[重開][多圖][一年長途遊記] 中南美到南極-西伯利亞至東歐

輕輕一推

[芬蘭-Helsinki]

由聖彼得堡去芬蘭原來好方便，搭3個半鐘火車就去到，車貴差唔多要成六舊水港紙，都幾肉赤

到達啦，係北歐呀，車站都好似寧舍光鮮咁

但窮撚總係可以搵到睇落霉霉爛爛既地方住

北歐既物價真係名不虛傳地貴，為左減少出街食飯既次數，我地揀左呢間附設小廚房既龍床盤，每晚三百蚊港紙


晌芬蘭做野既朋友話我地知，呢度既餸菜好新鮮，自己買餸煮好好食。呢一日都夜啦，唔夠時間出去玩，於是我地行去附近既大型商場，去超市進行震奮人心既狩獵


講係咁講，我地又邊有咁多錢掃貨 最後買左兩舊肥美既三文魚煮晚飯，每舊港紙三十零蚊，真係好抵

每邊煎佢兩三分鐘

入口即溶，好優質呀

呢度最好就係個廚房仔入面竟然有洗碗機，洗碗部同事表示非常滿意


因為覺得交通費唔抵，所以係Helsinki既四日入面我地都無搭過車，行得多都會攰，我地就決定嘟部單車黎踩

5歐可以租24個鐘，都唔算貴丫，漫無目的咁係唔認識既城市周圍踩好舒服。男朋友最開心就係呢度既電動scooter同共享單車一樣咁common，佢係美國既時候已經成日嘈著話要玩，睇下佢幾開心

頭15分鐘可以免費試玩，之後每半個鐘5歐，佢玩左九個字就嚇到收手，嘟返部單車黎踩。想慳車錢但最後用左成15歐黎租車玩，諗返起都覺得幾好笑



但係咁就令我地睇到好多有趣既風景，我地踩左去好多地方，不知名既河邊啦，係公園仔睇老師幼稚園小朋友黎玩，經過墳場見到有人出殯。Helsinki比我地既感覺好舒服，呢度既人好有禮貌，而且感覺好安全，係一個令人心情放鬆既地方。最後我地又黎到左一個大商場，行我地好鍾意行既家品店

佢既夢想係第日屋企可以放到個bbq爐，每日都可以食燒肉

又順便見識下當地既樓價



今日全日都無所事事，咁係因為夜晚我約左個朋友黎我地個龍床盤食飯。佢好開心我地黎左Helsinki，話知道人在異鄉，掛著既美食離唔開幾種，打邊爐一定榜上有名，所以帶左包醉雞湯底、菜心、雜丸、同一堆優質靚肉黎同我地打邊爐

佢真係好細心，我以前以為離開香港一段時間，最掛住既可能係魚蛋燒賣、燒鵝、燒腩仔之類，但旅行耐左，菜心竟然漸漸成為左我地最掛念既食物之一。 晌香港，菜心好似空氣一樣理所當然地存在，原來係外國菜心係咁難搵，就算有都又老又貴又唔甜 我地心存感激地享受呢一餐久違了的打邊爐你地係異鄉既時候，最掛著既香港食物又係啲咩呢?

老土啲都要講句，黎到芬蘭，點可以唔試下芬蘭浴呀

芬蘭浴即係焗桑拿，據講起源自一家人煮飯時天花板漏水，雨水滴落灶頭啲熱石度形成蒸汽，啲人發現係比蒸氣蒸一蒸之後成個身舒筋活骼好暢快，因而發展出芬蘭浴。芬蘭浴係芬蘭好重要既文化，傳統既芬蘭浴都係一間小木屋，通常會起係水邊，方便人焗完之後跳落水過冷河。而傳統上焗既時候大家都會一絲不掛，正呀 不過男朋友份人好鬼怕羞，第一次黎講佢想試下啲容許有塊布摟下身既，為左配合佢，我地揀左可以著泳衣入場、比較摩登既Löyly Sauna


佢係2016年先開張，所以所有野都好新淨。呢間桑拿座落係海邊，咁焗完就可以跳落海浸水喇。

入場之前我地係呢度間餐廳食個lunch先，我飲呢碗黎芬蘭一定要試既三文魚湯，落左好多刁草，但又唔會覺得香草味太搶，好濃厚好好味呀

男朋友食駝鹿肉丸，係好味版IKEA肉丸，配埋啲莓醬，味道都係無得彈

芬蘭既食物真係好好味，不過呢餐食唔飽既飯盛惠四百幾蚊港紙，令佢成為左我地係度唯一而且最後一餐係街食既飯

食完坐一陣，等啲食物落完隔，我地就入場啦。呢度入場費每人19歐，包一條毛巾仔，入到去先係更衣室換泳衣

除左更衣室之外既設施都係男女共用既，我覺得咁樣好好，咁拍拖黎既情侶就可以一路傾住計焗喇。呢度由天花到牆到地板都係木造既，好芳香好舒服。我地兩個大鄉里都係第一次焗桑拿，係度有兩間唔同既桑拿房，一間係環境光猛氣侯溫和既普通桑拿，另一間就叫做smoke sauna。Smoke sauna入面黑蚊蚊，充斥住蒸氣，能見度極低，熱到不得了，坐左一兩分鐘就覺得連氣管都就快要灼傷了。奪門而出之後成個人仲冒既煙，可能已經蒸熟左


