[重開][多圖][一年長途遊記] 中南美到南極-西伯利亞至東歐

劉明

留名

[危地馬拉-Antigua]

Antigua Guatemala西文意思係古老的危地馬拉，佢曾經係危地馬拉既首都，但因為呢度地震同埋火山活動發生得太頻繁，所以係17世紀一次災難性地震之後就將首都遷都至危地馬拉城。
由Panajachel出發，搭3個鐘colective就黎到，價錢每人Q36。

呢度既街道井然有序，馬路都係舖滿石仔既路，建築有濃厚既殖民地色彩，矮矮既平房顏色繽紛之餘又有一種破爛感，係一個好優美既城市。今次我地住間好少少既apartment，係homestay既天台屋，有個露台仔同獨立廁所，每晚都係百零Q


露台可以望到水火山Volcán de Agua

仲有一隻成日都係隔壁屋頂跳過黎玩既貓我地幫佢改左個名叫間條仔

原本我地只係打算黎呢度行火山，黎到之後發現幾鍾意呢個地方，而且都有幾多野玩，所以最後係度住左8日。
放低野之後去附近間coffee shop plan下過幾日既行程

係市內周圍行下，有唔少好似大三巴咁冧剩前面幅牆既建築物
好似女人街既市集



唔知係咪因為溫差既關係，水火山既山腰成日都有層雲遮住，睇唔清佢既全貌

因為住果度個廚房唔開放俾住客用，所以係Antigua我地餐餐都要出街食。不過呢度既餐廳種類好豐富，當地菜意大利菜日本菜......連台灣菜都有，而且都係真野黎，唔係外國啲呃遊客既偽亞洲菜。
呢一晚我地去左飲當地湯水

推 好正
希望快D出！

係咪寫得太悶
連埋爛尾個post都寫左全程既四分一架喇～

呢一日我地6點鐘起身， 7點鐘就係行山舖頭集合同拎物資。
聽日再見啦間條仔

出去既時間見到馬路同埋教堂門口砌滿哂花瓣，應該係承接上一晚既迷之慶典喇

去到舖頭我地將啲營呀、地蓆、野食同水塞哂入背囊，再食少少野就出發。執好野之後我地搭大約一個鐘車去山腳出發。呢個就係Volcan Acatenango，當時覺得睇落都唔係好高姐

Antigua位於海拔2000米，而起點呢度就大約2500米高，今日去既終點係3700米既營地，大約行6個鐘。
初時會經過一啲栗米田


行左大約2個鐘先至黎到呢條trail入場既地方

個售票處無人既，自己係櫃枱拎張紙填啲簡單既個人資料再扔返係度

廁所竟然有馬桶，太豪華了吧


我地既行裝都唔輕，每人十幾kg。其實覺得自己都幾叻架，因為沿途見到既其他人全部都唔會自己揹埋gear，佢地一係就請挑夫，一係就上到營地先用長期放係上面既營，得我地3條友係揹哂啲野苦行咁行上去。
由呢度開始風景都愈黎愈靚，穿過充滿雲霧既樹林，好似置身晌仙境咁。山上面既雲飄得好快，雲霧快速經過身體既感覺真係好奇妙，有好幾次我都睇到出左神唔記得左對腳要行


出發前其實都有啲擔心，因為我身體好潺弱，而男朋友就好鍾意做運動跑開全馬。去過高原既都知道假如你係平地愈廢，去到高地反而持久力會愈強，反之亦言，所以我擔心既唔係自己，而係我男朋友 果然過左入場處無耐佢就開始扯蝦了，去到後期面青青每5分鐘要抖一抖，一個運動健將要一條廢柴成日停低等佢既滋味一定好難受喇。

愈向上行就愈凍，無幾耐就著哂啲heatech同羽絨上身。呢6個鐘真係過得好漫長，扯蝦扯到氣若游絲之際終於黎到3700米既營地

營地位於Volcan Acatenango差不多最高既地方，剛剛好係雲層之上，被好多黃色野花包圍住，個頭唔痛既話呢度真係一個令人好心懭神怡既地方。呢度好似梯田咁有四五層，每間tour agency佔一層，而今日除左我地三條友之外，就只有另外一對瑞典情侶同佢地個guide係度過夜。搭好個營加返件厚衫之後我地就去左佢地果層一齊圍爐取暖


導遊Gareth係一個好厲害既威爾斯人，佢當過十年兵，無當兵之後因為好鍾意行山而去唔同既國家做tour guide，知識非常之淵博但係個人好低調，而且好照顧我地，我地覺得好敬佩佢呀。係呢個乜都無既環境之下，佢竟然拎左包綿花糖出黎比大家一齊燒黎食，話去camp一定要有燒綿花糖咁話

