(不定期live) 西班牙讀書歐遊之旅

見到你話遊記出名加落地庫就估到大概係乜野
台仔blog最鍾意食呢d grilled野，而次次都伏到爆炸

好耐之前去捷克又係睇左台仔blog, 十個有九個都係介紹一間食grill既野

同樓主你一樣又係叫左一盤mix, 全部都又乾又un, d blog仲話好好食

走去玩千秋仲跣低咗, 好彩無受傷?

學識一個敎訓，mix 埋係冇好嘢

係，衰on9

多謝
點識㗎 對西班牙人嘅性格同文化有冇咩睇法

外國做野識
除咗short temper 其他方面都好唔西班牙人 所以comment 唔到
不過去左佢屋企過聖誕幾年 佢哋既”團年飯”好嘈
但又真係好熱情無架子既 我咩肯試肯食佢哋都好開心

個羅宋湯幾吸引

望返啲相都想再飲多碗

啱啱到咗羅馬尼亞首都 布加勒斯特 暫定行程係咁樣 有任何建議提醒 歡迎指教小弟

Day 1 (now) 9 hea中

Day 2 布加勒斯特 to sinaia to brasov

Day 3 brasov 即日來回德古拉城堡

Day 4 brasov 9hea半日 下晏搭車返布加勒斯特 繼續hea

Day 5 布加勒斯特 唔知做乜好 傍晚飛返西班牙

quote 返我之前講過嘅預計行程，本來就係day 4離開brasov ，返去首都 布加勒斯特，預備day 5 最尾一日飛返去西班牙


但根據我呢幾日嘅描述，相信大家都feel到，我對首都 布加勒斯特 嘅印象唔係幾好，同埋又幾鍾意brasov 呢座城市，所以樓主喺day 3晚臨時改咗行程，好彩我懶得滯，連聽晚嘅住宿都未book，所以依加臨時改都冇問題

(唔好學我)

羅馬尼亞 day 4



琴晚已經知會咗出面櫃檯想住多晚，我間房係有位嘅 改咗行程，依加多咗晚，唔使11點check out走，今日訓到11點幾先落床


拖到12點左右出門，然後同第一日一樣，接待處聽到聲，就出嚟迎接我同埋收錢，原本佢就建議收番前兩日呢個價錢，我就厚住臉皮咁問依加唔駛比booking.com中介費，有冇得平啲

佢勉為其難諗咗一陣之後打咗個九折比我 原本三百頭hkd已經好抵，依加齊頭300就搞掂






收完錢，佢又主動行出嚟幫我斟杯咖啡，又建議我有邊度好去，好nice 搞到我都有啲唔好意思，唯有係到賣下免費廣告

Casa Moritz

位置、服務同裝修都幾滿意，仲有個大露台，之前有post到酒店相，有興趣可以去望下

再次去到舊城區市中心，今日仍然都係落雨，但係開咗遮就唔會濕身嘅程度，涼涼地濕濕地其實都幾舒服，落緊雨嘅呢度同樣都好靚






嚟到 城市文明博物館，原來撞正休息，但我今日心情靚，乜嘢都睇得好開，冇乜所謂啦 (如果平時都係咁就好)







