(不定期live) 西班牙讀書歐遊之旅

痴撚線隔離咁撚貴...

咁係因為港共政府，從一開始就將西班牙要
歸類做隔離21日，所以我冇影響


但各位新聞都見到，近日港共瘋狂將好多本來隔離14日嘅地方，升做隔離21日搞到勁多人要重新book過酒店，但咁遲book就得番最貴嗰啲

依家第一日到步哥本哈根，將會係我最後一次旅程啦 都係呢句，有任何建議請教下小弟


今晚將會極速搞掂法國馬賽(希望)，跟住開新post講丹麥

再之前爭落啲街數，就返香港隔離嗰陣再寫啦:

對唔住各位，依加繼續補番馬賽，講到day2去到舊城區嘅勒內塔，上到個塔到睇360度靚景

明明全日都唔見太陽，係塔企到臨日落嘅時間，太陽突然撥開雲霧走咗出嚟，係收工之前扮下工發下光，成個畫面好夢幻，夕陽無限好~





其實上塔嗰陣，我本身有少少嘢煩惱緊，理性上知道呢座塔風景係靚，感情上卻無法交個心出嚟感受佢，但直到夕陽出現，本能咁令我放低咗麻煩嘢去感受呢到


自己一個埃住喺欄桿，抵住強風，緩緩呼出霧氣，觀察住呢片城市被夕陽餘輝映照住，由金黃色褪變成灰暗色，明明係每日都會發生嘅事，但仍然好慶幸呢一刻我企咗喺呢度


有時見到好壯觀、開闊嘅靚景，就會意識到自己嘅渺小，無論你自己經歷緊咩，成個世界都會繼續如常繼續運行，如果一直都識咁諗就好了










太陽落咗山後，仲有小小餘輝，真係好似啲聖光咁，古代歐陸畫家，係咪就係見到呢個景色，從而想像為天使降臨人世嘅背景呢

都係呢句，我唔相信宗教，但千幾年前知識水平唔夠嘅人，一定係覺得眼前呢片景象，靚到似乎一定係人為嘅，但由於科技水平無可能做到，所以，一定係某個偉大嘅造物主整出嚟，比人類嘅禮物

(其實，我知道一定有教徒依家都係咁諗，得罪了)

可惜一到五點，職員就上嚟清場，請曬全部喺塔嘅人離開，想hea多陣都唔得，可惜了



由於我hea得滯，每個景點都hea 好耐 守護聖母教堂應該係冇機會去到了，只可遠觀而不可褻玩，影影佢算啦



喺呢一帶最高點聳立住一座發光嘅教堂，的確有種守護同象徵嘅感覺，連我呢啲外人都有呢種感覺



Le Panier Marseillais
一條藝術街，可能因為已經入夜或者因為covid，呢到冇乜商業味道，就係兩邊好多塗鴉，然後有啲手作、復古、咖啡店之類嘅文青野，但開得唔算多，唔會干擾咗呢條路本身嘅氣息，反而喺相輔相成


我本身毒L性格就係唔鍾意人多，呢個氣氛幾適合我，冷清又清靜





謎之文青夜冷舖，雖然有啲興趣，但feel到一入去就會比老板熱情sell嘢，不了


喺條路嘅轉角位hea咗一陣，見冇乜嘢做，就影下途人咁，記錄低呢條街嘅日常，嘗試係平凡中尋找不平凡 (mk語錄確定)



