大清亡國關慈禧蛋牛治 2

【常威近代史】（四百四十七回）
孫文之死（一）

1925年3月，段祺瑞喺北京召開「善後會議」，各方勢力商討「第二次直奉戰爭」結束後嘅政治分贓，南方廣東，蔣介石同蘇式紅軍合作，全力打擊陳炯明粵軍殘餘勢力，勢如破竹。

3月12號，孫文於北京鐵獅子胡同11號病逝，天一歲地一歲，享年60歲，孫文於去年應邀北上，共商國是，12月到達天津時肝病發作，12月31號抱病入京，1月20號病情加劇，1月26號，由德國俄國兩位醫生喺北京協和醫院為孫文進行手術，確診為末期肝癌，藥石無靈，2月24號開始，孫文病情惡化，延至3月12號與世長辭。

2月24號，孫文立下遺囑，由汪精衛筆錄，宋子文見證，遺囑內容如下：

「余致力國民革命，凡四十年，其目的在求中國之自由平等。積四十年之經驗，深知欲達到此目的，必須喚起民眾及聯合世界上以平等待我之民族，共同奮鬥。

現在革命尚未成功，凡我同志，務須依照余所著《建國方略》、《建國大綱》、《三民主義》及《第一次全國代表大會宣言》，繼續努力，以求貫徹。最近主張開國民會議及廢除不平等條約，尤須於最短期間，促其實現。是所至囑！」

孫文突然逝世消息驚動全國，3月19號，由家屬及部份國民黨員將孫文靈柩移往中央公園社稷壇。歷史記錄，12萬北京市民站立街道兩旁，恭迎移靈隊伍經過，孫文之後，如果我冇記錯，有十萬人送別最後一程之政治家，下一個係1976年嘅周總理周恩來。

24號起，響中央公園社稷壇舉行公祭，前往吊唁嘅民眾達到75萬餘人次，傳說臨時執政段祺瑞唔敢親自前往向孫文致祭，改派內務總長龔心湛（1871-1943）代祭，嬲到孫文嘅多年戰友李烈均大叫：「死總理嚇死了活執政！」，全國各地，包括不少軍閥地盤都設置靈堂供大衆吊唁孫文，4月2號，公祭結束，孫文靈柩移住西山碧雲寺暫時安放。

孫文被近代史稱為「國父」，係1940年4月，中華民國國民政府明令尊稱孫中山先生為「中華民國國父」，沿用至今，但係當佢係1925年死嘅時候，「國父」呢個稱號並未出現，將孫文嘅位置抬上「國父」神壇嘅人係蔣介石，因為孫文死後，一切政治遺產皆由蔣介石一人承繼，蔣介石要鞏固自己權力來源，當然要極力抬舉孫文，不過孫文生前，都係響噹噹嘅政治人物，係中國革命嘅代表象徵，真真正正革命KOL，地位無法否認，孫文一生起伏，亦都表現咗中國革命之路嘅起伏。

1866年出生於廣東翠亨村嘅孫文，係最早參與推翻滿清政權嘅革命先行者，接受美國檀香山英國殖民地教育成長，算係半個西人，由1894年28歲時上書李鴻章呼籲政體改革，同年11月喺美國檀香山創立興中會革命團體，孫文就踏上暴力革命之路，再不回頭，由1895年第一次廣州革命開始，前前後後打滾政界三十年，中間經歷無數波折，但孫文從不放棄，如果你話鄧小平三起三落？孫文又何止三起三落呢？孫文值得敬佩嘅地方，係佢嘅恆心同堅毅，百折不撓，把握每個機會東山再起，真係唔係個個可以做得到。

論名氣，排除袁世凱，孫文敢認第一冇人敢認第二，但係論實際掌握政治權力，孫文係要到50歲之後，辛亥革命嘅成功，源於四川保路運動及武昌軍人起義，算埋同盟會有份，但當時領導同盟會嘅人係真國父黃興同宋教仁等國內陀地，孫文一直流亡海外，佢最大嘅作用係同華僑籌款以及擔當中國革命嘅海外發言人（可能孫文係少數英文流利嘅中國革命家），用今日嘅術語，孫文係打國際線，當然你唔可以話佢嘅角色唔重要，睇下你用乜嘢角度去睇喇？1911年辛亥革命成功，孫文被應邀回國擔任臨時大總統，亦全因爲孫文嘅國外名氣同國際聲譽。

孫文有份實際參與嘅其實並非辛亥革命，而係1913年宋教仁被行刺後所發生推翻袁世凱嘅「二次革命」，不過呢次革命完全冇得打，中國革命力量同國民黨差不多被一鋪清袋，最後可以翻盤純屬好彩。二次革命失敗後孫文再一次流亡日本，組織「中華革命黨」，建構「黨國合一、獨裁政治」雛形，連出生入死嘅好兄弟黃興都唔buy佢。

