[重開][多圖][一年長途遊記] 中南美到南極-西伯利亞至東歐

循例多圖左先
危地馬拉


哥斯達黎加


阿根廷


南極

智利

玻利維亞

秘魯

哥倫比亞

蒙古

愛沙尼亞

立陶苑

拉脫維亞

波蘭


匈牙利

故事係咁既，事源我同男朋友27歲既時候決定裸辭，想係組織小家庭之前任性一次，揹起背囊去一場自由自在既旅行，一齊好好感受呢個世界。時間上當初定左係去一至兩年，最後係上年6月因為放唔低香港既事就提早腰斬左個行程返左黎，但我地從來無後悔呢個決定，因為就算外面既世界再美好，都唔係我既家。

世界好大，有好多未知既事、唔同既文化、美麗而善良既人民，我地認識到好多朋友，亦遇上過車禍同搶劫，所有好既壞既都係一個美好既經歷。好感激我地曾經有一個咁美好既旅程，希望有朝一日可以將未行完既旅程繼續啦。

最後整個旅程去左一年，因為我地都比較鍾意隨心而行，所以全程都無訂一個行程表，只有由北至南，東至西既一個大約概念，沿途再邊走邊問人會唔會有咩當地人先知道既有趣地方咁。而中途發生左啲意外所以返左一返香港，最後整體既路線如下:

美國>墨西哥>伯利茲>[危地馬拉]>哥斯達黎加>巴拿馬>阿根廷>南極>阿根廷>智利>玻利維亞>秘魯>哥倫比亞>西班牙>德國>法國>意大利>馬爾他>香港>北京>蒙古>俄羅斯>芬蘭>愛沙尼亞>拉脫維亞>立陶宛>波蘭>匈牙利>塞浦路斯>格魯吉亞>香港

睇到呢度你可能會認得我? 我就係之前寫遊記爛左尾果件蛋散喇!!
[多圖][長途遊記] 八個月中南美
https://lihkg.com/thread/972871/page/1
真係唔好意思個post荒廢左成年，上年返黎香港之後因為社會發生既事一直都無心情繼續寫遊記。
適逢呢排失業無工開，大家唔介意既話我繼續係度寫埋落去丫。俾我重拾返流浪果種輕狂既感覺，提醒自己縱使生活不如人意，都唔好忘記要對世界充滿好奇。

歡迎去上個POST睇返海龜義工、墨西哥同伯利茲篇。
今次，我地由危地馬拉開始。

留名

可以同鍾意既人一齊經歷上山下海真係唔易
相信呢一年會成為你倆人生中重要既共同回憶

想知義工團係邊到報抵d,唔跟voltxx 既話

[危地馬拉-Flores]
上次講到我地打算唔整VISA闖入危地馬拉既計劃失敗，唯有死死地氣返去伯利茲個邊境小鎮San Ignacio 搵間住宿過一晚。關口個呀叔教我地附近條Benque村有間危地馬拉大使館，我地可以係度整返個簽証。訓左一晚之後我地又搭巴士出發啦。

車上面比想像中新淨

行去大使館既路上，前面個摩天輪好正，好想玩

我地搵左間網吧印左入息證明之類既文件就黎到大使館，話就話係大使館，其實只係一間裝修得靚啲既鐵皮寮屋

個職員問左一啲關於我地職業既野，確定我地係正常人就叫我地磅水喇。簽証每人25USD，但要比齊頭數，話唔駛找都唔得。我地身上只得幾張100USD，唯有係村入面睇下唱唔唱到錢，唯一一間銀行話佢地唔提供唱錢報務，之後我地行左十幾間士多，全部都無美金可以唱到。不過伯利茲人好好，每一個人都想盡辦法幫我地，有個姨姨直頭打電話比幾個朋友問佢地有無美金，然後話車我地去附近油站問下，不過我地怕麻煩到佢婉拒左。身水身汗之際我地搵到間華人餐館，老細好爽快就唱左錢比我地，仲幫我地唱到好散等我地以後好用啲添。雖然有啲阻滯，但每一段呢啲小插曲都係好有趣既經歷。

終於我地入境到危地馬拉啦!

