(不定期live) 西班牙讀書歐遊之旅

食完個靚早餐，開始去行舊城區

第一個景點係Torres de Serranos ，當年嘅主城牆之一，本來應該係可以入去參觀同埋上塔頂，可惜閂咗

老老實實，今日行過見到嘅景點基本上都會係走馬看花，因為今日係節日，大部分地方都冇開，所以冇得入去探索，所以其實冇咩好講，希望一兩日之後，我仲有機會同時間重新探索呢啲景點





我愛意大利gelato食住一路行其他舊城區景點

但估唔到，亦都係惡夢嘅起點，我本來就有啲感冒，幾肯定就係因為再食埋啲杯雪糕之後，我打呢篇文嗰陣，把聲已經沙曬 下次唔會再輸畀gelato嘅誘惑 (應該係)

無助者之聖母聖殿，中間嗰幅畫最吸人注意，但其實唔知有咩含意呢





巴倫西亞主教座堂

呢度完全係喺上圖嘅景點隔離，又係可惜冇得入去，喺出面行咗一圈，好明顯呢個建築係溝咗好多唔同嘅建築風格，呢種不協調可能就係佢嘅賣點，希望有機會再入去

另外，傳說呢個地方係收埋咗個聖杯，當然，大把地方都宣稱自己有呢個杯信唔信就由你 (另外，崇日毒撚應該會好清楚聖杯樣嘢，唔我問我 我點知的)

行下行下，唔經唔覺見到有間嘢有啲眼熟，原來眼前有間舖頭之前旅行書講過，本野聲稱呢度係全市最受歡迎嘅鋪頭之一，咁有即管入去望下

(唔記得影招牌，下圖為google)



坐低，又冇menu乜都冇，冇得指住菜單講this this this 好彩之後店員搵咗個識英文嘅夥記幫手，直接同我哋講有咩好推介，但啲菜式名我都係聽唔明㗎嘛


好彩之前影低咗本旅行書講呢間鋪頭嘅嗰一頁，即刻開番嗰張相，然後跟住本書推介一定要試嘅嘢落單，horchata 同fartons



horchata係杯嘢飲，飲落去主要係一啲堅果同埋牛奶嘅味，都幾甜。fartons就係個長條型甜麵包，兩樣應該都係華倫西亞人成日食嘅嘢







偷睇到隔離有一台點嚟食，我就照板煮碗，睇下會唔會係local食法 一擺落口 兩者加埋真係幾夾 呢個食法應該冇錯

正，去到歐洲就算國內遊都好玩

見呢度嘅裝修，都應該係嗰啲疑似百年老店，好有地位嗰啲，的確係幾靚嘅，一邊食住枱上嗰兩樣嘢，一邊觀察下周圍環境都幾有趣





但係，一見到張單就唔有趣啦 除番開一個人4.15，即係一杯嘢加一條包就要咁嘅價錢

本來覺得有啲貴，不過當換個諗法，當自己去咗啲偽文青咖啡店，都差唔多價位啦，周圍裝修仲更有特色同歷史背景，咁諗又舒服咗好多



繼續上路，嚟到 Plaza Redonda 圓形廣場

同大部分西班牙嘅廣場唔同，通常啲主廣場都係四四方方咁樣，但佢用咗完全嘅圓形，係呢個景點最有趣嘅一點，但我相信呢個圓形廣場入面嗰啲檔口全部都係遊客價劏水魚

病左食自己帶既藥定 當地買？

繼續下個景點，嚟到華倫西亞北火車站，外觀嚟講都算係一個好標準嘅火車大站

睇返火車站出面一張介紹嘅牌，原來呢度曾經喺西班牙內戰期間接收咗大量難民，一度變成西班牙嘅難民中心總署。 一場又一場戰爭當中 ，其中一邊嘅軍隊會獲得勝利，但人民卻永遠都係輸家

其實講開又講，我都越來越想了解多啲西班牙內戰嘅歷史，當年細個教歷史嗰陣，完全冇提到西班牙喺一戰二戰做啲乜，明明都係歐洲大國吖

依家先開始知道，原來當年一戰二緊西班牙都打緊內戰，唔得閒理其他事，之後再畀佛朗哥極權政府統治咗幾廿年，算係填補咗我歷史觀裡面空白咗嘅一塊





行入去火車站裏面，周圍都幾靚，現代化之餘又保有傳統藝術特色

凌晨仲出post, 你個fd有無屌鬼你

睇住你啲相勾起哂我嘅回憶 好想再去多次

話說你地有無畀tips習慣.

