[重開][多圖][一年長途遊記] 中南美到南極-西伯利亞至東歐

巴打budget 幾多？

係山窿出黎之後我地去左附近一個瀑布沖下身，不過果度啲水好凍，玩左陣我地就起身了

行行下我地見到河邊有個韆鞦，條繩大約3層樓咁高，可以fing出去河上面打關斗跳河。見個個都玩得好high我地又排埋一份

不過我完全唔識控制，一出去啲離心力就fing到個屎忽離開左坐緊塊木板，去到河上面一鬆手，就肚腩向下大字形自殺式撻落水，痛到好似全身炸裂左咁，當堂係水入面暈左兩秒郁唔到。意識清醒之後先發現河水水流好急，即刻用盡吃奶之力游返上岸。
輪到男朋友既時候佢跳得好好，跳完大家都係度鼓掌歡呼，佢仲跳左幾次添。
我地玩韆鞦條河

呢個時候已經係晏晝，我地行左去另一個河谷，每人分到一份三文治，玩完水食野特別好味既

之後我地就行一段山路去semuc champey最標誌性既石灰岩水池了。之前提過因為呢度既河水礦物質好豐富，長期沖刷之下形成左一層一層湖水綠色水池，而且佢唔係得個睇字，係大家都可以落去游水架。行左個零鐘山我地就望到佢啦

再行多半個鐘多啲就落到谷底，呢度有深深淺淺好多個池，可以由一層sir落下一層，每個池都唔係太深，大部份地方都可以掂到地，除左遊客之外都有唔少當地人一家大細黎玩，啲湖水好冰凍，好彩果日天氣好好，太陽曬住之下都好舒服

玩到心滿意足之後就返歸了，因為個個返黎都走去排隊沖涼，而兩格沖涼房之中只有一格係間歇性有暖水，所以我地決定去玩多陣水先。
係呢間咁平既hostel入面竟然有個泳池，仲要個風景好正，實在太神奇了

玩到太陽落山開始凍我地就去沖涼了，呢度環境好、有泳池、仲唔使沖凍水涼，我覺得好幸福呀。

下一站: Lago de Atitlan

你可以去佢地ig睇下呀，我見佢地成日都話歡迎報名

去得返旅行既時候就出發啦

多謝好靚果啲都係男朋友影架，好核突矇查查果啲先係我影

清晨4點入森林影

巴打心水太清了吧
我以前都寫過埋到尾既遊記架! 不過短篇黎同埋果時無乜人睇
[脫節遊記]老撾
https://lihkg.com/thread/559666/page/1
但係睇下好喇，Laos係支持港版國安法既國家之一，啲人民的確係好pure好true既，但反正我一段時間內就不會再去了

知道其實我成日都好想寫返，而家失業真係太好了

每人使左17萬左右啦，主要都係交通費同埋南極上面，雖然我地已經大部分時間搭巴士，但因為中段撞左車對搭車有好大創傷後遺症，所以後期會多左搭飛機

如果唔係去好長時間我地建議帶啲美金去慢慢唱會係最方便，如果去得耐既話最好申請一張有plus或者cirrus既提款卡，因為佢地啲機好多都淨係認到呢種卡。

多謝支持呀

知道
反正而家無得去旅行，寫返遊記當止毒癮都幾好。

我地最後每人17萬左右啦，其實我地都成日搭巴士捱餅乾同自己煮，可能就係去南極同埋之後搭多左飛機果度用多左錢。
不過其實豐儉由人既，我地唔係好刻苦果隻旅行，有時住下dorm，有時住apartment/ homestay，有咩喜慶日子又會住下酒店咁，所以都係睇下你想要一個點樣既旅行架姐

Exact7ly係果邊如果淨係得張銀聯真係屎都無得食，我想講果時我地就正正係得銀聯既柒頭，有段時間兩個加埋全身得返80美金真係好彷徨。因為部部ATM都話佢地淨係收plus同cirrus 所以我地先知道佢既重要性

[危地馬拉-Lago de Atitlán]

前一晚係hostel見到有去Panajachel既車飛，Panajachel係Lake Atitlan旁既一個湖邊小鎮，之前啲墨西哥朋友同我地講過呢個湖好靚，所以就決定下一個地點去呢度喇！
每人Q185