焗到㷫熻熻，係時候落海浸浸

果日天陰陰，氣溫只係3度左右，浸一浸唔只毛孔收縮，直頭骨都赤。我覺得仲凍過係南極跳海，跳落去浸左下過膊頭就彈返上黎 我成日都唔明點解啲人要咁自虐跳落啲凍水度，之不過咁樣浸一浸，上返水又真係好似有神功護體咁，完全唔怕凍

芬蘭浴完成身散哂，平時浸完溫泉咪會好攰既，焗桑拿原來仲攰過溫泉好多。呢晚我地用打邊爐剩低既肉淥麵食，加埋朋友送既喇沙湯底同蛋麵，暖笠笠，好味道


[下一站: 愛沙尼亞-Tallin]

樓豬加油

男朋友話我成日掛住玩，玩到唔訓覺又唔出文，沒收左部機

時空被惰性扭曲了

食飽啲可以唔食晏晝嘛

竟然有人發現到呢啲九唔搭八打格係男朋友得意之作黎，佢而家沾沾自喜緊

有文

收埋自己玩

我都睇左陣，一開始心諗呢個雕像做乜9 咁搞笑，後來先發現係改圖

芬蘭好似無大家想像中咁貴，租過一間airbnb幾百蚊一晚有埋個迷你芬蘭浴

男友影相好靚呀

La línea recta es del hombre, La curva pertenece a Dios.

我用一星期返工偷懶時間 終於睇到26頁
感謝樓主 令我重燃 出走南美既願望
加油

想問下樓主有無買旅遊保險，要買邊隻先可以保曬咁多個國家

睇咗幾日 終於追到live 樓主好幸福 可以同男朋友去一個咁長既旅程

留名支持
睇到去歌斯達黎加
樓主d用字好生動盞鬼
好睇

留名支持
扮左幾日工追到live

[愛沙尼亞-Tallinn]

由於Helsinki消費太高昂，逗留左四日我地就打算逃向波羅的海三小國了。三小國之中離我地最近既愛沙尼亞同芬蘭只係相隔左一個海陝，乘搭渡輪就可以到達。因為又想慳車錢，我地決定行一個鐘去渡輪碼頭


48kg既我長期揹住加埋26kg既行李，果排真係覺得自己大隻左好多


行下抖下，終於黎到渡輪碼頭



去愛沙尼亞既船程需時兩個鐘，原本以為係好似去澳門啲金光飛航咁既樣，但原來艘船係好大隻架

入到去仲有啲似遊輪咁樣

行李寄存要2歐，我地覺得啲袋放係腳邊就OK，無需要用到呢個服務

船上面不設劃位，亦都無渡輪一排排果種櫈，乘客可以係餐廳入面自己隨便搵個位坐

今朝做左咁耐負重運動，買幾粒肉丸獎勵自己先

船上仲有好多舖頭，無無聊聊可以去望下


好快就黎到愛沙尼亞首都Tallinn喇


Tallinn係歐洲中世紀建築保留得最完整的城市，亦因為咁令佢成為左世界文化遺產。今次我地會住係舊城區既一間apartment，個單位就係我身後面呢堆屋度

又係唐五樓既頂樓，我邊行邊心入面咒罵，下次一定唔會再揀要行咁多層樓梯既住宿。好在上到去開門，睇見間屋仔又幾舒服幾溫馨

我地覺得兩個人一齊去旅行，平均既分工好重要，如果太倚賴其中一方咁佢就太辛苦喇。我地兩個負責既野都唔同，我負責住宿同飲食，交通同錢銀由男朋友負責，行程方面就大家一齊商量。我地都完全信任對方既選擇，目標係就算中伏都唔嗌交唔怪責，因為呢啲安排都係對方好比心機資料搜集同計劃既，又點會忍心怪責佢呢。

執行李既時候係袋底搵到兩舊係俄羅斯果時買既包，應該仲食得掛，拎黎醫醫肚


時候尚早，食完下午茶係時候出去行下了

Tallinn舊城區大部份地方都被保留完好既城牆包圍，城門兩邊都係一啲圓碌碌既塔，睇落好可愛

可係係因為當時係春天，或者愛沙尼亞人真係好鍾意花，呢城門附近開左好多花店，配上黃昏既光線，好靚

太陽落山喇，我地都係時候去買餸

呢度既物價正常好多，啲野比起香港平少少咁，而且仲好新鮮添。今日呢舊腩肉好香好好味



今次呢間住宿雖然有少少貴，每晚要400hkd，而且要行五層樓梯先到，但我地都覺得係值得既，因為佢既位置好好，令我地足不出戶都可以欣賞到舊城區既美景




坐係窗邊窺探黎樓下拍拖既情侶都係一大樂事

[愛沙尼亞-Tallinn]

坐係窗邊窺探黎樓下拍拖既情侶都係一大樂事

最尾兩張相個對比好正

係咪晌郊外少少既地方
我都見過有啲係湖邊既屋仔包芬蘭浴好抵，但要揸車先去到

我用一星期返工偷懶時間 終於睇到26頁
感謝樓主 令我重燃 出走南美既願望
加油

南美個cultural shock真係好正，同埋留得耐個人都會跟住一齊熱情奔放左，好鍾意周街攬人

有呀，果時買左AIA 果隻，佢係計香港出發最長保你180日，所以得半年係有旅遊保，我都想知有無時限長啲既旅遊保。

但係真心唔推薦呢隻，比人偷野都唔保既，辣殺