危地馬拉位於伯利茲既西邊，我地係度由北至南總共去左4個地方:
Flores>Semuc Champay>Lake Atitlan>Antigua
由陸路搭小巴入境，通常都會先去到湖中島Flores落腳，呢度亦係去Guatemala一個最重要瑪雅遺跡Tikal既駁腳點。

由邊境去Flores，係要搭車又搭船既。當我地過左境之後一片迷茫搵緊小巴站之際，有個大約7、8歲既弟弟問我地去邊，我地講左比佢知之後佢就叫我地跟住佢行。唔知係咪一路上遇到既人都好好，去到呢個時候我地已經對陌生人無乜介心，亦好好彩地跟住佢行左陣就到了。開車既時候弟弟仲同我地講拜拜，真係好可愛！

果邊既小巴一貫統稱colectivo，呢部就係去Flores既colectivo喇，好新淨！

小巴入面人貼人比較迫，旁邊個BB一路眼金金望住我地

大家既行李放都係車頂，途中落大雨仲驚個背囊會濕哂，好彩司機半路既時候已經好細心咁幫我地塞返兩個背囊入車尾了。
搭左個零鐘車就去到個叫Santa Elena既地方，係果度要轉一程tuktuk

再轉一程船

黎到Flores了，我地住間平價野所以要去對面岸

間住宿照舊都係無冷氣同熱水沖涼既，不過唔係問題，因為對住個湖好舒服

夜晚摸左去附近間餐廳食，餓左一日終於有飯食了
聽聞呢度既湖魚好好食，我地都想試下，佢地在生時係咁樣既，唔識得係咩魚黎

廚房呀姐話呢個煮法叫馬雅式煮魚，好好味架，用啲蕃茄錫紙洋蔥包住黎煮，都係配tortilla食，好味到連舊魚雲都吮埋！


因為前一日太頻撲，第二日我地決定抖下，漫無目的周圍散下步



抖足精神，聽日倒塔咁早就要起身喇
下一站: 叢林中既瑪雅遺跡 Tikal

另外樓豬英文好流利？
西文同葡文呢

真係架
曾經一齊渡過咁難忘既時光真係一件好幸福既事

可以試下直接同當地既組織聯絡呀，好似我之前墨西哥果個咁佢地可以直接聯絡唔使經agent架

英文正正常常啦，西文既話我地出發前係零架，邊去邊揸住lonely planet 本phasebook學架咋。係墨西哥識既朋友會教下我地，然後好多國家既人根本完全唔講英文既，唔怕錯不斷講當地人都會好樂意教你，日日講日日聽之下突然之間就會同人溝通到架啦。
葡文我都唔識架，不過當一路上見到好多日本人淨係講日文都生存到，你就會覺得其實語言真係唔係一個問題黎架

有冇推介，我都上年睇左，本身想今年去

好靚啲相
好葡萄 希望我都可以有咁既一日

樓主影得好靚

波蘭第一張點影

lm,不過根據經驗 爛左第一次尾 就會爛落去

咪再爛尾

[危地馬拉-Tikal]

Tikal係瑪雅時期係其中一個最興盛帝國既首都，由公元前700年開始有人居住，公元後200年左右最興旺，900年既時候同其他瑪雅文明一樣突然末落，全盛時期有十幾萬人係度住。佢佔地甚廣，相信有90% 遺跡都未被開發，只有一成係清理好可以開放比遊客參觀。呢度特別之處係因為位於叢林之中，係睇遺跡既同時仲可以見到好多野生動物，呢個地理環境亦都為佢帶黎濃濃既蒼涼感。

大家去Tikal都鍾意去睇日出，係迷霧中睇住太陽係瑪雅遺跡之中升起，幾咁有feel呢。所以我地凌晨3點幾就爬起身，4點半就上車出發，點知開車無耐已經天光

最後差不多6點去到門口，個天已經光哂了，如果大家想去睇日出記得搭3點半班車喇

清晨同黃昏都係動物最活躍既時候，我地黎到既時候濃霧仲未完全散哂，周圍都圍繞住馬騮同雀仔既叫聲，感覺好夢幻，不過回過神來既時候已經好猛太陽




沿路既路牌話你可以係度見到豹、食蟻獸同埋鹿之類，不過我地就無緣見到啦，只係見到馬騮同大咀鳥姐，見到最多就係呢種Spidermonkey，佢地用條尾卷住樹枝好似蜘蛛咁吊落黎，好盞鬼

呢度同其他遺跡一樣，都有宮殿、神廟、祭祀地等等

呢度好似就係宮殿房間入面張床

最好玩既係呢度既金字塔係可以爬到上頂架 ，瑪雅人起啲金字塔好鬼死斜，因為之前太多人爬上去既時候跌死，所以而家係塔後面搭左啲樓梯比人行，不過上到去都係自己手腳並用爬。
行上去既樓梯

去到塔頂可以係個高過哂森林樹冠既角度黎睇呢個遺跡，係好特別既風景呀

係塔頂hea左輪我地就返歸了，呢個亦係我地旅程到呢度最後一個睇既瑪雅遺跡。
當中每一個遺跡都有佢地獨特之處，而佢地之間雖然地理上相隔好遠既距離，但文化同交流又有微妙既聯繫，所以唔會睇到悶。我成日覺得有時有啲野雖然好似，但我相信每樣事物都有佢獨特、美麗既地方。如果唔識去欣賞每一件事物，咁樣去再多既地方都係徒然。

