[重開][多圖][一年長途遊記] 中南美到南極-西伯利亞至東歐

樓主手 成個出奇蛋果個係咩黎？

隔離間café真係好好味，第二朝我地又返兜

食食下有個好靚既俄妹坐左埋黎，問我地係咪遊客，話想介紹俄國比我地認識。佢寫左好多推薦既餐廳同埋景點比我地，由莫斯科寫到黎緊我地會去既聖彼德堡

佢話佢都好鐘意去旅行，自己係外地有時都會覺得無助，所以想比啲指引我地。我問佢最鍾意國家係邊個? 佢既答案係”格魯吉亞” ，一個我地之前無諗過會去既地方，亦估唔到我地最後真係會聽佢講，去左格魯吉亞，呢個我地今次旅程既最後一個國家。

莫斯科呢個地方推翻左我對俄羅斯人 以至作為一個首都既印象。可能之前係南美留太耐，覺得首都係充滿罪惡氣息，又亂又危險，但其實呢度條街好光潔明亮，周圍都係好夢幻既洋蔥頭，暫時黎講都無咩危險事發生，睇黎我地應該放低返少少戒心，唔好太精神繃緊，tune返個旅行心態先得。俄羅斯人雖然睇落好cool，但我地接觸過既都好熱情，就算英文唔太好都好努力同你溝通，戰鬥民族同想像中既完全唔一樣呀。

之前係Irkutsk睇過local版馬戲團，黎到首都莫斯科我地打算睇個豪華既。莫斯科有兩個馬戲團都好出名，一個係俄羅斯國家大馬戲團 Bolshoi Circus，另一個係尼庫林馬戲團Nikulin Circus，後者位置交通方便啲，所以我地揀左佢黎睇。我地早幾日上網買定左飛，每人1000盧布(~120hkd)，坐山頂位

搭地鐵出去

俄羅斯地鐵站出名深，據講係因為起既時候考慮到軍事防禦用途，所以起既時候掘深啲。入左閘之後條電梯搭極都未搭完，月台深入地核

除此之外佢地既地鐵站都出名華麗，牆身雕龍雕鳳華麗非常




黎到尼庫林馬戲劇場既門口喇，已經有好多人排緊隊準備入場

尼庫林馬戲團係蘇聯時期第一個國家馬戲團，由小丑尼庫林創辦，係俄羅斯最歷史悠久既馬戲團之一，因此名氣好大。佢就係小丑尼庫林喇，詭異既笑容加上天陰陰，有啲恐怖

入場既掛褸區

門口有小丑扭波波，睇啲細路high到爆

我地都趁下熱鬧，買桶爆谷食

大型既馬戲團真係唔同啲，個場好大，有時天花板仲會跌啲大波波落黎比你班人玩下


只不過規矩都多啲，開場之後就唔比影相，所以無相比大家睇了。文字描述一下，佢既舞台效果非常華麗，節目都好豐富，不過可能因為今次坐山頂位，無咁投入，我都係鍾意之前Irkutsk睇既小型馬戲多啲。

散場之後係旅行中不曾出現過既購買護膚品環節，一路旅行以黎我都係用清水洗面，聽聞俄羅斯既護膚品有平民戰鬥機之稱，又平又天然又好用，搞到我心郁郁想試下，就去最出名開到成行成市既natura siberica買左啲磨砂同補水mask，每樣都係幾十蚊港紙咋

真係好好用，之後返香港都見過有得買，但價錢係俄羅斯既兩倍，真係好謀取暴利，可恥

然後我地係附近搵左間俄妹推介既餐廳食晚飯，打算今餐大杯酒大串肉咁食俄式燒肉串Shashlik，幻想住自己一手揸一串肉啃既時候

估唔到呢度既肉串係拆件上既 不過味道真係好好，香口多汁，第日有機會真係好想試豪邁版既真烤肉串呀。

食飽我地就慢慢散步返住宿喇


旅行下半部都開始左一段時間，歐亞地區同之前既中南美好唔同，文化衝擊無咁大，少左份冒險既刺激感，相對黎講旅行得都比較舒適安穩。雖然話同所愛既人一齊，去邊度都咁開心，但出得黎行，我地都唔滿足於呢份安定感，想要多啲衝擊。我地開始諗下之後既路線想點行，穿過東歐之後不如經中東落非洲? 我一直都好想去中亞，或者落到東歐之後，可以經土耳其伊朗入中亞?

但諗諗下，又覺得長途旅行有好多變數，你打算去東面咩，可能聽日就發現西面有個更吸引既城市。率性而行先係呢次旅行最有趣既地方，所以，都係唔諗住咁長遠住喇，睇下聽晚住邊仲好啦

[下一站: 俄羅斯-Saint Petersburg]

多謝你，你地鍾意睇我都好開心呀。諗起我既文字同經歷可以為你地帶黎樂趣，對我黎講都係鼓勵黎

希望武肺快啲完，大家身體健康，生生猛猛咁去返旅行啦

係 我不斷係度諗點解俄羅斯人個樣咁冷酷，但整出黎啲野咁好笑

諗左陣先知你講邊舊
餐包黎

其實睇得出樓主應該幾省鏡，仲要係空姐

俄羅斯性價比真係好高

but俄妹圖呢

慢慢追左一兩星期終於 Live 了
樓主寫得好有生活感
櫻主男朋友Ｄ相又好靚
加油

好羨慕唔洗長輩同行就可以出遠門
唯有睇咗當去咗

不過補充番俄羅斯空郵係比亞洲其他地方貴的
差唔多重嘅鑰匙扣, 用00信封size (225 x 125mm) 寄去俄羅斯 (HKD$28.6)
貴過一樣信封size寄去新加坡 (~HKD$15)
所以價錢果兩倍應該有唔少去咗運費到

