葉開葉開
2023-07-10 13:30:28
五百六十一
「係呢,點解你星期六都仲響hall既?」Cathy好奇地問。
「今朝足球隊選拔。」我食住頹飯答。
其實仲有係因為要補習。
「咦,你踢足球架?」Cathy問。
「係。」
「咁你入唔入選到啊?」Cathy緊張地問。
做乜撚咁緊張。
我含住啖飯點點頭。
「嘩,你好勁啊!」Cathy好似真心為我高興。
其實以我既實力,入選到係基本中既基本,不過見到佢讚我又為我高興,我都笑一笑道謝:「多謝。」
Cathy望住我既笑容發呆。
「啊,係喎,阿威都入選左。」我突然醒起我個好同房。
「你地都好犀利!」唔知係咪我錯覺,雖然Cathy都係開心咁笑左下,但好似冇啱啱咁替我高興。
我冇深究,繼續急急腳咁食飯,一陣補習唔好遲到。
今日星期六,可能有家長響屋企,遲到就真係好撚樣衰。
「你真係好趕時間喎。」Cathy問。
佢當然冇我食得咁急喇。
「係啊。」
Cathy諗左一諗,側頭問:「趕住去見女朋友?」
「我都想啊。」我食埋碟入面最後兩啖飯,道:「要趕住去補習咋。」
「你真係好勤力喎。」Cathy關心地道:「好似見親熙仔你都係去同人補習咁既?唔辛苦咩?」
「辛苦都要做架。」我一邊起身孭起背囊一邊飲啖水:「我走先喇,妳慢慢喇。」
「嗯。」Cathy見我好似好趕咁,都唔阻我,淨係講左句:「多謝你陪我食飯啊。」
「大家咁話喇。」我笑道,然後揮揮手道別。
其實我又唔係講假既,我都真係有啲開心架,我自從中四同淇淇分手之後,返學都係自己一個食午餐多,冇乜試過有人陪我食lunch。
*
今日我同秋兒姐姐兩個都忙住同人補習,全日都只係互相send左幾個短訊。
我響屯門補完最後果個小學生已經七點幾,我是旦食左啲野就自己一個返hall。
星期六既夜晚,仲留響大學宿舍既人唔多,連啲鬼仔鬼妹交流生都出晒去玩,我就自己一個人好寂寞咁行返hall。
呢個時候我特別掛住秋兒姐姐。
...
...
...
不如返屋企?
咁咪可以見到秋兒姐姐囉?
...
咦?
好主意喎!
雖然而家都晏,但返到去應該都未夠十一點既,何況對大學生黎講十一點好晏咩?
聽朝雖然有補習,但最多早啲起身咪得囉!
好,坐言起行!
我本來都差唔多返到Hall,都即刻行返回頭路,向地鐵站行返過去。
我本身想拎個電話出黎話比秋兒姐姐聽,但最後都係決定唔好。
等我比個驚喜佢先!
我懷住興奮既心情返到屋企,然後鞋都未除就叮左個message比秋兒姐姐:“返到屋企未啊?”
“未啊,仲有兩個地鐵站先到”
兩個站?
啊,我即刻放低個袋衝落街,去到地鐵站入口,啱啱好見到秋兒姐姐行緊樓梯上黎。
佢一臉疲倦既樣,好攰好攰咁拾級而上。
「秋兒姐姐!」我對住佢大嗌。
秋兒姐姐聽到我把聲,有啲難以置信望下周圍,然後一臉驚喜咁望住我:「熙熙?」
我行埋去拖起佢隻手:「Hi!」
秋兒姐姐驚喜地問:「點解你返左黎既?」
「諗住比個驚喜妳吖嘛。」見到秋兒姐姐既表情,我就知自己已經成功左。
「你唔係夜晚先響屯門果面補完習既咩?」秋兒姐姐問。
「係啊。」
「你唔攰咩…?」
「見到妳,乜野疲勞都唔見晒喇!」呢句唔係假話,本身咁夜出黎都唔好話唔攰,但見到秋兒姐姐之後我成個人都真係輕鬆晒。
「我都係啊…」秋兒姐姐講完之後就將頭靠響我膊頭上面。
「我地行先喇,唔好阻住其他人出入。」秋兒姐姐突然發覺我地block住左個路口。
其實都咁夜,地鐵站都冇乜人出入。
「啊,好,我地行返去先。」我同秋兒姐姐十指緊扣,慢慢咁行返屋企。
「妳好似好攰咁啊。」我凝望住秋兒姐姐既面孔,雖然依舊係好靚好靚,但都好攰好攰咁,個眼袋都腫左唔少,又有黑眼圈。
最近既生活一定好辛苦。
(待續)
葉開葉開
2023-07-12 13:31:56
五百六十二
秋兒姐姐搖搖頭:「唔係啊。」
「仲話唔係?」我憐惜咁摸一摸秋兒姐姐既眼袋:「妳睇妳個眼袋,妳係咪每晚都好夜先訓啊?」
「唔係啊...」秋兒姐姐避開我既眼神。
咁即係係喇?
