無因
2017-03-25 17:55:11
望住熟悉嘅校園,總係覺得少禁啲嘢,分手大概最痛苦嘅都係每日要行過熟悉嘅地方。
每當冇嘢做嘅時候,我總會盡量避開我同Christy去過嘅地方,無論走到邊度腦海中嘅記憶仲會浮現,
呢樣應該都係校園戀愛同平時拍拖最大嘅分別,你平時拍拖分咗手,唔見一排點都放得低,但係而家日日都要經過,咁同係傷口度灑鹽有咩分別。
再唔開心,過多一兩個禮拜大概都開始變得麻木。
無論我自己基金自暴自棄,都唔見得係到博邊個嘅同情。
我嘅成績由班上面名列前茅,去到分手以後完全一落千丈,識我嘅人都唔係好敢問我咩事,只係眼白白咁睇住我放棄自己。
我即時對Christy已經無咩感情,但係我都仲係無所事事。耐唔耐我都會send啲好奇怪嘅message比佢,當然佢唔會覆我,但係起碼我有個渠道去發洩。
直至有一日。
『你今晚落一落嚟圖書館,有少少嘢比你。』一個好熟悉嘅電話號碼send嚟。
究竟係邊個呢,係呢啲事候搞住我。
相比起以前我約Christy係library 門口等嘅時候,我總係會早五分鐘到,但係面對住今日神秘嘅約會,我始終唔係好上心。
直到九點零五分,電話再次響起,『你來唔來架?』
雖然唔知係邊個,但既然我又無嘢做,落去睇睇都無防。
我落到去,見到無人,心諗,屌,邊個咁得閒整蠱我啊。
「喂!」有人係後面叫我。
「?乜咁啱啊?」又會咁啱撞到Shelly。
「咩咁啱啊,你遲到喎大佬。」
「?」唔怪得個電話熟口面啦。
「你唔係冇save我電話呀嘛。搞錯呀。」人生其中一個最尷尬嘅時刻到係比人發現咗你無save佢電話嘅。
「Err… 我之前啲電話唔知點解無晒啊。」唔知點解呢句嘢真係講大話一流,唔駛比原因之餘又解釋到唔係我錯。
「唔講呢啲喇,你遲啲自己save返啦。」佢爽朗咁講,打破尷尬嘅氣氛。「你點呀?」
「咪又係咁。」我仲係唔係好明佢叫我嚟,但係大約都估到係關Christy事,我都唔想叉得太開,只係想佢快啲入正題。
佢從衫袋攞左個信封出來,「依個俾你。」