[重開][多圖][一年長途遊記] 中南美到南極-西伯利亞至東歐

係呀 我以前都唔知道，之前仲諗住無興趣睇運河所以無諗過會去，有去到真係太好喇

LM 支持，由上個POST 睇到LIVE，好好睇
絲打煮嘢食好勁，你男朋友影啲相好靚
想問啲相係用咩機同咩鏡影架

第二日報左個左tour去Corcovado National Park，呢個被認為係中美洲原始生態保留得最好既國家公園



可能因為岸邊一片長長黑沙灘既關係，呢度俾人既感覺幾特別，而佢亦都真係名不虛傳，即使係落住雨一路行都見到好多好多動物。

我地係哥斯達黎加成日都見馬騮，其實呢個國家有4種原生既馬騮: 最常見到果種白面馬騮white face、spider monkey、howler monkey同埋squirrel monkey，係度竟然半個鐘之內可以見到哂佢地，其中squirrel monkey我地都係第一次見到。佢地金毛細細隻，一群十幾隻一齊出動，一邊傾計一邊合作行動好快速

火雞

野豬仔

係岸邊見到金剛鸚鵡，好開心咁係樹上食緊果實，原來佢地既叫聲好撚嘈好難聽

中途經過一啲ranger station，呢度有啲trail要行一兩個星期，係度會提供床位同浴室比遊客，亦會有少少生態既簡介。


岸邊間唔時會見到鯨魚骨

黑沙灘上面有唔少海龜既巢，呢個成地蛋殼應該比其他動物挖出黎食哂了

導遊托住碌大遠鏡，遠處既動物都可以睇得好清楚

原來鱷魚既正面係咁on9



咁辛苦先黎到drake bay，但可能因為舟車勞頓同不斷淋雨，我個病又惡化返，仲開始咳血 去完國家公園男朋友就叫我留返係屋好好休息，係度五日大部份時間都係吽下吽下，都唔太記得做過啲乜

好彩就算係訓係吊床攤屍，望出外面都有好多野睇



攬住呀媽訓覺的馬騮BB

講起上黎我地都好耐無住過有電視既屋，因為成日上唔到網連電話都好少用，悶就睇下風景，望下雀仔飛黎飛去，望下天望下雲， 覺得仲好睇過睇電視同碌電話

呢段時間男朋友除左照顧我之外，有一日都去左潛水。呢一帶其實好出名潛水，最為人熟悉既係一個叫Cocos Island既地方，潛開水既話可能知道佢既地位係類似大堡礁或者Galapagos，由drake bay附近坐三日船先可以去到。我地咁窮緊係去唔到Cocos Island，就去左搭一個鐘頭船就去到既Cano Island，傳說呢度既水好清，能見度30米，有好多野睇，好彩既話仲會見到鎚頭鯊。不過我地黎得唔岩時候，岩岩打完場風令海水又濁又凍，水既能見度低到同香港有得比，仲有唔少暗湧。雖然同想像中好唔同，但都見到海龜同鯊魚，男朋友無影到相，我都係根據佢寫既日記打返以上紀錄出黎。

養病既日子除左fing吊床同睇馬騮，就係煮下飯仔。男朋友成日話同我去環遊世界但我最鍾意既活動竟然係去街市買餸煮飯，表示得啖笑


得閒得滯，開始自己拉麵同焗麵包



個包好硬，唔係幾好味



去旅行病真係好無癮，但就算幾想出去玩都一定要好好休息快啲好返，因為過兩日就要出發去另一個氣候既阿根廷啦!!

下一站: 哥斯達黎加-San Jose

多謝你 餐餐出街食好貴呀，反正我好鐘意煮野食，而且係其他國家既街市買餸都好好玩!

影相方面問左男朋友:
相機係Olympus em5 II，鏡的話大多是用12-100既旅行鏡， 仲有一枝7-14用黎影星空或者銀河，記得帶支腳架仔呀!

唔該曬絲打同埋你男朋友嘅解笞呀
加油繼續寫落去! 我會繼續睇架
唔好爛尾呀

[哥斯達黎加-San Jose]

經過我努力不斷飲水，個病終於好得七七八八! 無乜野做過就要離開Drake Bay了，真係有啲遺憾，我都唔知自己有無膽量再搭多一次果部大飛黎呢度了。呢日host叔叔問朋友借左部型格戰車，車我地落海邊


我都唔記得左講，睇佢個老實樣就知叔叔一家好好人，知道我唔舒服，日日都會托好多水黎比我飲，又會幫我地打掃洗衫，真係好多謝佢地
Drake Bay呢條村仔，居民少到就黎連我地都認得哂啲人，就好似呢個哥哥仔咁，佢係第一日既船長、第二日既tour guide、今日又係度幫手搬行李上船。
好大隻呀


搭車又搭船之後我地又返到黎San Jose

好耐無出街食飯，呢晚去食左個牛骨湯，感覺好補呀!

