏡周圍𥄫就係佢地茶餘飯後既活動,真係一班好可愛既人。

附近都無乜餐廳,呢幾晚都係自己煮,今晚食椰菜卷
2020-09-02 00:54:00
巴打同屋企人去咁孝順
我地住宿會盡量控制係每晚hkd 150~350之內,比心機搵既話我覺得都有唔少四四正正既apartment揀。我唔敢答你呢筆錢全年係南美夠唔夠用,因為南美我地只係留左大約三個月,除左間中住下dorm,我地住過每晚三百零蚊既apartment都好好,好多時仲係兩房或者三張床我地住唔哂覺得好空虛添,希望呢少少資料幫到你
2020-09-02 02:18:48
2020-09-02 19:29:17
今日我地去玩zipline,La Fortuna地區有唔少zipline既路線,我地叫Chris隨便幫我地揀間佢覺得好既,都唔記得左幾多錢了,反正就係好平。我同男朋友都係第一次玩,覺得有啲興奮,今日個tour又係得我地兩個


呢條路線總共有九段zipline,雖然全日都落住雨,滑輪啲生銹汁又噴到成面都係,但晌雲霧中既山林穿梭都好特別,玩既時候雨點高速打落塊面度仲增加左一份刺激感添。去到最尾果段可以用spiderman式飛去對面

我就麻麻地呢個體位,覺得個頭倒吊好痛,同埋上下倒轉左都睇唔到風景,不過係幾有趣既

玩哂九段zipline之後仲有個optional既遊繩落山既環節,都好好玩


完哂所有活動之後我地入左一個竹棚,入面有一個女人同好多手工藝品。我地起初以為呢個係sell人買手信既地方,諗起當時有呢個想法都有啲慚愧。

坐底之後女人開始同我地講野,唔係用西班牙文,係用我地聽唔明既語言。透過guide既翻譯,我地知道原來佢係來自一個叫Maleku既原始部落,佢地族人一向係呢個區域生活,亦有自己獨特既語言同文化,但政府就對外宣稱佢地已經滅亡左,佢地既語言亦因為唔被認可愈黎愈少人用而成為瀕危既語言,呢間tour agent比左佢地一個機會可以係度向遊人訴說佢地既故事。講完之後女人好真誠咁向我地展示唔同既手工藝品,希望我地好好記住世界上仲有一個叫做Maleku既部落,佢地既族人依然好努力咁守護緊自己既語言同文化。
"我唔想我地既語言滅亡"去到呢度其實我已經眼濕濕,歷史真係晌世界各地不斷重演,雖然當時未有反送中,但政府抹殺廣東話既意圖大家都心知肚明,呢個咁細小既部族係資源缺乏既環境尚且努力捍衛自己既語言,我地又點可以放棄呢。

玩到成身污糟邋遢,收搭好心情又係去浸溫泉既時候。今次我地去試高級野,有個pass可以入對面間睇落好架勢既酒店

我地去人地既spa房房沖左個涼,就出去搵熱水浸

呢個場有3個細池,又係無其他人我地包哂場 池水既溫度同野溫泉一樣唔太熱,好舒服。兩日比起黎我都係鍾意前一日既野外溫泉多啲,天然既流水同樹影比到人一種好有生命力既感覺。

玩到好攰,今晚食好啲


下一站: Monteverde
2020-09-02 20:02:14
多謝分享!真係好正!
2020-09-03 13:56:00
[哥斯達黎加-Monteverde]

Monteverde有”綠色的山”既意思,周圍都係綠油油一片。黎呢度既人通常會住係入面一個叫Santa Elena既小鎮,呢個區域屬於cloud forest,係度就好似住係雲入面咁,長期都好潮濕好大霧。

今次都係住一家人經營既住宿,有兩張雙人床既房包早餐每晚hkd240。呢家人三代同堂,有4個小朋友,一日到黑都好熱鬧,我地都好鐘意呢度

屋主嬸嬸好有心機,將間房佈置得好靚

成日係我地張床碌黎碌去既三歲豆釘同貓咪


嬸嬸有三個仔女,其中一對係龍鳳胎黎,龍鳳胎細佬Pablo係屋入面唯一一個識少少英文既人,係負責同我地溝通既。第一日黎到未諗到有咩做,Pablo邀請我地聽日約埋樓上對德國情侶去後山玩,有秘密景點想同我地分享咁話,呢度既人真係鬼馬,個個都有私伙景點既,咁我地聽日行程就訂好左喇。

每朝嬸嬸都會煮豆飯比我地食,膽拖煎大蕉同生果,好豐富

食完我地就向後山出發

行行下入間馬廄,原來Pablo屋企養左兩隻馬,佢話呢度既居民好鍾意馬術,每年都會舉行唔少比賽,所以好多人都會養馬,佢地仲有個訓練馬術既空地

再行多一陣,就見到佢想帶我地黎既第一個地方

驟眼睇好似一棵穿窿既空心樹,其實佢原本係兩棵樹黎,外面果棵寄生絞殺左入面棵樹,裡面棵樹腐爛左之後就形成一條好似樓梯咁既通道,一直爬可以好輕易咁去到樹頂。
Pablo話呢度係佢同朋友最中意黎既地方,夜晚會同朋友一齊爬上樹頂飲啤酒睇星星。唔知我有無聽錯,佢話成個絞殺中空既過程要大約500年先可以完成架

