與我同屋嘅女同學打到帽我嘅ex躺平//《同居女孩》

大力一推！！！！！！！！！！

【第四話 入伙】

同居嘅第一日，阮倩兒將行李放入房之後，我就同佢講下間屋嘅嘢。

「你間房隔離就係廁所，我唔會同你爭嘅，因為我間房都有個。廚房就一目了然啦，啲清潔用品就係嗰個櫃。雪櫃入面嘅嘢食你可以隨便食，我轉頭再拎條後備鎖匙畀你。至於我隔離房係雜物房，你冇乜事都唔好入去啦。另外仲有間多間吉房，乜都無嘅。」我指手畫腳咁同佢講解。

我間屋係左右兩個單位打通，所以都頗大下。

「明白。有唔明再問你，我打掃下間屋先。」阮倩兒講完就拎起咗兩袋垃圾。

「唔洗啦，我扔啦。」 過門都係客，我唔好意思要客人做清潔，同埋啲垃圾全部都係我製造出嚟，咁正路都應該由我自己處理返。

講開又講，突然要講咁多嘢我真係好辛苦。

「家務請畀我做，當係交租，我唔想喺度到白住。」阮倩兒好堅決咁講。

「咁之後嘅家務就交畀你。」我明白佢嘅諗法，所以都唔再推塘。我都唔想佢住得唔開心，就當等價交換。我再講：「呢一次畀我幫你，你都唔知垃圾房係邊到，我帶路。之後會交返畀你。」

