依家全世界都知你唔比錢就會Random派位,
最好笑係咩,向來都唔比錢揀位個啲係唔會因為你拆開晒就比多百幾二百蚊揀位架。跟住到上機個時,大家你眼望我眼,調黎調去盞搞着成機人,之後你聲譽又柒咗,都唔知你搞個咁既系統做乜。
最近既親身經歷:
一早見到同女朋友拆開咗,A同C,冇咩所謂。之後上到機見到B個個人,我望住佢一秒,心諗佢都唔似係咁無聊揀個B位坐,之後佢又望住我地,諗咗幾秒,就講,你地洗唔洗一齊坐,你想我坐入面定出面?咁就換咗位啦。坐低之後,我觀察前排啲人,有一家三口又被拆開咗,有兩個係老夫婦,行動就差啲啦,坐好咗,被夾住個個又突然想調位比佢地,之後又搞搞搞,之後個老人家啲登機行李又搞搞搞,有一下個行李仲跌咗落後面個乘客到,緊住好彩個袋係軟身手信既大袋行李,個老人家都有唔好意思。
咁經過呢件事我就一直都好好奇,佢呢個系統。如果咁啱遇著再雞手鴨腳啲既乘客,係又會搞出啲咩事件呢。再加上以我搭過既航空,唔揀位好似都冇聽過會派到啲位亂晒龍(利申,唔算搭過好多,有錯請指出)。唔係話市儈唔比多少少錢揀位,而係向來揀位錢呢啲唔係賺啲可能對窗口位走廊位各種有要求嘅乘客錢咩,又或者比錢既就先到先得可以想坐咩位就咩位。但依家擺到明特登想拆散焗人頂唔順比錢就好奇怪囉,再加上香港人性格都唔受呢套,上到機你又吹唔脹啲人會調位。
咁成件事其實係幣大於利定利大於弊呢?