孫文一直嘅政治立場，強調「法統」，強調「共和」，但佢嘅所作所為，「人治」色彩比「法統」濃厚，用我自己嘅描述，孫文只係芸芸眾多軍閥中嘅其中一個，每個軍閥都有自己一套「說法」，但到咗最後，孫文嘅「說法」成為唯一正確，就係歷史嘅杜撰問題。

我非常相信，孫文其實係一個「馬克思主義」者，或者更精確少少，孫文係一個「列寧主義」者，尤其是1917年十月革命列寧成功建立共產政權之後，孫文更加相信列寧主義先係建國（或稱革命成功）嘅唯一出路。講係冇用嘅（馬克思主義），要做出嚟先至係堅（列寧主義），列寧同托洛斯基俾孫文嘅啟示同影響，一定比歷史記載更加巨大。

孫文真正掌握政治權力，要去到1920年，由陳炯明幫佢打返廣州作為根據地，建立南方軍政府開始，不過老實講，當時軍權喺陳炯明粵軍手上，孫文實際掌握嘅權力又有幾多？之後孫文提倡北伐，並且將蔣介石插入軍隊，企圖從陳炯明手中奪權，但唔成功，之前已經講過，陳炯明主張聯省自治，割據廣東，粵人治粵就已經心滿意足；而孫文目光更遠大，要北伐統一全國，於是一對好兄弟反目成仇……

下次繼續孫文評論……

#常威💀 #大軍閥平反系列 #大軍閥 #民國歷史

【常公子歷史頻道323回：替大軍閥平反系列之 #大元帥】

♏2020年年頭，大概冇人能夠想像，一場突如其來嘅Covid-19會造成史上最大嘅全球災難，過去嘅災難，例如一次、二次世界大戰，世界上仍然有一些地方可以倖免，唔被捲入漩渦之中獨善其身，但今次新冠肺炎傳染病，就係整個地球所有人一齊受，幾乎冇一個國家可以倖免於難，或多或少都受唔同程度嘅影響，而且最重要嘅係，這場病毒將會改變所有人嘅生活模式、甚至改變全世界嘅產業生態，而且冇得返轉頭。

♉你話Covid-19係突如其來，其實又唔係，冠狀病毒嘅襲擊源自於2003年嘅沙士，之後有中東呼吸綜合症，冠狀病毒向地球人宣戰，亦早有警示，不過對上兩次，疫情只係響局部地區發生，冇擴散到全世界，所以大家都掉以輕心，唔當係一回事。今次Covid-19病毒響短時間內擴散全球，先至係全人類嘅一次真正考驗。但係返轉頭講，Covid-19亦算係一隻致死率較低嘅病毒，我實在無法想像如果Covid-19嘅致死率有10%以上，世界會變成點？

♈又上一個世紀開始的全球一體化，將整個人類嘅運輸、經濟、產業鏈連成一線，締做咗半個世紀嘅高度興盛繁榮，同時亦種下咗今日嘅禍根。疫情發展到現在，人類仍然處於被動抗疫狀態，每個國家利用社交距離、隔絕封鎖方式以確保比較安全嘅生存環境，就好似香港咁，防疫措施不斷變化，主動權並唔喺人類手上；呢個環境一直要維持到疫苗出現，人類先可以進入主動抗疫階段，全球人類開始施打疫苗，或者搵到其他方法化解或者阻止疫情高速擴散，呢個階段，好有可能維持一至兩年；到咗最後，等到疫情危害嘅程度下降到可以人類可以承受嘅範圍，全人類進入同疫情共存嘅階段，真正將Covid-19變成bad flu，大概先算係圓滿結束。

♏由被動到主動，由主動變成習慣，整個三階過程要搞幾耐？2021可以嗎？應該唔可以，抑或要去到2022？亦冇人能夠知道，總言之，情況就係唔樂觀中仍有樂觀，凡事平常心面對……

♑【常威近代史】第五部《霹靂大忠臣對決無敵大買辦》電子書上架（條download link在下面），請大家課金支持我一直走落去，直至劉少奇骨灰到達北京王光美手上…

♎【#常公子近代史】語音導航！請大家幫手「#訂閱」我條常公子YoutubeChannel！同埋介紹多啲人睇睇！衝上4000訂戶！

✅https://youtu.be/JGz6xpwY-hU

【常威近代史】（四百四十八回）
孫文之死（二）

1922年夏天，被陳炯明驅逐離開廣州嘅孫文，故事可以到此為止，如果蘇聯或叫第三國際冇伸出「大力」援手嘅話……早響1922年，孫文已經同蘇俄有所接觸，響「第三次革命」，即係南北戰爭之後，孫文亦都曾經企圖說服蘇俄武裝入侵中國，同佢一齊推翻北京中央政府，但當時蘇俄拒絕為孫文提供任何援助......

