Halo~ 咁多位巴絲,呢段時間被困屋企,不如吹下水,一齊傾下神學 之前見到個post,話傳道人淨係返兩日工,又可以收好多錢,非常之嘆。我睇到之後,一直都想澄清,所以就開咗呢個post。
我諗有唔少人都對宗教界嘅職業有啲疑惑或者想像,不如就趁呢個時間傾吓計啦,橫掂而家大家都相對得閒。
無論係神學問題,又或者對呢行嘅疑問,我都會盡量試吓解答,請出招
(利申:我year 1,功力很弱,未必條條都答得到,不過會盡力而為)
首先想澄清兩樣野:
1. 牧師咪淨係返兩日工,其他時間點樣玩都得啦?!
無論係牧師/傳道人/幹事,大部份嘅同工都會係返星期二至星期日,我哋係off 星期一嘅。
點解要返咁多日,你地唔係淨係幫手搞崇拜、祈下禱唱下歌咋咩?
非也,其實要營運一間教會,係仲有好多範疇要處理,工作層面都好廣泛。例如:個人輔導、準備團契小組嘅活動、主日學課程、青年體育活動、海報單張設計、學校事工發展、籌辦教會camp、開無盡嘅會、搞佈道會、舉辦講座等等。
兩日係絕對冇可能搞得曬。我哋嘅工作職能又有少少似老師+社工+event planning 嘅綜合體,不過就加咗信仰元素喺裏面。
2. 讀神學好容易,個個人都讀得來?
唔係咁簡單㗎,葉師父。一般如果你要修讀MDiv (神道學碩士課程),其實都係需要大學學歷資格先俾你入場,亦都要面試,遞交幾千字嘅個人志願書,又要牧師推薦信。
最後可能係會有一半人唔符合資格,俾人foul返出嚟。如果你要人課金支持你,更加要喺自己嘅教會過五關斬六將,佢先會肯俾你去。
到你入咗場,你就會發覺呢個program唔會比任何一個碩士課程容易。首先有大量嘅西方教會歷史等住你背,又要去記得嗰啲仿如外星話嘅希臘文、希伯來文。
仲未計每科要交一份平均5000字嘅論文,所以我有朋友係讀到抑鬱,甚至聽過有學生係因為太多衝擊,直接離開咗教會。
講到呢度先。到你哋問
再利申:小弟係80後,之前有打過其他工,發夢自己做過反送中聖詩團,同埋我都撐同志平權。
#光復香港
#時代革命
#五大訴求
#缺一不可