對瑞典情侶癲癲喪喪，成日講埋啲好好笑既野，我地傾到係咁喪笑，但係咁高海拔連大笑都好奢侈，一路笑一路扯蝦一路頭痛 又開心又難受 覺得自己就快精神分裂 同埋佢地唔知報埋d咩平價團，晚飯竟然得白烚意粉，佢地個guide仲問佢地加唔加聽日早餐既士多啤梨醬食，真係好靠唔住 笑左佢地一輪我地就將我地啲肉醬分左比佢地一齊食。
有暖笠笠既野食落肚好舒服，休息左一陣我地都精神返唔少

天寒地凍，食完即刻捐返入營攤抖。

唔係，幾好睇，但追post難追，可能有人 想睇某d國家 好難簡黎睇，連登post好多人會參考行程
你分開1-2國家/區 開post會吸引d

多謝支持呀

謝謝巴打意見呀
不過對我黎講呢個係一個旅行黎，唔想將佢斬開呢，有緣既人自然就會睇到喇

巴打我記得你日內瓦個post!!!
好多謝你做既野，請受我一拜

兄弟爬山姐

之前提過呢度旁邊係非常之活躍既Volcán de Fuego火火山，所以全晚都聽到佢發出窿窿聲，好似行雷聲咁，但聲音就延綿同厚實好多。而營入面其實都唔係暖出面好多，著哂所有衫笠住被袋都係寒到骨痺，加上有啲高原反應個頭好痛，全晚都訓得唔係太好，訓下醒下又探下男朋友個鼻睇下佢仲有無氣息在唔在生。

第二朝凌晨3:30我地就起左身，原本諗住行上3900米既頂峰睇日出，不過呢日太大霧，Gareth話就算上到去都係乜都睇唔到，所以就決定唔去了。無得行上山頂，我地都有少少失望，橫掂都起左身，就搭火堆煲咖啡食早餐啦。望住個火堆發吽哣之際，突然間傳黎全晚都無聽過、好巨大既爆炸聲，大家即刻望向隔離座火火山

呢次係我第一次見到火山爆發，而且只係相隔2公里咁近，真係好壯觀。原來火山爆發係好似一個紅色噴水池咁，岩漿不斷係火山口噴出黎，流落山，愈流愈慢然後停係山腰，伴隨著爆發亦都有好多碎石碌落山。可惜影既相唔足以表達當刻既震撼，但我相信最好既鏡頭就係我地既眼睛，好好將風景印係腦海之中就係最美麗既照片。

過左無耐就開始天光啦

雲散開之可以望到好遠，前幾日身處既Lago de Atitlan睇落好近，連遠處既太平洋都可以見得到。旁邊呢個山頭就係岩岩爆完既火火山

Gareth話三個月前呢座火火山有一次大規模爆發，埋左山腳既一條村。當時其實都有預警叫村民去避難，但果度既居民好多都係老人家，成世人都係同呢個火山共存，覺得唔會有咩大問題，而且走又可以走去邊呢，結果呢場火山爆發既傷亡非常慘重，至少死左三千幾人，而好多人仲未搵得返，應該已長埋泥土之下了。
而果次之後就無人再清晰咁見過呢座火山爆發，一係就天氣唔好太多雲遮住，一係就淨係見到噴灰色煙，估唔到無得行上山頂反而令我地可以目睹咁難得既一幕呢。

收拾好之後我地就落山喇，之前諗極明點解上黎既時間要6個鐘，落山只係雖要2個鐘，但原來真係得架。因為山路好斜，落山幾乎係跑落去，而且無哂高原反應，個人愈行愈精神，好快就行完lu。雖然好攰，但可以同心愛既人一齊睇到咁特別既風景，真係太好喇。

早兩日高原行山元氣大傷，我地要做返幾日廢青黎回復HP先得。
起身先來撚一個貓

撚完間條仔再撚隔離cafe果隻


餓餓地出街睇下有咩好野食先，呢間睇落好正，就決定是你了


我地食pollo a la leña (晌柴火上面既雞=烤雞)，Q32送野飲，可能呢度遊客多所以野食都比較貴

好正呀，雞juicy薯仔香，配埋左邊塊布冚住既tortilla食。中美既野食通通都係配粟米餅tortilla，無論你係食炸雞、飲湯定係炒飯，旁邊總有一大疊tortilla。呢間餐廳好有誠意，啲餅係嬸嬸係門口新鮮整既

