[重開][多圖][一年長途遊記] 中南美到南極-西伯利亞至東歐

係
好似隻豬咁食飽就訓，訓飽起身睇show，埋岸就落地玩，同之前有一餐無一餐既苦行生活好大反差，間中係咁都真係幾正，乜都試下嘛

蠔

[法國-Marseille]

上郵輪既時間係下晝一點至三點，我地兩點鐘就黎到馬賽既港口做好Check in手續。痴返個luggage tag落個大背囊運上船

然後就上船公司既接駁車喇，以為幾分鐘就到，點知愈駛愈遠，仲上埋高速公路 最後搭左個半鐘去到附近一個叫Toulon既港口上船，原來因為天氣關係架船今日改泊左係呢度。呢部就係我地坐既MSC Meraviglia，好撚大部

拍埋佢度覺得自己好渺小，我同男朋友叫佢做海上公屋

一人一張匙卡，寫左夜晚開飯時間同枱號

上船前迫你影遊客照個位

呢架船2017年先落水，我地19年頭搭，當時黎講應該都算係好新既一架船喇，佢既賣點就係大 佢有19層，載客量4500人，男朋友話之前睇bob叔介紹過，所以見價錢唔貴就想黎坐下了。咁我地呢啲窮撚緊係唔會住露台房啦，最細果個房型就好心滿意足了


航行路線上既每一站都會有新一批客人上船，就好似巴士咁每過一個站船上就有一部份客人會換左，所以我地上船既時候已經有啲本身係船上既客人活動緊架喇。放低野之後我地就參觀下架船，呢條係船內既中央街，兩旁係商店、雪糕店、付費餐廳等等，天花板個熒幕會因應唔同活動轉畫面

街既盡頭係一條天鵝牌水晶樓梯，庸俗 好多女盛妝打扮係度影相

甲板上面有個水上樂園，如果係夏天黎一定好好玩架姐

天氣凍，室外既泳池無人用

室內既暖水池就長期都好多人，好耐無浸過暖水既我地日日都會黎浸下

gym room、球場、兒童樂園之類既設施




我地買左疊12張既野飲套票，飲酒既話個價錢會抵啲，呢日個日落景好靚，嗌杯野飲係窗邊睇日落


免費晚餐有兩個選擇，可以去食自助餐或者食set dinner既西餐廳，第一晚我地就去左揀餸食飯既西餐廳，有頭盤主菜同甜品，因為係地中海船所以野食都係行地中海路線，唔知正唔正宗不過味道都唔錯




演奏廳每晚都有唔同既表演，食完晚飯我地去左睇歌舞劇

出返黎見到大街度開緊70年代disco party，成班老友記好投入咁跳緊鈣質舞，我地都去un左幾野

晌船上面一日到黑都有好多活動，又唔使自己plan行程，難怪咁多老人家鍾意退左休坐郵輪周圍去 但呢度既服務都有個唔太好既地方，我地等左好耐行李都未運到返房，落counter問左好幾次都話唔知原因，直至夜晚好想拎返套乾淨衫沖涼再去chur啲員工，先知道原來大背囊入面有把較剪所以被扣起左，最後差不多凌晏一點先拎得返行李，如果佢地既消息可以流通返少少，同客人既溝通好啲會更佳

[下一站: 意大利-Genova]

個日落好正

[下一站: 意大利-Genova]

前一晚好夜先訓，第二朝訓醒我地已經停泊好係Genova既港口啦

第一次埋岸好興奮，好想快啲落去玩，拿拿臨去自助餐區食早餐

食完就落船玩啦，我地無跟收費tour，諗住每個泊岸點都係自己隨意行下。10點左右落船，下晝5:30前返上黎就可以


Genova係意大利北部一個港口城市，亦係一個中世紀既古城，四周都係充滿歷史痕跡既建築物，大街小巷都好有味道，係度隨意散步遊走已經好滿足。雖然呢度既樓唔高，但起得好密，成個城市都密質質咁起滿屏風樓，啲小巷高高低低，亂七八糟，我鍾意呢種骯髒凌亂感






