「無咗最主要嘅獵手黨,同鄉會嘅人海同游擊戰術好湊效,防疫員一時間都突破唔到,所以依場革命需要有個突破口,而突破口就係諸位嘅家族。你哋決定站邊,都好左右到局勢發展……」米田貢認真分析。
廖家公子:「其實乜都唔做,對我哋係最好,就算做……都需要權衡利害,係咪值得做。」
「最重要係我哋對上嘅老頑固,你都知佢哋份人,最唔想有咩改變,暫時家族真正話事嘅始終係佢哋。」候家公子說。
「加上同鄉會話要解放農奴?無咗佢哋,邊個幫我哋耕田養魚。」鄧家公子說出最重點的事情。
「你哋都提出咗幾個疑慮,但我只係想提提大家,今次機會一過就無,如果齊福皇真係捱過今鋪,往後區內實施嘅政策只會越嚟越嚴厲。」
「哈,所以要我哋一齊追求自由平等啊?」候家公子笑了聲。
「我想同各位一齊造王。」米田貢張開雙手。
大家沉默半晌,由鄧家公子開腔:「造你上去?」
「唔係我,係齊福皇嘅十四王子。」
「十四王子……」文家公子思索著:「無聽過。」
「齊福皇咁多仔女,點解偏偏要揀佢?」廖家公子問。
「佢係齊家嘅後人,揀咗佢上位,至少本地人唔會抗拒。其二係我同佢早係相識,以後朝中有人好辦事。」
「但……同鄉會都唔會同意。」
「哈哈哈哈哈,同鄉會從來唔係咩血濃於水嘅組織,不過係一班想爭取共同利益嘅鄉里,到時候新王上任,釋出善意拋少少甜頭已經可以瓦解一大半抵抗勢力。」
「但農奴問題一日唔解決,日後都可能……」文家公子有所忌諱,早晚會再發生相同事情。
「有時候一件事包裝好佢,觀感就唔同哂,我哋自然有辦法解決。齊福皇手段實在太高壓,有時懷柔並施俾對方覺得仲擁有自由同生存空間,先係上上策。」米田貢說。
「假設我哋都同意你,最大問題嚟,點樣說服我哋屋企長老?」鄧家公子說。
米田貢嘻笑:「最簡單嘅傳統,決鬥?」
文家公子以為是什麼大計,頗為失望:「你講笑咩米生,佢哋老人家點打,亦都唔會打。」
「未講完……我係指,係根據佢哋喜好嘅決鬥。」
「你意思係?」鄧家公子皺眉。
「侯家你哋嘅鬥雞生意最賺錢,令尊最重要就係鬥雞。」米田貢指出。
「係……但講到鬥雞,你唔會夠我老豆鬥,佢隻鬥雞唔係講笑。」侯家公子表現出不安。
「唔洗擔心我哋輸,嘻嘻我哋捉咗隻聞風喪膽嘅殺人雞。」
「我哋家族收埋咗隻鬥雞,叫「殭屍雞」,佢好與別不同,你哋真係唔會夠佢鬥。」
「到時就見真章。」米田貢微笑,順便介紹我:「況且我有最好嘅鬥雞訓練師,亞貢。」