與我同屋嘅女同學打到帽我嘅ex躺平//《同居女孩》

「咁樣唔係證據。」我講。

「無論如何，我知道自己無估錯。」

「你想點？」

「唔反駁？」

「只係你聽唔入耳。」

「你覺得係就係。」

「你到底想點？」

「放心，我唔係要出賣你哋。」

「我點肯定你唔會講出去？」

「既然件事唔係阮倩兒做，咁我點講都無用，況且我無證據，所以唔會有人信我。」

「所以你究竟有咩目的？」

「我只係想你聽我講嘢，當扮神父聽罪人告解。」

我哋兩個同時望住倩兒，然後周璇就開始訴說。

「班上嘅女同學一直都知道女仔嘅小圈子入面有欺凌事件，但係大家一直都只係默默地做一個助紂為虐嘅旁觀者。每個人都怕自己一出聲就會成為下一個被欺凌嘅對象，為求自保所以無人有勇氣出聲。結果，包括我在內嘅人都成為咗罪惡嘅一部分。」

去主動幫被欺凌者嘅人當然有高尚嘅情操，但係唔出手先係人之常情。

但係就係因為覺得係人之常情，所以旁觀者就係無意識之間成為咗欺凌者嘅一方。

面對欺凌只有被欺凌者同欺凌者，唔存在所謂中立，自稱中立嘅人都不過係縱容欺凌者同默認佢哋嘅行徑。

「嗯。」

我無意指責周璇，因為我過往一直都被蒙在鼓裡，直到今年開學我先知道呢倩兒一直畀人欺凌。

「唔鬧我？」

「我係你嘅話，我都可能會唔出聲，無人想成為下一個受害者。」

「如果唔係有人教訓咗班欺凌者，我哋呢班旁觀者隨時會成為下一個被欺凌者。呢次真係好彩在有人出手，好彩在個火未燒到我哋身上。結果，都係以自己為出發點去諗。」

「嗯。」

火勢未燒到埋身，人係唔會識驚。

周旋睇得出咁其他人都睇得出
即係分分鍾全班甚至全校都知係倩兒做嘅

鐘*

「好自私呀可？所以我覺得我對阮倩兒唔住，因為我都係欺凌佢嘅人之一。」周璇兩隻食指打圈。

「就係因為咁你開始接近倩兒？」

「正確啲講，喺係雅妍同其他兩個有份欺凌阮倩兒嘅女仔被人打傷，再申請退學之後，我知道自己唔會成為下一個被欺凌者之後，我先想贖罪。」

「等等先！雅妍退咗學！？」

「係。我諗佢呢啲自尊心咁強、一直做班上風雲人物嘅人接受唔到被自己睇唔起嘅人反咬成功，所以先走。」

我上次見雅妍嘅時候，佢明明已經收斂咗好多，佢份傲氣已經唔見得七七八八。

我以為佢會喺改過自身之後返嚟學校，估唔到佢已經走咗。

「都有道理。」我答。

「講返阮倩兒，我想向佢贖罪。我哋呢班旁觀者同班欺凌者一樣，正正係過去幾年令佢孤身一人嘅原因。喺枷鎖消失嘅依一刻，我諗就係成為佢朋友、去補償佢嘅好時機。所以當佢話要幫手買嘢食嘅時候，我就已經決定咗埋佢身同佢做朋友。」

「咁樣只係自我滿足。你只係想滿足自己贖罪嘅願望，倩兒嘅心情係點，對於你嚟講並唔重要。」

「嗯。我明白我咁做好自私，但係我唔想後悔。以前無幫倩兒擺脫欺凌，我已經好後悔。我唔想喺呢個無掣肘嘅時候都唔出手幫佢融入返呢個班，我唔想再睇住佢係困境入面但默不作聲咁睇住佢受苦。」

「我覺得你唔需要用贖罪嘅心同倩兒做朋友。我唔否認旁觀者都有一定程度嘅惡，倩兒都有期望過會有人拯救佢，而大家犧牲佢去自保嘅做法都傷得佢好深。所以你應該要好好同佢道歉，佢唔原諒嘅就再道歉，一直道歉直到佢原諒你。到時候你哋就可以成為對等關係、做真真正正嘅朋友。你用贖罪嘅心態去同佢做朋友嘅話，對倩兒嚟講實在太唔尊重。」

無發現欺凌嘅我其實都係惡嘅一部分，所以我都要好好同佢道歉。

我相信，周璇只要好好嘅同倩兒講出心底話，倩兒一定會接受周璇呢個朋友。

不過經過周璇嘅告解後，最少我搞清楚周璇唔係有咩企圖先喺呢個時間點去接近倩兒。

周璇有啲震驚咁望住我，過咗陣佢就低住頭講：「嗯。你講得啱，咁樣實在唔係太好。」

淚水一滴又一滴咁跌落喺地下。

我唔知周璇係因為覺得羞恥、諗通咗定係其他原因而喊，我淨係知道我整喊咗同班女同學。

「我會好好同阮倩兒道歉，再同佢做朋友。唔係為咗贖罪，而係因為我真係想做佢朋友。」眼角淚緊淚水嘅周璇對我擺出笑臉。

我哋兩個肩並肩坐、有啲尷尬嘅氣氛、班會旅行、喊緊嘅女仔，點解成個佈局好似周璇同我表白但係我拒絕咗佢咁？

成個故事就好似一個暗戀咗我好耐嘅女仔，為咗親近我而同我一齊加入購物組，當佢係班會旅行搵到同我獨處嘅機會後同我表白，但係對佢無感覺嘅我一口拒絕咗，所以佢就傷心到喺原地喊。