去到1922年，蘇俄政權已經全面穩定，捱過同白軍嘅血腥內戰，亦頂得住國際資本主義社會嘅龐大壓力，世界上第一個共產主義政權喘定，並且幾乎可以肯定可以繼續存在落去（之前真係危危乎），自己革命成功咗，下一步就係要向全世界「輸出革命」，響史太林未真正完全掌權行國家社會主義之前，列寧同托洛斯基嘅夢想同路線，依然係「國際主義」，要解放就要解放全世界，真正嘅共產世界，一定要全地球所有人都一齊共產，否則此消彼長，最後一定會失敗收場，先知托洛斯基嘅預言響1991年得到驗証。

孫文1922年嘅失勢，正值莫斯科同北京談判建立外交關係之時，蘇聯同中國邊境接壤，如果唔能夠成為「最親密嘅戰友」就會成為「最可怕嘅敵人」，呢個叫「地緣政治」，美國同日本相隔一個任賢齊傷心太平洋，有乜嘢唔啱，仲可以避而不見。但係如果你住喺我隔籬，日日朝見口晚見面就叫避無可避，所以蒙古（現在蒙古國）一大片嘅廣闊地域，變得相形重要。蘇俄早已透過老朋友馮玉祥，企圖吞併蒙古，建立同中國嘅「軍事緩衝區」，等大家唔使直接碰面。明白「軍事緩衝區」嘅重要性，你亦會明白今日嘅北韓點解可以長期食住兩邊茶禮；你亦會明白當時大英帝國點解唔直接吞併西藏。

1922年，蒙古一片本來屬於中國嘅土地，已經被俄國軍隊佔領並扶值傀儡政權中，北京要求蘇聯撤軍，於是兩個國家無法建立正常外交關係。失勢嘅孫文，正正是「奇貨可居」，於是蘇俄決定加以利用。越飛派出荷蘭共產黨人馬林到上海同孫文會談合作可能性，孫文拋出方案，首先完全同意蘇聯軍隊應該留在蒙古，然後建議蘇聯幫佢翻身，建立軍隊，推翻北京中華民國中央政府，當時孫文嘅開價係200萬金盧布。

孫文喺一個革命家，亦係一個100%理想主義者，但中國革命搞咗廿九幾年，始終未能出現心目中嘅理想圖像，孫文都明白「槍桿子出政權」真係無比重要，革命KOL孫文有號召群眾嘅魅力，但係佢從來無擁有過實際軍權，第三次革命南北戰爭中，名義上嘅大元帥係有權無實，只係西南軍閥嘅代言人白手套，所以到1922年，佢一心要建立自己嘅革命軍隊，一個要人，一個要錢，孫文同蘇俄於是一拍即合。

你可能話孫文係勾結外國勢力，之前長時間勾結日本，連個名都改為「中山樵」，之後勾結蘇聯，但係作為一股反對中央政府嘅勢力，點唔可能勾結「國外勢力」呢？如果勾結「國內勢力」，你就唔係反對派啦？係冇？基本遊戲規則就係咁，要做反對派一定會勾結外國勢力，況且人人做都係可以係錯，孫文做就一定啱，唔好問點解？

蘇共中央政治局開會批准每年給予孫文200萬金盧布作為革命資金，而且唔係一次過撥款，而係年年都有，並且冇限期。蘇俄嘅巨額資助，亦係孫文一生人中一筆最巨額嘅可靠收入，是水就生，有水就曉飛，之後佢利用蘇俄嘅錢收買西南桂系軍閥，利用軍事力量逼走廣州陳炯明，然後以勝利者姿態再入主廣州，再一次當上南方軍政府大總統，頒佈「聯俄容共」政策，由紅軍軍官背後支持創建黃埔軍校訓練革命軍隊，依一次佢奪取北京政權嘅可能性，比過去任何時候都有希望。

莫斯科將重注押喺孫文身上，主要原因係蘇聯同北京政府喺蒙古問題上毫不妥協，與其同你糾纏落去，不如喺中華民國國內培植一股親蘇勢力，最後能夠推翻你固然perfect，就算做唔到，拖住你後腳或者同你製造麻煩亦都係好事。呢種擺個計時炸彈喺人哋國家內嘅玩法，一直沿用到今時今日，將來亦會繼續用落去，唔會有停止嘅一日。

我認為孫文係一個共產主義者，意識形態上可以同蘇聯順利接軌。但亦有人唔認同，有人認為孫文只係一個（小軍閥）野心家，無論意識形態又好、合作對象又好、中國嘅前途又好、打唔打仗都好，對佢嚟講都係無關重要，佢只係想一心推翻中華民國北京中央政府，建立自己心裡面嘅烏托邦。