我地會係度住兩晚，準備搭飛機去阿根廷。今次貪平住係火車軌隔離，朝朝火車經過都係度響安，好嘈


出門在外最掛住就係香港既野食，我記得當時最想就係食燒鵝同埋點心，咁岩比我地發現附近竟然有間酒樓! 第二朝起身就即刻狗衝去大富豪….丫唔係，係中國城飲茶 (殘體字招牌注意)

媽呀係點心呀

仲有皮強瘦肉粥同叉燒腸

啲侍應都係講廣州口音廣東話，order野食無障礙。
門口告示牌都有好多野睇，華僑小姐乜乜乜同啲招聘樓盤廣告



食飽飽就去行街，中途遇到迷之活動，睇唔明睇左陣就走左

之前講過呢度有好多二手衫店，我又無乜冬天衫帶黎，所以! 係時候shopping time了!!






雖然唔是特別鍾意濕平，但見到咁多平貨真係幾興奮。衝量過背囊既重量，最後買左兩件冷衫，同男朋友一條唔知真定冒牌既紅褲仔，估下呢度用左幾多錢

兩件冷衫加埋都只係₡1000，即係唔使13蚊港紙，平均每件HKD 6.5，反而男朋友條褲仔就要₡2000，成HKD 26，好貴。重點係藍色果件冷衫，係Made in Hong Kong架

佢感覺好有歲月既痕跡，一諗到佢幾十年前係香港製造，飄洋過海去到外地，輾轉俾我晌成座山咁既二手衫市場搵到佢，最後帶返佢返香港，成件事真係好浪漫! 可能佢都好想返故鄉，所以係度比我搵到佢?

然後，終於黎到要離開中美既日子了


今日會搭3個鐘飛機去秘魯Lima，再轉4個鐘redeye機去阿根廷Buenos Aires。等上機等到肚餓，我地會黎呢個窮撚天地，好多backpacker都係度試食朱古力同試飲咖啡放題，一個眼神一個微笑大家都對對方心領神會

除左留黎紀念既錢幣之外，我地仲有₡1500剩，拎去買左個樹懶杯墊留念

等上機既時間又悶又漫長，係杯墊後面寫下警世格言先

Pura Vida意思係pure live，係哥斯達黎加人既生活態度、問候語、祝福語、道別語，係everything。係呢度可以唔識hola，唔識adiós，影相唔使擺yeah或者捽lin手捏心心，只要做個牛角六字手勢 講聲百搭既Pura Vida就可以喇! 純樸又熱愛大自然既哥斯達黎加人真係完美演繹呢個生活態度，希望以後可以再有機會黎呢個咁Pura Vida既國度啦! 再見喇豆飯!!

好快就會踏足南美大陸啦，好興奮




下一站: 阿根廷-Buenos Aires

[阿根廷-Buenos Aires]

經過四個月既旅程，我地終於黎到南美啦! 計計下數我地好快就要去南極，呢個我地唯一有預先訂好既行程，所以而家都係時候要黎到阿根廷，準備向南邊進發了。

我地朝早六點就黎到阿根廷首都布宜諾斯艾利斯，太早未去得住既地方，係機場搵個舒服既角落合一陣

訓醒食少少野就出發去今次既住宿，今次我地又住apartment，每晚HKD230。個單位晌係棟好古舊既建築之中，好古典好靚，我好鍾啲殘舊野，可以住係呢棟咁有歷史感既建築物入面真係好開心

連鎖匙都好靚


重緊要係咩呀，係露台有部任用既洗衣機呀

呢度天氣好好，洗好既衫晾一晝就乾，簡直係師奶福音!

通完頂真係好眼訓，搞唔掂。落樓下士多求其買啲餸炒個麵就要訓覺保命，訓醒再好好周圍行下

唔使客氣啦
謝謝你既支持呀，其實我都唔知仲有無人睇緊，但諗諗下如果連寫自己想寫既野都要理有無人鍾意，咁樣做人太辛苦了 所以唔使擔心啦，悶悶地就返黎睇下有無update啦。

絲打G持你

一直有追緊

總有追緊啊，間中就入黎睇你有無更新，支持支持！
有個肯陪對方去任性既另一伴好正，好好珍惜

追緊

好正
好少可有港女唔驚昆蟲又能屈能伸
屋企個件實嫌污糟
暫時最鍾意邊個國家?

