五百七十四
講返校園生活。
要講呢幾個星期有最明顯感覺到有咩唔同既,我諗應該係Cathy。
我之前咪話過會成日落堂既時候成日會撞到Cathy,然後大家會吹幾句水既?但係自從海洋公園Halloween果次re u之後,我響campus撞到佢既次數大大減少。
咁當然,次數減少啫,但我都有撞過佢既,而撞到佢既時候佢都係同平時一樣咁同我傾計,內容好正常既,但傾計既時間就短左,傾幾句就走左。
當然,之前撞到既時候,都唔算係講好多野既。
但簡單啲講,而家我既感覺就係佢表面上想扮到同以前對待我既時候冇分別,但實際上佢其實係避緊我。
係咪我做過啲咩?響哈囉喂既時候笑佢撟住我隻手?佢唔係咁小器吓嘛?
當然喇,呢個只係我既感覺,始終我同Cathy又唔會特別約出黎去玩又或者傾電話互send短訊,只係算一個叫做都傾得埋既朋友。
由於我唔敢肯定,現實亦都好多野要我煩惱,所以我都唔打算亦都冇能力去尋根究底。
好快到左Social Sciences annual dinner 既日子,為左去參加呢個晚宴,我仲特登去搵柏彼得借左件西裝。
佢而家踢緊果間球會有贊助西裝,要借一套比我唔難。
我落堂之後就join埋自己既組mates,然後見到阿威同阿冰兩個出雙入對咁。
唔……
至於組媽Cathy睇落好似同平時差唔多,但我硬係覺得佢有啲野,有啲唔開心,同我既交流都冇乜。
算...就算佢真係唔開心,我都理唔到佢咁撚多。
題外話,我地系啲女個個都著晒晚裝又化晒裝咁,雖然佢地大部分都唔算靚,但打扮完之後都叫做比平時養眼既。
我以前中學時聽過下謝師宴啲女同學都係咁著,但我中五同中七兩次都冇去過,所以都未親眼見過啲女著晚裝。
之後我地就成組人一齊上左由social現莊book既其中一架巴士,出發去舉行annual dinner果間酒店。
沿途成班人嘈嘈鬧鬧咁好撚熱鬧,有一刻我真係擔心會唔會嘈到巴士司機搞到炒車,不過好彩最後架巴士都平安到達尖沙咀果間酒店。
「其實個重點係一陣間完左個晚宴之後通常會有人拉隊去附近既酒吧劈酒,我上年都有去過,最後飲到自己都唔知點樣返左Hall,哈哈。」奶爸Alan響入場之前響lobby同大家影相果陣講。
「真係睇唔出原來你會飲酒...」我直話直說。
Alan望落只係一個隨街見得到既普通眼鏡男,估唔到佢都好飲酒。
「啊,其實唔係既,我都唔識飲,我諗住跟埋去一齊玩下架咋。」Alan有啲唔係幾好意思地笑住回答:「所以我咪飲醉左囉...」
「正啊!一陣間會唔會有架?」肥仔賢問。
「冇咪你搞囉!」講野呢條友我唔撚記得佢叫做乜野名...
我淨係熟果幾個先記得...
肥仔賢興致好好,答道:「好,冇人搞就等我黎搞!大家會去架係唔係?」
「好!」幾條友答道。
我望一望阿威,佢掛住同阿冰仲有Cathy影緊相,好似冇聽到肥仔賢既搞手宣言。
佢同阿冰...希望佢冇唔記得我講既野。
「喂,你都會去架,係咪?」肥仔賢走埋過黎拍我膊頭。
「一陣先算喇。」
「嘿嘿,我當你默認...」肥仔賢奸笑道。
我冇再理佢,都係果句,我唔想去既冇人逼到我去。
不過...其實呢個機會咁難得,我都想去見識下,哈哈。
後尾大家影多左陣相(我當然冇相機,但人地話會比擺上Facebook ,叫我開個Facebook account tag返我),就陸陸續續走入宴會廳就座。
我係第一次參加呢種宴會,正如之前所講,中五同中七既謝師宴,我都冇去過,所以入去坐低果陣覺得樣樣野都有啲新奇。
啲野食又靚又好食,中間大會邀請左有啲教授上去演講,最後仲有大抽獎,我都好少參加呢啲抽獎,可惜我今次冇乜抽獎運乜鳩都抽唔撚到。
老實講,我中學都冇乜試過出席呢啲活動,所以覺得餐飯真係幾OK,不過報名費要成三舊水都真係幾肉痛...
完左大抽獎之後,大家都差唔多散Band,之後就係影相時間。
又影?
不過嚴格黎講,而家先係正式既影相時間。
但都係果句,我又冇相機,影閪咩?
(待續)