葉開葉開
2023-08-14 13:42:00
五百七十六
「哈哈,妳又輸左喇,飲喇!」三唔識七男係咁同Cathy猜枚,而Cathy已經連續輸左六、七鋪。
Cathy拎起杯亂鳩咁溝既酒一飲而盡,然後笑道:「再黎!」
可能成個場都冇乜靚女(數到盡應該得幾個),加上三唔識七男同Cathy越玩越大聲,竟然越黎越多人行埋黎我地果枱睇下我地玩乜。
肥妹仔Yuki同緊另一條友玩緊,而Alan佢地就戇鳩鳩咁睇住Cathy佢地玩,仲有兩條仔自己猜枚。
其實都有其他女仔同學走埋黎諗住同我傾計,但我雙眼掛住望實組媽唔得閒理佢地。
「喂,我都想同Cathy玩啊!」又有個男同學走埋黎。
「咁你同佢玩陣喇。」三唔識七男笑笑口行開讓位。
「飲!」Cathy又輸,笑笑口咁飲晒成杯酒。
連現場咁暗,我都睇得出佢塊面紅晒。
Alan呢個時候都出聲勸Cathy:「Cathy妳係咪開始醉啊?不如抖下先喇?」
Cathy搖搖頭,笑道:「我冇醉。」
咦,係咪飲醉左既人都會話自己冇醉?
咁即係Cathy已經醉左?
「係囉,Cathy都話自己冇醉咯,你唔好阻住佢飲喇!」準備同Cathy玩下鋪既男仔屌鳩Alan。
「係啊~我邊有醉!」
「但係……Cathy妳……」Alan一時之間語塞。
於是呢個無恥男又猜枚贏左Cathy,Cathy拎起杯酒一飲而盡。
Cathy個人就算坐響度都搖搖晃晃咁,表情又傻笑咁,妳唔好話比我聽妳冇醉啊!
話時話Cathy有冇咁黑啊?好似真係玩親都輸既!唔係特登架啩?
下個男仔又排上去同Cathy猜枚,然後Cathy又輸又飲,本來Alan都開始同人傾下計飲下野,但佢似乎又放心唔落,所以周不時回過頭咁望下Cathy,不過佢比啱啱個無恥男寸完之後似乎冇聲出,只係得個睇字。
至於我?
我好似都係金睛花眼咁望實Cathy……
我唔係特別想𥄫佢,但佢由一入黎酒吧開始,就好似唔係好正常……所以我不自覺咁留意左佢多啲,畢竟佢都係我其中一個比較傾得埋既朋友,因為咁,就算有其他人想搵我吹水玩飲野,都比我視而不見。
「woo~Cathy又飲喇,好飲得喎妳!」下一個男同學又笑住灌Cathy飲酒。
「好,我飲~」
呢個唔係平時既Cathy,唔止,簡直係一啲都唔似佢。
之後又有下一個男同學……
……
……
……
我漸漸覺得呢班人好過份。
好似成班人響殘廁前面排隊打攪伯母咁。
終於見到而家呢個男同學又贏左Cathy,我忍唔住企起身走埋去搶過Cathy手上杯酒,道:「唔好飲喇。」
Cathy醉醉地咁望住我,然後突然道:「熙仔?」
屌,妳唔撚係醉到認我唔到啩?
「係啊。」我沒好氣地道。
Cathy定睛咁望左我一眼,突然想搶返杯酒,道:「我都唔係你女朋友!你去搵你既女朋友喇,唔駛理我啊!」
此言一出,我真係嚇左一大跳。
我望一望其他人,我識既除左Alan仲有間中望住我之外,其他人都已經不知去向,有啲應該去左第二枱度玩,而Cathy呢一下大聲既聲音,都令到Alan望過黎,同我面面相覷...
點解Cathy會講句咁既野既?
唔會係因為……
趁我諗緊野唔為意既時候,Cathy由我手上搶返杯酒一飲而盡。
「Cathy真係飲得喎!」
「梗係!下個!」Cathy擺出一副自信滿滿既表情。
唔得,唔可以比Cathy再飲落去。我直覺話比我知,再比佢飲落去佢真係醉晒既話真係會出事。
比人執屍強姦都話唔埋。
我唔理得佢啱啱句野係咩意思,作為朋友,我呢一刻都要保護好Cathy先。
「輸左,飲喇Cathy!」
「好!」就響Cathy諗住放杯酒入口之際,我再一次伸手搶左佢手上杯酒,道:「仲飲,飲撚死妳啊!唔準飲!」
「做咩唔比我飲啫!你去關心你女朋友喇!你女朋友都唔係我!我要飲!」Cathy已經有啲語無倫次。
「係囉,輸左都要飲架,人地Cathy都話要飲囉,你係佢邊個啊!」贏左Cathy條友咄咄逼人。
「飲啊!」Cathy又伸手想搶我手上杯酒了。
呢個時候,我做左件事。
一件事後令我好後悔既事。
(待續)