五百三十九
「點啊,好唔好玩?」秋兒姐姐響電話度問:「不過聽你講野語氣咁輕快,應該幾OK?」
「係啊,幾好玩。」
不愧係秋兒姐姐,一聽我把聲就知我開唔開心。
唉,唔想淨係講電話,想見下秋兒姐姐啊。
如果唔係未來外母又唔舒服一早返左屋企,我而家就可以直接去秋兒姐姐屋企見佢喇。
不過而家就無謂打擾佢休息,而秋兒姐姐又要睇住未來外母,都廢事叫佢過黎。
啊,但愛錢如命既未來外母又提早返屋企休息,係咪病情又惡化左呢?
「係喎,未來外母冇事吖嘛?今日又咁早返既?」我問。
自從上次既對話之後我同秋兒姐姐傾計時都會叫林太做未來外母。
「佢有啲頭暈,驚好似上次咁又暈低,所以打電話叫我去接佢。」而秋兒姐姐聽我咁叫林太已經見怪不怪,答道:「好彩返左黎抖左陣就冇事。」
「佢仲唔肯去私家醫院?公立醫院既排期真係有排等啊。」除非病情係好危急,咁公家醫院就會優先處理。換句話講,如果公立醫院肯幫你排快期,咁你既病情一定係已經好嚴重。
唉,正面啲諗,雖然未排期排到未來外母,但至少即係話未來外母既病情未至於好嚴重...
「可能最近佢多左唔舒服,所以語氣好似鬆動左...」秋兒姐姐道:「而且我都有同佢講,我會出晒啲醫藥費,唔駛佢比。況且如果佢真係有咩事既話,啲錢係帶唔到上天堂既,點知佢話要留返比我。」秋兒姐姐講到又好氣又好笑。
「但妳都唔係想要佢啲錢...」其實咁睇既話,未來外母又唔係純粹係愛錢,只係想將最好既野留比秋兒姐姐。
「我咪咁同佢講囉。」秋兒姐姐沒好氣地道:「我話我想要既唔係錢,係一個健康既媽咪。」
「咁佢實聽到心都甜晒喇!」我笑道:「所以佢就肯去睇私家?」
「都係既,佢而家肯去私家醫生果度睇一睇先。」
「貴唔貴架?」我問。
「都應該要幾千架。」秋兒姐姐道:「不過唔駛擔心錢住,我都仲有響度。」
「我遲啲都過數入妳戶口吖。」之前我已經問秋兒姐姐拎左佢戶口號碼。
「熙熙,真係多謝你。」秋兒姐姐早就接受左我既幫助。
「未來外母都係我家人黎架嘛,係咪?」
「嗯。」
之後我地又傾返啲開心野,講下今日Re U時玩左啲咩,所有既痴線懲罰都講埋比秋兒姐姐聽,佢聽到我地一班大學生玩埋啲咁變態既懲罰,露出一副冇我地收既既語氣。
哈哈,係好癲架,好彩我冇輸過啫。
我地又傾多陣,先依依不捨咁收線,大家各自休息。
就響我想上床休息既時候,我先發現有人send過短訊比我。
唔,除左秋兒姐姐之外仲有邊個會send短訊比我呢?
我打開電話一睇...
係Cathy?佢send啲咩比我?
“熙仔,今日玩得開唔開心呢?希望下次re u再一齊玩
”
...
無端端send啲咁既野黎都有既。
不過對於長期冇乜朋友會搵我既人黎講,收到新朋友既訊息,總係會有啲開心既。
但係而家都夜喇,我都有小小攰,我留返聽日先覆佢喇。
*
理所當然地,我第二日一朝起身就已經冇左件事。
之後距離我入宿開學既日子越黎越近,我都越黎越珍惜同秋兒姐姐一齊既日子。
不過話雖如此,但我要返工,秋兒姐姐都要返學校開會同埋為開學做準備,佢收左工之後仲要返去照顧未來外母,所以我地可以二人世界獨處既時間並唔多。
性慾強大既我好懷念soc camp之前同秋兒姐姐覆雨翻雲既光陰,不過而家我地兩個都咁忙,唔好話做愛,連相處既時間都要盡量擠出黎。
好彩既係秋兒姐姐好快就收到Part time教育文憑既offer,但咁都意味住佢會忙到夜晚都唔得閒。
未來外母都開始接受左秋兒姐姐既建議去睇私人醫生,遲啲可能要不斷做化療,但呢度既費用真係好貴,對於我同秋兒姐姐既財政狀況黎講會係一個好大既挑戰。
就係咁,我入大學之前既暑假,都進入尾聲喇。
(待續)