[重開][多圖][一年長途遊記] 中南美到南極-西伯利亞至東歐

話時話，最後有冇去埋亞馬遜

[阿根廷-Ushuaia]

南極之旅終於結束了! 過去十日好似發左場夢咁，南極既一切都係如此純粹，山係莊嚴既雪山，水係清澈透明既水，雪係潔白無瑕既雪，所有事物都保留住佢地原本應有既樣貌，呢份簡單係幾咁珍貴而美麗。船上面既大家大半生都周圍旅行，最後追求既原來都係咁簡單既自然風光，你話人係咪好奇怪既生物呢。

晌船上既最後一日，因為早左回航既關係其實架船前一晚就已經泊左岸，呢日朝早放完行李出門口就如常落餐廳食早餐。食完9點鐘就落船啦，話哂都係同一條船上面相處左十日，都有少少唔捨得既



去旅行有時好特別，平時朋友同你講句得閒食飯你可能唔會好上心，但旅行時識左唔係好耐既人叫你一定要去佢既城市探佢，你就會成日記著，好多時仲真係付諸實行去搵人地，可能因為係外地人與人之間既信任會強左? 定純粹係我毒撚性格好容易將人隨口講句既說話當真呢，唔知呢。旅途上每一次相遇，可能都會係彼此間最後一次見面，近排知道係墨西哥義工營一個好錫我地既姨姨過左身，有啲感慨。當時我地仲應承佢第日結左婚會帶個仔去探佢，原來已經無機會可以再見了。

我地今次住得再入啲，呢間住宿依舊都係好好，有隻好痴人既貓


佢好嗲好鍾意人抱，但佢以前唔知做左咩壞事，個host貼左張紙話佢好百厭千祈唔好比佢入屋。
男朋友怕佢會凍成日都傻更更咁坐係門口攬住佢


返返黎地面之後我地係Ushuaia逗留左三日，主要都係洗衫呀，諗下過幾日既行程咁。
洗冬天衫真係好煩，又厚又難搓，我發現咁樣踩既方便又快捷

阿根廷既廁所好多都係咁樣樣，有兩舊野

開頭我地都唔知呢個到底係尿兜定洗手盆黎，男朋友仲話可能係比BB沖涼既浴盆 之後發現應該係好似啲日本馬桶咁用黎洗屎忽既。

閒逛時發現今次返黎比起十日前已經暖左好多

呢度既垃圾分類做得好好，仲有個位比你放樽蓋

新鮮出爐既empanada真係好正


之前都無講過添，阿根廷有種國民飲料，叫做Mate，係一種茶黎既。佢地鍾意飲Mate既程度係你係街上面都會見到人拎住後面紅色果個牛龜咁大個熱水壺，方便可以隨時沖茶飲

佢地既茶葉好碎，直接扔落個杯度就加水沖茶，為左飲茶時唔會成口茶渣，佢地會用呢款飲筒

咁飲既時候就會隔走哂啲茶渣啦。呢種茶好苦，我唔係好識欣賞，不過聽過好似會降乜降物好健康既。

臨走前一晚食餐好既啤啤佢

呢隻可能係我飲過最好味既啤酒，見到記得買支試下

我地飲蜜糖味，香到不得了，個標籤話好味既秘密係佢地用左Patagonia既水。Patagonia……呢個鼎鼎大名既地方，就係我地下一個目的地啦!!

