[重開][多圖][一年長途遊記] 中南美到南極-西伯利亞至東歐

終於唔爛尾到南極

https://youtu.be/nUFrn5tIctc

有冇ching都有睇佢嘅中南美旅行vlog？
佢最新條片咁啱update到阿根廷

樓主有冇開ig / fb page?

冇睇一排
見到幾篇新文 好開心

[阿根廷-Ushuaia]



黎到冰天雪地既Ushuaia了!!

烏斯懷亞Ushuaia位於阿根廷最南邊，遊人稱佢為”世界盡頭城市”，但有人話世界最南邊應該係智利既Puerto Williams，是但啦稱呼呢啲野唔使咁認真。 呢度係我地黎緊上船出發去南極既地方，只不過我地早左成 11 日黎到 因為呢度既氣侯同我地之前幾個月生活既森林和原野好唔同，我又岩岩大病完一場，打算早啲黎適應天寒地凍既天氣，諗返起都覺得果時任性得好快活。不過Ushuaia都有好多地方可以遊覽，所以留咁多日都絕對唔會覺得悶。

呢度既機場細細，好香木味

搭車離開機場既時候可以見到呢個小鎮係一個三面被雪山環抱既海灣

去到今次住間apartment撳極門鐘都無人應門，仲開始落起雪黎，雪愈落愈大刮到臉都痛，只係著住麻質褲既我地就走左入間士多保暖。


我地出發之前其實係香港買左隻wifi蛋，隻野聲稱係全球九十幾個國家都上到網，係發達國家係收得唔錯架，但係偏遠地方就好多都未覆蓋到。不幸地我地係度都係上唔到網，就係士多買左張SIM咭打算聯絡個host，但原來當地既SIM咭要用阿根廷既身份証黎activate，當我地懊惱之際收銀哥仔就用自己身份証幫我地activate左，附送一個帥氣既笑容，俊俏既阿根廷人真係外冷內熱呀!!
得到電話咭之後好快就聯絡到host，佢亦好快就黎到開門比我地




呢間係我地住過最鍾意既住宿之一，屋仔細細一房一廳，好有家既感覺，係貴左少少每晚要HKD300。屋入面每個角落都有暖氣，每個窗都望住雪山，好似掛滿好靚既風景畫咁，我地都好鍾意呢度。
廳個窗

廚房個窗


係度留左好多日，都唔知由邊度開始寫起好添就講下係度既日常先啦。
按照慣例，黎到一個新地方我地都會攤抖返三兩日先，我地係11月頭黎到既，雖然落住雪，但而家其實係Ushuaia既夏天，氣溫都有3-10度。我地住係離市中心45分鐘路程既民居，附近一個遊客都無，好平靜好舒服。我地都好鍾意沿漫無目的咁周圍行



晌附近間超級市場搜購下日用品，呢度既牛肉都好優秀，色澤紅潤，呢一盒當時都只係三十幾蚊港紙

呢度啲師奶好猖狂，個個都好似要買成個月糧返去咁，可能天氣凍個人懶得出街買餸掛。要係度住十幾日，我地都買左唔少餸


第二日起身食整個靚早餐

食完慢慢散步去海邊







碼頭有好多海鷗，望左陣見佢地不斷叼起啲野由空中擲落地，google話原來佢地會咁樣掟爆啲貝殼類黎食入面既肉。地下果然有好多破碎既貝殼，又學到野了

經過啲travel agency見到去南極既last minute船飛廣告，當時係11月1號，見到既廣告都係一星期內出發既船

講開南極船，我地係半年前early bird優惠買既，十日團 每人5795USD。如果黎呢度係為左去南極的話，我覺得買early bird會好啲，因為可以揀自己心水既船型同出發時間，而last minute就好睇彩數，如果一場黎到Ushuaia先發現買唔到岩心水既last minute飛應該會有啲失望吧。假如只係想黎踫下運氣的話，咁就黎到先捕下last minute都無妨。

