葉開葉開
2023-08-02 13:37:29
五百七十一
過左陣,秋兒姐姐先柔聲道:「我明白,有時我自己都會覺得好攰。」
「嗯…」
「不過講個好消息比你聽吖!」秋兒姐姐有啲高興咁笑左出黎。
「嗯?」好消息?
「做左幾次化療之後,醫生話媽咪既病情改善左唔少,可能好快就可以好返!」秋兒姐姐笑道。
「真既?」我都笑左出黎,畢竟呢個真係一個好消息:「未來外母就快好得返嗱?」
「唔知呢,不過醫生咁講情況應該樂觀既。」秋兒姐姐笑答。
「希望快啲到未來外母康復果日!」我滿心期待,因為除左代表未來外母身體好返之外,亦都代表我呢種地獄般既搵錢生活可以完結。
「多謝你啊熙熙,我地加油頂埋佢!」秋兒姐姐諗到既,似乎都係同一件事。
我地真係有默契。
雖然我知道,就算未來外母真係完全康復都好,秋兒姐姐依舊會好忙,佢一樣要上堂、一樣要照顧康復中既未來外母、一樣要返工,但至少唔駛比未來外母既病情搞到牽腸掛肚,同埋唔駛搵咁多份私人補習幫補湯藥費先喇。
我都可以搵少幾份教職。
同埋...希望我地之後可以多啲時間相見喇。
*
去海〇公園果日既Re U既日子係星期五黎,果日我向兩個學生既家長請左假,落左堂就同阿威hea到夠鐘就一齊出發。
今次Re U只係得八個人出席,Cathy Alan兩個組媽奶爸就梗架喇,反而Simon就仲係唔見影。
講起黎都好耐冇見過佢,不過我自己都係好摺,冇咩資格話人。
而其他既組員就有阿威、肥仔賢、大波妹Amanda,肥妹仔Yuki,仲有個路人樣我都唔撚記得左佢咩名。
人少就冇乜所謂,呢班人反而係有時同阿威一齊食飯果陣會見開,感覺好似仲friend啲。
講起黎阿冰都冇黎。
不過唔關我事喇。
呢次係我人生入面第一次去海〇公園,內心莫名其妙咁興奮起黎。
唔得唔得,我要掩飾下先。
小學生咩?
買晒飛入場,我發覺啲報置好有啲萬聖節Feel。
好有氣氛。
「平時係咪咁報置架?」我問身旁既Cathy。
「唔係啊,呢啲係全城哈囉喂先會搞裝餘架咋...」
「哇!!!!」突然後面傳黎一陣嚇人既怪叫聲,Cathy嚇到即刻撟住左我手臂,我擰轉頭一望,係隻拎住電鋸,好似科學怪人既鬼。
本來佢嚇我我想屌柒佢,但見到佢呢個造型,嚇完我地之後又企響度側頭咁望撚住我,我就覺得好好笑:「哈哈...」
「嚇死人喇...仲笑...」Cathy抬起頭望住我,個樣猶有餘悸。
「咦,佢地呢?」我發覺比隻鬼嚇完之後唔見左其他組員。
「係喎……」Cathy回過神來,正東張西望,找尋其他組員的身影。
「睇黎係我地比鬼嚇果陣佢地行左先。」我搵極都搵唔到佢地。
我同Cathy行左一陣,都係搵唔到佢地。
「不如打比佢地吖?」我提議。
「嗯。」但Cathy並冇行動,個樣仲有小小呆。
我呢個時候先發覺原來Cathy仲撟住緊我隻手臂,於是笑道:「隻鬼走左喇,妳唔駛再撟實我隻手喇,我有女朋友架喇。」
睇黎Cathy啱啱真係嚇呆左,佢呢個時候先好似驚醒左咁,急忙放開佢撟住我既雙手,有啲不知所措咁講:「啊,Sorry,sorry!」塊面仲有啲紅。
Cathy其實都算係純情系既少女,佢而家既反應都好可愛。
佢面懵懵左一陣,然後先發覺要打電話,急忙拎左個電話出黎,道:「我…我打比佢地先…」
「咦,唔駛喇,前面咪佢地囉。」估唔到又失驚無神撞返班友。
「啊…係。」
不過我地兩個行過去之後,發覺班友響度行緊周圍睇緊有咩玩,玩邊樣先,根本冇發覺我同Cathy啱啱走失左。
連阿威都係。
阿冰冇黎搞到佢好似有小小患得患失咁。
雖然園區入面人山人海,買野食又好,玩鬼屋又好,甚至玩機動遊戲都好,都要排隊排餐懵,但我反而覺得咁樣先有果節日氣氛。
如果下年冇咁忙既話,我同秋兒姐姐都可以黎呢度拍下拖喎。
(待續)