[重開][多圖][一年長途遊記] 中南美到南極-西伯利亞至東歐

978 回覆
332 Like 5 Dislike
2020-10-18 17:19:26
睇緊,好好睇

樓主同樓主男朋友好幸福
2020-10-19 08:57:23
2020-10-19 15:38:27
百內國家公園既入場卷有效期係三日,跟完廢老團之後一日我地又自己搭巴士入去玩

自己黎唔使趕時間可以慢慢行,我地揀左條山腳短短地既路線,行下停下坐下,慢慢欣賞咁靚既景色

山頂好多呢啲形狀迷幻好似UFO咁既雲

心心雲


雪山上面既雪好似瀑布咁流落黎

山腳好多呢種綠色毛毛球,啲葉好似尖刺咁,硬倔倔好拮手


路上有唔少溪澗流水,好多人都係就咁裝黎水飲,好甘甜架


今日既晏晝係一疊包+吞拿魚一罐


行長途線堅毅的人



行到差唔多,夜晚8點零鐘就出返門口等巴士走,等左兩個鐘架巴士都未黎,好似話因為天氣唔好(????)所以部車黎唔到,巴士公司既人都唔知幾時先會有車。雖然個天好光,但其實已經係夜晚黑十點,大家都棟左係度呆等
南美啲巴士真係亂咁黎,好彩最後有另一間巴士公司既車收留左我地,11點幾就返到hostel。

短短留左幾日,我地又彈出彈入返去阿根廷,去Patagonia位於阿根廷國土之內既城市El Calafate喇。

下一站: 阿根廷-El Calafate
2020-10-19 15:47:47
所以我覺得獨遊去長途旅行既人好犀利
真係唔可以睇少啲老人家,佢地既毅力真係好強,如果我老左都可以好似呢啲健壯老人咁叻就好喇
2020-10-19 15:58:15
唔使擔心呀,我都未搵到工,仲好得閒可以打遊記
多謝你地陪我就真

2020-10-19 16:03:04
唔會特別勁啦,個個都可以去好多地方架
多謝你捧場
2020-10-19 16:07:54
我地只係行左兩日都覺得啲風景靚到不得了,係果度露營既話一定好正
果時都有人提議我地去Puerto Montt呀! 不過我地上網睇過覺得果度好似好城市化,無乜興趣,所以下一站去El Calafate
2020-10-19 16:12:23
2020-10-19 16:15:04
一路返工一路追post
睇完好想學返spanish,之前學到一半停左,希望學好之係去南美
2020-10-19 16:15:52
係囉
有時遇到啲趣事或者見到好靚既風景,始終都會想有人係身邊一齊經歷同分享
2020-10-19 16:38:55
巴打你咁醒既
近排去學西文識左個男仔,原來佢係睇左我篇遊記之後真係去左墨西哥海龜營既一個巴打黎,同佢傾開先發覺我果時好似寫得唯美過頭 佢話雖然真係好好玩,但估唔到係咁辛苦,去完一轉瘦左好多

日常工作除左之前提到既巡沙灘同執垃圾之外,最多時間就係打掃同營地既維修保養,全部無難度既體力勞動。要洗廁所啦、煮飯(而家好似唔使)、拎住把開山刀劈樹籐、抆雜草、入沙包起防波堤etc

順帶一提墨西哥既馬桶係唔可以沖廁紙既,所以你倒廁格啲垃圾筒既時候會有好多沾滿屎既廁紙
2020-10-19 16:40:05
謝謝 啲企鵝真係好趣緻
2020-10-19 16:52:30
多謝你
係呢,可以係對方身邊真係好幸運
2020-10-19 17:15:36
夠唔夠消磨一晝時間
點解咁浪費呀,我反而係去完之後返黎的起心肝正式學
2020-10-19 19:04:07
[阿根廷-El Calafate]
El Calafate同Puerto Natales唔係隔好遠,搭6個鐘巴士就黎到啦

巴士沿途既風景好靚,時不時都見到啲野生動物經過,食下野睇下風景又落車過下關好快又返到去阿根廷




我地會係度留4日,黎呢度主要係想睇冰川Glaciar Perito Moreno,順便同之前約過我地既香港師奶食飯。一到埗擺低野即刻去食個大餐先

呢個獵人煲(餐牌係咁寫)真係好好味,入面啲牛肉大大舊,肉味好阿根廷,又香又濃又多汁,男朋友食得太擒青打左3日c egg

因為第二晚約左師奶食飯,所以朝早我地都唔去太遠既地方玩住,廢事啲巴士又甩底返唔切黎食飯。出去玩前食左晏先,係市中心驚覺有間日本野,好耐未食過啦! 又幾好食,仲聽到個廚同員工傾計講日文


