唔驚唔覺已經同Christy分咗手差唔多半年,原來一段感情只要經過夠長嘅時間,唔見唔講唔諗,再深嘅感情都好快會唔記得。再加上要返香港,換換環境見下屋企人對自己都唔錯嘅。
返到香港,雖然無英國咁忙碌,但係始終係一個自己熟悉嘅地方,係自己嘅屋企種係有種係外國冇嘅安全感。
隨著聖誕嘅來臨,死黨啊然知道我回復單身,當然亦有邀請我去佢嗰啲淨係飲酒嘅party,但我都無答應。可能都係未係好適應掛,總係覺得唔係好想玩咁。
但係平安夜果晚,啊然再次打來,「喂, 死仔,今晚有冇野做呀?」
「下,無呀,都係係屋企食飯咁囉。」我都唔知點答佢好。
「出嚟一齊倒數啦!」其實佢知唔知聖誕節係慶祝啲咩嘅呢,有無見過人倒數生日架。雖然口裡好想就咁話不了,但係心入面都係好想去玩。
「Err… 同邊個啊。」欲拒還迎呢招似乎都係最好用。
「我啲friend囉,有啲你都見過啦。」佢滿心熱情咁邀請我。
「都唔係好熟,下次先啦。」講真我都唔係話好咁興趣,啊然條友都唔會理我嘅,去到一支公係到戇鳩鳩咁咪仲無癮。
「來啦,你唔來點熟啊,快啲啦!七點係尖沙咀等啦!」佢講完就收咗線,對於叫人出去玩呢樣嘢,佢真係一流。
呢種講完一句就即刻收線唔比機會你回應真係冇得輸,我而家同佢講話唔去好似變到我甩佢底咁。
算!去咪去!
我六點幾就出門口,着咗件恤衫加條牛仔褲,同阿媽講聲約咗人,本來仲以為會被佢煩,點知佢都無講啲咩,只係話阿媽都明嘅嗰啲。
原來我真係大鄉里出城,係尖沙咀個地鐵站到轉咗成半個鐘都未出到去。
「喂!都未呀你!」電話裡面嘅啊然大大聲屌我。
「真係係尖沙咀站呀,我出唔到嚟呀!」我努力為自己抗辯。
「知你出唔到喇,快撚啲啦!」說罷,佢又收咗線。
最終,我遲咗廿分鐘先到集合編嘅地點。
除咗我同啊然同行嘅仲有啊禧再加埋幾個啊然嘅女仔fd,樣同身材都幾肆正,唯獨係著衫求其咗少少。
「行得未啊?」我問。
「仲差一個。」啊然好老定咁講,屌!咁你頭先就米撚催我啦。「啊!到喇!」
我一轉身,Fuck,唔撚係咁橋呀嘛,當日我係啊然屋企hit on 嘅女仔,Cathy,竟然會係呢度相遇。
「hello!唔好意思呀咁遲!」此起彼落嘅hello聲隨即上演,係咪所有女仔都鍾意同其他女仔扮friend嘅呢。「依?家朗你都嚟呀!好耐冇見啊!」
見?仲好意思講,上次就又話下次見,下次到幾時呀。當然,心諗果句係唔可以講出口嘅,「係囉,咁橋嘅。」
「唔好講咁多啦!快啲行啦。」啊然一路係度催我哋。