[遊記][多圖]我在瑞士的14日

Hello大家好, 唔知連登呢邊有無人記得我
其實呢個遊記以前係高登已經寫完左, 不過D圖已經死晒
但間唔中都有人問返我瑞士D資料, 最近見到其他人D瑞士遊記又令我自己都想補返D圖, 所以決定搬過黎呢邊順便補返晒全部圖

基本上我都係搬字過紙咁貼返過黎, 如果你未睇過既話多多支持下啦
睇過既如果你好得閒就睇多次啦

行程交通使費個D資料都會貼埋過黎, 大家有咩想知都可以係到問, 盡量幫返大家

循例第一個POST貼圖呃人入黎睇

Zurich


Schaffhausen


Luzern


Grindelwald


人生第一次影到銀河


Mont Blanc


Aletsch Glacier


幾乎一定會去到既少女峰


Glacier express


火車途中既山谷


可能比較少人去既Lutry-Lavaux

講下今次既行程
我地3個人都係第一次去瑞士, 同埋得14日, 所以揀左去D大路野
機票揀左Zurich入Geneva走
大概行程就係Zurich > Luzern > Grindelwald > Zermatt > Chamonix (法國) > Lausanne > Geneva

Total用左2萬7左右, 好撚貴啊
有野想知可以再問

Day 1

由於我朋友佢用miles換因航機票, 所以最初plan係大家各自飛去Zurich再集合, 而我打算買Qatar
因為Qatar做緊特價好撚平, 連稅只係HKD 4097

但當我想買個時俾我老母知道左, 佢不斷話中東D國家好危險呀呢樣個樣, 總之就唔想我搭Qatar啦, 後來嘈嘈下仲話情願貼返差價要我搭其他airline
咁去旅行都係想開心...我都唔想搞到自己老母擔心我, 最後我改左買因航直飛Zurich, 貴2千蚊
其實即係同我朋友同一班機, 不過佢坐PE, 我坐ECON
平心而論因航直飛+時間靚過Qatar好多既, 但貴左2千呀, 未出發已經駛多左2千蚊

好耐無搭過, 對上一次搭因航已經係幾年前


check in 完後去左機場新個邊參觀下, 都幾靚, 但幾乎無人


去旅行一定要影呢個牌(好似係)
終於上機, 直飛Zurich要12個半鐘
雖然係同一班機, 但我朋友坐PE, 我坐ECON咋

睇過我遊記都知, 搭飛機呢D ON9野我都會照寫
老老實實...其實係我人生第一次搭飛機有得叉電


有排飛


其實要飛差唔多12個半鐘


我坐走廊位, 出乎意料地隔離位無人坐
而坐窗口位個條友又真係好勁, 全程12個鐘都無行過出黎
由於隔離位無人坐, 所以又坐得幾舒服

銀河果張好靚 點樣影 ？

因航既晚餐, 揀左食PASTA


本身都無期望, 不過不失啦, 反而我覺得個咩意式米形沙律好好食


出發當日我特登勁早起身, 等自己攰到仆街可以係飛機上面訓得著
一路食飯一路睇左套Zootpoia, 之後就訓到死左, 醒返時已經差唔多食早餐, 而坐窗口位個條友真係全晚都無話要去廁所之類行過出黎

早餐, 真心難食, 好過無


經過12個鐘多D, 我終於到左Zurich啦
會合返同機既朋友, 就一齊去入境啦, 呢到無乜點影相, 其實要搭D列車之類先去到


btw講漏左, 另一個朋友自己買左Emirates飛Zurich, 但佢中午先到, 所以約好左到時係Zurich火車站集合

由於落機時係朝早6點幾, 所以入境唔係好多人
排左一陣就搞掂, 乜都無問過, 望兩望就放人
行李都好快就拎到, 出機場時大概7點幾, 之後我地打算去買SIM卡先, 不過幾間電訊商都係開8點半, 咁唯有周圍行下等佢開門

係機場隔離個商場見到超市已經開左門, 就決定入去睇下瑞士D野有幾貴
未出發前已經知瑞士係數一數二貴既地方, 實際黎到發覺真係貴到仆街
一兜5.8CHF, 你地當乘8就OK, 即係差唔多50蚊


類似百佳牌壽司, 14.9CHF


6.6CHF


意外地雪糕好平, 咁大盒3.5CHF咋

留名

想去多次switzerland

搬字過紙時發覺自己原來好撚多錯別字, 我盡量改返, 希望無改漏

外國既超市真係乜都有, 行行下見到有個AREA玩回收, 係超市入面做回收垃圾到底係咩玩法, 唔通我要特登帶D垃圾入去超市掉????


