與我同屋嘅女同學打到帽我嘅ex躺平//《同居女孩》

樓主係咪真係好鐘意食白汁雞皇飯？

「其實我當日知道有人睇到我畫畫。」阮倩兒講。

佢竟然開金口講自己嘅事。我以為佢咁cool唔會想講自己嘅嘢。

阮倩兒再講：「無讀視覺藝術嘅我正路係唔可以用視覺藝術室，但因為我鐘意畫畫，所以我會襯放學後嘅時間偷偷地走入去畫畫。一來可以偷用學校啲資源，二來可以消磨一下時間，三來畫畫可以畀我放鬆下，四來可以令我唔洗咁快返屋企，所以我不時都會咁做。」

呢次係阮倩兒第一次同我講咁長嘅說話。

「咁點解你唔一開始就讀視覺藝術？」我問。

「因為畢業會乞食。」阮倩兒直截了當咁講。

「雖然我無朋友，但我都唔太想畀同班同學見到佢畫畫。」阮倩兒竟然輕描淡寫咁講出自己無朋友嘅事實，雖然我一早就知佢無朋友，但係我估唔到佢可以咁爽快咁講出嚟。

畫畫係阮倩兒嘅秘密嘅嗜好，我諗佢覺得呢個興趣同佢個人嘅性格唔係太夾，所以佢怕畀人知。雖然唔知怕畀邊個知道，因為佢都無朋友。

「因為唔想畀人認到我同唔想整污糟，所以我每次畫畫嘅時候都會放髮同除眼鏡。但係就係有一次，因為我係自修室做功課做耐咗搞到遲咗去視覺藝術室，唔記得變裝就入咗去。結果就畀個變態偷窺狂見到。」阮倩兒真係當咗我係淫蟲。

「我真係無心⋯⋯」真架，快啲信我啦。

「我畫咗一陣畫之後想托一托眼鏡，嗰陣先發現自己未變裝。變緊裝嘅我都有一刻感覺到有視線望住我，但係當我望向望出門外時又見唔到人。我依家知道唔係錯覺，真係有癡漢偷睇我。」