如果用呢個角度去睇，孫文無疑係一個馬基維利主義者，為咗達到政治目的可以不擇手段、更可以左右逢源成為一隻政治變色龍。去到1922年，孫文究竟想推翻啲乜呢？其實1911年辛亥革命之後，中華民國的確係一個經由民主選舉產生嘅政府，當然你可以質疑所謂民主選舉中嘅民主成分有幾多？

全國大選，一直有進行；國會無論用任何名目，總是在運作。中間曾經有過袁世凱稱帝事件，但袁世凱死後，整個共和民主政體依然運作如常，國家雖然貧窮，但仍然有巨大發展，有言論自由新聞自由，大鳴大放，百花齊放，任何政黨皆有發言權，包括新生共產黨在內；亦有獨立嘅司法機構，循序發展，私人工商業開始逢勃興旺，中國經濟亦開始高速發展。呢個歷史上人人唾棄嘅「軍閥混戰時代」——中華民國沿用五色旗嘅時代——其實係一個真正嘅好時代。

孫文你為什麼想推翻它？下次繼續孫文之死.....

#常威💀 #大軍閥平反系列 #大軍閥 #民國歷史

【常威近代史】（四百四十九回）
孫文之死（三）

今集係孫文最後嘅評價……

19世紀至20世紀初，係一個建構「民族」觀念嘅「機會窗口」，響19世紀之前，世界上大部分人祇有國家觀念，而無民族觀念。一個「民族」所涵蓋嘅人數，可以遠比一個「國家」為多，而所謂一個民族，亦係一個好寬廣嘅定義問題，而孫文毫無疑問，就係「中華民族」嘅主要建造者同主要推手。

所謂「中國人」或「中華民族」，亦係響19世紀末期開始出現喺個世界上，清帝國係由入侵中原嘅滿州人所建立，佢哋視被征服嘅中原漢人（或原來明帝國國民）為「降虜」，即係投降嘅俘虜，統治階層同平民百姓根本唔係同一個範疇中嘅人，所以孫文初初搞革命嘅時候，就用「驅除韃虜」為口號，後來1911年革命成功，年底孫文宣佈《臨時約法》內容，其中明確提出，中國係一個多民族國家，內外蒙古、新疆、西藏、青海都為中國領土，從此，「五族共和」，所有人都被納入為「中華民族」嘅一部分，「驅除韃虜」依個説法先被徹底放棄。

由此可見，如何去定義一個「民族」，的確非常有彈性，所謂定義亦係由勝利者去決定，無論你喜唔喜歡都好，總之統治者講咗就算數，有人話，「身份認同」係個人嘅抉擇，但係從古到今，「身份認同」只係統治階級向民衆所作出嘅「定義」問題。依一點相信冇人會比香港人更清楚，97年前，香港人係「殖民地嘅香港人」、「中國難民」、「揸BNO嘅英國二等公民」，97年後，香港人變成「中國香港人」，但又唔係百分百嘅「中華人民共和國中國人」，本土主義興起，又有人認為香港人就係「香港人」，甚至提出「香港民族」嘅荒謬講法，到咗目前，我哋又係「大灣區」的一分子，我哋嘅身份不斷被重設同改寫，你有「認同感」嘅時候，「定義」有可能已經改變了。

創立中華民族，係孫文最大嘅歷史貢獻，無人可以代替，單單這一點，其實佢被稱為「國父」，亦相當恰當。

就我個人對孫文嘅理解，我認為佢係一個百分百嘅好戰分子，毋忘初心，起初投入革命事業嘅時候，孫文的確係一個無懈可擊、拋頭顱灑熱血嘅革命分子，但係辛亥革命成功之後，中華民國共和體制建立，孫文並無功成身退，反而多次以唔同藉口發動內戰，先有「二次革命」、「三次革命」，再有「北伐戰爭」，更加唔好提響軍艦發炮攻擊廣州平民……當然你可以為孫文辯護佢係為勢所逼，但係無論如何，佢都唔會係一個和平主義者，佢所做嘅嘢——如果撇除「口實」同「理由」——根本就係一個大軍閥嘅所作為為。

由革命分子變為恐怖分子，其實係一線之差。2001年我自己非常唔明白點解有人可以揸住架飛機撞向世貿大樓？今日我終於明白，一切都係為咗追求尚高理想，為夢想而戰，世界上邊個唔係為咗崇高美麗嘅夢想而發動革命呢？但到咗最後，追求夢想嘅人反而比夢想所吞蝕而變質，導致生靈塗炭，我諗孫文就係一個好例子，除咗孫文，中國近代史上亦有太多依類例子。