拎左佢ig同fb收埋自私睇

多謝你

同長輩去旅行都係樂趣呀～ 大個左之後帶呀爸呀媽去旅行，見到佢地好似小朋友咁好安心跟我去玩真係好開心 我好後悔以前無帶婆婆去多啲旅行，我記得佢講過最鍾意睇雪，成日諗著遲啲放假再帶佢去睇，點知下年又下年，而家佢已經要坐輪椅唔願出遠門了 佢地老得比我地想像中快，所以要好好珍惜同長輩遊歷既時光呀。

原來係咁 俄羅斯既郵費貴咁多架，又學到野了

聽日更新

Mon Hunt 玩成點

喂喂? 999? 我要報案，樓主唔見左~

樓主嘅一日係98個小時

[俄羅斯-Saint Petersburg]

莫斯科之後就係離佢個半鐘機程既聖彼得堡喇，我地會係度留四日。係度住既apartment位於一個好新淨既屋苑入面，周圍都係推住BB車既年輕夫婦，睇黎應該係上車盤黎

每晚300hkd既價錢，好舒服，有衣帽間、大廚房、露台仔


但佢得兩張梳化床，無一張真既床，有啲奇怪。呢度既浴室用浴缸，仲有好香既浴鹽可以浸浴添


有咁設備齊全既廚房，朝早煮返個豐盛早餐先


滴血救世主教堂係聖彼得堡其中一個最出名既地標，呢個血腥既名字係為左紀念當年阿歷山大二世經過呢度既時候被手榴彈炸死。我地沿著運河一直行，行到盡頭就見到呢個洋蔥頭喇

咁岩佢裝修緊，係出面睇唔係太靚，我地就每人比左35hkd入去參觀。呢度既壁畫好特別，係用瓦仔砌成既，我都係第一次見，真係大開眼界



教堂入面唔大，好快就參觀完喇。參觀完又到左午飯時段，運河兩邊除左手信舖之外，仲有好多遊客食肆，都係this this this咁嗌餸食。以為味道唔慌好，點知都幾好味


之後我地沿住河邊行，行到黎另一間喀山主教座堂

呢度入面唔影得相，比較多真信徒係度點蠟燭拜神，似返一間真正既教堂。全日同咁多遊客一齊迫景點真係好心力交瘁，行到黎呢度我地已經好攰，無乜心情睇，行左去附近一個公園遊盪




自己炮製大餐既日子又返黎喇

隨著旅行既日子愈黎愈長，肥仔都唔再淨係識等食，變得愈黎愈識照顧人喇。呢日佢叫我訓晏啲，佢煮早餐比我食，真係陪感安慰



冬宮都係呢度出名既景點之一，琴日行到腳都跛，今日我地醒水喇，搭巴士出去

呢度既巴士唔係上車入銀仔，搵位坐定之後會有個著熒光背心既婆婆行埋黎負責收錢，收完比張飛仔你，好得意。

冬宮係一座薄荷綠色既建築物，就咁望已經好靚。黎到既時候唔知係咪有啲咩採排，見到好多士兵同樂手一齊步操



睇落好雄糾糾，其實佢地奏既音樂叮叮咚咚咁好魔法少女feel，係俄羅斯一排硬係覺得呢度啲人同文化有著莫名奇妙既違和感，啲床又軟綿綿，建築又夢幻，連士兵都係奏魔法少女系音樂，到底世人係咪誤解左俄羅斯人呢

講返冬客，無做皇宮之後而家佢係一間博物館，而且係全球四大美術館之一。呢度既展品由石器到近代都有，名畫、雕塑、木乃伊，仲有好多睇落好厲害既藝術品





不過我地無乜修養，展品又欠缺英文解釋，入面佔地極大九曲十三彎好似迷宮咁，睇得有啲辛苦，睇左兩個零鐘就要出去花園抖氣喇

冬宮既貓咪眼睛都同冬宮一樣色

我地發現睇教堂呀皇宮都係唔係太適合我地，呢啲建築對我地呢啲粗人黎講好似棟棟都差唔多咁，都係通山跑開心啲，或者之後都要搵返多啲親親大自然活動。

夕陽下係河邊漫步返屋企，我記得以前未一齊既時候佢話過，旅行最易令人既壞性格表露無違，好多好朋友都係去完旅行反面，所以如果有女朋友，即使唔能夠同居，都一定要同佢去個長旅行，睇清楚對方既真實性格。隨著旅行既日子愈黎愈長，我覺得呢個男人既肩膀愈黎愈可靠，真係好想以後一直都依偎住佢

唔知係佢心入面，我又有無啲咩唔同左呢? 呢排情緒都好低落，覺得自己好無用，好迷失，個人好似愈黎愈退步，咩都做得唔好咁，但佢依然好溫柔咁係身邊陪伴支持我，想我打返起精神。去旅行既時候佢成日話，盪失路又有咩所謂，行唔一樣既路先可以發掘到有趣事架嘛。我諗，人生既高高低低就好似一場旅程咁，中途可能會盪失路，但即使係迷路，我地都可以從途中欣賞到獨特既風光。同男朋友一齊總係能夠令我領悟到好多，可以有一個共同成長既伴侶，上天對我真係太好喇。

[下一站: 芬蘭-Helsinki]

lm

個早餐咁大條腸

個雕像有遮住無ban圖

輕輕一推