對於自己被提及，喺門外偷聽嘅阮倩兒有啲吃驚。
「但係佢明明係被欺凌嘅一方，點解我哋要處理佢？」何老師提出合理嘅質疑。
「何老師，從來我叫你處理嘅係欺凌事件，而唔係欺凌者。」陳副校開始「指導」何老師。
「我唔係太明白你嘅意思。」何老師直言。
「何老師，你太年輕啦。我嘅意思係你要令阮倩兒唔好將佢被欺凌嘅事講出去，你要得到佢嘅信任，令佢覺得你係處理緊班欺凌者。咁樣你就可以畀到事件可以解決嘅希望佢，同時因為你得到咗佢嘅信任，所以你可以控制住佢嘅行動，令佢唔好搞大件事。」陳副校平淡嘅口吻同佢嘅說話內容有著極大對比。
陳副校嘅溫柔原來只係幻象。門外嘅倩兒心碎了。明明佢因為信任而向陳副校透露咗自己嘅真心，明明以為可以捉緊希望，明明以為同改變只有一步之遙。
曾經佢以為陳副校係真心幫助自己，但係一切都只不過係假象。陳副校想保護嘅係學校嘅排名，而唔係阮倩兒呢個學生，原來琴日嘅一切都只不過係一場戲。
自己投放嘅感情被背叛，希望之光化成絕望嘅深淵，救命繩變成將自己推入黑洞嘅鬼手。
呢份絕望帶嚟嘅傷害遠比身體上受嘅苦大。
阮倩兒唔知道呢個世界上仲有乜嘢人可以相信。
阮倩兒好想離開，佢唔想再聽落去，但係佢顫抖嘅雙腳完全發唔到力，佢只能企係原地被迫繼續偷聽。
「咁樣做嘅話，對阮倩兒會唔會太殘忍？」何老師對陳副校嘅建議有啲疑問。
或者何老師會幫手，倩兒如此安慰自己。
「何老師，你聽我講。」陳副校停一停，再講：「你管理嘅班入面如果有欺凌事件，對你日後嘅升遷係會有非常非常之大嘅影響。所以你唔覺得你嗰班無欺凌發生係最好嘅選擇？同埋最重要嘅係，我唔想有任何事情影響到學校組別升遷。只要嚟緊一年無風無浪嘅話，我哋學校嘅排名就可以順利升到Band 1中，所以我唔想見到有任何阻礙出現。」堅定嘅語氣中可以見到陳副校嘅決心，亦都可以見到佢嘅無情。
學生之於陳副校只係學校嘅道具、只係工作上要處理嘅對象，而唔係一個人。
對陳副校嚟講，自己到底算係乜嘢？倩兒唔想思考呢個問題嘅答案，佢知道自己承受唔到真實。
「明白嘅副校長。我唔會畀呢件事影響到學校嘅發展。」喺學生同仕途之間，何老師揀咗後者。
