(不定期live) 西班牙讀書歐遊之旅

多謝支持

有冇下文先

支持

唔好意思各位，呢個星期太多野搞，學好多文交，好多其他繁複事，我啲flatmate仲話要搞party

依加暫時得閒少少，將盡力全速打文，呢一刻嘅我已經係身處於羅馬尼亞

上回講到，Palma Mallorca day 3 定4

今日要早少少起身，有咩做？出發去人生第一次潛水



無論咩時間起身，出發前都要望下我最愛嘅酒店露台，有幸比我見到太陽升起嘅一刻，周邊氣温開始微微回暖。





明明太陽日出日落只係每日必然都會發生嘅事，但我仍然可以感受到感動，有時真係會感受到古人講嘅嗰種天人合一，對大自然嘅專崇同敬畏

上次有呢個感覺已經係上大帽山追冰霜，同樣望住太陽出嚟個下

繼續，落樓下歎酒店早餐，由於起得早，成功搶到靚位

今次時間預得幾好，但今日我就收山食少少算啦，費事等陣落水嘔





跟住潛水舖揸車係酒店樓下車我地 去到舖頭，原來老板未返冇人開門，大家一齊on99喺出面等

吹咗幾句水，見呢間嘢叫埋自己做Norway diving，以為全部都係挪威人，但除咗老板之外睇嚟都唔係




司機唔記得咗係邊到人，但搬咗去西班牙好多年，然後開始圍爐取暖講呢到人嘅英文唔掂，好有共鳴呀 當然，其實我都明白對方唔係應份同你講英文，所以其實嗰時我心情都好複雜

開門入舖，叫我地入房坐低，跟住係睇片考試，令我諗起當年遵理補習，望住yy 條片做嘢咁

一場嚟到竟然要考試





唔好話我話，雖然只係true or false，但都唔易做，我本身英文唔好，有啲生字真係睇唔明，最尾錯咗兩條，我認我廢




呢一幕即刻笑咗，諗返起碧藍之海其中一場有冇人有睇過呀，有嘅烏龍茶相認 但講真，我對潛水嘅嚮往都係嚟自呢到


我知對玩開潛水嘅人冇咩好笑，但我呢啲新手係笑點低啲

開始興奮了



價錢表，比有興趣嘅人參考下，我地揀嘅係discover scuba diving，90歐就冇咗


其實本身因為我地唔識游水，佢地話要人手拉我哋出去，所以每人要收多60歐，150歐 per person


討價還價之後，成功收返原價90歐，我知依加淡季佢哋唔多客，一定唔會想冇咗我地

查返Google map，我哋潛嘅地方叫做Port Adriano

(google 圖片，圈住就係我哋出去嘅位)




呢到就係我地潛嘅位，係岸邊練幾次，跟住就會拖我地出海幾百米咁樣

當然，之後冇得用相機紀錄，呢張就係最尾嗰張相，以下將開展純文字討論

純文字討論應該會畀人插，所以我而家決定去佢facebook (就係叫norway dive)，偷返佢之前幫其他客人影嗰啲相，看圖說故事啦，個景都係一樣嘅


都係呢一位教練，同一個場景同一個情況，一開始企喺岸邊練下啲基本嘢，呢個階段我明明ok，都完成曬所有教學訓練




教學完成，正式開始出海潛水，同下圖一樣，陽光一絲絲咁射落海之後，個場嘅好夢幻呀，經過海面折射之後，陽光更加好似啲聖光咁，一道一道光照亮呢片海

我睇唔少潛水作品，都會特登shoe一幕，廣角影住太陽光射入一片海域，今日終於畀我見到


而且的確都係多魚，但冇咩大魚或者特別嘅海洋生物，始終仲係喺沿岸

唔知大家有冇一種咁嘅感覺，如果嗰日一覺訓醒開始太美滿，全部嘢都啱你心意，連過親馬路都係綠燈咁樣，之後一定冇好事發生


所謂希望越大失望越大，我即將經歷我今程歐洲旅行最大挫敗之一


意外發生了，之前一直都幾順利，但係當教練開始拖住我越嚟越出同深，我開始見唔到海床，望向底就係一片深淵，我突然想像唔到，我要進入呢片黑暗





突然就開始驚，潛緊水驚絕對係大忌中嘅大忌，跟住成日做手勢，要教練帶返我上水面


我成日覺得我隻耳仔有啲唔舒服，正常就係要做你搭飛機嗰個撳住個鼻嘅動作去減壓，但唔知點解喺水底唔係好做到。只不過，依家諗返起，似乎都只係藉口，最後都冇計，教練驚我排唔到壓會出事，咁就拖返我上岸邊，所以我潛得最深嘅位置，應該都只係四米左右

(長文慎入)


其實我唔係真係第一次潛水(如果你認得小弟，睇過我之前嘅遊記，我之前嗰篇沖繩遊記有提過)

嗰次其實先係我第一次，但因為嗰日天氣好差，所以雖然孭住一大堆潛水裝備，但基本上只係喺岸邊兩三米深嘅地方玩下，我當時仲係非常失望，冇得潛出啲


明明唔係第一次潛水，我本來對自己都有啲信心，點知結果竟然係咁樣，同上次比都只係深咗少少，隔咗幾年，最尾都係原地踏步


我對自己好失望，90歐拋咗落鹹水海(物理上)都唔係最大問題，我恨自己咁廢，理性唔能戰勝感性，明明清楚過自己冇嘢好驚，明明有機會彌補番幾年前沖繩嘅遺憾，而家有機會我又唔敢去把握，困住自己喺個垃圾confort zone到，搞咗咁多嘢最尾都係出唔到去，屌！！！！！

飲生命之水前記得除衫.
始終係人都有唔擅長嘅野. 一係玩D自己擅長嘅, 一係慢慢試多幾次, 實會得嘅.