「聯俄容共」政策，係由孫文死前幾年一手促成，「黨國合一」觀念，亦係由孫文一手所創立，喺佢建立「中華革命黨」時，佢已經明白「獨裁統治」係亂世之中嘅唯一有效管理方法，推翻滿清王朝，建立民主共和體制，強調依法治國（法統原則），本來就係要將「人治」嘅成分全部（或有限度）拋去，但係孫文好快已經反其道而行，不斷強調「法統重光」嘅佢其實自己先係破壞「法統」嘅人，依一點無法否認，你去睇睇孫文整個歷史流程，所謂「法統」只係大聖手中一支可伸可縮嘅金剛棒，對自己有利嘅時候，就叫法統；對自己不利嘅時候，就叫障礙。咁何來有法統呢？

歷史人物，往往生於時勢，所謂時勢造英雄，並非英雄造時勢，係存在決定意識，並非意識決定存在。張學友一把美麗聲線於80年代出道，自然流芳百世，如果學友生於今天，大概唔會有好大成就。「時勢」往往淩駕於人嘅能力之上，所以馬克思主義裡嘅「唯物辯證法」歷史觀是對的。

除咗生得合時，亦要死得逢時。1925年孫文喺佢嘅人生巔峰畫上句號，正正就係最好時機。如果早死幾年，佢只不過係南方其中一個軍閥代表，大概同唐繼堯陸榮廷同級，如果死後幾年，國民黨同共產黨反面，血腥清黨嘅責任亦好難唔計喺孫文頭上（當然如果孫文尚在，或者根本唔會反面都未定），但係正正孫文死於1925年，死於偉大歷史轉折點，於是無論國民黨的中華民國、抑或共產黨嘅中華人民共和國，都視孫文係「國父」，直至百年後嘅今日，仍然高高在上，永垂不朽。

無論如何，孫文呢個人喺中國近代史上角色無比重要，不論生前行事，抑或死後被重新被史學作家演繹撰寫，孫文的確係代表咗一個時代——一個中國嘅革命時代——隨住1925年孫文之死，中國百花齊放嘅革命時代亦宣佈過去，「共和」、「法統」等普世價值，無法調和中華民國中每股軍閥勢力嘅恩怨情仇。孫文之後，一切皆以武力解決，當然孫文之前，本來亦祇有可以武力解決，但我想強調嘅係，孫文之後所使用嘅武力，係另一種武力概念——係血流成河、趕盡殺絕級嘅極端武力！大家不留情面，盡情生死相搏！一個原有秩序結束之後嘅大混亂時代，由始進入血腥高峰……

#常威💀 #大軍閥平反系列 #大軍閥 #民國歷史

【常公子歷史頻道324回：替大軍閥平反系列之 #胡適】

♏胡適可以講係中國知識份子嘅典型，又可以講係異類。當時嘅胡適係小部分接受全面西方教育熏陶嘅中國知識份子，佢考取庚子賠款官費留學，入讀美國哥倫比亞大學，跟隨美國實用主義大師杜威寫論文，得到哲學博士學位，100%PHD，係真正嘅、貨真價實嘅PHD，因為同時代好多去外國留學嘅中國人，根本唔入流，有好多根本冇讀過大學，或者只係讀中學，上過大學先修班，或者喺美國科水讀野雞，就返嚟也文也武，升自己上神檯，呢啲情況到香港上世紀90年代中不斷發生。

♐胡適因為貨真價實，所以成為中國知識份子嘅代表人物，由佢發動嘅新文化運動、改寫中國文學發展聞名於世，響佢身上，你會發現好少中國人嘅缺點，你會發現佢展示咗西方人嘅優點，我個人認為佢基本上係一個西人，因此歷史沉澱落嚟，佢最後得到最高嘅評價。最近《胡適留學日記》原文手稿18冊，響北京以破世界紀錄1.93億人民幣成交，成為全球「最貴日記」。

♐胡適於1938年到1942年擔任中國駐美國大使，在美加各地巡迴演說，爭取美加各界人士支持中國抗日戰爭，呢個亦係胡適從政路上嘅終站，二次世界大戰結束，胡適回國擔任北京大學校長，專心從事學術工作，1948年當選為中央研究院院士，同年底獲蔣介石安排專機從北京飛往南京，但係胡適並冇跟隨蔣介石到臺灣，中國變天之後，佢寓居紐約，擔任《自由中國》發行人，直至1958年，先返去臺灣任中央研究院院長，以一個知識分子嘅身份終老，胡適同蔣介石嘅關係，太多花邊新聞，胡適亦嘅心狠手辣蔣先生少數唔敢喐嘅人物之一，真係好巴閉、好把炮。