晚晚搞到好夜先返去 仲要抽少少時間溫西班牙文 搞到咁夜先出post

所以我係呢個鐘數自己行到出沙灘 望住海咁樣打文 費事搞到佢

兩個人同房一張床
邊有時間訓覺

再過嚟讀書升學啦

有諗過 要儲下錢先
西班牙天氣咁好 人都開心啲

喂喂, 你仲會唔會去西班牙

宜家點去呀 好耐冇去過旅行

呢邊天氣真係好好多，即使熱都係冇香港咁濕熱咁恐怖

wifi巴！好耐冇見！

當年啟蒙我行朝聖之路就係巴打你呀 我選擇嚟西班牙同埋打算學西班牙文 一定程度上都係同朝聖之路有關係

( 其實已經係第二日，但琴日啲嘢都未打完 希望追到進度)


華倫西亞鬥牛場，喺頭先嘅華倫西亞北站隔離，可惜又係閂咗，只係可以偷望下裏面嘅情況，好想睇下鬥牛 但好似因為疫情延遲咗 我依家讀書嗰個城市都唔知有冇得睇呢



跟住嚟到一座橋，名我已經唔記得咗 專程行嚟呢度 就係因為今日係華倫西亞國慶日 有好多特別嘅活動搞 之前網上見到呢條橋附近會搞一個特別嘅中世紀風市集

食自己幸福傷風素 跟住係藥房買咗枝咳藥水

真係幾多人，有啲返咗去花墟嘅感覺 但除咗手作嘢多 冇乜淘寶貨之外 的確係有種中世紀風味，起碼係形式上，但都已經比花墟有趣，詳情睇圖




一堆疑似係香草嘅嘢


中世紀風嘅蜜糖


一堆醃好咗嘅前菜



雖然中世紀唔會有呢啲爐，但山長水遠搬過嚟市集呢度都真係唔容易，抵你有咁多人圍觀



我幾欣賞佢連食嘢嘅地方，都會特登模仿當時嘅風格，唔係隨便幾張長枱長凳就算

第一個感覺，就係好似台灣夜市嗰啲夜市牛排，唔知點講 但可惜嘅係佢全部都冇寫價錢，所以費事重覆就唔試了





始終我唔太鍾意人多地方，行咗一陣就走了，都冇買到啲乜嘢，離開市集之後見到出面個公園有個巨型繩網陣，係真係有啲高，最高處跌落嚟都真係幾係嘢，老了老了





橙衫金毛選手手腳並用，睇姿勢就知係繩網陣行家

佢非常有自信心，最後成功登頂，仲要孭住個書包 好似去做負重訓練咁

差唔多行完景點，開始攰了，回頭嗰陣行返市區中心，突然見到開始封路，頭頂仲有直升機，初初以為係因為準備慶祝華倫西亞節日有關，但依家諗番就未必喇，唔知係咪

行行下，開始見到揸住警棍甚至催淚彈槍嘅警察，又以為係純粹係維持治安，驚啲人節慶玩得太癲，再行就見到眼前呢一幕，黑衣人對住防暴警察，有啲好似驚恐症發作咁樣，同時又有啲懷念，唔知講咩好，唔識形容個感受






問返一啲當地朋友，好像喺因為十月九號是瓦倫西亞國慶，但瓦倫西亞國已經唔存在，為咗預防極端右翼喺呢一天有動作，就搞咗個反極端右翼遊行

晚飯，民宿附近有間華人餐館，叫美好menu 9.25歐，2道菜加飯/麵 飲品甜品，價錢都唔錯，就揀佢




前菜，揀咗個湯，始終好耐冇飲過湯水，但實際上飲落咗，就係雞絲加味精，冇乜特別



主菜，檸檬雞同炒飯

早有聽聞外國人鍾意食檸檬雞，實際上嗰個檸檬汁都似嘅，但嚿雞就完全唔係嗰回事，味道都唔錯嘅，炒飯都係正正常常




甜品，明顯唔係華人嘢，出面似係炸咗嘅春捲，裏面約入朱古力醬，其實又幾好食 之後試下春卷點朱古力醬先