回到港島區,我先跟陸山泉交代北部都會區的事。
「你要我做嘅嘢已經搞掂。」
「多謝你,亞貢。」
「你鐘意嘅可以留低。」
「我都係望慣花草樹木。」陸山泉摸著面前的混凝土牆壁:「你呢?」
「唔知,未諗。」
「亞貢,你有冇為自己而活過?」
「係?」陸山泉突如其來的問題,令我怔住。
「其實都係我自己一啲感悟,我以前喺八鄉事件退落嚟之後,先發現我從未為自己生活過。」
「……」
「如果一直只顧為住某個目的而前進,中間唔適當地休息下,咁會慢慢失去人性,變成為咗目標不惜一切。」
「嗯。」
「我無任何意思,只係提醒下你,曾經發生喺我身上嘅事。」陸山泉說出自己觀察所得的感想:「其實留喺到嘅依幾個月,我發現病獵協會隱藏住唔少問題,可能只係因為你強大到足以掩蓋一切缺陷。。」
「……」
「佢哋一直圍住你依個體系而轉,依家佢哋需要靠自己建立一個體系。如果你想令病獵協會缺陷顯露出嚟,然後令佢哋可以及時改善,咁擊敗病者國度後嘅呢個時間點退出,係個絕好嘅機會。」
原本我行程上尚有一大堆的事要處理,但回想起來……都是我真正在意的事嗎?
如果問我,有什麼是我真正在意的話……
那答案只得一個。
經過幾天的深思熟慮,我把自己的決定告訴瑪希。
「你話你要休息?」瑪希一副意想不到的神情。
「嗯……」
「病獵協會仲恢復緊,你係所有病獵嘅精神支柱,真係唔留低?單純個人企喺到都得,你大可以做個顧問負責文職,唔一定要上前線。」瑪希勸留我。
「真係發生你哋解決唔到嘅事再搵我,其他病獵都要試下成長。」
「咁好。」瑪希暗暗深嘆,會心微笑:「病獵協會應該好快會搵你。」
該交代的事都交代完後,我就向建築公司買了批材料,回到將軍澳的茅湖山去。
對上一次因為炎魔的擊襲,屋子都焚燬了。
我想要重新修建好。