完啦，佢之後都會一直當我係變態佬架啦。

「我無心架⋯⋯」

「邊個知？」

「唉。」我嘆口氣再講：「估唔到你都會講咁多嘢，我仲以為你係唔鐘意講嘢個一類人。」

「我係唔鐘意講嘢。但呢件事關我事，所以我先講你聽。」阮倩兒講。

佢吸咗啖氣，然後塊臉有啲紅咁再講：「我畫畫呢件事可唔可以唔好講畀其他人知？」

你都無朋友，就算我想講都唔知可以同邊個講。

但係呢個內心獨白太失禮，我又唔會將佢嘅事講出去，所以我答：「無問題！你鐘意畫畫呢個秘密我會好好守住。」

我今日畀阮倩兒冷淡對待咗成日，我見到眼前呢個紅都臉曬嘅阮倩兒，我就情不自禁咁去戲弄佢一下，所以我特登大聲啲講「畫畫呢個秘密」。

阮倩兒聽到之後就紅住臉咁低頭繼續食飯，然後細細聲咁講咗句：「多謝。」

仆街，有啲罪惡感。

一個本來咁強勢嘅女仔變得怕羞，我覺得自己好似變咗個奸角咁。

「唔洗客氣。」我尷尷尬尬咁食完飯，再將啲碗筷放入洗碗機，然後就急急腳返房瞓。

有條女同我一齊住同埋一齊傾下計，我失戀嘅痛好似無咁深，好似無咁掛住同我分咗手嘅嗰條八婆。

【第五話 完】

【第六話 女孩的回憶】

雖然阮倩兒無講，但其實佢都有一段同梁諾衡係學校嘅邂逅。

梁諾衡對阮倩兒嚟講係一個有啲在意嘅人。

有一次，班入面咁啱到阮倩兒值日，佢要負責收功課。

係班入面無朋友嘅阮倩兒束手無策，佢唔知點樣開聲問人拎功課。佢企咗係一個男同學檯前，但又唔開口。嗰個男同學又望返住阮倩兒，兩個對望住但又乜都唔講。

係呢個時候，咁啱經過嘅梁諾衡就開口問：「搞咩呀？」

被問嘅二人都無回應，然後梁諾衡見到阮倩兒手上拎住作業， 梁諾衡即時意會到發生緊咩事。

「同學，你交咗功課未？」

畀梁諾衡問一問，男同學即刻拎份功課遞畀阮倩兒。

阮倩兒望住梁諾衡，欲言又止。

梁諾衡見到咁嘅情況，佢就話：「不如我幫你收？」

梁諾衡覺得阮倩兒好難做得好呢個任務，所以建議由佢嚟做。

阮倩兒將功課簿遞畀梁諾衡，然後細細聲講：「唔該。」

講完之後，阮倩兒就走咗去。聽唔到阮倩兒感謝嘅梁諾衡就開始幫佢收功課。

呢件事之後，阮倩兒就有啲在意梁諾衡呢個男仔，但係因為佢係班入面嘅定位同埋佢本身嘅性格令到佢無進一步去接觸梁諾衡。佢只能夠係班入面嘅一角偷偷觀察梁諾衡。

阮倩兒無意同梁諾衡講呢件事，佢只係在意梁諾衡呢個人，依家亦好感激對方畀地方自己住，但係佢無意欲同梁諾衡親近或者做朋友，所以呢件事阮倩兒只會埋藏喺心中。

【第六話 完】

畀巴打捉到校對錯誤，我馬上加更了

加多幾更thanks 因為真係好好睇唔夠喉！

有文睇 推啊

遲啲會見到我真正鐘意食嘅飯

出篇潮文出黎啦

你係咪睇電視?