天氣凍個人都懶左，唔想行成粒鐘行返去，就去遊客中心問下有無車可以搭，原來有部巴士可以返屋企附近，太好了。市內既巴士好易搭，車站都好光鮮，路線方面只有A B C三條循環線，大部份地方都可以去到，每程兩個幾港紙




河邊啲野花好靚，想抆兩條返去插，但返去先發現佢離開泥土就會謝，果然野花都係應該係野外快樂生長，我太自私了對唔住呢



天氣凍唔想日日煮飯，又炆定一大烹牛肉食幾餐

係咪好生性呀我

完左先答你

me好少睇vlog

曾經開過一兩個月，果時係live住咁update。但跟住覺得咁樣好攰，又霸佔左珍貴既旅行時間，搞到唔可以全情投入咁享受旅行，就砍掉左個page了

儲肥篇遊記慢慢睇

終於追到live
唔好爛尾

閒置play左三日，我地仲未開始觀光活動，今日開始漸漸開啟返遊客模式了。首先進行溫和啲既活動，行下博物館。

呢度有好多博物館，我地先黎呢間規模細細既世界盡頭博物館 Museo del Fin del Mundo，呢間野係舊銀行改建而成既，佔地好細，好快就睇完


Ushuaia 位處既省份叫做火地島Tierra del Fuego，名字由來係因為當初歐洲人發現呢片土地既時候，係船望上陸地見到原住民生起既火光，所以就叫呢度做火地島。
原住民係咁樣既

火地島原住民因為歐洲人帶黎例如麻疹同天花等外來既病而令人口急速下降，最後因為種種原因，原住民人口凋零至部族徹底滅絕。
有好多雀島標本介紹

當時遠征黎呢度既歐洲人鍾意放個番鬼佬嫦娥係船頭


係度生活左幾日，我發現如果用呢身裝束去南極一定唔夠暖，主要係我件冒牌North Face太薄了 件野係以前返工去尼泊爾果時買既，Kathmandu果度有條街專賣老翻戶外野，其實質地好好架，果時好鍾意去行街，呢件一舊水唔使既偽Gore Tex就一路著到而家。為左唔想再次病到咳血，我係市中心間減價outlet買左件防水厚外套，咁就唔驚會冷親啦。

我地又用百零蚊買左個望遠鏡，準備去南極睇動物用

作為前西班牙殖民地，拉丁美洲有好多churros食

Ushuaia出名食又抵又好味既長腳蟹，其中有一間特別受遊客歡迎，但係度既頭幾日我地無做功課，求其見到一間寫全逢星期四全單八折就衝左入去食




佢地煮蟹既方式係白烚，食既時候吱啲檸檬汁，呢隻野2kg港幣$200左右，好甜好好味呀。呢啲蟹好好笑，原來最後一對腳仔縮左係身體入面，要搣開蟹蓋先見到

飲飽食醉，又等巴士返屋企


得到左保暖裝備，聽日可以去行山啦!

好好睇 支持
唔好爛尾

支持支持

Hea左咁多日，係時侯要去舒展下筋骨啦!

我地今日去行火地島國家公園Parque Nacional Tierra del Fuego，市中心有呢種coletivo搭過去

嗌車既時候同佢講你住宿既地址，佢就會係約定時間黎樓下接你，即使我地住既係airbnb都無問題。車票就係來回票，行完去返遊客中心等車走就ok。

搭大半個鐘車就黎到，一落車會見到呢間世界盡頭郵局

相傳呢度個呀伯會印企鵝郵戳上你張postcard，不過間郵局今日無開。無得寄postcard，我地就開始行啦。呢度有好多條路線，搭車既時候問過司機大佬，佢推薦沿海果段路，雖然比較長但風景最靚，我地就聽佢話揀左呢條路線黎行喇