♉胡適亦係第一批建構「中國哲學史」嘅人物，1919年出版《中國哲學史大綱》，令中華民族開始有自己嘅哲學史，呢個貢獻其實可圈可點，因為一個連哲學史都冇建立起嚟嘅民族，好難喺20世紀之後嘅世界「雄立」起來。胡適一生，近乎完美演繹「中國知識分子」角色，真係想抹黑佢都冇乜位入，睇返中國近代史，咁嘅大人物唔係有幾多個。

♑【常威近代史】第五部《霹靂大忠臣對決無敵大買辦》電子書上架（條download link在下面），請大家課金支持我一直走落去，直至劉少奇骨灰到達北京王光美手上…

♎【#常公子近代史】語音導航！請大家幫手「#訂閱」我條常公子YoutubeChannel！同埋介紹多啲人睇睇！衝上4000訂戶！

✅https://youtu.be/F9fRJm-pn8w

【常威近代史】（四百五十回）
一紙需扁兩個面門

隨著孫文之死，中國近代史進入全新階段。孫文嘅政治遺產，將由蔣介石完全承繼，當然蔣介石要做到完全繼承孫文，仍要經過一番波折同手段。

放喺南方國民黨陣營中最大嘅矛盾係「左右」之分，「聯俄容共」政策之下，產生「第一次國共合作」，其實各有異心，亦各懷鬼胎。事件嘅本質係國民黨（或孫文）收咗「第三國際」（或蘇共）嘅錢壯大軍力企圖奪權，本身就係赤裸裸勾結外國勢力（不過當時似乎冇一個軍閥冇勾結外國勢力？），容許中國共產黨黨員以個人名義加入國民黨，只係附帶條件，即係買斤豬肉搭舊豬骨。國民黨包括孫文在內，一定唔想，不過老細出糧畀你，要你星期六加班，你就係無得推，鬼叫你窮？

國民黨內亦出現「左派」、「右派」之分，右派成員大力反共，認為中共黨員加入國民黨，純粹係進行滲透間諜分化活動，等待坐大然後奪權。當然佢哋亦無錯，凡事睇吓你用乜嘢角度睇同埋程度之分。我記得十幾年前公民黨成立嘅時候，好多人都話公民袋係分化民主黨而出現，所以真係睇你點睇啫？

就連創立國民黨嘅元老級人馬，14歲1895年就追從孫文加入興中會嘅馮自由（1882-1958），都因為反對孫文「聯俄容共」政策，1925年3月27日被國民黨中央執行委員會開除黨籍。1924年國民黨「一大」召開後，馮自由就感覺黨有赤化傾向，於是離開廣州，響北京成立「護黨國民黨同盟會」，上書孫文，要求驅逐共產黨出國民黨，但被孫文拒絕，本月8號，佢同另一個國民黨元老級人馬張繼（1882-1947）組成「國民黨同志俱樂部」，就被組織冠以分裂黨嘅罪名，被驅逐出黨。

講開又講，馮自由係出生於日本橫濱嘅中國人，畢業於名牌大學早稻田，佢成為支持資本主義右派就係理所當然，所謂臭罌出臭草根正苗紅；但係差唔多同一時間，中國共產黨農民大王彭湃先生亦都好快響海陸豐建立中國第一個蘇維埃，建立中國第一個共產主義農民政權。不約而同，彭湃亦都係畢業於日本早稻田大學，一紙需扁兩個面門一心開二門，左右逢源，難免令人覺得獨立思考嘅重要性。

孫文死後，舉國哀痛，北京中央政府聲譽再受打擊，當然去到1925年，依個中央政府嘅威信早已經蕩然無存，當時有一宗叫做「金佛朗案」，佛朗，即係法國法郎。事源於1923年2月，由直系打骰嘅北京政府，允許以金佛朗作計算單位，償還法國嘅庚子賠款。「金佛朗」又唔等於「佛朗」，點解嘅？因為第一次世界大戰令法國出現嚴重通貨膨脹，法郎大幅貶值，其實際價值只及紙幣含金量嘅三份之一，即係跌咗66%，但係法國人為咗確保自己利益不受損失，1922年提出建議，中國剩低嘅庚子還款要用「金佛朗」結算，「金佛朗」即係金本位嘅法郎，並唔係貶值咗三分二嘅「紙佛郎」。

按照匯率，當時中國銀幣1元兌換8佛郎，但如果用「金佛朗」匯率計算，中國銀幣1元只值3佛郎左右！中間牽涉咗好多金融操作，呢度唔詳細表述喇，但係件事好簡單，法蘭西人用兩個唔同貨幣匯率同中國傾還錢，就係老屈你！你老母真係咁都得？咁仲有乜嘢唔得先？1923年，直系政府因為舉國上下反對，被迫將「金佛朗案」擱置，但法國人又玩手段，以恢復中法銀行業務為誘餌，而中國好多官僚軍閥亦響法國銀行有存款有利益，於是歷屆中央政府，好多人為此案奔走疏通。