如果呢一刻畀其他人見到我一定會畀人誤會係仆街仔。

點解拒絕人哋嘅表白就係仆街仔？鬼知咩！啲女人覺得拒絕女仔表白嘅男仔都係賤人，完全無理由，毫無道理可言。

但係我無呀！我無畀女溝呀！

不妙。

大撚鑊。

畀人見到我就閪啦。

我乜都無做呀！周璇都無同我表白呀！我只係幫佢解開心結咋！咁多位同學請相信我！我是（係）無辜的！

我立好呢個flag嘅幾秒後，玩波玩到累嘅倩兒向我哋走過嚟。

仆街啦。

我望向隔離嘅周璇，仲低頭喊緊。

【第四十話 完】

男仔最驚就係整喊女同學

係（托眼鏡

咁多文，應該乜加更都加晒啦

今日咁多文既

【第四十一話 走先啦】

「我走先啦，係咁先啦，下次再講啦。」我向周璇rap咗一段歌詞後就打算逃走，但係佢拉住我。

「搞甚麼飛機呀？」我驚到講書面語，同時倩兒越行越近。

「可唔可以陪我？聽我向阮倩兒嘅道歉。」周璇抹走眼角嘅淚水講。

「⋯⋯可以。」當係為咗倩兒。

「你搞咩隻眼紅晒？」行到埋嚟嘅倩兒問。

周璇望望我，我向佢微微點頭。

「你整喊佢嘅？」倩兒指住我問。

我搖搖頭。

「倩兒，係咁嘅⋯⋯」

//

喺你痛苦嘅時候無幫到你真係好對唔住。

成為咗間接嘅欺凌者、成為咗幫兇真係好對唔住。

因為自己嘅懦弱而犧牲咗你真係好對唔住。

真係好對唔住。

如果你原諒我嘅話，可唔可以同我做朋友？

今次，我唔會離棄你，即使有新嘅困難出現。

我知道你無理由去相信我，但係我都希望可以同你做朋友，因為我好鐘意阮倩兒呢個人。

我想成為你喺班入面第一個女性朋友，唔係為咗贖罪，只係因為我希望同你做朋友。

//

周璇向倩兒訴說內心嘅一切。

周璇將佢嘅懊悔、歉意同埋對未來嘅希冀都一一道來，倩兒就係不知不覺間牽起周璇嘅雙手。

語畢，周璇低著頭等待倩兒發落。

等大家幫手推post

推

「望住我。」倩兒道。

周璇緩緩抬頭，同倩兒對望。

「我原諒唔到你。」倩兒講。

「都啱嘅。」

「但係我都想同你做朋友。」

「我明明有份傷害過你。」

「我知道。雖然係間接、雖然唔係主犯，但係我的確好討厭喺我受苦時，對我視而不見嘅人。」倩兒瞥一瞥我再望返周璇，又講：「當時，每一個中立嘅人都係幫兇，你哋都選擇咗犧牲我去保護你哋自己，依家嘅我真係原諒唔到每一個加害者。」

「咁⋯⋯」周璇想抽出被倩兒捉住嘅雙手，但係倩兒用力地捉住周璇雙手。

「雖然依家唔得，但係可能未來就可以原諒小璇你⋯⋯」倩兒愈講愈細聲，倩兒再講：「所以呢，如果你再求下我嘅話，我唔係話唔可以同你做朋友嘅。如果你求我嘅話，我都可以勉為其難咁同你開始做朋友。」

呢條女，一怕羞就唔識好好地咁講嘢。

唔識好好表達自己呢一點，或者會慢慢改善。

因為佢終於有咗人生第一個同性朋友。

兩個女仔相擁。

「求下你，我可唔可做你朋友？」周璇問。

「既然你求我嘅話⋯⋯朋友。」

攬住倩兒嘅周璇用口形同我講咗聲多謝。

我多謝你就真。

因為你，倩兒應該可以好好咁融入呢個班級。

所以，你哋要做一對好好嘅朋友。

【第四十一話 完】

輕輕一推

尷尬到

#754 第五行
係喺

有冇加更

呢個時候要好好安慰女同學先得www（摸頭

有女裝校服都未必係倩兒嘅。可能我鐘意著呢！啲籃球撚鐘意聞底褲，gym撚鐘意著女裝囉！

笑撚咗

【第四十二話 二人的時間】

自由活動時間，「勉強」成為朋友之後，周璇拉住倩兒周圍去，而我就成為佢哋專用嘅攝影師，幫佢哋影啲打卡相。

影到累之後我哋就慢慢周圍行下，跟住，陳浩然頭耷耷咁迎面走過嚟：「呀⋯⋯」

「咩料呀。」我問。

「女班長同男班長表白呀。」對女班長有意思嘅陳浩然一臉失落咁講。

「咩話！」周璇聽到呢啲消息就驚訝地道。

「世界末日啦！」陳浩然仰天長嘆。

周璇用手肘撞一攞我，再係我耳邊細細聲講：「我拉走陳浩然，你哋兩個自己行下啦。」

語畢，周璇就拉住陳浩然：「帶我去照田雞！」

陳浩然一臉唔情願咁同周璇一齊行：「佢哋唔係田雞，無姦情㗎wuwu⋯⋯」

周璇同陳浩然走咗次後，終於嚟到我同倩兒嘅獨處時間。

「影張相囉？」倩兒提議。

「好呀。」我擺好架勢，準備幫倩兒影張靚靚嘅打卡相。

「唔係呀。」 倩兒耍手擰頭，佢拉一拉我衫袖：「唔係獨照呀⋯⋯」

「你想同我影合照？」個衰妹想點。

「快啲。」

「吓？」

「你真係想同我影相嘅話，我都可以同你影一張合照。」倩兒臉頰泛紅。

「我唔想影。」

「吓⋯⋯」

「你真係想同我影嘅話我可以同你影。」我反客為主。