葉開葉開
2023-06-14 13:29:15
五百四十九
「你既情況又真係好少見……」秋兒姐姐響電話另一端聽完我講左周芷若既情況之後答道:「我幫人補習左幾年都未試過。」
「秋兒姐姐妳都未試過?」
「唔認真既學生都有既,但係將秦始皇個名寫左做林峯就真係未試過。」秋兒姐姐講完之後都忍唔住笑左一笑。
「我覺得佢對我有興趣多啲……」我無奈地道:「邊有女學生第一堂就問補習老師有冇女朋友架?」
「哈,其實我都試過有架。」
「下?真架?」秋兒姐姐都冇同我提起過添。
我知佢讀大學既時候有一班狂蜂浪蝶諗住追佢,但原來包括埋學生架?
「其實佢地都係問下,八卦啫。」秋兒姐姐柔聲笑道:「果個學生最後都有老實咁上堂,其實同其他學冇乜分別。」
我第一日同左三個唔同學生上堂,我覺得周芷若同其他兩個好大分別喎……
不過周芷若真係一個麻煩既學生,真係想唔教。
「其實對住某啲學生,妳有冇諗過放棄佢地架?」老實講,我真係唔多想對住周芷若。
「冇啊。」秋兒姐姐即刻答得出:「雖然只係私人補習,但都係我始終係佢地既老師黎,如果我都放棄佢地既話,仲邊有人會理佢地?」
真係好個好老師。
有咁既心腸,秋兒姐姐果然天生就食老師呢一行飯。
「可能係佢地學校既老師喇……」我聳聳肩:「唔知呢?」
「佢地啲老師好多都唔負責任架。」秋兒姐姐嘆左口氣道。
咁秋兒姐姐講既都係事實。
我中學果陣啲老師咪一樣。
「熙熙……」秋兒姐姐既語氣突然變得有啲狡猾:「你唔係諗住第一堂就放棄呢個問題學生下嘛?」
啊。
不愧係秋兒姐姐。
隔住個電話都比佢一眼睇穿左添。
「唔係,梗係唔係喇!」但作為一個要配得上秋兒姐姐既男人,我又點可以承認我真係想唔再教佢呢?
「唔……不過呢個學生都真係唔易搞……」不過我都係忍唔住歎左口氣。
「做老師係唔易架,我都驚你應付唔到咁多學生,而且而家仲要有個比較難搞既學生……」秋兒姐姐聽落有啲擔心我。
秋兒姐姐已經夠多野煩,我仲點可以要佢擔心架?我即時擺住一種自信滿滿既語氣:「放心!我搞得掂既!」
「唔緊要架,你有咩問題都可以問我。」秋兒姐姐把聲好溫柔:「你冇乜補習經驗,又要一次過應付咁多學生,係辛苦架。所以如果有需要,我好樂意分享自己既經驗比你聽。」
「多謝妳。」我感激地答道。
我諗秋兒姐姐應該真係冇諗過我一次過接咁多個學生。
冇計喇,為左未來外母,我一定要幫秋兒姐姐分擔佢肩上既重擔。
希望我可以搵到多啲錢,等秋兒姐姐唔駛咁辛苦接咁多私補,可以專心正職同讀教學文憑喇。
係喎,掛住講自己野,唔知未來外母既病情點呢?
「係呢,未來外母點樣啊?」我問。
「總算說服到佢睇私家,之後應該會做化療,希望可以清除到啲癌細胞喇。」秋兒姐姐語氣又擔心起黎。
「放心,冇事既。」我安慰秋兒姐姐道:「未來外母既癌症發現得及時,而且又去私家醫院做化療,一定好得返既。」
「嗯,希望係喇。」秋兒姐姐都係唔放心。
不過你地問我,正如我啱啱比出黎既原因,我又好樂觀覺得未來外母一定可以化險為夷既。
只係唔駛問,私家醫院做化療一定係好貴。
我冇問幾錢,都唔想勾起秋兒姐姐既煩惱,我要做既只係將我大部份搵到既錢比晒秋兒姐姐就得喇。
今日上左三個學生,其中個小學生既媽媽係即場比現金,而其餘兩個就係每個月先出一次糧。
冇所謂喇,有錢收就OK。
之後我地傾多左一陣就收線。
我就冇野做行緊返hall啫,但秋兒姐姐又要備課又要準備自己文憑課程啲功課,真係好忙好忙。
有得好似啱啱咁樣到一陣計已經好好架喇。
幫完三個學生補習之後,其實都有啲攰,我拖住疲累既身軀返到房,見到個三唔識七既人入左黎同阿威用阿威部電腦打緊機。
係隻足球遊戲。
啊,仆佢個街,仲要坐埋我張凳。
(待續)