大街上擺左啲二手攤檔，賣一啲飾物、傢俬、相之類既野

去到中心既費拉利廣場 Piazza De Ferrari

經過一間好靚既教堂La Cattedrale di San Lorenzo，由黑、白、粉紅同埋綠色既大理石興建，好特別




原本諗住忍到返上船食晚飯，但真係太餓啦，要係街買啲小食咬下



唔爭在順便食埋gelato


Genova舊城區唔係太大，兩三個鐘就行完，我地慢慢hea到4點幾就返上船了




呢日太肚餓，食飯無影相，淨係記得有人生日所以大家一齊fing餐巾唱歌

夜晚繼續夜夜笙歌，今晚表演將紅同白獻給你

係個結合影子同魔術既表演，好精彩架。話說Download船公司個apps就可以睇到航行既資訊，目的地資料同船上每日既活動都可以係度睇到，亦可以透過個apps預約想睇既表演

我地都無買船入面既上網服務，因為每次靠岸我地就可以用自己隻wifi蛋上網，都好方便。玩完返到房見到前一日被迫影既遊客照已經曬左出黎安躺床上等我買了


影到好似感冒童咁既病樣，不了

[下一站: 意大利-Civitavecchia]

點解係哥倫比亞會咁突然去德國嘅？

Btw 發現好多人去中南美洲長旅行都唔會去巴西，究竟係咪有啲咩原因？

終於追到live 好好睇

[意大利-Civitavecchia]

第二個上岸點我地黎到羅馬省既一個海港鎮Civitavecchia，全日都天陰陰毛毛雨，天氣唔多好


呢個鎮無咩特別，所以我地決定搭火車出去羅馬市中心觀光下


落船時間得一晝，但出市中心要先由碼頭行半個鐘去火車站，然後搭一個鐘火車再轉三個字地鐵，一個一回已經用左四個鐘，其實時間真係好趕，如果坐遊輪黎呢個港口想去羅馬，記得要早啲起身出發 一出閘首先黎到羅馬競技場


媽……好多人，周圍都迫滿遊客，仲有好多企圖笠條手繩上你隻手屈你比錢既手繩黨，我地無係度停好耐。繼續向前行，呢一帶既遺蹟都好大規模而且好好地被保存落黎，就好似一個廢棄既城市，加上呢一日天陰陰，為呢度增添左幾分蒼涼，其實幾有feel



順便去埋許願池

呢度真係太多人，周圍都係同人身貼身，行到有啲炆，出名既景點無可避免就係咁樣呢。好快就要趕火車返上船了，是日光速既走馬看花結束。

返到船上面好肚餓，去自助餐區拎左啲下午茶食，呢度幾乎係全日開放既，唔怕會餓親

狂奔左一晝有啲攰，去左按摩池浸下暖水昅下女女，沖完涼出黎見到大街玩緊bingo，心郁郁就買左幾張玩埋一份

40歐就係咁付諸流水，之前係中南美死慳死抵啲錢就咁倒左落海了 閒逛時又發現珠寶店有遊戲玩，估下邊一隻戒指係豬耳繩，我地都唔執輸玩埋一份

今晚既大街，繼續冚家high high high

對是日景點無乜興趣，今篇異常地短，之後會長返少少架喇

[下一站: 意大利-Palermo]

因為比人搶完野同炒完車之後係南美既日子都好精神繃緊，成日提心吊膽，想去個相對安全啲既地方放鬆下。咁岩搵到由Madrid返香港既平價機票，諗住新年返香港抖抖再出發，所以就過左歐洲了。其實呢段行程真係有啲亂咁黎 我有諗過唔寫出黎，但見有啲幾靚既相想分享又寫埋了。

我諗跳過巴西係因為佢國土太大 至少呢個係我地既原因，長旅行通常都係搭巴士穿州過省，係長條形既智利同阿根廷移動已經用左好多時間，如果再要好好咁玩埋巴西應該要用多兩三個月，所以我地打算呢個國家留返第日用一個trip去，取而代之係行西邊差不多路程但係可以遊覽多幾個國家既路線(玻利維亞、秘魯、哥倫比亞之類)。

歡迎你

好掛住羅馬

係喎 留返一次過去好啲 之前聽過人講巴西太過tourism 同埋消費太貴所以寧願去其他國家

其實南美洲根本就係比好多地方都相對危險.....無可否認嘅事實....

