「非常好、非常好,個個都想得到嘅殺人雞,依家就喺我手上。」米田貢雙手負著,看著鐵籠中暴躁的新鬥雞。
「我完成咗你要嘅嘢。」
「亞貢,呢隻雞,其實係關鍵。」米田貢兩睛瞅來。
「關鍵?」
「其實我哋應該宏觀啲,喺王座未被推翻前,其實所有反抗者都係同一陣線。」米田貢表情漫不經心,手指向殺人雞:「四大家族嘅侯家,係特別鐘意鬥雞,鬥雞亦係佢哋旗下最賺錢嘅項目,如果你帶住殺人雞贏到佢哋,我諗佢哋會願意坐低傾傾。」
「同佢哋所有人合作?」
「難道你以為殺死錦綉王,錦綉勢力下嘅人,就唔會有逐鹿中原嘅心態?佢哋同時一樣會動用防疫員,繼續維護成個制度同體系,要對抗到嗰堆防疫員,只可以聯合所有家族,甚至係同鄉會……唔係一兩個個體做到。」米田貢心思細密,晚上影子映落側臉很像位陰謀家。
「到真係事成,聯合完就要分豬肉,佢哋應該唔會支持你推薦嘅十四王子,雖然推十四王子上位,可以安定到錦綉嘅殘餘勢力。」
「人有啲時候,總不免要過河拆橋。」
「你一早諗好計劃?」
「都諗咗陣間,首先要對四大家族投其所好,話哂圍村人係幾排外,一開波就傾合作佢哋肯定唔會理你。」
「侯家鐘意鬥雞,其他人?」
「另外嘅我再講,但如果想喺北部都會區西面行動自如,甚至係同四大家族搞四家聯聚嘅話,首先要搵同鄉會幫手。」
「因為防疫員嘅檢測站太密集?」
「係,類似戰線咁,要靠同鄉會推出去,咁我哋就可以喺西面活動自如,唔受監視同限制,最重要係……同鄉會有個好寶貴嘅資源。」
「你講嘢其實唔洗下下賣關子。」
「地道。」米田貢指一指地面:「佢哋靠住大量嘅農奴幫忙,其實喺北部都會區底下建立咗條,長而深嘅地道,可以話係同迷宮差唔多,他日有地道闖入錦綉內部會好方便。」
「居然連地道都有……」人類的想像力和執行力真的無窮無盡。
「至於點搞掂同鄉會,傾得成反抗嘅事……就睇你造化,亞貢。」
結果到頭來,我還是要前去找伍澤民一次。
羅湖地鐵站。