[重開][多圖][一年長途遊記] 中南美到南極-西伯利亞至東歐

斷斷續續睇過依個po好多次
決定要由頭開始睇
樓主加油

有無計過南美到總共洗左幾錢?

得閒入黎睇吓有冇文

想問下去咁遠同咁耐，預知咁多野影，相機你點樣配置鏡頭定帶晒去？

下一日，我地再接再厲，join左北線團。朝早繼續食營養早餐


今日連團友都無，成團人得我地兩個。聽人講北線既景色比南線更靚，可惜前一日落左場雪，無論係邊個位望落湖面都好似舖左層白紗咁




呢日晏晝係腸仔飯團，夠哂飽肚


呢一日無得落湖玩，主要都係行下山睇下風景影下相




去到另一個山頭，又見到隻狗狗，一直叼住條樹枝撩我地要玩扔樹枝，呢度啲狗真係趣緻


兩日既南北線tour咁就完左喇，雖然無想像中既景色，不過大自然就係咁樣，我地無辦法控制天氣，學會欣賞每一個意料之外既景色，咁先會令旅行更有趣嘛。

七點鐘又係時候開飯，今日食白汁雞皇意粉

臨走前一晚，再散步去薩滿岩睇日落


[下一站: 俄羅斯-Irkutsk]

[俄羅斯-Irkutsk]

離開Olkhan，我地又返返去交通交匯處Irkutsk。經過休息站時我地想嗌返上次隻poision食，但今次個休息站大啲靚啲，唔係上次果間cafe仔黎，隻posion都無咁多汁可口


返到去上次間apartment住一晚，主要都係洗下衫同休息下，之前都無好好周圍行過，搞掂啲家務我地就出去行下

我地都係第一次黎東正教教堂，原來女仔要包頭巾先入得既，教堂裡裡外外顏色都好夢幻，係俄羅斯好常見


體操大國，連屋苑樓下啲公園都唔同啲



下一站我地打算去首都莫斯科，由Irkutsk繼續搭5日西鐵就可以過到去，之不過用特衰護照入境俄羅斯有樣野要注意，就係只可以免簽証逗留境內14日。俄羅斯係全世界領土最大既國家，特衰護照入境最長竟然只可逗留兩星期，真係好撚岸鳩。我地係俄羅斯頭頭尾尾已經留左7日，再用多5日黎搭火車既話真係唔使玩。

鑑於懶得返邊境彈出彈入刷免簽逗留，我地又唔是鐵膠，對西伯利亞鐵路無一份執著，所以就決定搭1個鐘內陸機去莫斯科好了

我地搭既S7航空

一個鐘機程都有熱餐食，好滿足。以前返工食飛機餐食到厭，而家反而好掛住果陣飛機味 自從呢次長旅行之後已經差唔多兩年無去過旅行喇，真係好懷念去一個完全唔認識既地方到處闖盪既感覺，唔知下次再可以再揹返起呢個背囊出發係幾時呢。

[下一站: 俄羅斯-Moscow]

終於有更新了 表示感動

2月是咪貝卡爾湖全盛時期
睇巴打篇遊記啲風景好靚

多謝支持

咁又無喎
我地無特登mark低啲數，果邊住宿每晚150~350hkd，食飯每人每日50~100hkd，係交通費貴啲，城市之間既巴士要幾百蚊港紙，食住行生活費黎講我覺得每個月一萬蚊港紙已經好鬆動。不過智利/ 秘魯/ 玻利維亞一啲熱門旅遊區消費都會特別貴，主要去呢一帶會join tour玩既話可能要預多少少旅費。

唔好意思掛住左打機，檢討中

男朋友: 帶左兩支鏡，一枝變焦天涯鏡，一枝廣角影星星。影多一陣相樓主就黑面話我掛住影相，好大壓力唔敢影咁耐

好感動又有野睇

好似2月尾3月頭，貝加爾湖真係比想像中靚好多，消費又平 ，除左凍左小小

樓主呢

Mon Hun?

留名 早排又睇返另一位巴打既南極之旅

係呀

我都追緊

[俄羅斯-Moscow]

上一篇打錯左，由Irkutsk去Moscow既機程應該係5個鐘先岩。呢兩個城市雖然同樣係俄羅斯境內，但就有5個鐘既時差，所以頭幾日都好唔慣，成日都夜晚8點幾9點就訓著左。

係機場拎完行李既時候我地見到部咁既機

俄羅斯好興call車，主要既call車apps有3個: Gett, Uber, Yandex.Taxi，之後我地主力都係用Yandex.Taxi，貪佢係當地夠普及，覆蓋面又夠廣，去到波羅的海三小國都仲用到。不過岩岩黎到未上到網，就試下用呢個Gett先啦。


的士司機好健談，佢話近排好努力學緊英文，希望可以同遊客溝通得好啲。我最鐘意健談既當地人架喇，把握機會請佢推介一下俄羅斯有咩好食，佢叫我地一定要試俄式燒肉串Shashlik (資料圖片)

仲有就係必飲既vodka，仲推薦左支心水既牌子比我地，叫我地今晚記得去超級市場買黎飲添。

黎到市中心太陽已經落山喇

莫斯科既住宿有啲貴，所以我地係度住膠囊旅館，咁岩book到入面一千零一間雙人床房，每晚240hkd。呢度住左好多後生俄仔，去沖涼既時候成日都見到佢地淨係下身圍住條毛巾仔周圍走，都咪話唔正(無圖)