睇到好想去旅行

留名

抖足精神，今日可以周圍行下探索呢個城市喇! 黎之前我地無乜睇到關於呢度既資料，估唔到呢個城市係咁靚，街上充滿歐洲式建築，新舊建築融合得毫無違和感，靚得黎有啲殘舊同混亂，係一個好浪漫既城市。
之前兩個月見樹多過見人，好耐未見過咁多高樓大廈喇




不過條街枕住好大陣尿壓味，路邊特別係銀行門口好多露宿者，亦有唔少玻璃比人打爆既舖頭

Lonely planet話呢度有好多潑屎潑尿黨，佢地會幾個人一夥，一個負責向你潑屎尿，其他人會扮好心幫你抹身偷你野。好地地偷野唔得既，好玩唔玩玩屎 我地係度無遇上潑屎黨，只係之後遇到其他小偷，唔係成身屎都算係好好彩喇，呢個就之後再講啦。

七月九日大道，為紀念阿根廷獨立日而得名，係世界上最寬闊既街道

Buenos Aires 直譯既西文意思係好空氣，呢度既天氣真係好好


講起晌阿根廷既洗費真係一殼眼淚，呢度既物價唔貴，仲好平添，但問題係我地撳唔到呢度既錢，無銀用。呢日我地行左幾條街，試左好多間銀行，都無一部ATM可以read到我地既卡，張卡過幾日仲比人盜用埋 我地無諗過之前係啲窮鄉僻壤都可以撳到錢，係呢個大城市竟然唔得。呢度碌卡又唔係太普及，我地唯有係袋底僅餘既美金度搣左張100蚊出黎，拎去黑市唱。

點解唔正正經經去找換店唱呢，我地上網睇到Buenos Aires因為政局不穩既關係，正當找換店個兌率又差又浮動，黑市個價係最好既。鬼叫你窮咩，我地就跟住網上面其他backpackers既指示，膽粗粗行左去條尿壓味好濃厚既街，都唔敢拎電話出黎影相。果度有好多大叔係路邊叫”cambio cambio’’ (“change change”)，見到我地兩個額頭鑿住水魚既亞洲人即刻埋黎捉住我地，佢地好進取，其中一個大叔搭住男朋友膊頭就夾左佢入個好似重慶大廈咁既商場。大叔帶左我地入間舖頭仔，間野係賣皮革既，都幾光鮮，但我地都無心情睇野，啦啦林唱好錢點好數，睇清楚啲錢無穿無爛就走人。

激動得滯打得長氣左，我地係阿根廷留左一個月，呢個都只係我地無銀用悲劇既開始。總之出遠門記住一定要申請返張plus/ cirrus信用卡，真係好撚好撚緊要，如果唔係就會好似我地咁。

唱到幾個錢揸手，個人都開始飄，大佬獎勵我食雪糕

我地散步去到一個大公園



果度有片大草地，有好多情侶同小家庭都係度攤抖，我地都係度攤左陣。呢日個天好藍，好靚好舒服


離開公園既路上見到個青銅色鐘樓，果時岩岩好6點鐘，聽到佢叮咚叮咚響

行到黎呢個中央車站搭地鐵


呢度既地鐵好易搭，呢張SUBE咭係佢地既八達通，可以幾個人共用，一個嘟完入閘pass比下一個就得，我地話想買一人一張仲比職員笑傻仔


佢地既地鐵站好古老，每個站都有好有特色既磁磚或者壁畫，我地搭呢條紅色線更加係全南半球第一條地下鐵路，不過而家已經換左新一個型號既車箱喇




之後! 就黎到今日既戲肉! 萬眾期待既鋸扒環節!!
阿根廷既牛肉咁出名，一場黎到唔試下就太對唔住自己喇。難得做呢啲高消費活動一定要好好準備，經過幾個字既資料搜集，搵到間又出名又大件夾抵食既扒房，叫做Don Julio。呢間野要7點鐘就乖乖地黎排隊等開門，如果唔係就要等位喇。雖然等位既時候會派肉批同香檳，但我地寧願早食早享受!
遲左黎要等位的人

我地就入去坐低先喇


入到去因為我地一腳牛屎，唔識睇個餐牌，侍應就帶左我地出去揀扒

真係好震撼，一大盤唔同部位既牛扒擺哂係面前，我地揀左一直都好想食既斧頭扒，塊扒好似我頭咁大，都係港紙220蚊咋我地仲叫多左兩個小食，烤牛腎同烤菇，再加一枝紅酒，order好就埋位等開餐。
呢隻Malbec好似係阿根廷好出名既紅酒，好香果香味，我地之後都左佢既出產地度瘋狂飲

烤牛腎率先登場

生生地，好juicy，爆到成個碟都係肉汁，食剩最後一啖先醒起要影下佢個橫切面

千盼萬盼，終於等到我地既斧頭扒啦!!!