乜都有得賣, 發現瑞士既代表性紅牛, 不過當然唔會而家係到買


最後用1.9CHF買左支bitter lemon飲, 已經叫做好平


搞搞下終於8點半, D電訊商開門啦
本身target左買swisscom張1.2GB LTE卡, 但發現隔離有間叫Salt既做緊買10CHF送10CHF既任用LTE
1日扣2CHF, 即係俾10CHF就可以用到10日, 仲要任用, 咁抵玩就決定左揀佢
購買過程都好順利, 買個時要出示PASSPORT, 之後店員幫你SET返APN, 話等大約20分鐘先會ACTIVE
買好SIM卡後就正式開始瑞士之旅

第一個行程就係搭火車去Zurich HB, 商場地底就係火車月台
由於我地係買15日swiss pass既, 所以大部份既火車都係任搭, 唔需要買飛, 睇岩邊架車就上

呢個就係ZURICH機場火車站既月台, 都幾乾淨


flughafen即係機場咁解


有pass就可以任搭, ZURICH機場有樣好就係好近市中心, 搭出去都係約15MINS, 是但一架經Zurich HB既車都OK


瑞士D雙層火車
BTW雖然有PASS, 但我個張既2ND CLASS既火車PASS, 所以只可以搭2ND CLASS既車廂, 呢個要留意返

因為只係搭十幾分鐘, 所以上車後都無坐, 就咁企係門口旁邊算
搭車途中張SIM卡終於用到, 都收得唔錯, 而且個LTE好快
唯一缺點係可能佢用APN同埋成日係到SEARCH台, D電好似倒水咁
好快就到左Zurich HB啦, 第一件事當然係去酒店放低行李先

由於今次係3個人去旅行, BOOK住宿都係一個大問題
不外乎幾個原則啦, 平, 近同埋方便, 但3個人真係無乜選擇
瑞士住真係好撚貴, 你可能話怕貴咪住hostel同share room囉
但我搵過瑞士d hostel都係好撚貴, 4人share room一個床位都可以收35CHF一晚
咁我不如俾貴少少住酒店仲好啦, 至少唔駛同人share, 我真係好怕同陌生人share同一間房
最後我目標係搵D 最多500蚊一晚既酒店, 結果搵到呢間叫Montana, 仲好近火車站添
BOOK左間3人房, 一人大約4百幾蚊一晚包早餐, 睇返地點咁近都可以接受啦

好快就到左Zurich HB, 落車後行出月台睇下, 個環境是咁的
日光日白都OK, 夜晚我會覺得有D恐怖
不過好在意外地好乾淨


呢個時候當然係出動Google map啦, 但點樣都好, 總之上左地面先算
求其搵個出口上地面, 結果去左個有D荒蕪既地方


唔知自己行撚左去邊

兜左個大圈, 終於俾我行返去真正既火車站月台啦
作為Zurich中央車站, 都幾乾淨企理




雖然google到睇, 間酒店好近火車站, 但原來係要由站頭行到站尾再過多一個街口左右, 其實都唔係話好近
而且大部份景點都係近火車站頭個邊, 即係每次出入都至少要行晒成個火車站既距離先
ANYWAY因為有google map, 所以搵酒店無難度, 呢到就係門口


咁早去到未有得CHECK IN住, 但可以暫時放低行李先, D STAFF都好friendly, 同埋可以正常用英文溝通
放低好行李, 去埋個廁所就正式出發參觀

咩都唔講狗衝正皮左先

銀河果張好靚 點樣影 ？

其實無咩技巧, 因為現場已經好靚
一支大光圈鏡+腳架, 推高D ISO計返500rule就可以啦

用FF(135)計, 當你支LENS係24MM
500 / 24 = 21s
即係你最多可以曝光21秒, 如果唔係D星星就變星軌
當然呢個只係理論, 你要睇返實際環境再去影啦