下一站: 智利-Puerto Natales

咁誇張

機械人巴!!! 上個post之後就無見你了，你幾好嗎
我都覺，危地馬拉完全係hidden gem黎，去之前都無諗過咁有驚喜。
我有睇你古巴遊記呀，有機會都好想去下古巴/ 多明尼加/ 波多黎各果幾個國家

我諗呀姨有幫你地寄既
啲postcard都唔知係咪有腳識自己消失
我有朋友仲慘，去北韓旅行果時寄左張postcard返香港
之後係屋企信箱淨係執到張郵票
張咭比人偷左

無呀
果時岩岩比人搶左兩次野驚魂未定，又炒完車條頸好痛，就飛左去哥倫比亞啲島仔休養

我都認同呀！翻工睇真係有動力想搵多啲錢，遲啲都咁樣去玩一年

咁搞笑 有返張郵票留念都幾好

多謝關心，竟然有人記得我 
好撚唔掂，大半年無去旅行，WFH都堅忙，想寫多一兩篇中南美國家，或者東歐遊記都懶
原本今年再去東歐，計劃左放假就支那病毒，好彩未真係請假同買機票

樓主，兩年前我好似你咁裸辭又去左歐洲中南美(當然冇你去既國家咁多)
我想講你曾經試過咁做真係返唔到轉頭
個陣諗住玩完返香港從此安安穩穩努力工作
但個心真係好癢
唔係疫情既話我已經度緊第二度裸辭去旅行

[智利-Puerto Natales]

Patagonia，除左係運動牌子名之外，仲係智利同阿根廷之間一個自然風光同trekking都享負盛名既地區，同尼泊爾並列係遊人心中既健行聖地。Patagonia橫跨兩個國家，面積好廣，我地打算去智利國境內既百內國家公園(Parque Nacional Torres del Paine)，就要去鄰近既Puerto Natales落腳啦。

智利同阿根廷既國土都係直畢甩長條形，由最南面既城市一路坐巴士向北移動都幾攞命，閒閒地都坐十零廿個鐘巴士，最長果次我地試過坐左26個鐘......到埗既時候真係感動到想親吻土地

今次就未使坐咁耐住，由Ushuaia去Patagonia，首先要坐12個鐘巴士去Punta Arena

開左3個鐘車之後就要落一落車，過關入智利

拜拜阿根廷，我地過幾日再返黎

上網睇啲人話智利關口對入境既行李查得好嚴，植物之類係一定唔比入境，所以我地都好擔心會因為啲胡椒粉呀煮餸香料比人遣返，好彩最後平安入境。
之後要上船過河，巴士同人分開上


去到Punta Arena已經好晏

我地係度短短留左一晚，呢度既炆鱔好出名，晚飯嗌左碟黎試下

味道都唔錯，但無乜特別好似普通魚咁，唔講都唔知係鱔黎，鱔都係豉汁蒸好啲

第二朝我地就再搭3個鐘巴士黎到Puerto Natales。可能因為Patagonia太出名了，呢度既住宿比其他地方貴好多，我地都開始住返dorm，每個床位都要成HKD230一晚。
呢間hostel既設計好特別，房入面有條旋轉樓梯可以上樓上

樓上係沖涼房同locker

Hostel老細以前係個工程師，而家由朝到晚都係花園度揼緊一隻船，佢話呢隻叫做love boat，當船起好佢就會同心愛既女人坐住呢隻親手造既船去旅行。呢個世界真係好多瘋狂又浪漫既人，望著佢充滿希望既眼神，我地都覺得被佢既幸福感動到了。

今日心血來潮再search已經再搵唔到呢間hostel，可能佢隻船已經起航左啦

我諗起當時出發前都係好沈迷追另一個巴打同女朋友去流浪一年個post
希望你到時都會有個平安愉快既旅程呀巴打，到時再返黎同我地分享趣事丫

I know that feel bro
無時間限制既旅行真係最可怕既毒品

btw 巴打第二次裸辭既話想去邊

想去加勒比海小國s
古巴／波多黎各／哥斯達黎加／巴拿馬
同埋想去多次阿根廷
好鍾意好鍾意BA

我都裸辭 南美 歐洲浪遊過
不過幾個月就駛左十幾萬
可能北歐消費太貴
去過烏斯懷亞 但最後無上到南極船

BTW 搵到個一齊去既伴侶 好難得 好幸運

好多人黎Patagonia都會去百內國家公園行5~8日既trekking tour，根據路線既形狀分為W線同O線。我知道男朋友其實想行呢啲幾天團，但佢覺得我太潺弱，唔想我強迫自己做唔擅長既事，話就算參加一日團，風景都係一樣咁靚架姐

