之前個帖可能語氣重咗,喺度同你同另一位C HING 講聲唔好意思先
白水篇文係咪錯焦點?其實佢係講緊,死者有一個「唔合乎男權社會女性形象而過豪華生活」嘅形象(呼應白水篇文第一個問題),而呢個形象好快被網民認為「佢就係咪性工作者」,然後有人走去起底,同埋有張19 cap 圖,再群起指死者有俾人包,所以活該(呼應白水第三個問題,亦引發大家思考問題二)。白水由呢幾個發去剖析網 民呢個行為嘅心理,我覺得個焦點未至於脫離LIHKG上嘅觀察。
試諗下,如果係調轉,「大隻靚仔健身教練酒店被殘殺」,然後喺佢IG 見到好多型仔相、出海相,會唔會咁快就得出「哦,條仔一定係出嚟做喇,抵俾人做瓜啦。」呢個結論?如果唔會,咁即係好明顯喺思考同一事件發生喺唔同性別上嘅時候,思維係唔同嘅。咁你認為白水嘅焦點有冇錯?
至於你話佢哋喺IG 高調展示豪華嘅生活係俾網民毒舌原因,第一,可能呢班人都唔為意,佢圈子嘅生活一向係咁,只係觀眾睇唔順眼佢地嘅生活而仇恨佢地。而佢地其實冇嘢做錯,至少佢地冇因為觀眾過唔到佢嘅生活而奚落你地。
甚至乎佢地可能一向都有做好事,只係網民睇唔到/ 當睇唔到。然後一出事就即時諗到佢係「二世祖/ 貪錢女」,再毒舌一番。
點解我好似好激動?對一個人施以咁嘅毒手,呢單案其實幾凶殘。但網民嗰種冷血言論加上一路以來都有嘅slut shame ,我覺得係好難接受。
以上。