葉開葉開
2023-06-07 13:14:33
五百四十五
「哦…校隊...咁梗係可以喇。」秋兒姐姐鬆左口氣。
睇黎佢對我當年比公○條冚家剷踢斷腳仲有陰影。
雖然都正常既...當年既傷咁嚴重。
不過其實大學既比賽,以我所知,都有好多球會既青年軍同預備組參加,真係強隊之間既對決其實劇烈程度不下於預備組既比賽。
當然呢啲我係唔會話比秋兒姐姐聽既。
想佢又叫我唔好踢咩。
我地又互相依偎左一陣,然後先著返衫再返出去廳執野。
搞掂之後秋兒姐姐又打比未來外母睇下佢收工未同去到邊,要去接佢。
我其實都想陪秋兒姐姐一齊去,但問題係未來外母話左唔想人知佢患癌,我去左可能會令佢起疑,只得作罷。
其實佢有病就唔好返工喇,啲錢又帶唔走既,而秋兒姐姐淨係想要個健康老母又唔係錢...
*
第二日一早,秋兒姐姐一早就起身返工,因為佢做野間學校都算比較偏遠,所以需要多啲時間搭車,但我地都有一齊食完個早餐先各自出發。
我孭住一袋二袋咁一個人獨自上路。
搭鐵既時候我百無聊賴咁響度睇返我同秋兒姐姐之間既短訊,心入面泛起甜蜜既感覺,不過隨即又歎左口氣,入左大學之後要見面都唔係咁易。
一個炎炎夏日,我仲要孭住幾袋野由西鐵站行去大學campus,啲汗流到成身都係,真係唔係幾舒服。
好彩我本身就捱慣啫。
去到Hall,搞埋啲手續,拎埋鎖匙,我就向住自己既房進發。
中間響Lobby度都見到有啲所謂Hall莊既人,佢地好熱情咁問我係咪Freshman,又問我有冇參加Hall Camp。
其實之前黎reg hall既時候有人問過我玩唔玩Hall Camp,不過玩過系camp,又識左啲同系既人,要慳錢既我就冇再打算參加Hall Camp喇。
本來係咁。
結果我話左比我親愛既女朋友聽之後,又比佢逼我享受下宿舍生活,點都要我參加喎,仲同我講小小錢,對未來外母既醫藥費唔會有太多分別。
哈哈。
人地啲女朋友應該係驚男朋友響o camp亂咁識女仔,但係佢就完全相反,係擔心我過得開唔開心,想唔想去。
有秋兒姐姐真係好。
我行到自己既房門,禮貌性咁敲左兩下門,見冇人應門,就用鎖匙開左度門入去。
入面空無一人。
我坐左響是旦一面既床上面,望一望房間入面既周圍,從今日開始我就要響度住喇。
我拎起電話,雖然明知秋兒姐姐呢個時候應該開緊會,但我都係忍唔住傳左個短訊比佢,話比佢知我已經平安到達宿舍,仲打左一大堆野同佢形容下間房。
然後我望住個電話。
一分鐘。
兩分鐘。
五分鐘。
唉,秋兒姐姐返緊工開緊會,點得閒覆我吖。
諗起尋晚既纏綿,真係彷如隔世...
好掛住秋兒姐姐喇。
...
...
...
唔得,我要成熟啲先!
秋兒姐姐努力工作中,我就努力執下野喇!
首先鋪床單...然後呢啲衫就擺響度先...仲有呢個水樽...
慢慢我都聚精會神咁執野,但對秋兒姐姐既思念始終冇減,得閒就拎個電話出黎睇下佢有冇覆我訊息...
就響我執下野又㩒下電話既時候,我突然聽到敲門聲。
似乎係我既同房到左喇喎。
係喎,我都冇想像同房係點,反正都係咁住架喇。
唔知佢係個咩人呢?
「入。」我道。
我同房聽到就打開房門。
……
……
……
梁建威?
「估唔到咁有緣喎~」呢條撚樣露出傻笑。
「孽緣呀…」我把口係咁講,其實我心入面幾高興。
「屌你喇。」啊,條仆街對住我舉中指,成個戇鳩必咁。
啊,有佢做同房真係唔錯。
*
嶺大入左宿之後除左hall camp,仲有個學校強制性要所有人參加既大O camp。
而今日係大O camp之前既一晚,我就同阿威兩個去附近既屋邨商場入面搵野食。
一路食條友一路自己響度鳩up吹水,有時又要接聽電話應酬自己女朋友。
點講呢?
從佢接電話send短訊既次數、講電話既語氣,總覺得佢女朋友好似好依賴佢咁。
如果我女朋友都可以依賴我多啲就好喇。
好!
我今晚就要開工,上果個補習中介網站,搵多啲錢先得!
要做個配得起秋兒姐姐既人!
(待續)