[阿根廷-Puerto Madryn]
記得仲係南極船上面既時候,因為強國團聽唔明英文既關係,佢地有一個隨團生物學家,每日都會用中文係圖書館開talk教佢地生物知識。我地成日都係圖書館蒲,所以同佢都幾熟落,佢話黎南極之前去左阿根廷中部一個叫Puerto Madryn既海岸,果度係個觀鯨聖地,除左可以好容易睇到鯨魚,仲有機會可以見到野生殺人鯨獵殺海豹既情景!! 雖然當時已經係觀鯨季節既尾聲,但我地都想去踫一踫運氣!
由El Calafate去Puerto Madryn要搭26個鐘車,呢程係我地搭過最長途既巴士,中間要轉一程車,間唔時又會轉下司機咁
等緊上車既時候突然之間有個叔叔暈左係地下抽搐,大家都好擔心上前幫手,好彩救護車兩三分鐘就黎到,希望佢無事啦。原來大叔係我地班車既司機,可能揸長途車真係太辛苦了,等左個零鐘頂更司機就黎到,晏晝12點就開車出發。
中途晌轉車站食個熱辣辣杯麵,好滿足
架車間唔時會停底,放啲犬隻上黎聞下有無人運毒 (好眼訓, 影到蒙查查)
傍晚時分車頭部電視就開始播電影,巴士上面大部份乘客都係一家大細有老有嫩,你以為會播啲合家歎電影啦,點知係齣瘋狂炒車爆頭同好多唔著衫姐姐既
嚇到啲細路擘大口呆哂
我地又開始拎啲包出黎整晚飯食,咁長途既車唔搵啲野做消磨下時間既話真係好悶
好不容易第二日下晝兩點終於去到Puerto Madryn,真係坐到神智不清,去廁所洗個面,精神返啲就行多4個字去今次住既apartment
我地會係呢個城市留4日,放低野之後我就去買啲野食煮飯,男朋友去tour agency問下睇鯨tour既資料,得知聽日太大風唔適合出海,所以就報左後日既觀鯨+尋找殺人鯨團,聽日可以好好休息下plan下一站去邊先。
搭完長途巴士元氣大傷,第二朝一訓就訓到晏晝12點。
起身煮個麵食,食完出去散下步
Puerto Madryn係一個港口,沿住海邊散步好舒服,如果天氣暖啲我都想落水玩。
呢日海邊好多海草,不過咁又令沙灘個景色變得好特別
如果係觀鯨旺季,係碼頭呢度都成日可以見到鯨魚,但今日就見唔到啦。呢日係星期日,好多一家大細出黎曬大陽
阿根廷周圍都係踢波少年
薯仔炆雞,多水過頭
食完飯我地又開始諗下下一站去邊好,當時諗到兩個地方,一個係由首都Buenos Aires搭兩個鐘船就去到既烏拉圭,聞說果邊仲有可以㩒到美金既ATM,但礙於每人船飛要100USD實在太貴,所以放棄了。另一個選擇係伊瓜蘇瀑布,三日兩夜行程既話每人大約要HKD2500,都係超出預算了。
當時我地對於去唔去一個地方既考慮除左係旅費同埋有幾想去之外,仲有係以後由香港再去既方便程度。我地始終無可能一個旅程就去哂所有地方,假如果個地方係交通方便既話,我地會留個遺憾等以後有藉口可以再去
而家就趁後生去左啲隔涉既地方先。就係咁,我地仲未諗到去邊住,訓醒再算啦,可能訓醒就會有靈感呢。
早啲訓,聽日要由朝玩到晚了。