[智利>玻利維亞-Atacama]
Atacama沙漠由智利北面伸延至玻利維亞,所以參加三日兩夜既過境團係最佳既移動方式,由智利San Pedro出發去到玻利維亞Uyuni,途中會經過大大小小既鹽湖同埋天空之鏡,依照呢個地圖由下至上右至左移動
只不過係翻查lonely planet既時候我地見到咁樣既一段….
每5個參加呢個團既人,就有1個認為係waking nightmare,除左覺得啲食宿唔好,主要原因係醉酒司機同埋佢地瘋狂既駕駛技巧,聽講之前仲有車試過行行下爆炸(?) 報名既時候都有問過tour agent,佢地話而家情況已經改善左好多,意外少左,而且佢地既司機開車都好安全,叫我地放心。我地都心諗,無事既,應該唔會咁黑仔接二連三遇上意外掛… 我地諗…
見識過呢度咁靚既風景,其實我就好想參加呢個行程既,反正無飽飯食無床訓對我黎講都好閒,最緊要就係好玩! 所以諗左幾秒之後我地就報左名喇,每人175USD。 第二日朝早7點我地就上左負責pickup既小巴,向邊境進發
一個鐘之後我地就黎到智利同玻利維亞既邊境,呢度既高度已經去到4600米,感覺到空氣開始稀薄
黎緊幾日都會keep住係咁上下高既地區活動,係度我地同其他團一齊先食個露天早餐
後面果部就係黎緊兩日坐既車
再去排隊過關,我地見有其他國家企圖落地簽既遊客搞左好耐,好在我地一早整好簽證,所以好快趣吸個印過得
我地團有9個人,過關之後大家分成兩部jeep,我地同一對希臘情侶同一個德國妹妹一部車,負責開車既guide 20歲,另一部車就係兩個德國師奶同對巴西夫婦。
原來呢個團行程係好豐富,每隔3-4個字就有一個景點,而且沿途既景色都好令人驚嘆,路邊仲周不時有小動物係度偷偷望你,就好似呢隻可愛既vicuña
草泥馬型態既動物係度有四種,有人養同埋我地係香港日本台灣啲農莊常見既係llama同alpaca,而呢度野外見到既係vicuña同guanaco,個樣既分別大概係咁
呢度既湖都係以湖水顏色命名,周不時都有啲火烈鳥係湖邊活動,我地首先去左Laguna Blanca(白色湖),再去Laguna Verde(綠色湖)
呢度既土地同山水都好特別,所有野都係五顏六色,紅綠黃灰,好似彩虹咁,令人不得不讚嘆大自然既神奇
然後去左一個沙漠Desierto de Dali
再去附近既Aguas Termale de Chaivri浸溫泉
雖然係高地唔好沖涼是常識,但見到個溫泉暖笠笠咁我地都忍唔住狗衝左落去浸。啲水唔係太熱,乾淨就一定唔乾淨架啦,個個都係成身臭咁走落去,仲有啲人坐係池邊齋浸&捽腳,但係荒漠中有溫泉浸個感覺都幾神奇
浸完溫泉好舒暢,就繼續去下個景點啦。我地黎到一個4900米既間歇泉Geysers Sol de Mañana散步,果度有好多色彩繽紛既地窿,硫磺味好濃,個天飄住雪而啲窿又不斷冒煙同噴泥漿,成件事好迷幻
呢度無任何圍欄,你鍾意行到幾近啲氹都得,就好似後面對情侶咁
導遊叫我地要小心行,因為八個月前就有個遊客跌落去淥熟死左。既然係咁點解唔起啲圍欄呢,不過又咁諗,就係呢度咩都咁raw,我地先可以欣賞到咁天然景色。導遊當時話政府計劃係度整個地熱發電系統,唔知而家整左未呢。
好似去左好多地方咁,但其實只係過左一個上晝。去完間歇泉我地就到達今日既住宿,我地一車人一齊住一間房,床係石床黎,我鍾意硬床所以感覺還好,男朋友就覺得訓到周身骨痛。可能因為我要求低,或者無期望就無失望,我覺得環境都算做出乎意料地好
係度我地食個lunch先,係咁荒蕪既地方有菜有腸仔有可樂,好滿足了
南美有一種對抗高山症既coca tea,不過我飲完都覺得無咩唔同
因為以前去過兩次高原男朋友都就死咁滯,所以出發前我地都係衛生署配左啲高山藥。黎大旅行之前我地係香港打左幾支防疫針,黃熱病呀傷寒瘋狗症之類,當時要寫哂啲目的地比醫生睇,佢係咁話使唔使去咁多地方呀
最後開埋瘧疾同高山藥比我地,今次食左呢啲高山藥真係醒神左,個頭無咁痛,無記左所有針呀藥呀加埋都係每人$1200左右,買個安心都抵比既。
驚大家唔適應高原氣侯,食完飯仲有訓晏覺時段,好正
訓完下晝我地去左住宿附近既Laguna Colorada(粉紅湖),水入面既粉紅色藻令湖水顯現出咁少女既顏色
今日既景點唯獨是呢一個係要比入場費,150Bs (同港紙差不多1:1),有啲貴
可能係因為呢度舖左樓梯級掛
走既時候個天開始暗,湖水亦由淺粉紅變成啡紅色,隨住天色轉變呢度既景色都會變得好唔一樣,真係好靚
睇完湖,今日既行程都終於完結。我地返到酒店休息,等食飯既時候同大家傾計,佢地都係好和善既人,德國妹妹岩岩完成左高中,只有17歲,佢話想係繼續升學之前去見識世界,諗清楚自己想要啲乜,屋企人都好支持佢既個決定,年紀輕輕已經清晰咁知道自己想法真係好手替佢高興。希臘情侶同我地差唔多大,係好搞笑既人,成日叫大家趁希臘破產過去玩,個女朋友仲精通西文,經常負責做大家同導遊既翻譯。
Hea左陣又到晚飯既時候啦
有湯、茄醬意粉(無肉)同甜品,估唔到係middle of nowhere晚餐都會咁豐富,大家都食得好開心,真係一班容易滿足既人
食完飯導遊同我地講,呢度原來有得沖涼,不過要成10usd沖一次。我地今朝已經浸過暖水就唔沖了,但希臘情侶上晝怕污糟無浸溫泉,所以希臘男仔決定去沖個涼,沖完第二朝佢就病倒了