[重開][多圖][一年長途遊記] 中南美到南極-西伯利亞至東歐

支持!

樓主聖誕節快樂

依段時間一直追post
見到D海同天咁靚
覺得係城市好抑壓

泥漿幾錢？

多謝
大家聖誕&新一年平安快樂呀

學下啦可以睇多好多野嘛

聖誕快樂呀夏里絲

樓主聖誕快樂
順便推下post先

城市真係令人幾抑壓
但好彩香港都有好多好靚既郊外
都希望呢度既風景相可以帶比你一啲快樂啦

個團百三蚊港紙左右

多謝你呀，過兩日繼續出文比你地扮工時睇

絲打聖誕快樂！又追到live，精彩旅程一浪接一浪咁 

晌Cartagena既第三日我地參加左泥漿半天團，佢有兩個時段，貴啲但包埋去沙灘既上晝時段(70,000COP~hkd175)，或者只浸泥既下晝時段(55,000COP~hkd135)，我地唔想咁早起身，所以揀左平啲既下晝團。

呢個團既目的地係Volcán de Totumo，距離市區大概一個鐘車程，係個好似小山丘既蚊型火山，只要行廿零級樓梯就可以去到火山頂

換好泳衣就可以行上去啦，上面有個正方形既泥氹，爬梯落去，條梯包滿泥好跣，一落到去就有呀叔抆住你幫你做馬沙之

唔記得左講，呢個團包左火山既入場費，但就無包服務費既。咩係服務費呢，呢度有人會幫你磨沙、幫你用電話影相、幫你沖身，當然你可以選擇唔使佢地幫手，但其實每個服務你既人都係收5000COP(~hkd12)，我地覺得都ok，就快樂地使用服務了。樓梯口個大叔省完，就pass我落去池邊比其他同事繼續省，好似條生產線咁，好好笑


聽講啲火山泥係混合左溫泉水既，暖笠笠咁好舒服，覺得自己好似係朱古力噴泉入面咁，好得意 啲泥漿好滑，間唔時會有少少好幼既沙，傳說浸完呢度既泥漿浴皮膚會至少滑一個星期架!! 我都唔知呢個窿有幾深，因為啲泥漿太浮，心口以下都沈唔到落去，對腳伸唔到落去太深既地方。

呀叔捽得好落力，連大脾內側同心口都會幫你省，黎之前唔知會有男人同你捽身，因為想擴大同火山泥既接觸面積我仲特登著左件少布既既泳衣黎不過呀叔每日都摸幾廿個肉體，其實佢都唔係咁得閒理你，搞掂就會扔你埋一二邊閒置play。平時啲濕鳩火山泥護膚品都賣咁貴，黎到要查返夠本


玩完就去沖身啦，離開既時候樓梯口大叔仲會好貼心咁幫你撥走咁啲泥，沖身既地點就係我地身後面既湖。
爛泥怪x2

呢度啲水其實都唔講得乾淨，仲有啲牛屎味添，上網睇仲有條女話係度沖完身之後尿道炎 我諗都係因為好多人沖身所以濁左啲姐，望落都ok既

行到湖邊就有沖身部既姨姨衝過黎捉你洗身，佢地就好似細個呀媽幫你沖涼咁，捉住你省鑊咁省，仲會抽手入泳衣入面洗。男朋友就唔多鍾意，話好似比人強姦咁，個呀姐塞佢個頭落水洗頭浸到佢差啲窒息，又伸手入去洗佢屎忽，再一手除左佢條短褲幫佢搓乾淨啲泥，笑到我仆街 雖然係咁，但佢地真係洗得爽手又仔細，短短兩三分鐘之後我地身上連泳衣都搵唔到一滴泥，呢度所有人員都好有效率，真係好佩服佢地呀。

接受完療程，即刻容光煥發左，真係好滑架唔係講笑，之後都真係keep住滑左個幾星期

如果想將呢份喜悅帶回家，山腳都有個亭比你買啲樽裝火山泥返屋企

到底邊個咁醒諗呢樣產品出黎，諗起啲萬人斬既火山泥係個樽入面慢慢發酵，我就不了

我前兩日已經發現樓下個reception哥仔對男朋友嗒哂糖，呢一晚好攰唔想郁，叫男朋友落樓下色誘佢幫我地嗌外賣，成功得到了Frisby炸雞



之後既一日我地去左舊城區閒逛，呢度既建築物都好靚，好富色彩


我地都唔係行左好耐，去左間教堂


食左雪糕

遊客區既街頭有好多我地身後果種著彩色裙，頭上頂住生果盤既黑人既女人收錢比人影相。佢地叫做Palenqueras，其實原本唔係Cartagena人，而係住係東南邊一條叫San Basilio de Palenque既村，呢條村由逃脫既黑人奴隸所管治，所以住既都係黑人，佢地當時為左生計就穿著住佢地傳統既彩色裙、頭頂住農作物竹黎到呢度賣生果，久而久之佢地鮮艷既服裝配上色彩繽紛既街道就成為左Cartagena既地標喇。

傍晚既時候我地行左去城牆，呢幅海邊既城牆係以前為左抵禦海盜既襲擊而興建既，牆上面有好多窗，入面窄，外面闊，爬到出去岩岩好可以坐兩個人


同對方肩並肩睇日落，又係一個浪漫既黃昏


好快我地就要離開哥倫比亞了，下一站 將會係我地係南美大陸遊覽既最後一個城市。

[下一站: 哥倫比亞-Medellín]

個泥漿浴好似酒池肉林(泥漿版)

推

隔咗一排返黎又追到live
係浮島著民族衫的相好正

樓豬好正
遠程同個人

好warm

追到live, 樓主加油唔好爛尾

手快快未打好就出左文，是但啦
祝大家新一年平安快樂呀

多謝機械人巴，新年快樂呀！

係喎成堆全身泥既肉蟲係個狹窄空間載浮載沉咁蠕動

係呀係果度過聖誕真係好夢幻