一段真正開心嘅關係未必係淨係由名義上去定義,我呢一刻可能同Kate仲未有任何名份,但係我知道自己係真正開心嘅,而我都feel到佢都係。開心嘅來源唔淨止係肉體上嘅滿足,而係好似我哋大家都搵到一個真正明白自己嘅人,可以赤裸裸咁同佢坦誠相對,我指嘅當然係心靈上啦。
我哋每日都過住好似情侶咁嘅生活,朝早就去啲新嘅地方到行下,影下相食下嘢,夜晚返到去就緊係做愛做嘅事啦。日子過得好快,好快就去到星期五,我哋朝早無特別去邊度,只係拖住手去town間中國餐廳都食嘢。
雖然間餐廳嘅水準真係好差,連香港任何一間茶記都肯定會比佢好,但人在家鄉,咩嘢家鄉嘢都一定覺得好啲嘅,而呢一刻,我都覺得面前呢碟炒飯係唔錯嘅。
我望住我面前嘅Kate,唔知道我對佢嘅愛慕係唔係又淨係因為我每日都對住佢,因為環境而令到我鍾意佢呢。
我只係同自己講,而家開心咪得囉,唔好諗咁遠,今朝有酒今朝醉。
我哋之後反反去個間印度超市買咗幾支烈酒,就開始向今晚嘅party出發。仲記得之前第一次去house party嘅時候好興奮好期待,但而家我反而係冇咩所謂,反而prefer留係屋企睇埋果套套而家都未開始睇到嘅戲。
究竟係因為其實house party嘅好玩只係我自己幻想出嚟,現實根本都係好一般,定係我而家只係想同Kate一齊過邊度都唔想去?
反正佢都想去,咪當見下其他朋友囉,多啲聯誼都好嘅。
我哋去到啊然嘅host family 到,佢屋企好大,同我哋個間鬼屋完全無得揮。佢host family有兩間屋,佢哋一家住一間,接濟嘅學生就住係另外一間。
我哋學校有五六人住係果度,因為香港啲留學agent通常都會推介埋host family 比學生,而我哋學校有唔少人都係經呢啲agent來讀。
再次見到熟悉嘅面孔都令我開心起嚟,之前亂諗嘢嘅心情亦隨之拋諸腦後。過到嚟英國,你身邊嘅朋友就好似家人一樣,每日一齊hea一齊玩係生活嘅時間仲多過係香港見自己父母。
而正當我過緊呢啲咁糾結嘅生活,自然就好想見到啲朋友,等人幫手分擔一下,等自己唔會亂諗。
但當然我唔可以同人講我哋兩個嘅關係,呢朋友今日嘅功能就更係同我可以放低而家諗緊嘅嘢,開開心心玩一晚啦。
由於真係日頭,我哋都未夠mood開始party,唯有大家係度打下機吹下水先啦。