所以係度既第一日，我地就join左個廢老daytour去百內國家公園。
Hostel提供既早餐唔錯，麵包係佢地每朝新鮮焗既


國家公園既入場卷唔平，旺季每人要32USD，安慰既係入場卷既有效期係三日，第二日自己再搭巴士黎玩都仲得



呢個真係名符其實既老人團，小巴會運送你去到不同既checkpoint，活動量好似低過頭 遠處果三座山係百內最出名既地標，導遊話山既結構通常係一層一層既，但呢三舊就係拔地而起既大石，每座山都係一片完整既大石頭，係好罕見既景象黎

即係呢三舊

呢度既湖水好靚，有深深淺淺不同既顏色




行到咁上下去到一個佈滿石春既石灘

係呢度有南極漂過黎既浮冰，細細粒，好靚既冰藍色

呢種一日團難免有啲走馬看花，我地都覺得唔多夠喉，打算聽日再自己搭巴士黎慢慢行。

同團有兩個亞洲面孔，聽到我同男朋友講廣東話上黎同我地搭嗲，原來係兩個分別黎自香港同海南既師奶，我地旅行到而家都係第一次遇到香港人。師奶們好慷慨，請左兩隻柑比我地食，仲約我地係下一個城市食飯添。


返到黎，去買餸煮飯食


係hostel我地仲遇到另一個香港女仔，呢度果然係旅遊熱點，一日內就遇到兩次香港人。 呢個女仔同我地差唔多大，唔知係咪呢度絲打黎呢，好耐無同過 (除左男朋友之外) 年紀相約又同聲同氣既人傾計，真係好開心，我完全難掩心中既興奮，一輪嘴同佢講左好多野

香港女仔係黎南美獨遊既，已經旅行左三個月喇，岩岩係百內行完五日山返黎。同佢傾落計，唔知點解佢好似對咩都唔提唔起勁咁，對世間萬物都唔太感興趣，就算行山睇完咁靚既風景都無乜感動，只會話”都係果啲啦” “咪又係咁樣”之類，lunch同夜晚都係白烚生菜同廚師腸就一餐，我地話煮埋佢飯佢都會婉拒。男朋友話可能係我熱情得滯嚇親人

佢最開心既話題就係點樣可以盡快由南美轉機返香港，或者去長途旅行有時真係會令人好攰，我都好慶幸一直有男朋友係我身邊，有咩開心唔開心都可以一齊分擔

北歐真係好貴
係芬蘭留左幾日已經心裡淌血，要即刻逃脫落去三小國

呢個post見到好多裸辭旅行同路人，好開心

開始去挪威 唔係好捨得食野
買支水都廿幾三十蚊
普通一餐都過百
後尾睇化左 唔係長住

一個人去 有時真係會去到畫啞左
或者審美疲勞
試過成兩個星期無撞到香港人
連講野 諗野 都變左用英文先

BTW 百內我都有行W TREK
響EL CHALTEN 撞到對 香港老年夫婦
行得仲快過我

好好睇啊
千祈唔好爛尾
支持你啊 入到黎分享到你嘅幸福

真係好好睇 終於追到live
睇到你去過咁多地方真係覺得你好勁

繼續留名支持
我個時行W circuit ，人生第一次一個人露營，呢幾日都係鳩下鳩下頂硬上，但風景一流 
下一站去邊？阿根廷El Chalten 定係坐飛機去 Santiago？聽聞甚至可以由Punta Arenas 坐3日船去Puerto Montt

呢兩日做姊妹好攰
休息下先，星期一繼續

個人獨遊太耐又冇人陪/分享，應該都幾累

巴打請教之前墨西哥做義工放生海龜


日常工作有冇邊d有難度
要唔要洗廁所，打掃咁

留名支持 南極個part 好正