呀!!! 係幾咁美麗既橫切面，簡直係天賜既美味 我上世到底係做左啲咩好事，今世竟然有機會好可以食到如此美味既食物 我從來無食過咁香濃爆汁既肉，如果問成個旅程最好味既食物係啲咩，一定係呢舊斧頭扒!!

入黎既時候已經問左係可以碌咭既，呢餐飯埋單2700 peso，計返當時匯率大約五百零蚊港紙，好超值呀!

原來仲有咁多人睇緊，受寵若驚了
睇完啲牛肉相好肚餓
去煮野食先

Many thanks for sharing your itinerary and photos 📷.

好正呀! 欣賞樓主的遊記。

絲打
真係呀，我成日都覺得我地上一世一定係積左好多福，今世先可以遇上對方

兩個國家得唔得
最鍾意墨西哥既人同哥斯達黎加既大自然

嫌污糟咪即係個人整齊囉，都幾好丫，我都成日比男朋友話我污were

係阿根廷牛肉真係好正

我仲睇緊架，加油打埋佢啊

晌Buenos Aires既第三日，呢日夜晚就要搭通宵機去下一個城市Usuahia了。 呢度個host好好人，比我地用間屋用到夜晚，所以食完早餐我地就可以繼續出去遊覽呢個城市喇。

我地首先去左貴族公墓Cementerio de la Recoleta

呢度好大，大到會盪失路，安葬係度既都係名門望族、達官族人，其中最多人慕名而來既係阿根廷國母貝隆夫人既墓地。每一個墓都好似一間小屋，葬得少人既會就咁將棺木放係屋入面，如果係家族式既話棺木會放係地下室，屋既門口都刻左墓誌銘或者一篇短文，紀錄墓地主人既生平。比起出生，佢地更重視死亡，認為人出世既時候什麼都不是，人生終結時至係結算一生成就得失既時候。

每個墓都好特別，雕刻左華麗既天使或者栩栩如生既人像



有啲墓出面睇平平無奇，但企係門口裝入去會見到由內向外先望到、砌左精緻圖案既玻璃窗，我地估係比墓入面既先人睇既



呢度既墓有啲打理得好好，有啲就荒廢左，佈滿蜘蛛網，玻璃爆哂，連裡面既棺木都舖滿塵亂七八糟。即使你係貴族，在生時幾有錢地位幾咁高，隨住時間流逝都係會被人遺忘


呢度真係好靚，尤其是係荒廢墓地果重蒼涼感，好吸引。每個墓既建築各具特色，沿路都見到好多人黎寫生，亦有唔少老師帶住小朋友黎參觀。墓園係免費入場既，在遊客角度我覺得好值得一來，唔知係度既先人會唔會覺得咁多遊客黎好煩，定係其實都想有多啲人黎探佢地呢?


掃完墓，我地就去左雅典人書店El Ateneo，呢度曾經係個有100年歷史既大劇院，2000年既時候易手，改建成連鎖書店El Ateneo既其中一間分店。大劇院既大部分特色都保留左落黎，令佢曾經被評為世界最美麗既書店


聽講呢度咩書都有，亦有好多古典既書籍。
我都係度他鄉遇老師 係KING同性感囚犯呀! 果然係咩書都有呀

我地太夜黎到，行左陣書店就要打祥。自從琴日鋸完扒就一直對呢度既牛肉念念不忘，所以係搭飛機之開之前，我地決定要揹埋背囊再去扒房擦多一餐!

Buenos Aires中既貧民區La Boca係Tango既發源地，市區街上都有教人跳Tango既舞步


今次去既呢間扒房叫做La Cabrera，我地7點幾先黎到所以要等位，等位既時候都有粗獷版既汽酒派

等左8個字左右就可以入去喇，開飯前有好多一碟碟既小配菜比你止餓

飲食要均衡，嗌左碟燒菜

前一日試過斧頭扒，今日就食牛仔骨。呢個牛仔骨好似磚頭咁大舊，一份竟然有兩件，而且只係HKD 150，真係嚇死人。

呢份牛仔骨都好好食，但我地就覺得唔夠琴日既斧頭扒驚艷，而且呢間餐廳既服務都比較澳牛。如果係Buenos Aires只夠時間食一餐飯，我會推介前一日既Don Julio，岩岩google過原來佢仲係2019年唔知咩選舉世界排名頭50既餐廳黎

去到機場，食埋個飯後果，準備搭飛機去世界最南端既城市喇!!


下一站: 阿根廷-Usuahia