關於舊約嘅問題,有好多人已經答得好精彩。所以我反而想講下,點解到咗今日,基督徒會唔重視舊約,好多之前嘅律例都唔理。
其實係因為喺耶路撒冷早期嘅教會,係有兩班信徒一齊生活嘅。一邊就係希伯來人,一邊就係希臘化猶太人。
前者係比較傳統同保守,係講亞蘭語嘅猶太人,後者就係講希臘語,佢哋受希臘文化影響好大,比較接受改變。
去到後尾,希臘化猶太人俾人迫害,所以佢哋就走咗出去傳福音,於是就多咗好多外邦人,外族人信耶穌。
呢個時候有班叫敬虔者嘅人又加入左佢哋嘅群體,佢哋係一班唔想遵守摩西律法,但係又覺得上帝好正嘅人。跟住佢哋就繼續喺保羅嘅領導下相信耶穌。
但呢個時候呢邊嘅基督教其實已經好唔同,開放同自由度高左好多,已經唔會叫人去遵守咁多法律,亦都唔使行割禮。
後尾發生咗一次猶太羅馬戰爭,你當嗰時有班人搞「光復猶太,時代革命」啦。跟住羅馬政權就極速打敗左佢哋,結果嗰班勇武派信徒(奮銳黨),就連埋傳統古舊嘅猶太信徒一齊攬炒。好多人俾人驅逐。
所以好多堅守舊約精神,遵守摩西律法嘅人就消聲匿跡,變相呢個傳統就得返好少人繼承,演變落去就變咗今日嘅猶太教。
另一方面,基督教就由希臘化嘅基督徒支撐住,繼續傳揚耶穌嘅福音,呢個時候舊約所講嘅嘢就開始冇咁重要,因為堅守裏面信念嘅人消失咗。
當然舊約所講嘅嘢仍然都係基督教正典嘅一部份,但已經唔會再硬性規定你去遵守裏面嘅律法。
個進化史係咁嘅