[重開][多圖][一年長途遊記] 中南美到南極-西伯利亞至東歐

係唔係完全上唔到網

好好睇 支持樓主

蒙古團既第四日，朝早依然係咁大雪


男朋友去千里之外既廁所屙屎，話個屎忽凍到結冰咁滯。今日既早餐係牛肉蕃茄蛋湯


屋主大叔擔心路面情況太壞，所以跟埋我地車出去帶路，有佢仙人指路，今日開闢道路既過程順利左好多


我地先去左附近既瀑布

佢地話夏天既時候呢度好靚，不過而家結哂冰，景色一般，係度睇左陣就走了。

係大叔既引路下，我地黎到一條村莊


原來我地部車壞壞地，要整整佢，所以大叔帶我地黎佢係村入面既另一頭住家，係屋企搵啲工具黎幫手。雖然有好多蒙古人依然仲住係緊蒙古包，但其實當中唔少人既生活都已經現代化起黎，冬天太凍既時侯佢地會返去村入面住，有遊客黎借宿或者等到啲草生返出黎可以放牧既時候先會住係蒙古包。大叔呢間屋都好骨緻架



蒙古人真係好大方好客，屋企啲野任人舞都無所謂，Saruul話蒙古人都係咁不拘小節，我見佢去到邊度都好似自己屋企咁煲水沖茶摷野食，見我係咁咳，仲係人地屋企拎左罌野比我沖黎飲



呢款蜜糖有好多粒松果仔浸係入面，有淡淡既松木香味，用暖水沖黎飲好好味，飲落真係喉嚨好舒服。飲完蜜糖舒服哂，架車都整好，我地就告別大叔，繼續上路喇


Lunch係休息站食碟頭飯

我食牛肉飯，男朋友見到有久違了既雞勁開心，嗌左碟雞脾飯，比司機笑左好耐。原來係蒙古，真男人只會食牛羊之類既紅肉，雞呢啲咁弱既肉只有女人先會食

晏晝開始又突然陽光普照，呢度呢天氣都幾多變




今日既目的地係額吉湖


湖邊既高地有個咁樣既亂石塔，Saruul話呢個係蒙古人祈福既方式，先執三塊石仔拎住係手，然後圍住石塔順時針轉圈行，邊行邊許願，每行完一個圈就將手上既一塊石扔向石堆。我地都跟住佢講野方法做左次，我偷睇到男朋友許得好認真，唔知佢許左啲咩願呢。