「Ok。」阮倩兒今次好爽就應承咗我。

我帶佢行去同一層嘅垃圾房，丟完垃圾返到屋內之後，阮倩兒就開始執屋。

「麻煩你啦。」我講完就攤返上床玩打機，同佢講咗咁多嘢已經好累，我急需私人空間。

但我無閂房門，如果阮倩兒有任何問題都可以隨時問到我。

一個熱褲女係我屋企打掃，孤男寡女，如果佢對我孤狼式襲擊我都只能夠束手就擒。

我不自覺咁發出嘔心嘅淫笑，係廳嘅倩兒聽到我核突嘅笑聲之後，佢就一臉厭惡咁遠離我間房。

見到佢呢個表情我就收起淫笑，走到儲物室拎枕頭同被之類嘅寢具畀倩兒。

「呢啲枕頭同被都係新嘅，我擺係你張床啦。」講完我就放低啲寢具係佢將床到。

「唔該。」倩兒放低手頭上嘅工作同我道謝。

「床單你有冇話想要邊隻顏色？」

「無所謂。」

「咁我畀張藍色嘅你啦。」之後我係儲物室翻開幾個盒，拎咗張小飛象嘅床單同被套畀佢。

倩兒見到小飛象圖案後雙眼閃過一絲喜悅，然後又變返臭（閪）臉。

「唔該。」

可能呢個女仔都鐘意啲可愛嘢。

之後我都諗唔到有咩可以幫佢做，所以我又攤返上床繼續傷春悲秋。

不過有個人陪住，傷心多少都有啲分散。

【第四話 完】

晏啲/今晚補60正評加更

推

多謝高質「讀者」

唔該巴打成日幫我推

Push

Lm

推

洗乜客氣 我又黎推喇

60正評補

【第五話 初見回憶】

倩兒清潔完屋企就到咗中午，之後佢就出咗去醫院探媽媽。

「你要同人好好相處呀。」阮倩兒媽媽叮囑。

「我同阿衡好好呀。」阮倩兒講咗個細大話，佢唔識同同齡嘅人相處。惡劣嘅態度可能已經令梁諾衡討厭咗佢，但係佢唔知可以點樣同佢好好相處。

「咁就好啦。同埋呀，你以後唔洗成日嚟探我啦。」阮倩兒媽媽講。

阮倩兒同媽媽傾多陣之後就離開咗醫院，再去咗街市買餸準備今晚嘅晚餐。

阮倩兒返到新居嘅時候已經係傍晚，佢敲敲我房門問：「你有冇嘢唔食，我煮飯。」

「乜都食。」捲咗自己係被入面嘅我答，其實我唔想應佢，但無計。

我比較想知我前女朋友做緊啲乜。

「咁你等下。」

我禮貌上問一問：「洗唔洗幫手？」

「不。」阮倩兒簡略地回答。

一個鐘左右之後，阮倩兒就煮完飯，聞到飯香味嘅我就出房行去飯檯到等食飯。

好耐無食住家飯啦，我都唔知自己食咗幾耐外賣啦，有丁點感動。

阮倩兒煮咗簡單嘅兩餸一湯，蕃茄炒蛋、西蘭花炒雞柳同粟米蛋花湯。

「啱唔啱你胃口？」阮倩兒問。

「Ok。」我無乜所謂，其實我唔太想同其他人一齊食，但我當係畀面派對，同埋人哋煮咗我都無謂浪費。

我哋兩個人一直食飯都無傾偈，只有碗筷碰撞嘅聲音係呢個空間響起。

我全身都好唔自在，覺得好尷尬，但係阮倩兒就好似無乜嘢咁照常食飯。

唔知係太耐無同人相處定係因為阮倩兒幾靚女，我依家有啲想搵嘢講，明明無耐之前我仲想做自閉毒撚。

頂唔順沉默嘅我開口：「係呢，你知唔知我哋同學嚟？」

「知道。」阮倩兒好簡單咁回答完就繼續食飯。

「我仲以為你唔知我哋係同學，哈哈。」

阮倩兒無將對話延續落去，場面更尷尬。

不過我有啲驚訝佢竟然知道我哋係同學，我仲以為佢一定唔識我。

我諗住正常嘅話，一個女同學寄宿到一個識嘅男同學屋企，女方應該或多或少會表達到啲驚訝，但係阮倩兒丁點震驚嘅反應都無，所以我先以為阮倩兒唔認得我。

可惜，對話係呢到中斷咗。

得唔到對方回應嘅我，決定化身做啲chur女神回覆嘅毒撚，不停問問題，試圖展開話題：「咁你讀咩架？」

「同你一樣，經濟同地理。」阮倩兒答，今次答得比較長。

「你又知我讀咩？」

「⋯⋯咁啱。」阮倩兒呆咗兩秒先答呢個問題。

「你係咪有留意我呢？」

「無。」阮倩兒又精簡咁回答。

又延伸唔到話題。

我屢試展開話題不果，於是我決定試下講在意呢個女仔嘅一𣊬間，我嘅秘密武器。

【第五話 未完】

推！

心情好加更

「話說，我係學校見過你唔戴眼鏡同放頭髮。」我講。

仆街，講完我就諗，我咁講，佢會唔會當我係癡漢？

不過呢個話題好似吸引到阮倩兒，佢抬係頭問：「幾時嘅事？」

「中四嘅時候，放學之後我經過視覺藝術室，見到你係到畫緊畫。」我見佢有啲興趣所以就講落去。

阮倩兒聽到之後雙耳開始泛紅，但無改毒舌：「你跟蹤我？」

「唔係呀！嗰日打完波先發現漏咗嘢係班房，想返去拎嘅時候就咁啱見到有個女仔喺視覺藝術室入面，然後就咁啱見到你解開雙馬尾，再咁啱見到你除眼鏡畫畫。」我連忙解釋，我怕佢真係以為我係啲變態佬。