原本想租部單車周圍踩,但發現一個鐘要成120AR (~30HKD),實在太貴了,就決定行去岩岩google到晌附近既一個雀鳥保護區Laguna Nimez Reserva Natural Municipal,行一個鐘左右就到啦,門票每人350AR (~85HKD)



呢個保護區係湖邊,有啲似濕地公園,入面最多就係鴨,間中都會見到啲特別啲既雀仔



樣子哀怨的鳥

El Calafate其實係一種漿果既名,因為呢度生左好多呢種漿果,所以El Calafate就成為呢個小鎮既名

有個位可以通去出面既沙灘

呢個湖叫Lago Argentino,原來係阿根廷最大既湖,入面住左好多天鵝同flamingo



夜晚同香港師奶食飯,佢個friend係來自海南島既大媽,自從係廢老團交換完contact之後佢地就成日話約我地晌下一站食飯,原來佢地都即將去南極,但係……佢地係搭飛機去,仲話每人14萬港紙之嘛,反正唔鐘意搭船,怕暈船浪
我地叫左牛小腸、牛扒、同埋我地最憎但師奶們好想食既羊架

佢地話自己都係去緊長旅行,第一站係坦桑尼亞睇動動大遷徙,岩岩係復活節島睇完摩艾像,黎緊就會飛去南極 佢地不斷提住我地窮遊窮遊,覺得我地好刻苦,講真我就唔覺得自己窮遊既,只不過坐下巴士同間唔時食下麵飽之嘛,呢個世界貧富懸殊真係太嚴重了

之不過佢地都係友善既人黎,請完我地食飯之後,知道我地拎唔到阿根廷錢同唔夠美金,就話可以同我地唱美金。我地用身上既港紙,加埋啲原本諗住搭西伯利亞鐵去北京會用到既人民幣,唱左120USD返黎唔係幫到好多,不過可以用正常匯率唱到錢,都真係好感激了。
2020-10-19 20:08:29
絲打係邊到學?
貴唔貴?
2020-10-20 08:51:44
2020-10-20 09:22:15
錢係其次,我覺得 過程都佔好大部份,果種期待既未知 ,到去到目的地 真係 好興奮,好有冒險感覺
2020-10-20 19:06:29
今日參加左一個tour去冰川國家公園Parque Nacional Los Glaciares,呢度係琴日見到個湖Lago Argentino既延伸,我地會搭船出發,每站都可以上岸行下,睇下瀑布,望下山上面既冰川



呢度係繼南極同Greenland之後,世界上第三大既冰川,面積有成個首都Bueno Aires咁大。個guide把聲好悶,不過講解得好清晰

佢話呢隻咁核突既菇叫印第安人麵包,以前啲人會拎佢當包咁食




呢度啲水真係好好飲,又裝一支竹先

最後架船會駛去呢度最大既冰川Glaciar Perito Moreno前面

再放我地上觀景台,用唔同角度睇下呢舊白糖糕



係四周圍都係樹林既環境之下竟然有咁大舊冰,真係神奇。最外圍既冰間唔時會從外牆剝落轟落水,濺起既水花有差唔多半個冰川咁高,我地都係第一次見咁樣既畫面,好震撼。除左呢種遊船tour,呢度仲有唔少行山路線,想有特別啲既體驗仲可以join個ice walking tour係白糖糕上面行添。雖然係南極都睇過好多冰,但都覺得呢度好壯觀好特別!

下一站: 阿根廷-Puerto Madryn
2020-10-20 21:47:19
hkuspace呀,introductory 一年$8650,而家讀緊intermedaite就一年$9250。佢話可以claim返正苦個持續進修基金但仲未claim到
2020-10-20 21:55:44
無錯
錢無左咪再搵過,未知事物帶黎既興奮真係千萬難買。
好多野老左就唔會再有心力去亂闖去體驗,更加莫講話今日唔知聽日事,有無福氣可以變老都無人知。
2020-10-24 10:55:04
[阿根廷-Puerto Madryn]

記得仲係南極船上面既時候,因為強國團聽唔明英文既關係,佢地有一個隨團生物學家,每日都會用中文係圖書館開talk教佢地生物知識。我地成日都係圖書館蒲,所以同佢都幾熟落,佢話黎南極之前去左阿根廷中部一個叫Puerto Madryn既海岸,果度係個觀鯨聖地,除左可以好容易睇到鯨魚,仲有機會可以見到野生殺人鯨獵殺海豹既情景!! 雖然當時已經係觀鯨季節既尾聲,但我地都想去踫一踫運氣!