低處未算低，我一個friend仲衰過我，練習緊嗰陣已經頂唔順，要上岸休息同埋嘔，本身我嗰陣都鄧佢慘，估唔到我之後要陪住佢一齊岸上等

同行絲打就本身有基本潛水牌，對佢嚟講唔係啲乜嘢咩難度，聽佢講呢度差唔多係佢潛過之中最靚嘅地方


有點唔係幾好嘅係，得一個教練有水底相機 就係帶住我個位肥教練，而帶住絲打個位由一開始就冇相機喺身，即係佢一出發已經註定冇機會影到相


但係，帶住我個位肥教練有相機喺身，但都係冇幫我影，佢之後都有say sorry，但又話因為too busy for keeping me alive



帶我出海嘅肥教練，好鬼風趣，係咁講9嘢，話叫我po ig，睇下有冇香港囡囡對佢有興趣，有意請pm

壞事接二連三，本身經樓下酒店櫃檯book咗黃昏包船出海食飯睇日落，然後見仲有啲時間，去食啲嘢先，但連餐廳都廢時揾了，頹下頹下 去返上次食大伏豬扒嗰一間算了


上次雖然我叫個份係大伏，但朋友嗰一份聲稱係老板自己約上嚟個份烤魚餐，係唔錯嘅，今日一於就嗌海鮮餐


但個海鮮飯，等咗勁耐都未嚟，開始有啲驚趕唔切黃昏嗰程船，諗住打去船公司問下，一問就出事 原來船公司10月改早咗出發時間，酒店又唔知，咁就成功miss咗班船，我期待咗好耐架，第一晚到埗酒店就即刻book咗佢，點解要咁對我

好彩酒店即刻願意全額退款，啖氣叫落咗少少

我發覺自己特別係旅行期間，我成日有啲太完美主義，期待嘅野一失去咗就會好燥，所以你見我唔鍾意plan行程，一大原因其實就係咁解


但其實旅行就係咁，充滿不確定性，既然現實無法改變，只好叫自己學習放低，睇開啲啦年輕人






原本我book我嘅個程船嘅傳單，明明睇落好美好

但老實講，雖然我好期待黃昏嗰程船，但我潛水失敗之後其實已經好攰，當我知道班船已經一定趕唔切，個心反而放鬆咗少少，終於可以無憂無慮慢慢等個海鮮飯上嚟






好彩，味道真係唔錯的 雖然比唔上上次Valencia嗰一煲paella，但都係平均水平之上，見佢整咗半個鐘以上先上菜，已經知應該唔會太差，點都有少少心機整嘅應該(一廂情願)


本來嘅我，冇預先知會我嘅情況下要等半個鐘，應該會嗌肚餓同有啲唔耐煩，但我依加反正又冇野做，好得閒下，等下反而覺得冇乜所謂，上菜之後慢慢食下，優哉悠哉，食嘅嘢全部變得好食咗


望住老板係隔離最後做下樣炒幾炒，然後勺上嚟比我地，感覺相當之好，好似喺去咗貴餐廳咁，老板親自服侍下你，然後問你味道好唔好，有冇需要改善嘅地方




三文魚扒，平均水平啦，似係急凍貨，但質素都可以，接受範圍之內

食飽飯無嘢做，返咗去酒店lobby 坐按摩椅同望住個海篤下波，雖然簡單，唔係一啲係Palma Mallorca先可以體驗到嘅特別嘢，但真係好chill ， 成個人鬆咗好多，潛水失敗嗰種冤屈少咗好多

(依加諗返起我好似第一次對住個海篤波，都算係體驗嘅)


好老土咁講句，塞翁失馬，焉知非福，真係確實體會到啦，旅行本身都係要求開心同體會










係lobby hea完，返上房做咗一陣嘢，咁就夜晚八點幾


本身絲打搵咗一間好似幾好食嘅海鮮餐廳，佢係直接新鮮咁樣捉上嚟，再放喺魚缸，然後你自己指要食乜嘢同埋點樣整

名：Restaurant la Parada del Mar

可惜，佢潛完水都太攰，直接瞓死咗，叫佢唔醒 大家都見到，其實頭先餐海鮮飯都幾飽，所以其實我就唔係太需要食多餐海鮮餐啦，各位將來有機會去幫佢試下


既然冇去到食嘢，就落街行下，散下步 (廢老mode)
魚醫生，第一次係歐洲見到，仲以為係亞洲嘢，可惜佢就嚟收工，唔係真係想試下，近排去咗咁多旅行，腳板情況都唔係好好