「即係你偷窺？」阮倩兒表情扭曲咁望住我。

呢個厭惡嘅表情同係街上見到曱甴一樣，但係我真係無辜。

「唔係呀！真係咁啱見到！」我好落力咁解釋，我唔想畀女同學覺得係變態咸濕佬。

「講笑。」但係阮倩兒厭惡嘅表情唔似講笑。

「不過估唔到你鐘意畫畫。」

「好多嘢你都估唔到。」阮倩兒故弄玄虛去掩飾自己嘅怕羞。

「我覺得你放髮同埋無戴眼鏡個樣好靚。」我衝口而出。

今次死啦，佢一定會當我係變態佬。

「吓？多謝。」阮倩兒嚇咗一嚇，但係都坦然地接受讚美。

「總之我唔係偷窺。」我好介意畀阮倩兒話我偷窺。

「我知道，都話講笑。」阮倩兒有啲唔耐煩。

「我唔係變態佬呀。」我無奈到唔知點幫自己解釋。

「其實我當日知道有人睇到佢畫畫。」阮倩兒講。

佢竟然開金口講自己嘅事。我以為佢咁cool唔會想講自己嘅嘢。

阮倩兒再講：「無讀視覺藝術嘅我正路係唔可以用視覺藝術室，但因為我鐘意畫畫，所以我會襯放學後嘅時間偷偷地走入去畫畫。一來可以偷用學校啲資源，二來可以消磨一下時間，三來畫畫可以畀我放鬆下，四來可以令我唔洗咁快返屋企，所以我不時都會咁做。」

呢次係阮倩兒第一次同我講咁長嘅說話。

「咁點解你唔一開始就讀視覺藝術？」我問。

「因為畢業會乞食。」阮倩兒直截了當咁講。

「雖然我無朋友，但我都唔太想畀同班同學見到佢畫畫。」阮倩影竟然輕描淡寫咁講出自己無朋友嘅事實，雖然我一早就知佢無朋友，但係我估唔到佢可以咁爽快咁講出嚟。

畫畫阮倩兒嘅秘密嘅嗜好，我諗佢覺得呢個興趣同佢個人嘅性格唔係太夾，所以有啲怕畀人知，雖然唔知怕畀邊個知道，因為佢都無朋友。

「因為唔想畀人認到我同唔想整污糟，所以我每次畫畫嘅時候都會放髮同除眼鏡。但係就係有一次，因為我係自修室做功課做耐咗搞到遲咗去視覺藝術室，唔記得變裝就入咗去。結果就畀個變態偷窺狂見到。」阮倩兒真係當咗我係淫蟲。

「我真係無心⋯⋯」真架，快啲信我啦。

「我畫咗一陣畫之後想托一托眼鏡，嗰陣先發現自己未變裝。變緊裝嘅我都有一刻感覺到有視線望住我，但係當我望向望出門外時又見唔到人。我依家知道唔係錯覺，真係有癡漢偷睇我。」

完啦，佢之後都會一直當我係變態佬架啦。

「我無心架⋯⋯」

「邊個知？」

「唉。」我嘆口氣再講：「估唔到你都會講咁多嘢，我仲以為你係唔鐘意講嘢個一類人。」

「我係唔鐘意講嘢。但呢件事關我事，所以我先講你聽。」阮倩兒講。

佢吸咗啖氣，然後塊臉有啲紅咁再講：「我畫畫呢件事可唔可以唔好講畀其他人知？」

你都無朋友，就算我想講都唔知可以同邊個講。

但係呢個內心獨白太失禮，我又唔會將佢嘅事講出去，所以我答：「無問題！你鐘意畫畫呢個秘密我會好好守住。」

我今日畀阮倩兒冷淡對待咗成日，我見到眼前呢個紅都臉曬嘅阮倩兒就情不自禁咁去戲弄佢一下，所以我特登大聲啲講「畫畫呢個秘密」。

阮倩兒聽到之後就紅住臉咁低頭繼續食飯，然後細細聲咁講咗句：「多謝。」

仆街，有啲罪惡感。

一個本來咁強勢嘅女仔變得怕羞，我覺得自己好似變咗個奸角咁。

「唔洗客氣。」我尷尷尬尬咁食完再將啲碗筷放入洗碗機就急急腳返房瞓。

有條女同我一齊住同埋一齊傾下計，我失戀嘅痛好似無咁深，好似無咁掛住同我分咗手嘅嗰條八婆。

【第五話 完】

推

點解係見到「佢」畫畫？

lm

睇怕係樓主唔記得改返主語賓語

覺得似有鬼多啲

原來係鬼故