沿途有好多雀仔，溪流同海岸既水好清，周圍瀰漫住一陣獨特既木香，係呢片幽香既樹林漫步真係好寫意


一雙一對既upland goose，好可愛


我件新外套+望遠鏡，是咪好醒目

行行下遇上了幾匹駿馬




行到攰搵個草地休息下食個橙，我見呢度咁靚，叫男朋友不如幫我影張訓係草地既靚相，但佢影到我往生極樂咁既樣


請問呢度係咪得我一個唔識欣賞佢影既相

食飽繼續行，下半段路離開海邊，行返入樹林。
染左個忘了愛punk頭既毛毛蟲

好大甩痴頭芒

呢度既樹好多都佈滿咁既窿，樹林中亦不時傳出啄木既聲音

我地都係第一次見到啄木鳥，佢個樣好兇狠，下下都好大力好似裝左摩打咁轟落舊木度，真係驚佢會腦震盪


行到好肚餓，醒起出發前叫男朋友幫手烚左兩隻蛋帶黎食，一咬落去，入面溏心既

邊有人整溏心蛋去野餐架 爆到成手都係強汁，男朋友仲笑騎騎話佢係咪好叻，識整溏心蛋。好啦好啦，就算你咁奇怪，又影到我往生咁既樣，但有你係身邊既人生先係完整 順帶一提我同呢個肥仔由中一開始就識架喇，數下手指到今年原來已經識左18年，時間過得真係快


呢度好好行，大部份都係平路，下晝四點幾我地就返到黎遊客中心


遊客一下，cup下印仔先


實在太肚餓，係遊客中心間cafe買左個empanada，empanada呢種肉批係南美好常見既
小食，好正架


小巴係市中心放低我地，順便可以去買下餸，今日買左支Rosé，一啲用黎煮海鮮意粉，剩返大半攞黎飲

阿根廷既酒真係好好飲，仲要價格親民，普普通通二三十蚊港紙一支既已經好好味! 係度我地每日都要飲返支酒先安落

原來發緊燒，唔怪之得咁wing，休息兩日先

好sweet
樓主休息多啲 好返哂先再寫啦
唔洗急嫁 等你！

幾時結婚

終於到載極

成日覺得著左冬天衫，個人特別柒 特別係影相

I've been wondering about getting a temporary job in Siberia in January or February because I'm interested in working there temporarily. It'll expand my vocabulary and im sure it'll be an extraordinary experience.

因為Ushuaia既地理位置係咁天涯海角，而且氣溫嚴寒，令呢度成為禁錮囚犯既理想地方，尤其是係重犯同政治犯。呢間海事及監獄博物館 Museo Marítimo y del Presidio de Ushuaia 由監獄改建而成，資訊性好強，除左監獄既事，仲有好多關於火地島原住民同舊時航海既歷史，好多黎Ushuaia既遊客都會黎參觀架。

每一格監倉都改建成小展館，間唔中有啲令人不安既假人

囚犯都係著呢種黃藍間條既囚衣

其中一忽係未經翻新，原汁原味既監倉，一入去就好寒




睇完博物館，我地去左一間網上啲人好推薦既餐廳食晚飯。呢間野叫El Viejo Marino老船長餐廳，係市中心近海皮既一條大街，晚市夜晚7點先開門，我地6:50去到已經驚覺大排長龍緊!


好彩我地咁岩入到去，呢度似乎有自己既漁船，所以啲蟹零舍新鮮同平



我地叫左黑鱈魚同埋長腳蟹，今次隻蟹大隻啲都只係HKD180咋，呢次既蟹肉比起之前食過既更加札實同鮮甜，不過隔離兜飯就好麻麻。最驚喜係黑鱈魚原來好好味，充滿油香入口即溶，加多支白酒，好滿足 難怪咁多遊客慕名而來啦!

