[重開][多圖][一年長途遊記] 中南美到南極-西伯利亞至東歐

四張床呢款舒服好多，後生果時搭過啲六張床既，訓頂層壓迫感好強

多謝你
我都好鍾意睇你地既留言，睇大家既經歷同互相交流，亦估唔到我地既經歷竟然真係有人會鍾意睇，可以為你地既生活帶來到一啲樂趣都係我既榮幸呀

咁慘，好彩有kfc薯蓉呢個選項，感覺幾養胃
我都頂唔順佢地啲辣，係成都食過佢地啲麻辣火鍋，屙屎果時屎眼辣到發麻，無乜野都唔想再試。

推文，周圍都有韓國人

我見你地成日有白飯食，去到啲好辟嘅地方都有，係咪隨身會帶住？

終於追完，好好睇啊

朝早9點鐘，蒙古中部五天團出發!! 冬天係蒙古既旅遊淡季，大家都想係春夏季節黎睇綠油油既大草原，無人會想冰天雪地係郊外掙扎求存，所以我地兩條友又包左團啦

呢個五天團每人大約700USD，我地係hostel直接上車出發，tour guide係個叫Saruul既女仔，同我地同年，司機睇落同我地都差不多大，揸車好細心好安全，感覺係一個好好既tour呢。呢份就係我地呢幾日既移動路線圖


烏蘭巴托市內成日都塞車，一上車我地都塞左一陣先

市內環境大致上都係咁樣

導遊去士多買左啲朱古力糖比大家食，呢隻糖好好食呀，朱古力入面包住啲好似樂家杏仁糖既野，之後去到俄羅斯都見到有得賣


估唔到第一日既行程已經好豐富，出發去郊區前我地先係近市景點遊覽一下，首先去左Bogd Khaan Palace Museum博克多汗冬宮，博克多汗係蒙古國獨立後既首位領袖，佢本身亦係蒙古藏傳佛教第八世活佛既轉生，似乎係蒙古歷史中一個非常重要既人物



然後去左位處一個小山丘上既翟山紀念碑，呢度係為左紀念二戰時期蘇聯對蒙古既幫助而興建既，牆上充滿表現蘇蒙友好既壁畫



呢度亦係烏蘭巴托市既制高點，只不過今日天氣唔好，風景麻麻


雪開始愈落愈大，我地都開始離市中心愈黎愈遠

黎到成吉思汗紀念館，呢度最出名就係呢個巨型不銹鋼成吉思汗像

雕像下面係一個博物館，我地先係度參觀一陣。傳統蒙文真係好型

鍾意既話，工作人員可以幫你譯個名做蒙文，寫返比你做紀念

迷之大靴x1隻

係度亦有一啲蒙古人傳統生活既介紹

參觀完博物館，我地就可以穿過成吉思汗既下體，上到黎觀景台近距離望望佢

手持金鞭既策騎像，凍到結哂冰

我地同導遊姐姐


食完晏晝之後，我地就出發去烏蘭巴托東面既Terejl National Park，可能太大雪既關係，我地無停底睇風景，直接趕路去今晚住既地方。離開城市後，我地部車就再無石屎地行，要晌厚厚既積雪上開墾道路， 部車有時會死火，有時就卡左係小溪度，間唔時就要一齊落車挖地同推車，對我地黎講好新奇刺激


搞掂


大雪令到能見到好低，沿路又無路牌，係唔需要借助任何地圖同gps既情況下都可以憑直覺去到目的地，我覺得司機真係好厲害。導遊話原來司機都係遊牧民族出身，所以同內置左gps無分別，係佢既英明帶領下，我地好快就黎到今日既住宿啦

迎接我地既一隻好可愛既狗仔

放好行李我地就係蒙古包既主人見面，我以為蒙古人係好傳統同保守，但原來佢地見面都係會用擁抱既方式黎打招呼架。呢度係一家牧民既屋企，佢地係自己住緊個蒙古包隔離搭多左一個包招待遊客，旺季既時候唔夠住有時仲會搭多三四個添，佢地好熱情咁邀請大家入去坐，一坐低就請我地飲熱辣辣既奶茶