但我發覺有部份熱愛旅遊嘅人根本就唔肯承認，有種掩耳盜鈴嘅心態，每當有未去過嘅人提佢小心俾人打劫，呢班人就會反晒白眼，覺得你嘅好心提醒係突顯你嘅無知... 睇唔透

[意大利-Palermo]

好喇，第三站黎到位於西西里島西北部既Palermo。

Palermo係一個歷史悠久既港口，曾經被好多唔同既帝國同民族統治過，阿拉伯人、拜占庭人、西班牙人等等都曾經佔領過呢片土地，因此多元既文化同豐富既歷史成為左呢個城市既特色，令街上既建築呈現一種獨特既色彩，而呢度都係電影教父既其中一個拍攝場地。比起前一日既羅馬，呢度明顯清靜好多，可以好好咁係街頭漫步






其實係呢度我都有個地方想去，事關講起西西里島，第一時間諗到既就係美食，所以我條師奶癮又起，好想去當地既街市睇下。我地去左比較順路既Capo market，佢係一個身處巷仔既露天市集，兩邊擺滿生果、蔬果同海鮮既攤檔，住係樓上既居民仲會放啲錢係個筲箕度吊落黎買餸，好有趣


買左杯鮮搾血橙汁，原來真係好似西瓜汁咁紅卜卜，第一次見，真係大鄉里

係度買左幾包蕃茄乾做手信

街市入面仲有啲價錢唔貴既餐廳添

我地係其中一間坐低左，叫左地道名物炸魚毛


即叫即炸既魚毛蝦毛同魷魚，估唔到會咁鮮甜，好好味呀 接骨木花味cider都好香，同炸魚毛好夾。好似唔多夠喉，又嗌多左碟醃魚，酸酸地配麵包都幾好味


之後行左去巴勒摩主教座堂，呢度可以話係Palermo多元文化既代表，每一個曾經統治過呢度既民族都會將自己既特色加疊上去，令呢度有鐘樓、拱門、尖塔，亦有圓頂同刻有古蘭經既石柱


果然係西西里，周街都係橙樹


教堂內部


係度我地聽到久違了既廣東話，原來隔離有兩對中年港人夫婦，傾落先知佢地都係我地郵輪上面既團友黎，好熱情咁幫我地影左好多張相

佢地已經移民左去波士頓三十幾年，而家退休左周圍去旅行，因為我地同佢地既仔女差唔多大，所以佢地好鐘意我地，之後都成日係船上面搵我地玩，每日都苦口婆心咁勸我地移民 老人家們要食lunch，傾左陣計我地就分返開各自活動了。



行行下又肚餓，去搵下地道小食先。我地係間小食店發現左兩款呢度既名物，分別係Cannoli同Arancina。Cannoli係一款甜品，係餅皮入面塞滿甜到漏芝士


Arancina就係炸飯團，入面包左啲無乜味既餡，啲飯又無乜味，係一舊無味道的炸物，麻麻地

兩款小食都唔太岩口味，可惜可惜。係度仲見到另一款名物牛雜包，麵包入面夾住啲炆牛潤(?)，睇落好正，但我地已經飽了，所以無試到


最後經過羞恥噴泉，呢個名既由來純粹係因為個個雕像都無衫著，好羞恥


(驚露出JJ會被bam，相片經過處理)

呢晚船上面既晚飯都以西西里島美食為主題



不過我覺得都係朝早係街市食啲炸魚好食好多 而且今日既餐太細份，唔夠飽，所以係餐廳食完我地又去左自助餐度繼續食


[下一站:馬爾他-Valletta]

推

其實南美洲根本就係比好多地方都相對危險.....無可否認嘅事實....

但我發覺有部份熱愛旅遊嘅人根本就唔肯承認，有種掩耳盜鈴嘅心態，每當有未去過嘅人提佢小心俾人打劫，呢班人就會反晒白眼，覺得你嘅好心提醒係突顯你嘅無知... 睇唔透

不過都無可否認地南美帶黎既文化衝擊真係好獨特，有一種好吸引既魅力，我諗我以後都會再去呢個地方。每個地方都有佢既危險性，唯有自己提高警覺，不過又唔使太恐懼既，咁會失去左旅行既樂趣，果時我都係兩星期內瘋狂combo hit先嚇驚左

反哂白眼既話傻豬既係佢地自己去南美比人打劫係必然會發生架嘛， 人地都係好心提佢姐。

如果有機會再去南美，巴西值得去，有好西食，自然人文風景都有，女自然唔在講 
要長條形的話，可以由東北部Fortaleza 玩到去伊瓜蘇瀑布，再去阿根廷 

希望好快有得再去旅行

嘩由第一頁追到而家
夾夾埋埋睇咗五六個鐘都有
係青春呀
樓主同男友好sweet好幸福呀
好想好似樓主咁瘋狂一次呀

不過這些機會不是我的

[馬爾他-Valletta]