係度我地遇到一班強國人，等位既時候同佢地吹水，得知佢地將會同我地同船，而呢個南極之旅係老細請佢地黎既公司旅行……okay…… 佢地睇落都有啲文化，希望佢地係船上面會乖乖地啦。

話時話，呢度超級市場買既牛扒都好高質，就好似呢三塊加埋唔使60蚊既扒咁



煎出黎都係咁優秀! 我呼籲所有喜愛食肉既人都應該黎阿根廷!!

就黎上船，恤返個靚髮先，剪完我地有好好清理返個地下架。
呢個係旅行期間我幫佢剪得最好睇既一次



愈黎愈接近出發去南極既日子，我地都好似即將去秋季旅行既小學生咁愈黎愈期待，每一日我地都會黎港口睇下我地架船黎左未




今日我地架船都係未黎，明明仲有兩日就出發喇，點解架呢 諗諗下先發現原來我地記錯左出發日期，明明11號先出發但硬係以為10號出發，仲要兩個人一齊記錯，好彩早啲發現姐

繼續留名！

Ushuaia寫左咁多篇，呢個係出發前既最後一篇啦!!

因為原本間溫馨小屋有其他人租左，所以我地要搬去另一間hostel住幾日。係廚房煮野食既時候有個大叔過黎吹水，佢神神化化咁，話我地可以叫佢做Honey，原來佢係National Geographic既攝影師，每年都會黎南極影相，今年係第五年了。Honey係一個以色列人，但因為周遊列國咁去影相已經十幾年無定居過係一個地方，真係好難想像既生活呀。

同佢吹完水，我地就出門口去玩啦。係度日日都望住雪山生活，今日就決定去雪山腳行下。呢度有幾座唔同既雪山，我地揀左Glacier Martial黎行，由市中心搭巴士再轉的士黎遊客中心起步，呢段路徑好輕鬆，來回都係行兩個零鐘，好多老友記都會黎晨運架。





呢啲果原本就係呢隻奇怪既粉紅色，好卡通

原本想搭呢個滑雪纜車上黎既，點知原來已經停用左幾年


黎到呢度就封左路，怕遊客會出意外唔可以再向上行。上山既時候大雪紛飛，上到黎個天就開始清，可以見到雪山啦


落山既時候好好天，山腳既海峽都睇得好清楚

見到整個城市既景色，如果呢部纜車有開就好喇


搭車落山既時候見到Honey棟左係公路石膊度影相，夜晚返到hostel問佢當時係度做乜9，佢話佢今日由hostel行路去雪山，全日總共行左13個鐘 原因唔係因為無錢要窮遊，而係要感受生命中每一秒，影低每一個精彩時刻，唔可以錯過每一個日出日落，唔可以比食飯同訓覺耽誤。唔怪之得無咩見過佢係房訓覺，都無見過佢食飯，呢啲係咪叫藝術家既瘋狂，佢既熱誠的確好令人敬佩，但我希望佢可以身體健康啦，留返條命先可以做世界冠軍家嘛。

黎到係Ushuaia既最後一日，我地都係無目的地咁周圍行下，胡亂探索呢個地方


佢地既公園設計得好周到，傷健既小朋友都可以一齊玩韆鞦

係度玩左一陣



去到海邊個廣場，又遇上慶祝活動 捉左個好似記者咁既女仔黎問，原來佢地係度慶祝緊文化日



呢度既細路騎馬仲叻過我踩單車，好多爸爸都係度教小朋友騎馬

睇佢幾得戚


另一邊就有跳舞表演睇


啊!! 見唔見到呢兩個dee dee!!! 阿根廷仔真係好靚仔!!! 姨姨我係度睇左成粒鐘先肯走。仲有呢對後生仔，邊跳邊甜笑，係青春呀




睇完人跳舞，又黎望下我地架船到左未先…

到左啦!! 呢架就係黎緊我地要搭既南極船，聽日就出發啦


下一站: 南極

gchi

快小小啦