[重開][多圖][一年長途遊記] 中南美到南極-西伯利亞至東歐

因為呢個係香港forum，得香港人會比人認得嘛

近烏蘭巴托果一兩日間中上到，其他時候上唔到，可能我地張卡廢

多謝你

想問下樓主過程中有冇寫下日記
點解咁耐咁多野都仲記得

多謝分享 睇到樓主話會寫日記記底啦

[俄羅斯-Irkutsk]

下晝兩點半，我地黎到烏蘭巴托火車站，再次見返呢架綠皮列車



由烏蘭巴托再搭多五日火車就可以去到莫斯科，但我地岩岩先五日無沖涼，唔想又係火車上面吽臭多五日，所以打算先去離俄羅斯邊境不遠既Irkusk。相信好多巴絲都知道Irkusk係去貝卡爾湖既駁腳地，網上資料話貝卡爾湖冰封季節係1~4月，當時已經差不多4月中，但既然話今天春天特別凍，我地就搏一搏去睇下仲有無冰睇啦。

烏蘭巴托除左多韓國餐廳，連車站都有韓國野食賣，買左條紫菜卷上車食

之前無留意，床頭原來有風扇既

沿途既湖仲係結緊冰，似乎情況樂觀


今次我同男朋友係上下格床打對角，同房係一個樣好似麥玲玲既蒙嬸同一個係俄羅斯讀書既蒙古哥哥仔，佢地好好笑，過境果時望住男朋友護照張相笑鳩左佢好耐 不過語言所限同佢地溝通唔多，反而隔離房班泰國人就好岩玩

有次我行去廁所既時候聽到佢地房嘰哩咕嚕咁好熱鬧，就想話去結識下佢地，佢地好熱情，邀請左我入房玩之餘仲係咁請我食香蕉乾，見我嘴唇乾燥又送左支潤唇膏俾我，我好鍾意佢地呀

男朋友應該係怕我亂搭訕又會遇上怪人，坐係走廊邊睇書邊微微笑咁離遠望下我。其實我同佢既性格都幾唔同，我成日都大癲大肺坐唔定，佢就係一個沉實內向既人，佢話佢最鍾意見到我活潑開朗既笑容，我亦好享受同佢坐係郊外享受彷彿世界上只有我地倆人既寧靜。可以遇上真心相愛既人真係唔容易，我望望男朋友溫柔既眼神，向佢送上幾塊剛到手既泰式香蕉乾，佢一副真係無你收既表情，啃住香蕉乾繼續笑住睇書。

凌晨又係過關既時候，同中國入蒙古邊境一樣，由蒙古入俄羅斯邊境都係全程留係車上，連車廂都唔可以離開，要等關員上黎檢查。蒙古關都還好，俄羅斯果邊真係超嚴，審犯咁審，我地呢啲第一次入境俄羅斯既旅客仲要全家資料既表，所有直系家屬既資料都要填寫。全車既天花板都要拆開哂比佢地照，行李又翻箱倒籮驗屍咁驗，仲有啲軍人會帶隻犬上黎聞，真係好麻煩。不過我覺得最有趣既係蒙古同俄羅斯邊境只係隔左40分鐘車程，但啲人個樣完全180度唔同哂，一邊係成吉思汗樣，一邊係紅鬚綠眼白皮膚，完全見唔到中間既過渡混種樣，真係好神奇呀。

呢程車車程唔長，只需要23個鐘既時間，我地就黎到Irkutsk喇

一日有兩篇文睇
多謝樓主

樓主成日形容到佢同條仔咁sweet咁有默契，好閃

短文呢

追到buenos aires
估唔到咁平 又估唔到Panama 咁貴

比樓主篇新文閃親

告別左秦國朋友仔，行出車站就見到host嬸嬸等緊我地，佢會車我地去佢間屋。今次我地住係一棟幾舊下既紅磚唐樓(?)，睇啲comment話呢一種好似叫蘇聯式房屋，係我好鍾意既殘舊既style


