[阿根廷-Mendoza]
Mendoza省位於阿根廷中部,鄰近智利,盛產葡萄,以釀酒業聞名。之前提過係阿根廷既日子我地日日都鍾意買酒飲,經過日積月累係超級市場既浸淫,我地發現酒樽上面Mendoza呢個地區既出現率好高,就開始對呢個地方有興趣。原來Mendoza省當中一個叫Maipú城市係個滿佈葡萄園同酒莊既地方,我地都未去過呢種地方,法國酒莊就去唔起喇,不如去下阿根廷既啦!!
由Mendoza車站去Maipú有啲麻煩,我地問左好多人,得知有部183號巴士可以去Maipú,就拎住站頭呀姐既墨寶去搵呢部巴士
唔知點解等左個幾兩個鐘巴士都未出現,周圍既人見我地擺明係唔識路咁款都好熱心幫我地,但阿根廷既西文好難明,就算用google translate都唔係好知佢地講乜,好多時啲路人都係畫出黎或者親身帶我地去認為可以等到車既車站
呢個係巴士站擺地攤賣紀念品既小販叔叔係我地既救星 同佢之間既小故事令我好難忘, 佢見我地係站頭一臉苦惱咁呆等左咁耐,就黎問我地想去邊。得知目的地之後,佢開始截停經過既每一部,係每一部巴士,幫我地問路
果時天氣好熱,但叔叔都堅持每部巴士經過時跑出去截車問路。佢知我地未食野,驚我地肚餓,仲係佢個friend既攤檔拎左兩個冬甩我地食(好瘦呢個就係佢個friend)
問左十架八架車之後,跑到身水身汗既叔叔話比我地知原來因為今日係公眾假期,去Maipú既巴士路線改左,班次都疏左,重點係今日無183號巴士,而係應該搭184號。佢送我地去另一個站再等左一個鐘,終於等到我地部巴士了
臨上車前,叔叔仲送左一個佢賣既卡套比我地,話希望呢個聖人可以保佑我地一路平安
我地真係好感激佢,作為答謝,我地比左啲兩蚊同兩毫子港幣銀仔比佢留念。出發前我地就係度諗有咩可以帶比外國朋友做手信,男朋友帶左幾個利是封,我就帶左堆兩蚊同兩毫神沙,覺得佢地波浪既外形係錢幣中比較少見,而且大大隻字寫住香港,人地一定會記得啦。大叔收到都好鍾意,佢開心就真係太好啦,到而家佢都仲成日同我地video chat
旅途上不免會踫上一啲壞人、遇上不幸既事,但我始終相信仲有唔少無私既好人。如果遇上少少挫折就封閉自己,唔相信其他人,咁就會錯過好多遇上好事既機會啦。
唔怪之得開得咁疏,成程車除左我地就無人搭
我地係度諗,如果我地年紀再大啲先出發,或者就唔會為左慳呢HKD100的士錢而周圍撲去搵巴士,咁就唔會遇上小販叔叔,唔會出現令我地咁感動既呢段回憶。如果睇緊文既你都想出發既話,趁後生去啦,趁仲有氣力揹住個backpack周圍撞板,晌跌跌踫踫之中體會更加多啦
巴士漸漸黎到鄉郊地方,我地係田邊落車行去今次既住宿
由於決定得太臨急臨忙,酒莊既住宿已經full哂,好彩我地都搵到一間係葡萄園裡面既住宿,呢度只有果園無釀酒設備,會將種出黎既葡萄賣去附近既酒莊加工。
住宿每晚HKD540,包早餐
房出面就望住一大片葡萄園
望住發呆都好寫意
仲有好嗲既貓咪
沖完涼係葡萄園入面周圍行下,收成季節既時候住客可以參與一齊摘採收,可惜而家唔係時候,啲提子仲係青BB
Malbec係Maipú地區最出名既一個品種,呢度都種左好多
除此之外果園入面仲有好多唔同既果實,園主話鍾意可以摘黎試下
呢度完全係山卡啦黎,附近只有葡萄園同橄欖田,所以住宿都有optional既晚飯提供,晚餐每日都唔同,呢日係晌花園食BBQ大餐,大杯酒大塊肉好正
同枱既其他住客好現充,飲紅酒既人係咪好多都咁鐘意show off自己架呢 同佢地唔係好岩嘴型,我地食完就返房自閉了。
Maipú最出名既行程就係自己租部單車,踩去附近唔同既酒莊參觀。呢啲酒莊有啲係家族經營既傳統老字號,有啲就係摩登既現代化工場,各自提供不同既導賞報務同wine tasting package,而且價格相宜,好受遊客歡迎。
所以第二日我地問園主大叔借左兩部單車,跟住地圖向買醉之路出發了
其實我踩單車都唔係好叻,係馬路邊都係慢慢踩安全啲。正所謂人黑行路打倒褪,出左大路無幾耐,突然間有部電單車貼到我好近,然後感覺到有人用刀鎅斷左我個袋,搶個袋走既時候條友仲順手扯埋我落地。就係咁,我就大字型扒左係路中心,時間好似停頓左咁,眼白白望住部電單車加速愈駛愈遠
電單車黨聽得多,被佢地搶野都係第一次,再跟手仆到成身傷,我霎時間伏係馬路上面呆左。男朋友即刻扔低部單車跑過黎執我返去路邊,條馬路平時無車,當你仆街既時候就無啦啦變得車來車往,好彩無比貨車碌扁姐。嚇親加上仆到啲手腳好痛,忍唔住攬住男朋友喊左好耐見到咁戲劇性既一幕經過既貨車司機都嚇親,紛紛停低問有無野幫手,要唔要車我去醫院。都係怪自己太大意,以為鄉下地方就相對安全可以揹個斜揹袋仔出街。好彩袋入面無證件,係得件外套、兩塊M巾同男朋友部後備電話。
發生左咁既意外,我地就返去處理好傷口先。園主大叔見到我出去無耐就周身損哂咁返黎都好驚訝,聽到我地被電單車黨搶野仲嬲到要即刻扯返支煙。佢邊扯煙邊報警,我地知就算拎到報案紀錄都claim唔返錢,同佢講唔使啦,但大叔都堅持,怕啲賊係我身上偷唔到值錢野會再對其他人落手。佢話平時呢一帶都好安全,鄰里關係好好,好少有搶劫案發生,話我地真係不幸。我反而覺得個賊把刀仔無割傷我,好好彩就真
所以,只係相隔左三日,我又再係阿根廷落口供了
再次得到寫左名既手信一份
男朋友一張,我一張,唔使爭,打和啦super
以為係最後一份獨一無二既手信啦咩,傻既,下星期仲有呀