【常威近代史】（三百一十七回）
大軍閥平反系列
時間線去到1918年3月，時局仍然混亂不堪。
南北戰爭繼續拖拉，3月4日，上海《時事新報》增辟「學燈」版，專門刊載學術性文章，呢個亦係中國第一次喺民間報紙上出現純學術文章及評論，比起歐洲，足足慢咗100年，亦標誌住，中國人嘅文化水平開始拾級而上，脫離文盲野蠻人層次。同一時間，大量呼籲文學革命嘅文章開始出現，要求以新文體白話文取替舊文體文言文（但唔知點解今日嘅香港中學生都要讀文言文囉？），一場新文化意識形態更替運動亦好快會喺中國國內轟轟烈烈上演！
直系馮國璋同皖系段祺瑞之權鬥繼續發酵，上一個月17號北京政府公佈《修正國會組織法》，並命令內務部依修正法籌備新國會選舉，段祺瑞為鞏固佢喺國會中嘅力量，撥出重金，命令其頭馬徐樹錚（徐樹錚真係好多嘢做）幕後操縱，網羅社會賢達政府官員同政客，組成一個叫「安福俱樂部」嘅政治團體，目的在於收買議員、操縱選舉，取得大多數議席企圖控制國會。
咁似嘅？
政府出錢組織民間政治團體，企圖奪取議席，製造民意，咁咪即係腥港嘅《禮義廉》？冇錯，就係《禮義廉》！一直食阿公錢，個個肚滿腸肥，但有口鄉音就扮基層，控制議會控制社區。啱啱2019年區議會選舉一鋪清袋。但係啲樁腳又唔X洗驚，因為政府又話會用公職養住佢哋，上頭又會繼續出糧咁講。100年前發生嘅爛事，今日繼續發生，而且玩法基本上一樣。
但弊在弊在，100年前識字率1%有人信唔奇，100年後識字率達99%嘅香港亦都大把人支持《禮義廉》建制派？你睇得票率就一清二楚，佢老母今次區議會選舉仲有百二萬票，香港仲有人覺得佢哋係真基層，真心為香港，真心代表貧苦大眾勞動階層出聲。
講真，今時今日喺香港仲支持《禮義廉》或《工聯會》嘅市民，其實真係有啲問題。雖然支持某個政黨或某種政治意見係一種自由，係真民主嘅體現方式。但係人情道理上，不斷俾人欺騙再欺騙仲繼續相信佢，大概就係智力嘅問題。
不過我其實智力都有問題，欺騙香港人嘅唔單止係建制派，泛民都一樣。我常公子成日用一個例子，真正能夠保障勞工階層（窮人）利益嘅就係「集體談判權」同「組織工會」法，但過去二三十年，每一次響立法局關於集體談判權嘅議案，都冇辦法夠票通過，除咗建制派投反對票外（順帶一提，工聯會係贊成嘅），民主派或泛民嗰邊，亦大多數投反對票或者乾脆避席，咁究竟又係一個乜嘢玩法呢？冇集體談判權同合法工會？如何能夠保障勞工階層低下階層嘅利益哩？依一點，我係百思不得其解？
伸延思考（智力門檻180以上）：咁中國內地工人有冇集體談判權呢？係冇嘅。但係理論，中國共產黨就係一個由工人及勞動階層組成嘅政黨，基本上你可以將佢睇成一個巨大嘅工會，佢係代表工人階級嘅利益，所以中共本身就係一個能夠充分保障工人同勞動階級利益嘅政黨，於是集體談判權同工會亦都冇存在嘅必要，understand？