郵輪之旅既第四站係馬爾他首都Valleta，呢個城市既海岸線被高高既城牆所包圍，完全就係一個海上要塞既模樣



Valleta係由醫院騎士團為左抵禦鄂圖曼帝國而建立，有"騎士之城"既稱號，作為地中海上既一個要塞，城市規劃都係以防守為主，因此可見有圍牆、炮台、雕堡、高低縱橫交錯既街道。因為建築物既外牆都係米米黃黃咁，陽光灑落既時候整個城市都散發住金黃既色彩，所以呢度亦都被稱為”Golden City”。我地行到上Upper Barrakka Gardens，呢個位於高地既瞭望台景觀開揚，附近景色一覽無遺



其實呢度可以搭𨋢上，但每人要1歐，我地都係行上去好了，不過對於老人家係講係唔錯既設施，因為不斷上上落落都幾攰


城內既街道高低起伏，兩邊既建築同閣樓充滿歷史感，我地無進入教堂同歷史建築參觀，因為係街上游走已經充滿樂趣





作為前英國殖民地，馬爾他都留低左唔少有當時特色既產物

呢日既上岸時間寧舍短，好快就要返上船了，唔知係我虧定呢度真係太多上落斜，行左幾個鐘對腳已經有啲痛


是日晚飯，味道唔錯



連續落左幾日船，黎到第六日終於要抖抖，我地要由馬爾他跨過整個地中海去到西班牙，所以全日都係留係船上活動既航行日。朝早食完早餐我地去左睇煮野食比賽，參賽者要係10分鐘之內煮好risotto，贏家可以得到Master Chef初選既參賽機會，又幾有趣


完左之後又玩bingo，賭仔又黎踫下運氣，結果都係無中

玩完又夠鐘去食自助lunch了

係度我地又見到香港叔叔嬸嬸們，佢地已經搵好位等我地。佢地真係好友善既長輩，我地傾左好耐計，佢地不斷重申香港情況只會愈來愈壞，為左未來一定唔可以再留係度。其實當初出發去大旅行既時候，身邊既人已經叫我地搵到鐘意既地方就係果度落腳，唔好返香港，唔好望返轉頭。我地又何嘗唔知香港已經失禁式墮落，老實講一直旅行我地都有一直留意，但反而2019年返黎之後，就唔想再離開呢度。呢排見到好多去留既爭拗，有人想去外國享受自由生活，有人想留係度見證最壞時代，其實每個人都會為自己既人生負責，我地又有咩權利去對他人既人生指指點點呢。

吹完水，又去劇場睇戲

呢日晚飯我地無去食免費餐，肥仔唔知挑起邊條筋話要試下船上面間扒房Butcher's Cut，聞說係間幾出名既餐廳黎

頭盤叫左菠菜焗蠔，有時真係諗唔明啲西餐，得幾粒蠔仔都要用咁大隻碟黎裝

好味道，雖然好細甩但好鮮味好濃香。主菜嗌左未食過既dry age牛扒


我地都係第一次食呢啲熟成肉，原來口感好特別，食落好似煙鴨胸或者煙三文魚咁冧冧地，好鬆軟，係無試過既味道。都好味既，但無乜肉既質感好似怪怪地咁，我麻麻地鐘意，試過就好了，牛黎講我始終永遠不能忘記阿根廷牛

食完飯仲好早，我地又去左睇以80年代為主題既歌舞劇，好精彩

再去機舖打機

抖左一日回返哂血，係時候睇下聽日落船去邊玩啦


[下一站: 西班牙-Barcelona]

繼續推

G持好好睇

正 好寫意

Bingo如果中咗有幾錢？

如果有機會再去南美，巴西值得去，有好西食，自然人文風景都有，女自然唔在講 
要長條形的話，可以由東北部Fortaleza 玩到去伊瓜蘇瀑布，再去阿根廷 

希望好快有得再去旅行

多謝機械巴建議!! 希望好快可以用到
南美啲女女真係好正，有腰有前有後個樣仲好靚，好鍾意瘋狂同佢地擁抱錫臉式打招呼

辛苦哂
上個post睇左未，睇埋可以消耗一日時間了