我地住唐5樓，呢度無𨋢，揹住啲行李行上去都幾攰，唔怪之得呢度特別平啦

棟樓出面望落好舊，不過入到去屋入面就好摩登好cozy，有廚房有洗衣機，都係每晚170hkd



係俄羅斯住過幾個地方，我發現呢度既床有樣野好奇怪，就係啲床褥勁淋。啲M巾廣告咪好興有條女撻落舊雲度，成個人冚哂落去被棉花包圍住咁既，呢度啲床exact7ly就是呢種感覺，朝早起身條腰好痛，估唔到戰鬥民族原來鐘意啲咁軟綿綿既床褥。

黎到第一時間就係使用洗衣機洗衫，洗走哂啲羊蘇味佢

然後出去附近既超級市場買餸，去到邊都食生菜既我地發現呢度既生菜好貴，3塊菜葉，盛惠港紙8個半，平均價格每塊葉2.83元

我地係個類似賣兩餸飯既counter不左啲煙三文魚返去下午茶，為返大約五十零蚊港紙。呢度既煙三文魚真係好好食呀，唔會好咸，好厚切好肥美

夜晚我地久違地煮飯仔，好耐未自己煮過飯啦，男朋友話想食雞，呢晚就煮蘑菇燴雞。食唔起菜，食燈籠椒


第二日既早餐，開心果乳酪，超級好味

俄羅斯魚子醬都好出名，買左盒6hkd既黎trytry，好咸，賤骨頭食唔慣，下次買盒10hkd既貴野再試先


Irkutsk比我地既感覺係個舒服既城市，我地會係度晌留三日，第二日我地想去睇馬戲團，俄羅斯既馬戲出名丫嘛! 打算去睇既係一個local小型馬戲劇場Irkutskiy Tsirk，可以上網或者門市買飛，我地唔識俄文驚google translate上網買飛會搞錯，就直接行過去買飛

呢度門口有啲比細路玩既玩意，入到去又有幫小朋友畫花臉貓既化妝攤位、外套存放區、賣爆谷氣球既攤檔，氣氛好好


呢度門票唔貴，視乎坐既區域價格由400~1200盧布(48~145hkd)不等，我地都係第一次睇馬戲，所以買左貴少少坐最前幾行既位。呢個馬戲團比較本土，場地同價錢都好貼地同親民，全場觀眾都係一家大細既本地人，3歲以下既小朋友唔使買飛，都有唔少家長帶埋啲塞豆窿黎坐大脾


開始喇



雖然係平民馬戲，但表演一啲都唔乸西，飛人飛刀魔術歌舞樣樣齊，睇到我地心肝都跳埋出黎




間場仲有小丑搞氣氛，觀眾全部都好投入，我地隔壁果三個細路笑到斷氣咁滯，即使一句俄文都聽唔明，都好感受到個歡樂氣氛

半場會有小息放大家去廁所，買爆谷同紀念品，放到咁上下就會響鐘叫大家返去

下半場主要係動物表演



主持人個樣好似超音鼠入面個壞蛋博士


第一次係俄羅斯睇馬戲團，我地都覺得好好睇呀!! 除左表演精彩之外仲有好多同觀眾既互動，目測九成九都係俄國人既觀眾全部都好投入，對表演者好尊重，會比好多反應，令我地開始覺得雖然俄國人個樣好正經又惡惡地咁，其實內裡可能都係好熱情架。

[下一站: 俄羅斯-Olkhon]

唔好咁客氣啦

都唔係架，有時都會嗌交，佢試過係危地馬拉街頭扔低我自己走左去
不過都係啲小嗌霎，過一陣大家又會道返歉傾返點解會咁，望返轉頭記得既都係甜蜜既回憶，唔開心既事無寫低係日記又唔記得左，打返出黎咪變左咁

好短嗎將就下啦

BA真係好正
Panama係我地屎忽痕想有渡假feel先比較貴，果堆島仔度都有好多好平既hostel架

上次去Irkutsk 又係想試你上邊係魚生 但怕肚屙 唔夠膽

都好 開心嘅嘢就記得 唔開心嘅嘢就放低
人都會開心啲

Panama 要平都有得平？
BA 真係食扒都抵

Btw 樓主西文學成點

Medellin 有冇去搵返escobar 俾人殺個roof

扮工時間睇咗兩日
終於live咗
依家冇得去旅行
睇下遊記當去咗
樓主搵到人陪你瘋狂旅行一年真係好正
繼續加油！

個魚子醬係溝埋芝士?
食落口腥唔腥

我又黎啦

小冬瓜呢