無因
2017-03-20 17:33:14
呢個衰妹都算識做嘅,我估大約係知道我都好辛苦掛。
無奈我哋短暫嘅激情過後,生活再次反反去平時嘅刻板,佢對我嘅愛再無激情,剩得幾可能只係我哋慣咗對方係身邊。
時間一日一日咁過去,我哋就住無謂嘅嘢不停咁鬧交,由本身大家都冇都好在意自己有無做錯啲咩去到後來大家只係不停咁指責對方。大概我哋大家都變左,唔再識體諒自己身邊嘅另一半掛。
話雖如此,我哋而家咁嘅生活模式真係有資格叫做男女朋友咩。我哋每日只會send 廿零個text,有一大半都係交差模式嘅浪漫字句。
但係我哋大家都知道對方唔係認真嘅,見到『我好掛住你』,都唔再有果種心跳嘅感覺。
唔通人對得耐就真係會淡嘅咩?我唔知,但係我覺得我應該好好同佢傾下。
係臨訓香港嘅前一晚,我約咗佢落嚟同我傾傾。
由於已經接近暑假,英國嘅天氣好得出奇,都夜晚天都仲未黑。
我同佢由學校門口,一路向外面行,大概大家都想感受一下自由嘅空氣掛。
我哋沿住熟悉嘅path 走咗一大個圈,特別感觸嘅係,呢條path就係當日我邀請佢咗我女朋友嘅果一條。
我哋大家都知道約出嚟係講啲咩,但係當你見到面嘅時候,偏偏又冇勇氣去提出。
我哋行下行下,再次反反去當日嘅網球場,我停低咗,「又返到嚟呢度喎。」
我聽到背後傳來顫抖嘅哭泣聲,Christy 原來已經喊到不似人形。
我好自覺咁攬實咗佢,心入面無比嘅傷心, 我哋一路都無講嘢,直至Christy 再次冷靜落嚟。
「我好掛住你啊。」佢咁講。
我仲未嚟得切畀反應佢再繼續講,「你同我一齊係咪好唔開心啊。」
佢一邊講,眼淚一邊流落嚟,睇見我都覺得心酸,「我真係好鍾意你架,但係我覺得我哋要分開一下等大家諗清楚自己想要啲咩。」
我攬實咗佢,死都唔肯放手,我突然覺悟,自己究竟係咪真係咩都怪晒落人哋到,其實有問題果個其實係我呢。
最終,佢推開咗我,「我係唔鍾意同你鬧交同埋見到你唔開心先至咁做咋。你明架可?」
見到冷靜落嚟嘅佢,我覺得好無奈,我好想時間可以重頭嚟過,比機會我再次去做翻啱,但好可惜感情嘅嘢,真係冇咁多如果。
咁樣我哋算分咗手?定係指係冷靜一下,我無逆佢意唯一嘅原因係我知道佢都好唔開心,可能比個解脫佢,佢會覺得無咁大問題?