返到黎再用ps推返條銀行出黎, 網上都好多教學, 有咩唔明再討論

第一日既行程其實好悶, 因為就只係Zurich到鳩行
本身我係想連Zurich都skip, 落機直接搭火車去Luzern, 但我朋友覺得既然到左Zurich, 不如留一日行埋佢啦, 所以決定俾一日佢周圍行下, 同埋真係無咩plan, 行去邊我都係搭緊飛機時先諗

首先打算行返出去火車站先, 呢到係酒店附近既街道
當日係星期日既朝早, 成條街好冷清, 人都唔多個


星期日鋪頭通常都唔開會, 條街乜都無
另外條路上面吊住一舊舊個D係街燈, 歐洲好鍾意用呢種燈, 我諗慳位過一碌碌街燈掛????
不過對於想影相既人黎講有時就會覺得阻住晒

好快就行到返去火車站, 見到有個information center, 就影低左send俾朋友, 話佢知到時係Zurich HB既information center集合, 我諗咁顯眼應該實搵到掛


之後決定圍住Zurich既利馬特河(Limmat)到周圍參觀, 活動範圍大概就係下面張MAP既紅框


係Zurich火車站到有間麵包鋪, 望一望價錢, 貴到仆街

啲相好靚
有冇挨豬？

Zurich火車站其實都算係一個景點黎, 順便參觀下
講到瑞士出名, 其中一樣一定係鐘錶, 佢D火車站之類都係用OMEGA同ROLEX, 好厲害
不過Zurich個車站就唔係, 但當時覺得幾靚就順手影低左, 其實mondaine都算出名啦


有D唔知做乜野既噴水雕像, 話說成個瑞士都好多呢D噴水池(唔知應該叫乜先岩)
傳聞呢D水係乾淨, 可以就咁飲, 但我就無試啦, 唔想一開波就水土不服

之前睇過 再追post

點解話個車站都算係景點呢? 因為個入口其實是咁的, 好靚
不過朝早天氣唔好, 陰陰沉沉咁, 好在無落雨
話說出發前我日日睇瑞士天氣預告, 佢日日都話狂風雷暴, 好擔心成個TRIP都係咁


火車站出面就係電車站, Zurich主要交通都係呢D路面電車, 所以成個城既天空都佈滿一條條電線




影相黎講有好有唔好, 普通影時覺得都幾得意


但D電線實在太多
想影下其他野時, 俾D電線阻住晒
圖中既雕像叫Alfred Escher, 瑞士有今時今日既鐵路都係多得佢

由於我係搬字過紙, 所以搬到而家先有資料
===========================================================


見到都有D巴打就快去瑞士, 繼續寫遊記之前寫D交通資訊先, 希望幫到大家

係瑞士大部份都係搭火車, 最常見既問題係買咩PASS好, 通常都係兩種, Swiss Pass同Half Price Card
我大概講下兩種有咩分別

1. Swiss Pass
呢張PASS基本上包晒大部份你會用到既交通工具, 火車, 電車, 巴士都有包
有左呢張PASS, 你就可以係指定日期內任搭瑞士D交通工具, 非常方便
除此之外呢張PASS仲包左好多博物館之類既景點入場費(或者有discount), 好好用
因為係任搭, 所以就比較貴, 今次個TRIP我地買左15日既Swiss Pass, 要440CHF, 我肯定用到回晒本

Swiss Pass好處就係唔駛買飛就可以任搭, 就算行程有咩改變都無問題, 睇岩邊班車就上

2. Half Price Card
即係半價卡, 買左呢張卡之後一個月內搭交通工具都享有半價, 如果你唔係不停搭火車既話, 通常用呢張卡會抵過買Swiss Pass, 但缺點係每一程都要另外買飛, 好麻煩, 同埋遇到行程有變時又要再買過

根據經驗, 如果你PLAN好晒成個行程, 通常計出黎條數會用Half Price Card抵D, 兩者最主要分別係上少女峰個程火車, Swiss Pass得75折, Half Price Card有半價, 上少女峰好撚貴, 個到差左幾舊水港幣
除左少女峰之外, 搭纜車上大部份既雪山, 兩張卡都有半價discount, 最主要就差左係少女峰個程

但我地最後決定買Swiss Pass係因為方便我地隨時改行程, 同埋唔駛每次搭車都要去買飛, 方便好多

留名學嘢

留名