(不定期live) 西班牙讀書歐遊之旅

好好天

食完中餐返民宿休息，做做下嘢突然聽到出面煙花聲，原來今日都有煙花 仲要行出出口就已經睇到，今次比上一晚仲要靚好多唔講咁多直接出圖

估唔到你會去埋西班牙exchange玩得開心啲

呢度天氣真係好好

btw多謝關心，我特登買咗啲快速測試自己做，雖然我諗唔係100%準，但結果顯示我陰性，應該都只係普通傷風感冒，冇中招嘅

測試洗唔洗$100hk到？仲有冇用口罩咁？

lm
我而家係荷蘭exchange緊

早晨，今日嚟到藝術科學城，個名聽落好頹，但其實佢係一個好有時代感嘅五個館組成嘅建築群，由好多超級靚嘅建築組成，見有啲遊記吹到係啲唔知咩咩外星人嘅建築之類 雖然冇咁誇張呀真係幾靚

第一個建築，係一個文化中心，裏面應該係有一個好大嘅演奏廳畀你做文藝或者音樂活動，我就冇入去啦



去到呢座藝術科學城，五個管之中有三個特別突出，通常就係買套票一次過買曬三個館，分別係海洋館、imax戲院同埋科學館，但非常可惜嘅係海洋館由於已經full咗，所以唯有買戲院同科學館組成嘅套票就算


第一站，呢個建築叫 Hemisfèric，係一間imax影院，三大重點建築之一，專門播啲同藝術或者科學有關嘅片，傳言指出當有倒影嘅時候影呢度，就可以影到一隻眼，可惜睇唔到



(預告 其實之後夜晚我再嚟咗一次，呢次會成功影到 講到夜晚先再講，依家已經係凌晨，但我淨係講到今朝早 live真係不容易啊，1正評 = 1 鼓勵)

你個名

幾平，7歐，當63hkd
口罩當然有，有時甚至一日兩個

我一直都有買磁石貼嘅習慣，一個地方買一個，因為面積少方便帶返去，又有紀念價值

今次見到呢個雖然有啲貴，但真係整得幾靚下，藝術科學城五個建築畀佢濃縮入去一個細磁石貼到 唔買唔得




(下圖為google，因為影得唔好睇)
嚟到科學館，外型應該係諗住模彷鯨魚嘅骨架，可能係為咗呼應返隔離嘅海洋館，好靚呀

正式入場科學館，乘坐住電梯前往未知嘅世界




首先見到嘅係 雞(？)
呢個展品畀人去觀賞雞仔係蛋孵化出嚟嘅過程，估計係想傳達的生命教育之類嘅嘢畀細路睇，但其實我覺得幾殘忍，一出世冇咗阿媽，又要畀班進擊的巨人圍觀指指點點





正式嚟到第一個展館，講述樂器同埋聲波有關嘅科技館，一入去就畀個下馬威你先，係近乎全黑嘅環境，畀音波圍繞住，等你準備進入呢個世界




模仿音量嘅波場



一部琴放咗喺度，但又冇拆開嚟講佢裏面嘅構造，明明其他小提琴嗰啲都有，係咪因為唔捨得呀



一個源自瑞士嘅鼓，但我認得佢，我朋友屋企有個，佢話叫空靈鼓，原來竟然係出自於瑞士但呢個樂器敲出嚟真係有個空靈嘅感覺，而且又唔貴，抵玩呀



有個職員，帶住一班細路，為一套好耐時代甚至係未有音效嘅電影，配上配樂，例如係食嘢聲，火車聲，帶住班細路要上堂上嘅道具去整出嚟，真係一個好好嘅方法發揮細路嘅創造力，同埋引起佢哋對樂器嘅興趣，唔係捉佢去興趣班就得㗎

留名返工睇

玩到嗰心散晒 唔識讀書

Hermano, ahortia donde estas?
Todavia en Espana ? Hong Kong o otra el pais?
Estoy en Latin America

返工追晒
有得去exchange真係好

唔好fail呀

睇曬咁比面
多謝支持

依家喺Valencia，live 遊記post嚟

拉丁美洲比較少香港人去，巴打有眼光

我個陣做咗人生最毒嘅事 一個人行水族館

唔驚，獨遊嗰陣更毒嘅嘢我都做過

例如呢 想聽下
但獨遊完覺得自己好叻
原來好多嘢唔需要靠人地都做到

獨遊自己去主題樂園、情侶打卡景點、睇戲、高級餐廳 之類啦，我喺香港試過自己一個燒嘢食
(廣告：有興趣可以睇返我之前嘅遊記)

我呢一刻就自己一個坐梗係一個應該算高級嘅餐廳自己食緊嘢 但遊記追唔到進度，要遲啲先會講到依家

巴打你好勇
好 等睇你update

離開音樂館，嚟到科學館裏面另一個展區 太空館 展區門口呢張圖令我諗返起火星任務



展示住火星嘅樣貌




人類第一次觀察到火星所描繪嘅景象，以及第一次觀察到火星所用嘅望遠鏡