今日程車要搭10個鐘，途中經過左危版金拱門比人買晏晝

好耐無見過既高科技產物，估唔到危地馬拉既金拱門都咁high tech

我地唔肚餓所以無買到，反正身上面仲有兩筒餅，朝早8點鐘上車，去到Panahacjel已經天黑，隨便食啲野就訓左。

懶得滯唔想洗衫，第二日起身拎啲衫去街口間laundry洗

hostel隻狗，成日都訓得好嘆

之後去左散步，通常搭完長途車去到一個新地方我地都會9hea返一兩日休養生息下

呢日訓到好晏先起身，一出街就去搵野醫肚，見到間睇落好舒服既餐廳，入去試下先


呢個叫雞肉牛油果湯，入面有啲飯食落有啲似粥，幾好味。

食完我地就行左去湖邊，Lago de Atitlán(西文lago=lake)係一個俾幾座火山圍繞既湖，湖既四周散落住不同既傳統村落，佢亦都係中美洲地區最深水既湖。湖面經常都有一層霧，感覺好迷幻，我地靜靜享受住呢片美景，係湖邊由天光坐到日落


然後係街市買左啲餸，今晚整西芹煮雞

坐巴士去Patagonia果時遇到個準備去南極既香港姨姨，佢請我地食左餐飯，傾開計佢知我地無哂現金想幫我地，我地就摷哂身上面啲港紙同諗著旅行後期用既少少人民幣同佢唱，換左百幾蚊美金同兩包榨菜返黎呢百幾蚊都摵左一排，去到利馬就終於搵到㩒到錢既ATM了

唔講咁多 多圖多字就正皮

你個行程太長feel到有排都未講完
會唔會考慮分開美洲同歐亞洲

晌Panajachel既第二日依然係悠閒既一日，訓到自然醒然後整個早餐，因為唔知幾時先食下一餐所以通常早餐都會食飽啲

危地馬拉既天氣只分成旱季同雨季，五至十月係雨季。我地係九月中黎到既，唔係時常落雨但朝早同傍晚都比較涼，尤其是呢度係湖邊天氣就更加清涼，要著件薄風褸。
食飽就坐船去湖西面既San Marco郊遊


呢隻bonbonbum珍寶珠好好食，食到最入個芯係吹波膠黎，我地次次見到都買幾支，散買大約0.5Q一支。Google話係好出名既糖黎，係咪我太大鄉里所以未食過?
入面粒吹波膠

Hostel啲人話呢度有獨木舟扒，黎到發現湖面好大浪所以決定行下山好了，點解明明係湖但係會咁大浪既呢，真係唔明白。呢度既郊遊徑好好行，中間仲有好多櫈可以休息，係休養生息既最佳活動。
無見過既蟲，個頭好有趣

原來無乜影到風景相，得呢一張


因為無乜野做過，返黎就係附近隨意行下

文具舖入面笑到你有啲心寒既燈籠

有部插滿花既車，唔知係咩事呢，怕係喪事唔好意思問人地

街邊燒栗米，當地食法會吱啲沙律醬同加芝士粉係上面

晏畫食炸雞，唔知點解中美既炸雞寧舍好味多汁

又去左行local街市

無論由邊個角度睇，你總會望到一兩座火山


危地馬拉路上既婦女好多都依然著住傳統服裝，而當地人其實好好，臨黎到之前啲墨西哥朋友同我地講呢度好危險，叫我地千萬要小心，唔可以搭過夜既長途巴士，會成部車比人劫走槍殺。可能我地比較好彩，遇到既都係好人，就算係萍水相逢既路人係雞同鴨講既情況之下都會好努力幫我地，所以係呢個國家都無遇到啲咩唔好既事。

是日靚晚係手撕雞+蒜蓉蒸茄子

留名

係Lago de Atitlan既第三日。琴日去左湖既西邊，今日打算去湖既東邊睇下。hostel個光頭佬話附近有個幾特別既小鎮Santa Catarina Palopó，行40分鐘左右就去到，問完佢點樣行就出發喇。
行去小鎮既路係高高低低依山而建既馬路，山上面仲有唔少人係度玩滑翔傘，睇住佢地係雲層中穿插好似好好玩咁。最後我地行左個半鐘就黎到



原來呢度有一個叫做Pintando Santa Catarina Palopó既計劃，每個家庭都可以幫佢地間屋既外牆揀一隻顏色，再髹上一啲傳統圖案黎裝飾外牆。

而傳說呢個計劃實行左之後係令呢度變左好受歡迎，不過呢一日除左我地之外就見唔到有其他遊客，成條村都好靜好舒服，周圍都係跑跑跳跳既小朋友同編布既婦女

走既時候我地唔想再行返個半鐘返去，就問下人邊度有車搭，同啲街童玩左陣見到有部豬欄車經過，問岩目的地就上車了


今晚煮紅酒牛肉，呢度啲牛肉好抵呀，呢兩兜加埋先Q41，肉質仲好優秀添，紅酒都係求其買支30幾蚊既cheap雞野

狗仔早抖


下一站: Antigua 行火山

好好睇 好羨慕有人一齊流浪咁耐