我叫左去買個白汁咁d飯有d雞皇就$26蚊

【第七話 醉酒】

之後嘅一星期，我同倩兒除咗食飯之外都無乜交流，因為我哋都有各自嘅生活。

我就喺床到躺平渡日，而阮倩兒就出咗成日街，去到夜晚先返到屋企。

某夜，我係廳到同朋友打Apex。

係房嘅阮倩兒突然行出嚟，以為嘈到佢嘅我就問：「係唔係嘈到你呀？」

雖然戴咗耳機，但係我都怕唔小心騷擾到倩兒。

一身運動裝嘅阮倩兒綁咗一條馬尾，佢搖搖頭答：「無。我出去跑步，順便買糖水，你要唔要？」

跑完步食糖水呢件事其實係對沖，但係我無講出口。

「好呀，返嚟畀返錢你，麻煩晒。」

跟著，阮倩兒穿好波鞋後就出咗門跑步。

阮倩兒嘅扎起馬尾嘅樣令我諗起前女友，我放低手制再打側攤咗係沙發。

我前女友都會做下運動，然後我係手機到見到一張又一張我同前女友嘅合照。

//

「衡仔，今日練完跑可唔可以去你到沖涼呀？」一個女仔問。

「可以呀。」

「我睇啱咗呢對波鞋呀。」女仔講完之後就將手機嘅相show畀梁諾衡睇。

「我買畀你啦。」

「多謝BB！」女仔高興咁攬住梁諾衡。

//

「雅妍⋯⋯」我低吟，眼角唔自覺咁流出幾滴眼淚。

沉醉喺回憶中同攤咗係梳化嘅我不知不覺間瞓著咗。

一個鐘左右之後，阮倩兒拎住兩碗糖水返到屋。

見到係沙發瞓住咗嘅我，阮倩兒立即放輕腳步，慢慢行入屋，擺低糖水，再幫我冚上毛氈。

本來阮倩兒唔想嘈醒我，但係冚緊毛氈嘅時候我就扎醒咗。

「呀⋯⋯」啱啱瞓醒嘅我就伸展一下筋骨，我一張開眼就見到阮倩兒。

好近。

佢對眼同我好近。

阮倩兒有啲修長嘅睫毛，我哋都盯住對方嘅眼睛。

從睡意回過神嚟嘅我擰歪臉，話：「唔該曬。」

「唔洗，你畀地方我住，我唔想你病。」

留意到檯上有兩碗糖水嘅我就轉移話題：「不如食糖水囉？」

「好。」

係腐竹蛋糖水。

「你鐘唔鐘意食？」阮倩兒問。

「我ok呀。」只係我又諗起前女友。

//

「BB，我今日想食心太軟呀。」女仔係電話講。

「松記嘅啱唔啱？」我問。

「好呀，你買外賣過嚟我樓下？」女仔問。

「一齊行去食啦。」我提議。

「人哋唔想行呀。你做外賣仔啦。」女仔撒嬌。

「好啦，咁我買過嚟啦。」

//

「好難食？」阮倩兒見我臉色唔係太好所以問。

佢估錯，我只係因為諗起個ex先咁樣。

「唔係呀。」我匆忙咁食幾啖糖水，廢事我嘅唔開心影響到佢。

阮倩兒無追問落去，始終大家唔熟，只要維持基本程度嘅交流就可以。

阮倩兒唔係唔想知點解梁諾衡成日留係屋企唔出街，明明佢係班上有唔少朋友，點解佢暑假要成個廢柴咁留係屋企都唔出去同朋友玩？

但係大家連朋友都唔算係，加上八卦同佢嘅形象唔係太夾，所以佢無問到。

又過咗一個星期，暑假得返兩個星期。

同居咗兩個禮拜，我哋都係無乜特別嘅交流，只係萍水相逢、因巧合而住埋一齊嘅二人，唔會好似童話咁發展出愛情故事、或者毒撚幻想咁產生情素。

認識但係喺本來嘅生活無乜交雜嘅兩人突然同居，有嘅只係無盡嘅尷尬。

唔知同居生活幾時會迎嚟盡頭，所以我哋兩個都摸索緊同對方嘅相處方式。

今日阮倩兒依舊出咗去醫院探媽媽再去買餸，但係我今日罕有地離開床榻，久違地出街。

呢個中午，本來我完全唔想出去，直到我係ig見到前女友嘅一個post。

唔知失戀嘅人係咪都有呢個犯賤嘅習慣，就係會開個假帳戶去stalk自己嘅ex。雖然心入面知道睇完唔會有乜嘢好事，但係都會忍唔住㩒入去睇。

一個限時動態，我前女朋友雅妍拖住一個男仔嘅手。

見到呢個限時動態嘅我立馬就嚇到呆咗，不過我重覆又重覆咁睇呢個限時動態。

我怕前女朋友黃雅妍會刪除限時動態，所以我將呢個動態截圖再儲存到自己嘅手機入面。

明明呢張截圖對我嚟講只有傷害，但係我都忍唔住儲存落嚟。

睇完又睇，睇完又睇⋯⋯

到底我cap圖落嚟緊係為咗令自己死心，定係想故意傷害自己，抑或係保持同前女友嘅聯繫，我都唔明自己行動嘅動機，我只係好自然地咁樣做。

我無深究自己截圖嘅原因，只係用力咁瞪住張截圖。

呢個男仔係邊個？點解會拖手？佢就係個姦夫？咁我算係乜？雅妍有冇鐘意過我？

呢啲問題係我嘅腦海中纏繞。

其實我心入面其實有答案，黃雅妍都講過呢個答案畀我知。

只係我唔肯同唔想承認。拒絕承認對方唔愛自己嘅事實可以為自己帶嚟一絲嘅慰藉，即使咁樣只係自欺欺人，但係呢個幻象可以令自己好過一啲。

老細休息 ＝ 我都休息

今日出多啲文，當係提早交出90正評嘅加更，同埋畀人捉到校對錯誤嘅加更

但係呢個限時動態狠狠地打咗我一巴掌，再格硬將我拉返去現實。

雅妍無愛過我，就算有愛過，對依家嘅雅妍嚟講，我已經不值一提。

我意識到呢個限時動態對我嘅意義，但係我唔想面對、唔想接受。

我將電話扔落地下，再用被包實自己，將外面嘅光芒完全隔絕。

我要瞓我要瞓，唔好再諗唔好再諗唔好再諗唔好再諗唔好再諗唔好再諗唔好再諗唔好再諗。

但係唔得，思緒不停纏繞係腦海入面，我完全瞓唔到。

「呀！！！！」我用雙手遮住耳仔，係得自己一個嘅屋企大叫。

心入面好痛苦，心臟就好似畀人用力咁揸住，我自己都揸住自己胸口，期望呢個痛楚可以得到舒緩。

我有啲呼吸唔到，眼淚又唔知幾時開始流緊落嚟，滔滔不絕地。

我好似嫌自己未夠心痛，我執返起部電話，再打開手機嘅相簿去睇返所有同雅妍嘅合照。

我哋去過嘅地方、我哋嘅相處、我哋有過嘅肌膚之親，過去嘅一點一滴透過相片嘅輔助，非常清晰咁投射咗係我嘅思緒中。

比起回憶嘅影像，我記得嘅更多係感受，雖然唔記得當中嘅細節，但係拍拖帶嚟嘅幸福感係我最有印象嘅嘢。

雖然係幸福同快樂嘅過去，但係呢啲感覺湧上嚟嘅依一刻，對我嚟講就只係雪上加霜，係我已經遍體鱗傷嘅身軀上再插一刀。

我好想失去意識、我唔想再諗起前女友，但係我越唔想去諗，我同雅妍嘅回憶就越係湧現係出嚟。

我試圖打電話畀雅妍，但係佢已經封鎖咗我。就算想whatsapp搵對方，我見到嘅就只有一個灰色嘅頭像同埋係我傳出嘅訊息旁邊只有一個剔。

做完一大堆無謂嘅爭扎之後，我嘅痛苦不減反增。

腦海比之前更清晰，所以我完全瞓唔著。

我好想打暈自己但係做唔到，於是，我換件衫就去咗樓下donki買咗一箱日本啤酒返嚟。

點解無畀人查身分證？我都唔知，可能係啲職員太求其，又或者係我個樣似已經成年。

重點係我終於離開咗屋企。

平時無飲開啤酒嘅我只係呷咗幾啖黃湯就開始迷迷糊糊，世界好似對唔到焦咁，分散成一個又一個小光點。

但係我依然將黃湯灌入喉嚨，不知不覺間我已經飲咗半打啤酒。

忽爾，嘔心嘅感覺湧上心頭，我立即跑咗去廁所，將鬱悶嘅感覺都吐入馬桶裡面。

呢一刻嘅不適令到雅妍係我嘅腦海中消失得無影無蹤。

嘔完之後，我就好似斷電咁攬住個馬桶瞓住咗。

加甜

可唔可以麻煩大家㩒一㩒入penana畀view小弟

嗰一邊300views都未有

推

留名支持,已經俾咗正評+㩒入penana畀view

感謝巴打

推