再周圍亂咁行下，去到琴晚經過嘅議會廣場，(冇影，所以用返琴晚舊相)
原來佢廣場中心嘅建築物，竟然係當地歷史博物館，神秘到google map都冇顯示

我不嬲都鐘意去歷史館，我覺得係最快了解一個地方嘅辦法，即管就入去探下險

出快D啦

咪係 與標題不符 由頭到尾冇live過

多謝分享 好耐無去旅行 睇下你d相同文紓解下都好

連登不嬲都係圖文不符
多圖 = 一張圖，有圖 = 冇圖 有live = 冇live 都係同一道理



對唔住 一返到西班牙就要面對好多文同考試，有時又同同學出去，冇時間呀真係，盡力啦

講笑啫 上連登勿認真
好好enjoy個exchange先

得啦

但講真，如果冇lihkg呢個平台，我一定冇動力寫落去，然後我將來一定會後悔

得啦

但講真，如果冇lihkg呢個平台，我一定冇動力寫落去，然後我將來一定會後悔

又send咗兩次

又出咗兩次

大隱隱於市，呢個歷史館竟然隱藏係正市中心廣場嘅中心，仲要本身大門係閂埋的，我做好咗誤入政府機關嘅心理準備先去打開門，真係估你唔到裏面竟然有個歷史館


學生價，好似7 hkd左右，正價都係唔過20 hkd， 見到呢個價錢都知呢度咩料應該都係頹頹地咁






隨便影幾張相之後，突然有條友行過嚟同我講，影相就要收好似40蚊左右 唔係好鍾意呢個收費模式，不了，又要進入純文字討論


以上嗰幾張圖，都係二戰時候羅馬尼亞士兵嘅裝束，但二戰後共產黨上台，佢哋唔想人記得二戰歷史，從而諗起羅馬尼亞人民同共產黨嘅諸多瓜葛，想令人忘記共產黨實際上係點樣取得政權，然後再宣揚自己套歷史觀，即係共產黨最鍾意做嘅嘢之一啦


所以，絕大部分二戰嘅物品都已經冇咗，得返好少可以展示 但亦都因為咁，令到每一件普通嘅二戰物品變得更有意義



呢個歷史館基本上分咗幾個主題，除咗上述嗰個近代歷史，仲有 考古、陶瓷、醫術 之類，我興趣就冇乜，同其實佢真係冇咩展品好睇 又係走馬看花




之後行上二樓，佢係一個臨時嘅漫畫展，都係一啲同 時事 政治 歷史 社會相關嘅話題，漫畫係一個可以跨越語言嘅嘢，難得我可以唔使用google translate就咁睇，skip咗嗰一層翻譯上嘅錯誤，睇都睇得開心啲


呢一個展覽都幾深刻，最印象深刻係有個細路嘅作畫，佢係鳴人同佐助合作打咗架蘇共戰機落嚟 之後仲有唔少嘢，例如係呼籲社交距離，廣島原子彈嘅反戰漫畫，一個猶太細路仔嘅二戰經歷，慢慢睇都睇得幾開心




但見到呢張漫畫，真係偷偷地都要影低佢
其實唔止佢，仲有好多好多衛星國極權時代嘅諷刺漫畫



有本紀念冊之類嘅嘢，掀咗幾掀，近一兩個月都見唔到中日韓字，本人作為東亞代表，畫咗隻連豬上去

你唔講仲以為你畫咗隻維尼上去

行完歷史館，周圍望下搵嘢做，突然畀我見到山上一片白色，唔好呃我呀，係咪真係雪呀 食埋飯即刻衝去搭纜車上去




急住食完嘢搭纜車，費事搵餐廳啦，一於去返琴晚主菜難食但其他嘢好食嘅嗰間餐廳

sirloin steak，炒雜菜，同埋鮮榨蘋果汁，個新鮮蘋果汁 500 ml 都只係20蚊港紙，圖嘅最右邊嗰個樽都係蘋果汁嚟，比你自己倒入玻璃杯飲，果汁嚟講蘋果汁一直都係我最愛，但好少有新鮮嘅，正！




主菜，呢一餐都可以嘅，合格，賣相同味道都ok，唔算韌，同啲汁都夾

但係，我係話我本身唔鍾意食呢啲部位，太厚身，啖啖都係肉，冇乜脂肪中和下，都係正路薄身大塊嗰種啱我

呢餐15歐左右，喺呢到物價嚟講，算貴了






今次揀咗餐廳喺另一邊，變咗古風，都幾靚

另外，我見T骨牛扒大約只係50 hkd左右，本身想嗌一份，但侍應話要熟成30日，依家未到時間冇得食。 呢個價錢食熟成牛真係太誇張，睇下將來冇巴打幫我去試下