希望我將來會克服到

繼續喺酒店附近逛，行下行下，又想去睇下海，諗住呢度喺岸邊，應該會有啲沙灘之類行下，google map 一 search又真係有

叫做：Cala Major

有興趣可以copy and paste去google map睇下，Google map仲有成六千幾個評分明明呢度唔係市中心地帶，個沙灘面積又細，估唔到會係咁熱門，佢一定有呢過人之處，就去望下


明明就喺下面，但入口唔係咁容易搵到 兜咗第二次先搵到入口，就係呢條小徑，平時夜晚唔會敢行入去嗰一種




其實我都知打咁多字，未必有人想睇仲要嘥多我好多時間去寫，但我開遊記post有時係當寫日記咁樣，想記錄低嗰陣嘅感受，如果覺得太無聊就飛咗去啦


言歸正傳，去返多圖少字模式

呢個沙灘非常之有驚喜，可能係因為嗰條小徑嘅構造，我事前完全見唔到沙灘嘅任何樣貌，一落到去，原來係啲靚酒店同餐廳嘅後花園，依家就可以理解點解咁多人嚟過

雖然我畀唔起錢入去，但不得不講，呢啲建築物開咗橙燈之後，豐富咗成個景色，令到呢片沙灘靚咗好多，而且呢啲建築物都冇令到個沙灘污糟咗。周圍得兩三條友，後面有好多像徵著繁華嘅燈照住，呢一種冷清得嚟好舒服嘅感覺，我好享受呢個地方

如果我坐船出海，就唔會有心機有時間去搵到呢片沙灘，所以有時啲嘢真係好難講嘅

cls喺間餐廳中完伏 仲要返去再中伏

絲打心諗宜家啲港男

本身仲未算肚餓，今餐食番平少少，行過見到一間意大利菜，見到佢個爐好似好有料 一於就試下佢嘅pizza，好似12歐，貴咗少少，但都可以嘅





個pizza係我亂咁嗌嘅，返到酒店打開嚟睇，基本上就係芝士、松露油同埋杏仁，我就覺得啲杏人放喺pizza度就好奇怪，但都唔係唔可以，味道都平均水準啦，可以嘅，主要係因為凍咗，但呢一點就唔關商家事嘅


最衰係原來佢冇幫我哋切開，我自己手撕pizza，整到一pat嘢咁樣


話咁快就去到最尾一晚，係我最後一次坐喺酒店露台望住呢片海景，食住pizza飲住可樂，同呢片景色渡過只屬於我哋嘅最後一晚

前一晚，上tripadvisor隨便轆下嗰陣，無意中搵到佢，估唔到前一晚嘅凌晨，都仲有船有期可以出海，即刻去補返今日嘅遺憾，打去book，雖然因為未確定出席人數，搞咗好耐，但最尾都成功解決，仲有因為冇其他顧客，最尾變咗我哋包船，99 euro per one，破產啦


第二朝落去同櫃檯book的士，點知溝通錯誤，book咗架即刻嚟嘅的士，本身諗住book半個鐘後，冇計了，唔好話食埋酒店早餐，行理都差啲趕唔切執 下次學精了


今日陪我地出海嘅船




好彩上船都有呢啲小食，可以填下肚咁



開始出海了，好鬼興奮呀真係！

陪住我出去就呢架船嘅樣貌，呢度影得清楚啲，圖中嘅人完全係冇關係的，但都係同一個場景(船主IG cap返嚟)





除咗我哋，有一男一女喺架船度，負責開船同其他設備維修嘢，我去幫下手，幫個男嘅去放個錨入海，成個過程幾有趣，同佢合作搞緊呢壇嘢嗰陣，有一種我真係幫緊手去真係做一樣嘢就感覺，有種成功感，好充實，我真係存在緊，長期喺我心裏面一種空虛感暫時消散咗



架船定咗之後就著救生衣落水，今次我完全冇咩心理問題(當然，喺因為浮住喺水面)，水深起碼有15米，但可以直接望到海床，真係清到痴線，真係好似你開浴缸去浸浴咁樣，差唔多咁透明周圍好多唔同嘅魚，雖然冇乜大魚或者特別嘅魚，但唔緊要，因為一放個頭落水，成個大海嘅感覺返咗嚟



(google 圖片示意圖) (搵返一啲同樣係Palma Mallorca，景色都相近嘅圖頂住先，無得帶手機落水始中)






啲水都真係好凍其實，坐喺邊緣位，放隻腳以經覺得好凍，但唔理得咁多了，仰天大嗌一聲，跳落水，捱過頭十秒之後，慢慢開始適應返個體溫



一落水，就沿住條繩出去，之後就可以放手慢慢自己游下玩下，好舒服呀

我係絲

上archi workshop，西班牙嗰次有啲tutor英文都唔係話十分好所以有時講到九唔搭八咁好好笑
不過上堂附近間skye coffee同埋某餐廳嘅iberian pork ribs幾正到宜家仲好記得