睇完風景，我地就落去湖邊喇

聽講夏天既時候大家會係度釣魚游水，呢度亦係一個觀鳥既好地方，不過而家暫時就只得結冰既湖一個。湖上既冰好似未溶得哂，男朋友同司機兩個大細路跳左過去玩


我地原本打算今晚住係湖邊既營地，但天氣太凍，個營地無開門， 我地唯有返轉頭去其他地方敲門搵住宿



金黃色既陽光照落枯黃既草原上，呢日既黃昏真係好靚。回程既時候見到一大堆放牧中既羊，男朋友好興奮咁跳左落車，佢話佢其中一個夢想就係咁樣跑入啲羊群之中



羊群俾佢嚇到散開哂之後，我地發現有隻羊行得特別慢，走得不情不願咁頻頻回眸。我地向佢依依不捨既方向望過去，先發現除來地上有一隻連住臍帶仲未識行既羊BB

佢個身睇落仲濕濕地，應該出世無耐，就比男朋友嚇走左個呀媽 我即刻捉返條友上車，一轉身，羊媽媽就飛奔返去BB身邊了


呢一晚我地又返左集團式經營既蒙古包度住，無沖涼的第四天，個身朕除同茅廁既氣味已經融為一體了

睇相都feel到樓主個身有味

磨牙

天氣咁凍應該唔會好大味掛

沖唔到涼真係好痛苦 雖然冬天冇咩汗冇咩味
但女人都會黎m 好彩絲打果陣冇黎m
如果唔係都幾辛苦

做咩嚇走羊媽媽

我用左兩日先追曬，下年一於去中美洲玩返半年

好鍾意睇遊記
LM先

召喚樓

睇你遊記，隔住個moon都感受到你當時既感受，寫得好好啊

樓主淨係打自己同男朋友格仔但完全唔會幫一齊影相嘅朋友打格仔

住左幾日蒙古包，我覺得感覺都唔錯架，呢度唔會好似上網睇啲遊記咁比啲石屎起連浴室既假蒙古包你訓，又有得同當地人交流，夜晚訓覺又夠暖，真係好唔錯。但係男朋友就唔多鐘意，因為我地個蒙古包入面有好多烏蠅，飛黎飛去好滋擾，閒閒地都可以拍死成十隻。佢係度既興趣除左燒柴，就係拍死啲烏蠅放上火爐度bbq



黎到蒙古團既最後一日喇，整個上晝都係搭車回程，間唔時落車屙下尿郁動下咁






春天係牛羊馬BB出世既季節，但呢一年既春天比平時既寒冷，令啲草遲遲都未生出黎，天氣凍加上唔夠野食，好多身體弱動物都挨唔過呢一個寒冷既春天。路上經常都會見到佢地既屍體，入面既肉都已經被其他動物食得一乾二淨，淨返一堆毛皮同骨頭


今日既最後一個行程係去呼斯坦諾魯國家公園Khustai National Park

呢度最出名既係蒙古野馬，蒙古野馬性格兇悍，聞說當時成吉思汗軍隊所騎既就係蒙古野馬，佢地曾經幾近滅絕，經過保育後回復至瀕危水平，係呢個國家公園入面大約生活左350隻。我地有擁有遊牧民族之眼既司機大哥，不費吹灰之力就搵到兩隻野馬啦


蒙古野馬同路邊見到既馬唔同，佢地個頭比較大，頸上面啲毛好短，而且全部清一色只有淺啡一種顏色，腳部隱約有啲好似斑馬既條紋。數目咁少都可以遇到，真係好彩喇。

係度我地仲見到遠處既山上有一大群鹿跑落山，我從來都未見過咁多動物一齊跑，好似瀑布咁流動，真係好奇妙既景象，唔知啲人去非洲睇動物大遷徙係咪就係咁架呢
臨走既時候見到幾隻鹿係附近山坡經過


鹿仔有啲有角，有啲無角，我地以為係公乸既分別，但導遊話唔係，呢種鹿公乸都有角，只係每年春天佢地既鹿角都會好似樹葉落葉咁甩落黎，新一年再生返對新既出黎，佢地只係有一隻對角未甩姐，又長知識了。

呢幾日既旅程真係好特別，除左壯麗既風景、海量既動物同好蘇既肉，最估唔到既係蒙古人雖然個個都係彪形大漢，但原來個個都好熱情同善良，有機會既話我地都好想夏天既時候再黎一次綠油油既蒙古呀，到時就可以係溪流或者湖入面沖涼喇

完成呢個滿足既旅程，返到hostel已經7點半了。幾日無洗頭覺得髮質改變左，柔順左好多，可能我要考慮下唔好日日洗頭先得。男朋友話唔想再食羊味既牛，沖完個靚涼我地就去左隔離食泡菜野，睇佢幾滿足


食飽飽，聽日就繼續搭火車上路喇。

[下一站: 俄羅斯-irkutsk]

啲衫又厚，陣味trap住係入面揮之不去

Te quiero

好嚴厲

聽講天氣暖既話多過3日既行程可以去河邊沖涼，期待下次再去野外露出

如果黎M真是惡夢，有時都好羨慕男仔無呢個煩惱。

不過我係玻利維亞果時咪炒車既，果次嚇一嚇之後成六個月都無再黎M，所以下半場旅行都幾方便 之後返香港睇中醫調理身體先正常返，中醫話我係交通意外嚇親影響到喎。

發現有羊BB已經即刻捉走個傻仔

正呀，好好享受

多謝你 你地鍾意睇就好了