大白天要教書,放工之後又要幫人補習又要備課又要改簿又要返學仲要做功課溫書,屋企仲有個癌症病人要照顧,鐵人咩?點頂啊?
我冇拆穿佢,只係響佢面豬登錫左一啖。
其實就算我拆穿左佢都冇用,佢一樣都會係咁忙,倒不如比佢感受下我既愛意仲有用。
「不如我地去公園仔坐一陣吖?」我地行過果陣Christmas Ball我地兩個一齊練舞既公園仔既時候,秋兒姐姐突然提議。
「妳攰唔攰啊?」我問:「駛唔駛快啲返屋企抖下?」
秋兒姐姐搖搖頭:「都係坐一陣啫。」
「嗯。」其實一返到去我地就各自返屋企(因為我地屋企人都未知我地關係,無謂咁夜仲響對方屋企喇),所以其實我都想響公園坐多陣,見耐啲秋兒姐姐。
於是我地行左去公園仔,兩個並肩咁坐左響公園仔個滑梯上面。
秋兒姐姐將我靠響我肩膊上,響月色既照射同微弱既公園街燈既映照下,我見秋兒姐姐個樣真係前所未有咁攰...
好心痛。
「秋兒姐姐。」我拎左銀包出黎,再響入面拎左今日補習現金出糧啲錢:「今日出既糧啊。」
「唔駛咁快比我喎傻熙熙。」秋兒姐姐溫柔咁笑道:「你留返先,月尾用剩既先比我喇。」
「我夠用架喇。」我冇收返啲錢。
秋兒姐姐只係微笑咁搖搖頭。
「我見到妳咁攰好心痛啊。」我將心入面果句講出黎:「不如妳做少啲補習,等我負責搵錢比錢妳洗,妳唔好咁辛苦喇。」
我真係好心痛架。
秋兒姐姐將佢既玉手輕輕咁撫摸我既面,柔聲道:「你個樣咪一樣係好攰?你記住啊,你而家最重要既唔係幫人補習,而係讀好書順利畢業啊知唔知?一陣你掛住補習賺錢,啲成績下降畢唔到業既話,我都唔知點同叔叔交待好。」
「得架喇,我ok,妳要左啲錢先喇。」
秋兒姐姐望左我一眼,最後都從我手上面拎左啲錢,不過淨係拎左一半。
我望住佢。
「咁你都要生活架嘛。」秋兒姐姐微笑道。
佢既微笑真係融化左我。
所以我都冇再堅持。
「熙熙,見到你真係好。」秋兒姐姐靠響我膊頭閉上雙眼。
「我都係。」
「你講得冇錯,其實我真係好攰……」秋兒姐姐道:「但而家見到你,我就好似叉足晒電咁,覺得精神返晒喇。」
「嗯…我都係。」
見到秋兒姐姐呢副咁攰既表情,我憐惜地響佢嘴唇上錫左一啖。
「你今晚特登出黎睇我,我真係好開心架。」秋兒姐姐比我錫完之後,嘴角露出左甜笑。
「咁我以後個個星期都出黎睇妳,好唔好?」我問。
秋兒姐姐搖搖頭,然後睜開眼睛望住我:「唔駛喇,你咁樣個個星期都由屯門一出一入會好攰架。你聽日咪有個補習係朝早九點鐘既?」
「我聽朝最多咪早啲起身~」
「我唔想你咁攰啊…」秋兒姐姐憐惜地道。
秋兒姐姐真係一個好好既女朋友,如果換轉係鄭穎琳,應該一哭二鬧三上悠亞咁要我個個星期陪住佢。
「我唔攰。」
「聽話?」
「嗯。」不過對腳生響我度,我要返黎秋兒姐姐都擋唔住喇。
「咁我地都返去喇,媽咪都等我等左我好耐。」秋兒姐姐個頭離開左我膊頭,然後企左起身講左句:「叉足電既感覺真係好!」
「係喎,未來外母而家既病情點啊?」我拖起秋兒姐姐隻手行。
「佢啊…」
我地之後傾左陣未來外母既病情,知道佢接受化療之後病情有起色,但同時副作用都大,所以而家冇做野,只係響屋企休息。
咁都好既,病左就梗係要抖下架喇。
我地眨眼間就返到屋企,互相依依不捨咁道別。
我返到入屋,諗起老豆都差唔多收工返到屋企,不如等埋佢返黎先訓。
見到秋兒姐姐同未來外母而家咁,我都要好好珍惜老豆。
老豆一返到屋企見到我梗係好開心,仲話要落街買宵夜一齊食,所以我就陪佢一齊落街買外賣,返到屋企兩仔爺一路傾計,分享下我既大學生活咁。
老豆既皺紋多左,頭髮都白左唔少……
我希望佢可以健健康康,等我大學畢業之後可以等我養佢,佢就可以退休,專心享下福……
(待續)