個人覺得危地馬拉tortilla比起墨西哥既厚好多，陣粟米雀粟味都重好多，依然係咁食唔慣。

話說呢一日係中秋節，今日咁得閒就整個燈籠應節啦。
我地晌湖邊行山既時候特登執左啲樹枝，摷返行山洞既白蠟燭出黎，係文具舖買左張紙，再加埋之前儲落搭巴士行李tag既綿繩，應該可以紮到一個燈籠出黎既

運用小學美勞堂學既紮燈籠枝巧，成功紮出骨架來

唔…個火好似燒得猛得滯

剪啲通花上去裝飾，換過支弱啲既蠟燭，都唔錯丫可

係露台賞賞月，食生果，玩燈籠，靜靜渡過呢個小團圓

Tui

太正啦！！！！

你最鐘意最難忘係邊到呀

新毒者留名

留名
之後再睇

絲打條問題好難答

要揀一個最鐘意既國家會係哥斯達黎加，因為果度既大自然係完全融入生活，野生動物例如樹懶果啲都好常見，而除左首都之外我地遇到既人都係好純良，作為一個遊客你會感到完全安心，呢份安全感係長途旅行之中係好令人放鬆既。

難忘既地方係晌墨西哥做義工既沙灘，除左識左一大班朋友之外，仲有好靚既天然環境。我永遠唔會忘記坐住越野車係見唔到盡頭既沙灘奔馳，望住月光灑落海面，點點螢火蟲圍繞住我地發光，感覺有啲輕狂自由又有啲浪漫既晚上。

如是者我地係Antigua留多左幾日，同時搵一啲比較舒服既復康活動黎玩。
因為土壤、海拔同地形關係，危地馬拉出產既咖啡好出名，所以有一日我地去左參觀山腳一個包涵博物館既咖啡園Centro Cultural La Azotea。
搭tuktuk過去半個鐘就到

入場費Q50，原來仲包一個導賞員做講解，咁又幾好喎。一入去首先係一個小小既咖啡博物館，係度會講下咖啡既採集同製作過程，種植咖啡點樣改善當地人既生活，呢度出產既咖啡種類等等

唔同烘焙程度既豆

然後經過咖啡園，有啲熟左既咖啡果可以摘黎試下，層果肉甜甜地幾好味

跟住去睇下佢地炮製咖啡豆既工場，不過而家唔岩季節所以無開機，如果係採收季節既話會成地舖滿咖啡豆



啲果肉同果皮佢地都唔會浪費，會拎去堆肥

最後就可以試下佢地既咖啡喇，我唔飲咖啡既所以比較唔到有咩特別，淨係覺得飲落喉嚨好舒服咁

參觀完咖啡部分導賞員收工架喇，隔離仲有一個瑪雅文化館可以自己去睇。呢個文化館意外地做得幾好，會介紹一啲傳統村落既日常生活、節慶之類，最後仲有一段影片比你睇，做得好有心。

係啲公仔有啲恐怖….

另一日我地又屎忽痕搵左另一個火山黎行，今次呢個叫做Volcan de Pacaya，都係一座活火山黎既。而呢個火山tour既賣點就係可以用溶岩燒綿花糖食完全諗唔明係一個點樣既操作，所以好想去睇下到底係咩一回事。

我地係hostel報團，每人只係Q70，抵到爛，不過入場費Q50就要自己比。呢度只有2500米高，係一個好容易行既火山，只需要兩三個鐘就可以行完喇，所以好多人去，睇下我地呢團幾多人

一開頭都係四周都係樹既山路，入到去雲層之後突然變成一個好似月球表面既地方


個牌大概係話你要係度行就後果自負，國家公園唔會對你既安全負責

係度枕住都見到山上面有噴住煙既溶岩陰啲陰啲流落黎

再行上少少就連我地腳踏住既岩石都係暖粒粒，原來我地腳下既土地都係幾個星期前先形成，有啲新鮮啲既岩石仲特別熱，呢個時候導遊就拎左包綿花糖出黎話可以燒啦

原來溶岩燒綿花糖就係用岩石既餘溫將綿花糖整熱既意思，好似好無聊但又幾盞鬼喎，呢度既人對於行山要燒綿花糖食既執念到底有幾重個地下其實都幾熱，啲綿花糖一隊落去就食得

落山果時導遊嬸嬸執左條肥美protein比我玩，肥嘟嘟好可愛

呢個Volcan de Pacaya團都幾唔錯，容易行又唔貴又可以用個特別既方式去體驗火山，如果只係晌Antigua短短逗留幾日既話係一個好好既活動呢。

返到黎又周圍行下，食個飯

夜晚既Antigua都好迷人



下一站: 哥斯達黎加