孤寂落寞 同 長相廝守，同一個場境，卻可以傳遞出完全唔同嘅感覺，感受到陌生人嘅情緒

圖二好似見到將來嘅自己

simpsons



Rip紀念某一個人，但我就唔太查到資料係咩嚟





但究竟係點解，左右兩邊又要有個黨鐵標誌呢之前博物館先睇完黨鐵條片，點解成日都會見到佢


今次呢個地鐵站幾靚




返酒店前，去超市買下日用品，見到有隻香港人最愛嘅柴犬，坐起個購物藍到，好乖好得意




今晚慳錢食kebab算，環境睇落唔太乾淨，希望冇肚痛



開餐，味道普普通通，全部加埋10歐，飽肚就冇問題嘅，但我真係好憎喺kebab裏面都放薯條，本身都有啦，仲要入面都塞埋

馬賽day 3
今日主要行程就係去兩個外島，伊夫城堡島同埋frioul島，但去到先知今日冇船去城堡，只係可以去隔離嗰個荒島




趁上船前周圍行下，舊港呢到真係好靚




開船了，見返琴日去過嘅文明館同舊城，但我得以係另一個角度去睇，係海平面嘅水平線角度上再重新審視佢哋一次





過咗一陣，慢慢開始越來越大浪，真係去到同機動遊戲個種，你喺感受到個離心力，嗰陣即刻搵下救生衣喺邊


我係片到cap出嚟，可能會冇咁清晰，窗外啲白色唔係雲，喺浪花呀！！





終於捱過呢半個鐘上返陸地
周圍好開揚，基本上冇任何礙眼嘅建築物，可以欣賞到原來嘅自然景，但同時呢到個基建、道路設計都好好，簡單得呢又實用同現代





呢個咪長洲名物？！

應該係成個島唯一一條商店街，而且基本上都係餐廳，超市都冇間，當地人都真係唔容易




望上去上面，見到一個新古典主義式建築(應該係)，應該都係教堂嚟，一座聳立係外島嘅教堂，幾百年嚟就係度見證住風風雨雨，好似影視作品中世外桃源嘅聖地咁，有種神聖同神秘嘅感覺




行到去一條堤壩，正如頭先坐船咁，係非常之大浪，大浪不斷拍打堤壩，形成咗好多水霧或者雨點之類嘅嘢，仙境咁樣樣(可惜相機影唔到)




呢到都有環保人士
但講開又講，呢到啲垃圾桶又真係冇做分類，雖然呢啲地方，其實有垃圾桶就已經要感恩




本來我喺擔心呢個島根本冇嘢食，或者餐廳做獨市生意賣到貴一貴，所以買定咗三文治


行到去一個有長椅嘅位，就坐低食個三文治感受下周圍先，呢度只係起點，咬完個三文治就正式起行，更壯觀嘅景色等緊我





開始向島嘅邊緣進發，周圍真係好靚，不斷向前行，一邊就忍唔住回頭望返，頭先行過見到嘅景色



繼續向前，喺盡頭嗰邊見到一個接近荒廢嘅城堡，而家仲要係私人嘅....






雖然圖片未必feel到，現場真係勁大風大浪，真係香港十號風都不為過，波濤洶湧與懸崖峭壁，有種好史詩式嘅感覺添呀






呢度似乎係候鳥嘅棲息地，好多雀喺度休息緊，佢哋每日就係企喺度望住呢個景，好似喺度沉思緊諗緊嘢，思考雀生中



周圍就係咁樣，雖然荒蕪，但都叫開咗條路，唔算難行

原路返回，繼續望返頭先條堤壩，真係好癲，呢條堤壩就好似係守住馬賽嘅門戶，呢條堤壩擋一擋之後，令到近馬賽嗰邊個海風平浪靜

我為我畀呢樣嘢嚇咗兩秒而感到羞恥



錯有錯著上咗去頭先見到嗰座神殿，之前明明想去睇但搵唔到路，有啲嘢真係估唔到，順其自然就會有





神殿隔離仲有張愛國櫈



差唔多食嘢，呢度大有十幾間餐廳，但大部分都閂咗，得返兩間，Google map一間評分2.5左右，一間3.3左右，我好深刻記得低分啲嗰間，有一個評論係，我煮畀我隻狗都唔會整啲咁嘅嘢食，極嚴峻


咁冇得揀之下，就去高分少少嗰間啦，嗌咗一個蕃茄辣汁grilled salmon，成18歐，真係唔平，但味道都唔錯嘅，汁都幾夾，啲魚都嫩滑，而且最估唔到佢係竟然有飯食，將啲飯點埋個汁同埋魚油一齊食，唔錯呀




跟住就係呢個卡邦尼意粉，非常普通，11歐唔算好貴，但都係不了



食飽飯之後又開始周圍亂咁行，好彩！安全起見，去碼頭嗰度睇下班次先，明明之前網上睇下個官網，尾班船係夜晚八點幾

但係去到碼頭，竟然見到有張通告寫住近幾日唔知咩原因(睇唔明)，尾班船係五點幾，好彩有睇一睇，如果唔係又瞓街了

馬賽東平洲發現




繼續周圍亂咁行



Google map顯示好似係醫院...



pavillon hoche ，google translate，喺 「旗幟飄揚」
望住個咁有氣勢嘅海，然後再整個咁嘅招牌上去，真係型到呢....




時間又差唔多，準備離開呢到了
上船先見到，原來夜晚呢度開始著燈，又肯定會係另一個美景，可惜冇辦法留低睇下

差唔多了，準備開新post

(不定期live) 西班牙讀書與歐遊之旅(2)
https://lih.kg/2814973
- 分享自 LIHKG 討論區

新post 正皮留名

自推新post見

巴打 可唔可以加我入去
因為我好快會黎valencia讀書

exchange定長讀？
識得有個喺度讀牙醫