呀，bt7w我之前有無放過呢兩隻野？

呢兩隻野係我用爛毛巾整黎陪我地去旅行既公仔
早排見要參觀咁多遺跡整左套富民族氣息既衫仔比佢地應下節，我老母話好似用黎落降頭果啲公仔喎。

夜晚又返黎寧靜既小島


下一站:
Backpacker天堂Semauc Champey

[危地馬拉-Semuc Champey, Lanquin]

第二朝一早我地就搭coletivo離開Flores，出發前係車站買個早餐先

個包好似subway咁上下大，餡料都係自己thisthisthis，我地揀左牛油果同蛋，10蚊港紙就夠兩個人分了。

話說危地馬拉係貨幣叫Quetzal，簡稱Q，同港紙差不多係一對一既。呢隻Quetzal係危地馬拉既國鳥，係瑪雅文明入面Quetzal係一種好神聖既雀鳥，係墨西哥Chichen Itza金字塔前拍手甚至會有quetzal叫聲既回音。搵返有一日係hostel睇過既書呢種雀係長呢個樣子既:


講返程車，笑到抽筋呢四條女全程都笑到抽緊筋，嘈到頭都痛

呢一程車原本話4個鐘，最後搭8左個鐘，途中部小巴要排隊上船過河


係山路鄧鄧下好快就去到Lanquin，呢度係一個我好想去既地方，入面既Semuc Champey係一個河谷，好似石灰岩形成梯田一樣一層層既河水好綠好靚，係河入面有好多好raw奇奇怪怪既探險活動(?)玩，因為環境天然、有痴線野玩、啲野好平同埋環境隔涉，所以係backpacker眼中既天堂。

可能因為果度太山岩山忽，無人帶路根本唔識行，Colectivo一到埗已經有各間hostel既職員在場守候，捉返自己既客人上豬欄車運返旅館，我地都好快黎到今次住既地方

原本我地book四人房既，去到之後櫃檯呀姐話有間兩人房比我地，丫又好骨緻喎，我記得每晚都只係Q85左右

門口有個小平台，我地好鍾意坐係度吹風

男朋友話要學啲人係戶外做瑜珈，痴孖筋

蚊香簡直係必備既聖物，但我地成日搣斷

我好鬼死野蚊既，中美大部份地方都唔會有冷氣，而我地又好鍾意係戶外hea，唔想噴蚊怕水既話最好就係點蚊香架喇。呢盒蚊香係伯利茲買既，我地當係寶，因為無乜見到有得賣，次次點都珍而重之咁燒一陣就整熄佢，到最後剩返兩餅揹左返黎香港。

夜晚出common吃飯順便報下聽日既tour，有對好岩傾既西班牙+秘魯情侶聽日都會一齊去玩，真係好喇。


聽日可以去玩水啦！

第二日起身，出面既風景好靚

我地懷住興奮既心情，搭豬欄車出發去玩水啦

呢個係hostel報既全日團每人Q160，因為都係自己間hostel既人所以人唔多。沿途都係爛泥地，好似打樁咁鄧得好犀利，好在紮左大半個鐘馬就去到啦。

我地第一個活動係去watercave，我唔知點用一個詞語去形容呢件奇怪但係又好好玩既事簡單黎講就係拎住支著住火既蠟燭入去個充滿水既山窿入面玩。呢一日既相都係用部老爺防水機影，所以會濛濛地，大家將就下啦。

首先我地係洞口附近除哂衫放入locker，然後每人就會獲派一支白蠟燭

行到去洞口既時候，導遊就會幫你點著佢，一陣就靠佢做洞入面既照明

跟住大家就開始入山窿啦

入到去導遊會稍作講解，係出發前仲會抆啲蠟屎上你塊面度增加氣氛添


洞入面一盞燈都無，全靠大家手上面蠟燭既燭光黎照明。沿路有一條繩引路，愈向入行水位就會愈深，好多時都會深過個人，要一邊踩水一隻手扶著條繩再一隻手舉起支蠟燭唔好比佢熄。
中間就係果條繩，唔知導遊是咪覺得我好樣衰，係我塊面打左兩個大交叉

因為山洞入面真係好黑，點火光只係僅僅夠一個人見到前面既野，熄左就好似盲左咁乜都睇唔到，所以個個都好狼狽好搞笑。條路仲唔少鐵梯要爬，間唔時又有瀑布要揸住條繩fing過對面或者sir落去，而唔好忘記你仲有支蠟燭要照顧 成件事好九唔搭八但真係超級好玩。其實洞入面既水好冰涼，不過郁郁下好快就唔覺得凍，而因為個個都揸住支蠟燭入面行，所以入面充斥住好濃烈細個中秋節玩蠟燭既味，好有親切感。

係呢個情況下我地真係無辦法影到清晰既相，唯有俾兩張抽像相大家意會一下

支持樓主
留名

支持 留名
今次唔好爛尾啦