好喇，放低野又去超級市場買餸啦，順便獵奇下佢地有無啲咩奇怪野。見到呢個即食兔肉，睇落不甚可口

仲未適應到時差，到左夜晚都未肚餓，求其買左啲煙三文魚配麵包做晚飯


緊係唔少得的士司機推薦既Vodka啦，呢個牌子果然係超級市場一眼就搵到，而且一啲都唔貴，只係幾十蚊港子咋

大叔教我地俄羅斯地道既vodka飲法係加檸檬，再配青橄欖，我地謹遵教誨買齊材料試飲 (兩支果汁純粹係特價想飲)

司機真係無介紹錯，呢支vodka淡淡地，好易入口，加埋檸檬同橄欖味道好清新。只不過呢一日舟車勞頓加上未適應時差，我地飲左三分一支，係床度傾傾下計就訓著左了。

開始觀光行程喇，起身先去附近Café食個早餐


再散步出市中心，今日我地會去莫斯科既地標紅場、洋蔥頭一帶。由住果度行大半個鐘就出到去，經過裝修緊既克里姆林宮外牆

就到達洋蔥頭既背面喇


有人話洋蔥頭無分正面背面，無論邊個角度望過去都係正面黎。但我就覺得明明大門口得一個，又點會面面都係正面喎

洋蔥頭個真名叫聖巴西爾大教堂，佢座落係紅場南瑞，頭頂上既洋蔥形圓頂係東正教教堂既特徵，佢係沙皇伊凡四世為左紀念征服喀山汗國而興建既，傳說沙皇係教堂竣工後就將建築師既隻眼整盲，防止佢為其他人建造出比洋蔥頭更美麗既建築。

話哂係俄羅斯最出名既地標，呢度真係好多人，尤其是好多中國遊客，聽普通話仲多過聽到俄文。入去參觀之前我地先圍住佢行個圈，欣賞下佢既外觀

入去參觀要買入場劵，每人700盧布，85hkd左右

教堂裡面都貫徹外觀既華麗感，畫滿五顏六色既壁畫



呢度有部份作為博物館咁展示左啲展品，主要係啲宗教野。我無心冒犯架，但我覺得東正教啲公仔同我認知中既宗教作品好唔同，有一份莫名奇妙既喜感

把扇上面果兩隻好似永澤同學


行到一間房仔，有班男人係入面唱聖詩

佢地既歌聲好柔和，加上房仔細細回音大，顯得歌聲更加美妙。我計過佢地每20分鐘就會唱一次，睇好多遊記都見到佢地，我諗佢地應該係長跓係度既。

洋蔥頭出面睇色彩繽紛，入到去都係一樣，牆身畫滿花花裝飾，好夢幻

我地好鐘意呢幾幅牆，係度影左一輪相，發覺有個俄國姨姨一路痴痴地望著我地，明明人地先係當地人但我唔知哪兒來的自信，走埋去問佢有係咪有啲咩需要幫忙，係咪想人幫手揸機? 佢好努力咁用英文單字話講覺得我好靚，問可摸耳同佢合照

唔知其他國家既人係咪覺得亞洲人個樣好得意，去旅行間唔時就有人走埋黎想合照，我諗呢個姨姨都係咁掛。姨姨一臉滿足咁離開之後，又有個華人大叔話想影幾張我同呢幅牆既相，男朋友話又唔會少忽肉，咪影下囉
.
.
.


我全程就係呢個忍屎樣，原來要比唔識既大叔影係好尷尬既，心入面開始佩服啲比龍友影既女仔。呢幾張相完全係黑歷史，大叔望住影到我勁醜樣既相好滿足，傾左兩傾仲發現佢竟然係香港人黎 希望佢唔係呢度巴打黎啦

生得靚真係好唔得閒 被影完一輪我地又返返出紅場啦


”紅場” 有 “美麗的廣場既意思，佢係莫斯科最古老既廣場，好多活動都會係度舉行，例如慶典、閱兵等等。廣場既四周都係標誌性既建築，例如呢個又稱貴族百貨既 國家百貨商場


國家歷史博物館


好似個蛋糕咁既喀山大教堂


睇完洋蔥頭一個景點我地覺得今日已經功德圓滿，無再入呢啲景點入面睇，而且都係時候肚餓，就去搵間餐廳坐低食晏喇。呢度既中國人多到啲食肆既餐牌都係有殘體字


我嗌左鴨，鴨肉入面好似八寶鴨咁塞滿野，不過入面塞既唔係豆而係酸菜，出面再淋啲紅苺醬，酸酸地咁好好味

肥仔食類似基輔雞既東西，雞肉中間有好多芝士流出黎

每碟都係六十幾蚊港紙，遊客區黎講都唔算貴呀，仲幾好味添。

返去攤抖左陣，我地就行去附近條大街搵晚飯食喇。
俄版步兵，件長褸好型

係度竟然見到丸龜製麵，入去試下先

好多貌似炒麵同令人理解不能既配搭

以為連鎖餐廳難食極都有個譜，我地錯了。碗麵好咸，炸野又凍又淋，其實俄羅斯菜咁好味，點解我地要咁獵奇呢，下次都係乖乖地食返俄國菜好了

好羨慕樓主可以搵到個心愛既人陪自己一齊癲去咁多地方
要好好珍惜啊

樓主個post陪左我好多個扮工日
多謝樓主
睇左好耐但而家先第一次留言
寫得好好

我本身都打算去蒙古可惜武肺

真係好似小丸子個同學
對比起啲天花壁畫好搞笑