跟住我地就去佢口中既第二個秘密基地,條友仔一路神神秘秘唔肯講,話去到我地實會嚇一跳,搞到我地心思思 條路一啲都唔易行,一直都係晌度爆林,而且落左好多日雨,啲泥又鬆又滑,行行下仲比河水擋住左我地既去路。因為呢度天氣太潮濕,對鞋濕左既話跟本唔會乾,所以大家搬左舊木黎過河

Pablo無講錯,跟住見到既風景的確令我地目瞪口呆。
係一條天然形成有生命既橋。

到底棵樹點樣先可以跨過條河生成咁樣架呢,大自然真係好神奇,可以創造出咁多驚人既事物。我地漸漸覺得可能都唔使成日參加local tour,跟住當地人去佢地既秘密基地往往會有更多驚喜。條橋好堅固,係上面可以走黎走去都無問題,我地都忍唔住走上去影返張遊客照


玩完就返去沖涼洗衫了。嬸嬸驚我地無啖好食,成日都會煮多啲晚飯拎黎餵飼我地,呢日佢分左陀飯同比左兩碗湯比我地

原來呢度既人都鍾意煲湯,碗湯有合掌瓜、薯仔、紅蘿蔔、大蕉,木薯同埋豬骨等等不能盡錄,好似將成個士多既蔬菜放哂落去咁,用料有啲奇特,不過都好好味。雖然我地間中都會自己煲湯,但旅途中有一個媽媽煲湯比自己飲,心頭真係有說不出既溫暖。

為左方便嬸嬸同埋成日跑入我地房玩既細路同貓咪,係呢度除左訓覺之外基本上我地都唔會閂房門。呢隻黑貓勁嗲,一見到人坐低就會跳上黎呼嚕呼嚕


我地做咩佢都要痴住,好似係我地養既咁,真係好可愛連我寫日記都要叉隻腳埋黎,踩我本野一腳。

好好寫日記係我地旅行中堅持要做既事,可以唔食飯可以唔影相,但一定唔可以唔寫日記,因為只有手寫既文字同親手畫既圖畫最能夠紀錄當刻既感覺。全靠呢本日記先可以將當時既事記得咁清楚,我地約定到大家老左,記憶變得模糊既時候,都要係床邊將呢段愉快既經歷讀比對方聽
2020-09-03 14:00:21
都好多謝你同我地一齊回憶呢段旅程呀
2020-09-03 15:22:03
好想去旅行啊!!!!!!!!!!
下次去旅行都要開始寫遊記,就咁睇都好開心
2020-09-03 17:37:06
終於追晒上下集, 原來只係1/4個tour, 好期待, 好正
2020-09-04 00:18:52
呢度既天氣好潮濕,個人成日都渾渾噩噩好想訓覺。難得有日終於停雨,我地可以去行下山喇。
市中心每日都有幾班巴士可以去Santa Elena Cloud Forest Reserve,車飛係來回票,價錢大約十零蚊港紙。去到門口既visitor center每人要比hkd120入場費,係度有地圖可以睇下陣間想行邊條路線

呢度既指示好清晰,所以自己行都好方便唔怕盪失路。工作人員話呢幾日落左太多場大雨,有好多路沖爛左未整好,風景最靚果條紅色線因為太危險封左,其他路線都未清楚路況,提醒我地要注意安全


沿途風景好靚,周圍都生滿苔蘚,而且都無乜遊人,行左幾個鐘我地淨係撞到住樓上對德國情侶。雖然話呢幾條路線相對安全,但路上都有唔少冧樹,要手腳並用爬過去

門口個指引話呢度可以見到好多動物,沿路都聽到好多唔同動物既叫聲,但森林太密我地總係無辦法搵到佢地,可能城市長大既我地就係缺少當地人呢方面既觸覺,不過比心機留意都會見到啲小東西


我地由朝早8:30上車行到下晝4:30,感覺吸左好多新鮮空氣,個人都醒神左呀!

琴日嬸嬸請左我地飲湯,今日我都想煲返個香港style湯水請佢飲,我地發現外國人對我地用蘋果黎煲湯都覺得好好奇,所以決定煲個蘋果紅蘿蔔煲豬展比嬸嬸一家同德國情侶一齊分享,佢地都好鍾意,真係太好喇。


話說煲緊湯既時候嬸嬸又黎搵我,原來佢想教我勾花。事源嬸嬸雖然唔識講英文,我地西文又識得唔多,但我地每日都好努力溝通,佢早幾日話第五個孫女就快出世喇,勾緊一件裙仔比BB女,日日都好興奮咁同我分享進度

佢見我好感興趣,就叫我黎學下點勾花

覺得自己都有啲天份


係度住就算唔出門口都唔會覺得悶,自由出入既貓狗間唔時會黎裝下我地做緊乜

食食下飯呢個豆釘捧左塊紙皮黎,話今晚要同我地一齊訓

最後比佢婆婆連人帶皮搬走左
2020-09-04 00:20:53
我都好鍾意睇遊記呀
到時記得寫比我地睇!
吹水台自選台熱 門最 新手機台時事台政事台World體育台娛樂台動漫台Apps台遊戲台影視台講故台健康台感情台家庭台潮流台美容台上班台財經台房屋台飲食台旅遊台學術台校園台汽車台音樂台創意台硬件台電器台攝影台玩具台寵物台軟件台活動台電訊台直播台站務台黑 洞