葉開葉開
2023-09-11 13:38:29
五百八十八
生活要繼續,我總唔夠完全逃避面對面咁去見秋兒姐姐,更何況我已經決定左要將件事隱暪到底,所以我決定件幾個呢個星期既星期六,響大專盃比完賽之後,就返屋企,響返差唔多十一點果個時間,去地鐵站接秋兒姐姐同佢見面。
雖然要隱瞞件事而令自己有啲緊張,但係我真係好耐冇見過秋兒姐姐,所以其實我都有啲甜蜜。
罪惡感?
罪惡感去死喇,我會做個更加好既男朋友,去彌補自己做過既錯事既。
大炒完科大三球之後,我都有同啲隊友一齊走,仲夠時間同佢地食小小野先返港島果面。
今次我都係冇特別同秋兒姐姐講,諗住比個驚喜佢。
我返左去屋企,差唔多時間就落去地鐵站果度等佢。
結果,秋兒姐姐出閘果陣見到我既時候露出左個難以置信既表情,然後走過黎攬住我,攬得好緊、好緊。
秋兒姐姐份人比較保守,咁樣響大庭廣眾既地方主動咁做啲親匿既行為都比較少……
雖然呢個時間地鐵站唔算多人,但佢會咁樣主動攬住都可以睇得出佢有幾掛住我。
「秋兒姐姐……」我笑道:「妳攬到我咁緊,我就抖唔到氣喇……」
秋兒姐姐鬆開手,尷尬地道:「Sorry……」但表情入面仲帶左一副高興、開心。
「好耐冇見喇...我真係好掛住妳。」我道。秋兒姐姐一放手,就到我攬返秋兒姐姐轉頭。
唔能夠話攬住佢果刻冇罪惡感,但我知自己唔可以再比罪惡感打跨。
咁難得先可以同到秋兒姐姐響埋一齊,我先唔願意再放手。
「我都好掛住你。」秋兒姐姐答道。
攬完之後,秋兒姐姐主動拖住我隻手,一齊行返屋企。
一路行我地一路傾計。
「你今日比賽唔攰咩?」秋兒姐姐問,但一副甜笑既表情望住我。
「小小喇,不過我覺得咁耐冇見,我點都要抽啲時間出黎見面既。」我答道。
「咁你都可以同我講定先架嘛。」秋兒姐姐甜笑道。
「講定先就冇驚喜喇!」我都笑住回答。
我地行下行下,唔經唔覺都行到去公園仔,我地又照慣常咁入去坐下。
「未來外母最近既情況點啊?」以我所知,暫時情況應該算幾穩定。
「都係咁...做左幾次化療,總算冇惡化...」秋兒姐姐挨住我膊頭,然後有啲擔心地道:「熙熙,我好驚連化療都醫唔好媽咪啊。」
「唔駛驚,我地用咁多錢都係為左搵個好啲既私家醫生睇佢,佢一定好得返既。」我安慰佢道。
「嗯...」
一講起呢個有啲沉重既話題,我地兩個就咁默不作聲咁依偎左一陣。
「熙熙啊...好彩今日你有黎睇我咋。」秋兒姐姐輕輕地道:「其實...呢排既生活已經令我好大壓力...無論係照顧媽咪又好,教書又好,放工之後去上堂又好...我忙到根本冇時間休息,想見你既時候又見唔到...個心真係好攰好攰...」
我望住秋兒姐姐,響微弱既街燈燈光下,佢既面容顯得好憔悴,我伸手用力咁攬住佢。
「本來我真係覺得好攰架,但今晚突然間見到你,我就好似回復返精神咁。」秋兒姐姐抬起頭望住我一笑,再有啲怕醜地道:「如果冇左你,我真係唔知點算好。」
聽到呢句說話,我真係深深受到感動,不自覺攬得秋兒姐姐更緊。
我何德何能接受呢份愛呢?
我細過秋兒姐姐三年,只係一個仲讀緊書既大學生,比唔到咩有用既意見佢,最多只係可以盡我既努力去賺錢去略盡綿力咁幫補下未來外母既湯藥費...
但正正係因為秋兒姐姐當我係佢既心靈支柱,我先更加要對佢好,可以做到咩既都盡做,要好好咁對待佢。
我有冇對唔住秋兒姐姐?
有。
但既然秋兒姐姐咁依賴我,我呢次係絕對唔會再輸比自己既罪惡感,要努力對佢好,成為一個配得起佢既人。
係賤,但有乜計?
我懷住呢一份信念,開口道:「冇問題架,我永遠都會響妳身邊陪住妳。」
「嗯。」
呢一刻真係唔需要再講野,我地大家都明白大家既心意。
之後我地都真係冇再開口說話,只係默默地互相依偎,我攬實佢,享受呢一刻屬於我地既寧靜。
(待續)