蒙古奶茶好啖口，咸咸地，無乜奶味又無乜茶味，最緊要就係無蘇味，我幾鍾意。佢地好熱情，一日你仲坐係度都會不斷無限添飲比你。好快女主人就捧左啲小食比我地

呢舊好似啫哩既野，佢地話係用牛整既，我諗應該係啲肉連皮熬完雪返凍煉製而成，入面夾著啲薯仔同紅蘿蔔，食落好似上海菜啲鎮江肴肉，係幾特別。同肴肉唔同既係，呢舊牛啫哩真係好蘇，女主人教我配埋佢地自製既餅一齊食(下面果塊)，塊餅味道唔錯，夾埋牛啫哩一齊食感覺好好多。坐左成晝車，都係時候去下廁所

佢地既廁所都係旱廁，為左隔絕臭味，通常都會同住既地方隔開一段距離，今次呢個係比較傳統既露天版本，我鍾意呢款多過有蓋果啲，開放式唔會困住啲味無咁臭嘛。佢地話當個廁所用到咁上下滿哂既時候，就會一把火燒左&埋左佢，係附近再挖一個新廁所咁樣。

坐左一陣，屋主話帶我地去騎馬 嬸嬸驚我地冷親，拎左兩件蒙古大衣出黎比我地著

件野好似棉胎咁厚，入面有層厚厚既皮毛，著上身真係好暖呀，騎騎下果時直頭熱到出汗添。蒙古啲馬比較細隻，同蒙古人既身型完全相反，我地係屋主大仔同司機大佬既帶領下係附近山頭兜左個圈




我都係第一次係白雪茫茫既郊外騎馬，呢度真係好靚，除左我地住既蒙古包就見唔到任何建築物，只有被白雪覆蓋無盡既山嶺，我地由橫風橫雪騎到停雪出藍天，再到夕陽西下，雖然無風吹草低見牛羊，但呢片光景我地都好喜歡。
司機大佬與我們


騎完馬返到黎，就快食得晚飯了。等食飯期間我地去玩下牛，呢家人養左好多牛，牛咁眼咁望住我地

佢地好醒，識得用個頭開門，成日無啦啦走左入蒙古包門口徘徊



今日晚飯簡簡單單食炒麵

食飽就返去休息啦，呢度兩個蒙古包，屋主一家+導遊+司機住一個，我同男朋友住另一個，兩條友獨佔成個包，好premium呀。我地個包入面有四張床一張長櫈，氹氹轉圍住中間個火爐

門口隔離有個洗手盆，可以用既水唔太多，裝左半個綠色兜仔咁上下，但都足夠兩個人普通梳洗喇

屋主準備左好多上好木材比我地，男朋友好鐘意幫個火爐加柴，話望住啲柴係度燒好治癒喎


我地計過每條柴燒到半個鐘左右，就算加多幾條都唔會延長到好多時間，諗緊訓著左無人加柴點算之際，屋主就敲門拎左碌巨形木頭入黎塞左入爐，睇個勢應該至少燒到幾個鐘。蒙古包入面夠哂暖，拎包濕紙巾出黎抹下屎忽當沖左涼，就安心去訓覺了。男朋友話今晚個天好清，未捨得訓住，走出去影相影到相機無電先肯上床訓

我地果時見唔到韓國人呀，人都無乜幾多個

係
我地有個1kg既米袋仔，每次見到超級市場有米賣就會買啲fill入去，食太多當地菜有時都會想食下飯嘛。不過中南美買啲米其實好難食，又粉又無味，但就夠哂平，而且果時有啖白飯爬下已經好開心啦，都唔會理咁多。

話說我前幾日屎忽痕想由頭睇下個post，睇左四粒鐘都未睇完原來唔經唔覺寫左咁多野，由頭開始追既話真係辛苦你了

真係寫得好好睇，完全唔覺寫左好多，仲想繼續睇

影到相機冇電得一張相

咪係 想睇星空

原來仲有

星空好靚
樓主快啲出po

樓豬

真係會比人搶野絲打又炒車又比人搶野都真係幾甘

係時候出嘢啦樓

樓主又偷懶

唔知係咪因為燒柴取暖，令到空氣好乾燥，全晚都係咁咳訓得唔太好。到左6點左右爐入面既柴燒哂熄左，氣溫插水式下降，我地搵緊打火機既時候嬸嬸就黎左幫手起返個爐，佢地既幫忙次次都黎得好及時呀。
今日陽光普照，唔再陰陰天