終於去到你段祺瑞手上，由於「金佛朗案」擱置咗兩年多，作為庚子賠款擔保被扣起嘅中國鹽稅餘款已達2360萬元，對於財政捉襟見肘嘅段祺瑞政府無疑極具壓力，於是乎，4月12號中國政府向法國跪低，以匯兌美金方式，用「金佛朗」匯價計算償還庚子賠款，法國方面亦退還部分還款，用於恢復中法銀行業務，但單以當時匯價計算，中國損失高達6500萬元。（單嘢其實好複雜，我係簡單化咗，有興趣嘅朋友可以自己搵資料昅昅。）

呢一單嘢，真係金融老屈奇案中嘅奇案，亦見證咗弱國無外交，祇有任人魚肉。作為一個中華民國嘅普通市民，當你睇見自己政府樣衰到咁嘅地步？你話邊個唔想革命呢？

4月13號，中國國民黨組建黨軍，而國民黨黨軍第一派亦係當日正式成立，何應欽（1890-1987）任旅長兼第一團團長，沈應時（1895-1926）為第二團團長，依一日係中國近代史上重要嘅一日，亦係「黨國合一」嘅重要里程碑，從此以後，軍隊通常不是國家嘅軍隊，而是黨嘅軍隊，至到今日。當中嘅分別有幾大？其實好大。早響1924年11月，孫文已經提出組織黨軍，國民黨要擁有一支只屬於自己黨嘅武力，佢任命蔣介石為軍事秘書，授權由佢一手組織國民黨黨軍。

當然「私人軍隊」亦唔係乜嘢新鮮事，李鴻章同曾國藩嘅淮軍湘軍，甚至李鴻章私人擁有嘅世界級武力北洋艦隊，去到民國期間每一個大軍閥嘅部隊，其實全部都係私人軍隊，不過名正言順，將「黨軍」概念化成現實白紙黑字條文嘅人，始終都係孫文。

而黃埔軍校，本來亦係為咗創造「國民黨黨軍」而創立，4月14號，國民黨中央正式任命廖仲愷（1877-1925）為黨軍黨代表，29號，任命蔣介石為黨軍司令官，黃埔軍校政治部主任周恩來負責主持第一旅政治部工作。

北方中央政權摇摇欲墜，南方軍政府快馬加鞭，好快就會迎頭趕上……

#常威💀 #大軍閥平反系列 #大軍閥 #民國歷史

你條友，好好地做自己channel 咪幾好。宜家同周顯做節目，有時言論想持平，想講又唔敢去盡，但最可憐係比人覺得你黃，成日比周顯人不留情面爆，比人感覺好無面

唉，生活艱難，世界難撈...

生活艱難……係咁多

【常公子歷史頻道325回：替大軍閥平反系列之 #多重龍門】

♏在馬庫巴【單向度的人】中，有以下一段內容，原文抄錄：

♐『在發達的工業社會中，生產和分配的技術裝備由於日益增加的自動化因素，不是作為脫離其社會影響和政治影響的單純工具的總和，而是作為一個系統來發揮作用的。這個系統不僅先驗地決定著裝備的產品，而且決定著為產品服務和擴大產品的實施過程。在這一社會中，生產裝備趨向於變成極權性的，它不僅決定著社會需要的職業、技能和態度，而且還決定著個人的需要和願望。因此，它消除了私人與公眾之間、個人需要與社會需要之間的對立。對現存制度來說，技術成了社會控制和社會團結的全新的、更有效的、更令人愉快的形式。

這些控制的極權主義傾向看起來還在另外的意義上維護著自己：把自己擴展到世界較不發達地區甚至前工業化地區，並造成資本主義發展與共產主義發展之間的某些相似性。

面對這個社會的極權主義特徵，技術「中立性」的傳統概念再不能夠得以維持，技術本身不能獨立於對它的使用，這種技術社會是一個政治系統，這個系統在技術的概念和結構中已經起著作用。

一個社會用以組織其成員生活的方式，涉及到在由物質文化和精神文化的固有水平所決定的種種歷史替代性選擇之間進行一種初始選擇的問題。這種選擇本身是占支配地位的利益發生作用的結果。它預定了改變和利用人以及自然的特殊方式並排斥其他的方式。它是在他者中自我實現的一種「謀劃」。但是一旦這種「謀劃」在基本制度和基本關係中得以實現，它就趨向於變成排他性的，並決定著整個社會的發展。作為一個技術世界，發達工業社會是一個政治的世界，是實現一項特殊歷史謀劃的最後階段，即在這一階段上，對自然的實驗、改造和組織都僅僅作為統治的材料。』