由El Calafate去Puerto Madryn要搭26個鐘車,呢程係我地搭過最長途既巴士,中間要轉一程車,間唔時又會轉下司機咁

等緊上車既時候突然之間有個叔叔暈左係地下抽搐,大家都好擔心上前幫手,好彩救護車兩三分鐘就黎到,希望佢無事啦。原來大叔係我地班車既司機,可能揸長途車真係太辛苦了,等左個零鐘頂更司機就黎到,晏晝12點就開車出發。
中途晌轉車站食個熱辣辣杯麵,好滿足

架車間唔時會停底,放啲犬隻上黎聞下有無人運毒 (好眼訓, 影到蒙查查)

傍晚時分車頭部電視就開始播電影,巴士上面大部份乘客都係一家大細有老有嫩,你以為會播啲合家歎電影啦,點知係齣瘋狂炒車爆頭同好多唔著衫姐姐既

嚇到啲細路擘大口呆哂
我地又開始拎啲包出黎整晚飯食,咁長途既車唔搵啲野做消磨下時間既話真係好悶


好不容易第二日下晝兩點終於去到Puerto Madryn,真係坐到神智不清,去廁所洗個面,精神返啲就行多4個字去今次住既apartment

我地會係呢個城市留4日,放低野之後我就去買啲野食煮飯,男朋友去tour agency問下睇鯨tour既資料,得知聽日太大風唔適合出海,所以就報左後日既觀鯨+尋找殺人鯨團,聽日可以好好休息下plan下一站去邊先。

搭完長途巴士元氣大傷,第二朝一訓就訓到晏晝12點。
起身煮個麵食,食完出去散下步

Puerto Madryn係一個港口,沿住海邊散步好舒服,如果天氣暖啲我都想落水玩。
呢日海邊好多海草,不過咁又令沙灘個景色變得好特別

如果係觀鯨旺季,係碼頭呢度都成日可以見到鯨魚,但今日就見唔到啦。呢日係星期日,好多一家大細出黎曬大陽


阿根廷周圍都係踢波少年

薯仔炆雞,多水過頭


食完飯我地又開始諗下下一站去邊好,當時諗到兩個地方,一個係由首都Buenos Aires搭兩個鐘船就去到既烏拉圭,聞說果邊仲有可以㩒到美金既ATM,但礙於每人船飛要100USD實在太貴,所以放棄了。另一個選擇係伊瓜蘇瀑布,三日兩夜行程既話每人大約要HKD2500,都係超出預算了。

當時我地對於去唔去一個地方既考慮除左係旅費同埋有幾想去之外,仲有係以後由香港再去既方便程度。我地始終無可能一個旅程就去哂所有地方,假如果個地方係交通方便既話,我地會留個遺憾等以後有藉口可以再去 而家就趁後生去左啲隔涉既地方先。就係咁,我地仲未諗到去邊住,訓醒再算啦,可能訓醒就會有靈感呢。

早啲訓,聽日要由朝玩到晚了。
2020-10-24 16:09:58
2020-10-25 14:34:27
繼續留名
樓主其實係香港翻咩工好似英文好好可以周圍去 又玩到一年 好正
2020-10-25 16:28:40
當時我地對於去唔去一個地方既考慮除左係旅費同埋有幾想去之外,仲有係以後由香港再去既方便程度。我地始終無可能一個旅程就去哂所有地方,假如果個地方係交通方便既話,我地會留個遺憾等以後有藉口可以再去 而家就趁後生去左啲隔涉既地方先。


大家點估到因為支那病毒,而家就算台灣都無得去 
吹水台自選台熱 門最 新手機台時事台政事台World體育台娛樂台動漫台Apps台遊戲台影視台講故台健康台感情台家庭台潮流台美容台上班台財經台房屋台飲食台旅遊台學術台校園台汽車台音樂台創意台硬件台電器台攝影台玩具台寵物台軟件台活動台電訊台直播台站務台黑 洞