食完早餐攬攬屋主一家告別佢地，就繼續上路了。朝早大部份時間都係車上，我地會返返轉頭，經烏蘭巴托去東邊既半戈壁。今日既天氣好好，我地沿途都成日落車睇風景，呢度既山谷被霧氣籠罩，樹上既雪粉被微風吹落至漫天飛舞，發出閃令令既光芒，隨便係路邊睇到既都係一片美景



經過Terejl公園時打算入去睇下間廟，但原來星期日唔開門既

就去睇下舊烏龜石，都真係幾似隻龜


經過烏蘭巴托，呢度既空氣污染真係唔係浪得虛名

晏晝係啲休息站食，繼續食羊肉餃



下晝開始離開雪地，進入半戈壁。半戈壁係指Elsen Tasarkhai地區，其實離真戈壁沙漠仲係好遠，呢度都有一啲沙堆，但大約有一半地方都有植物生長，所以依然都有好多牛羊馬係度走動

坐得太耐車，落地舒展筋骨留影



係度我地去左個牧民家庭，逗留左一陣

佢地有一對好可愛既小朋友，一開頭好怕羞，熟落左之後咁撩我地玩

跟住佢仲好興奮咁帶我地去睇佢啲羊BB添，有啲BB仲係當日朝早先出世架咋




弟弟如數家珍咁不斷遞啲羊埋黎

羊BB真係好可愛，個樣永遠笑笑口咁，好乖咁比你抱住，真係好溫馴既小動物。佢地好細隻好輕，同毛公仔差不多重，而且一啲蘇味都無，啲毛好柔軟，我都忍唔住好似弟弟咁係咁用塊面捽佢地

呢啲羊仔要養係棚入面，因為呢一帶夜晚有狼，放佢地周圍走太危險了，前一晚訓唔著既時候都聽到好多狼叫。羊媽媽們就係出面放養，定時定候先趕返入棚餵奶

羊媽媽們

媽媽們睇黎唔多滿意我地係咁玩佢地既仔，咬男朋友JJ洩忿

唔知係咪為左保護牲口，呢度家家都有養幾隻狗，但呢隻狗仔咁嗲到底得唔得架


講返點解會黎呢度，其實呢家人係養駱駝既牧民，我地黎就係為左試下騎駱駝

呢啲駱駝好巨大，我覺得好似騎緊恐龍咁

呢家人都有蒙式大褸比我地著黎檔風，我呢件有啲花巧。駱駝會先伏係地下比你坐上去，然後先企起身。同騎馬唔同，騎駱駝無馬鞍坐，隨便放塊布係兩個駝峰中間就坐上去。無馬鞍扶手，亦都無韁繩揸，要固定自己唔跌落地就要搲實前面個駝峰執毛


駱駝既毛都幾嚡，男朋友覺得個駝峰好好手感，揸揸下好過癮，叉隻手入啲毛度仲可以保暖，唔使好似握住馬鞍個扶手咁冷冰冰。啲駱駝好乖，行得好平穩，但可能我唔識平衡，又驚佢會痛唔敢太大力揸佢啲毛，對腳要好努力夾住個駝身，全程都坐唔穩，係跌同未跌邊緣浪浪下，好鬼攰。

告別小朋友之後，我地就黎到今晚住既地方。呢度係集團式既蒙古包，一個圍欄入面有十幾個蒙古包，除左無左陣家庭溫暖外，蒙古包既格局都同前一晚無乜分別，唔同既就係呢度個廁所有蓋，好臭，好就好在佢係晌圍欄入面同埋有燈，夜晚唔使聽住狼叫帶住頭燈去廁所。今日晚餐係住宿提供既飯

