(不定期live) 西班牙讀書歐遊之旅

返工又追到最新
以前讀書最後悔無去exchange, 樓主要好好enjoy

我都係一個人去旅行，其實好多人都係一個人行展覽行水族館個d, 去多幾次就慣

試完一個人去旅行之後 翻到嚟香港好多嘢都想自己一個做

唔知你有無興趣，羅馬尼亞有德古拉個城堡
最近好似仲話個城堡有得打針

唔使擔心我，我即使喺香港有時都會咁

呢個真呀 更加多嘢想自己一個感受

(廣告：得閒又有興趣可以順便睇埋我以前啲遊記，應該都係獨遊多)

我都聽過 似乎呢個係最出名嘅景點 睇情況應該會去下

攞個著名景點做疫苗接種係咩玩法

起底發覺有睇過你2年前個歐洲live

其實我又無特登要一個人去
一個人係好free, 我自己鍾意影相，一個人可以唔駛理朋友影幾耐都得

但一個人去旅行有時都煩，食野試得唔多，book住宿又難d貴d

真
食嘢都算 最慘係住宿貴
同埋冇人幫自己影相

但一個人去嗰種自由度真係返唔到轉頭

個陣好彩有拎埋個腳架去旅行
已經練到無視世人目光 拎個腳架出嚟set機慢慢影
但一個人去旅行 一定係瞓hostel最抵
同埋有人陪 冇酒店咁恐怖先

我唔驚一個人瞓酒店
好唔鍾意同人瞓 通常其他option太貴先會揀hostel

我好唔鍾意同唔識既人訓同一間房
hostel多人房完全接受唔到
一個人住酒店先無問題，仲安心好多

大家好有緣 我鐘意旅遊台開遊記就係咁解

Airbnb幾好 但一個人住有時太貴

Hostel最怕係有人偷嘢 酒店好好多

已經延遲咗兩三日 今日會逼自己寫埋Valencia


Torres de Serranos
如果大家記得，第一次入市區嘅時候就經過呢度，但嗰時閂咗，今日終於開返，仲要免費入場，冇諗咁多即刻狗衝入去




今日係我最後一日留喺Valencia，酒店要check out，唯有孭住個大backpack周圍去，冇理由攞咗免費飛都唔入去㗎，頂硬上孭住十幾kg上去啦


一上一落幾百級樓梯真係行死我，仲要呢啲城堡嗰啲樓梯好多係舊時不規則嗰種，真係仆低都似





可能因為我太攰，覺得上面個景都係普通，冇一種豁然開朗嘅感覺，但正正係因為佢唔夠高，可以仔細望下周圍嘅街景，慢慢感受下附近幾條街嘅生活氣息，所以放低咗個大背囊，企喺塔頂hea咗一陣 (其實就係放低個背囊抖下氣)

你唔可以喺酒店寄存行李咩

今日似乎係哥倫布日，雖然好似冇啲特別嘅慶祝活動，但好明顯多咗好多小販同埋賣藝嘅人

網上睇片睇得多，但又好似冇咩機會親眼睇，一個油到全身銅色嘅人扮銅像

我企喺角落觀察咗一分鐘，係真係幾乎冇搖擺過，分分鐘仲攰過體力勞動嘅工，搵食艱難呀真係




一身性格藝術家嘅打扮同埋坐姿，45度角揼低頭chok住畫畫，chok過林峯



應該係墨西哥風？條友左腳踩住個機關控制住兩隻公仔，令到嗰兩隻公仔可以跟住節奏搖動

嚟到同樣係上次閂咗嘅 巴倫西亞主教座堂

最重要嘅係佢有locker 終於可以放低個backpack 坐低畀我膝頭放鬆下 咁耐冇獨遊過 孭住大背囊闖蕩嘅技能已經荒廢咗





價錢表，學生5.5歐，包audio guide 有英文

同上次一樣，佢又係有不同大大小小嘅禮拜堂，去講述一段聖經人物，但其實我對聖經故事嘅興趣唔大，冇乜心機去留意周圍嘅典故，走馬看花咁遊下啦







走馬看花之際，見到樣嘢當堂嚇一嚇，一隻某聖人嘅右手

相傳某皇帝準備迫害西班牙嘅基督徒，跟住皇帝同當時嘅主教講，比你兩個選擇，一喺當面放本聖經入火海，一係就放係自己入去，主教唔肯最終俾人燒死咗，佢嘅殉道令佢變成咗西班牙嘅聖人

理解唔到攞住人隻右手當係聖物周圍放，咁樣真係好咩.....

嚟到華倫西亞主敎座堂最出名嘅嘢「聖杯」 即係耶穌係最後的晚餐所揸嘅杯，流出嚟嘅液體相傳會變咗做紅色

但依家週街都宣稱自己擁有聖杯，信唔信就由你啦。但見呢度啲宣傳話教宗都曾經用過呢隻杯主持儀式，都應該真係有啲地位嘅






不愧係最重要嘅藏品，竟然有埋中文，但一個中國政策呢

公然干涉他國內政，傷害咗14億人民嘅感情，最終只會抬起石頭砸自己的腳..........



如果呢個聖杯真係正貨，一定會比我有種「吓 就係咁？ 」嘅感覺，可能太多流行文化同宗教人士吹到天花龍鳳， 但實物就....都係咁

但反而係放置呢個聖杯嘅周圍建築更有氣派，無論放啲乜嘢入去玻璃後面，都會即刻覺得勁咗





仲有呢間房嘅天花板同樣有來頭，完美嘅八角形

時間差唔多，又係坐blablacar走啦，Valencia有緣再會了

車主播住啲西班牙音樂，慢慢望住車外個境，然後諗下啲無聊嘢，再回顧返呢個幾月嘅經歷，呢幾個鐘竟然喺我今次旅程其中一個最深刻嘅位



Valencia 四日遊，完！