食飯既時候黎左隊蒙古樂隊，表演傳統既馬頭琴同蒙古喉音

原本以為係普通既表演，但去到喉音唱歌既時候真係驚為天人，仲以為係自己幻聽，真係見識少 以前從來都未聽過人類可以發出咁既聲音，呢種喉音唱歌方式係蒙古語中叫”呼麥”，歌唱者可以係唱出低沉歌聲既同時發出好似口哨咁既聲音，真係好神奇，呢種聲音有啲嘶啞，有種好似係好遠好遼闊既空間傳過黎既感覺，我覺得同蒙古呢個地方真係好襯。文字好難形容到呢種聲音，大概係咁樣既
https://www.youtube.com/watch?v=qx8hrhBZJ98&list=PLzwQU_p--dRqQc-liyMCoNk5vw0I2cI7U&index=4
咁樣
https://www.youtube.com/watch?v=TGn5Rmujrt8
真係一個好厲害既技巧，希望佢地可以將呢個文化好好咁傳承落去。最後我地用30hkd買左隊樂隊既CD，等第時返到擠迫既香港都可以欣賞呢種屬於大漠與草原既神奇音樂。

繼續追緊
樓豬加油

終於有新文啦

其他相影得麻麻，果晚又無銀河，將就下啦

真係會比人搶野絲打又炒車又比人搶野都真係幾甘

個人無穿無爛好好彩啦

落左一晚雪，一起身所有野都積左層厚厚既雪

早餐係Surral整既西洋早餐

我地逗留既呢個城市叫Kharkhorin哈拉和林，離開住宿後，我地去左隔離一座叫做光顯寺既名勝古蹟

光顯寺係一間藏傳佛教格魯派寺院，於16世紀開始興建，全盛時期曾經有六十幾座廟宇殿堂，可惜其後既戰爭同宗教壓迫令大部份寺院被毀，直至90年代先漸漸重建返，現時光顯寺除左係寺院，亦有一部份係傳物館




呢度好多寺廟貓 毛神神好嗲人





中午時分我地途經一個小鎮，Surral話都係時候食晏晝，帶我地入左間殘殘舊舊好似民居既房仔食辛辣麵


蒙古奶茶+辛辣麵+蒙古蒸包，好有趣既配搭。呢種蒙古蒸包叫Buuz，有啲似蒸餃，餡料係羊肉同洋蔥，係蘇左啲但好多汁，都幾好味。呢度最難忘既係屋外面個廁所，我諗佢已經滿到被焚燒既邊緣，入面既屎堆到高出哂地平線，個馬札得唔夠穩都驚會hi到個屎忽，好恐怖，我真係永遠不能忘記。

四月頭係蒙古既春天，佢地話天氣應該開始回暖至係，但意想不到既大雪令全日既路都堆滿厚厚積雪，今日部車被困左幾次，大部份時間都係度挖地




我地一啲都唔孤獨，路上經常都會見到其他被困既車


蒙古人好守望相助，見到路上有人遇上困難都會過黎幫手。但我地去既地方好多時都係四野無人，傍晚既時候我地又被困係雪堆中，絕望之際今晚既屋主竟然行左出黎搵我地，話見我地咁耐未到，有時擔心所以行出黎搵我地。我唔知係橫風橫雪之下佢係點樣步行過黎，果下覺得佢真係型到曉發光，蒙古人真係好厲害


係佢既幫忙下好快我地就黎到今晚寄宿既屋企

佢地都養左幾隻熱情既大狗


一入到去見到女主人同個女密密手包緊buuz，晚餐應該就係食呢種蒸包啦。係等待食buuz既時候，佢地都請我地食親手做既小食送住奶茶先

呢一盤各種不同形狀既都係芝士黎，全部食落味道都係一樣，粉粉地無乜味，我麻麻地。好快晚餐就煮好啦，原來佢地特登為我地整左牛肉餡既buzz，熱辣辣好juicy，我食左十幾隻

男朋友頂唔順陣蘇味，吱左好多茄汁落去送，渣架

屋主一家都係好熱情好好人，我都好鐘意呢度，如果要數缺點就係個廁所真係太遠喇…...


無沖涼既第三晚，個身開始發出同羊肉一樣既草原氣息了。