♑不要去明白它，嘗試去感覺它😂

♑【常威近代史】第五部《霹靂大忠臣對決無敵大買辦》電子書上架（條download link在下面），請大家課金支持我一直走落去，直至劉少奇骨灰到達北京王光美手上…

♎【#常公子近代史】語音導航！請大家幫手「#訂閱」我條常公子YoutubeChannel！同埋介紹多啲人睇睇！衝上4000訂戶！

✅https://youtu.be/kgg3is_BnuU

【常威近代史】（四百五十一回）
造神運動開始

1925年5月1日，勞動節大日子，第二次全國勞動大會響廣州召開，會上通過咗《中華全國總工會章程》，成立「中華全國總工會」，一個全國性嘅工會誕生，標誌住中國工人運動進入全新階段，亦標誌住代表工人階級力量嘅中國共產黨，前途一片遠大光明。

呢次會議由中華全國鐵路總工會、漢冶萍總工會、中華海員工業聯合總會、廣州工人代表會發起召開。到會代表一共227人，代表165個工會團體，同埋54萬工會會員，相當有代表性，大會選舉產生25人組成中華全國總工會第一屆執行委員會，當中有林偉民（1887-1927）、蘇兆征、鄧培、劉文松、孫雲鶴、劉少奇、李啟漢、鄧中夏、孫惠良、劉俊才等。林偉民任委員長，劉少奇任副委員長。中華全國總工會會址設喺廣州惠州會館，係全國工人運動統一嘅重要領導機關。

當中要提嘅係林偉民，由1920年起，林偉民和蘇兆征等人響香港海員工人中進行革命宣傳活動，並發起組建「香港海員工會」，多次串連全國海員進行抗爭活動，1924年春天，林偉民代表香港海員工會前赴莫斯科出席國際運輸工人代表大會，在蘇期間加入中國共產黨，佢係中共早期嘅工人運動領袖，亦係之後省港澳大罷工嘅重要領導人物，可惜短命，死嘅時候只有40歲。

另一個當然係我常威近代史嘅終點劉少奇，劉少奇係搞工人運動起家，當時佢同毛澤東已經係中共黨內兩粒閃閃發亮嘅新生代明星，有幹勁執行力十足。

正統馬克思主義係要喺城市中發動工人階級革命，然後武裝奪權，建立政權。無知且缺乏階級覺悟意識嘅農民階級，並唔係正統馬克思主義考慮嘅動員範疇之內，當然蘇聯布爾什維克建國嘅經驗，亦彌補咗馬克思主義呢方面嘅缺陷，響「中華全國總工會」成立之時，中共亦開始喺廣州外圍農村地區組織農民運動，海豐人農民大王彭湃係先驅者，彭湃響海峰建立嘅第一個蘇維埃經驗，雖然只係曇花一現，但亦啟發咗中共對農民運動嘅重視程度，當然要將農民運動轉化成中國共產主義革命嘅主要綱領，將「白區」城市工人階級運動放響次位，實踐以「鄉村包圍城市」嘅偉大重要奪權戰略，仲需要多年醞釀。

對農民階級嘅重視同處理，亦成為咗之後毛澤東政治生涯起伏嘅重要線索，不過「實踐係檢驗真理嘅唯一方法」，「捉到老鼠嘅先係好貓」，最後證明毛澤東是對的，農民運動是對的，分田鬥地主是對的。

當時嘅廣州的確係風起雲湧，由蔣介石率領嘅東征國民黨黨軍，正同陳炯明嘅粵軍殘餘勢力作最後戰鬥，但好有可能因為主力部隊調嚟廣州，滇軍軍閥楊希閔（1886-1967）、劉震寰（1890-1972），密謀喺廣東發動兵變，企圖顛覆廣州革命政府。

東征陳炯明時，二人喺廣州附近按兵不動。三月，劉震寰親自前往雲南，挑撥唐繼堯進兵廣西，威脅廣東政權。本月初楊希閔前赴香港，同北京派嚟嘅密使以及陳炯明代表商量共謀顛覆廣東政府。本月中旬，劉震寰起兵佔領廣州東山，楊希閔率領部隊控制廣州市中心，兩人對外宣稱兵力達到三萬人，楊希閔自稱「滇桂聯軍總司令」，宣佈廣州全城戒嚴。

二人起兵嘅同時，廣東革命政府早有所察覺，5月13號，蔣介石、廖仲愷、許崇智喺汕頭召開軍事會議，決定分散兵力，一方面繼續攻打陳炯明粵軍殘餘部隊，另一方面東征軍主力回師廣州平亂。6月4號，滇桂軍公開叛變，佔領廣東省長署、粵軍總司令部及兵工廠、公安局等重要戰略機關。當時國民政府代理大元帥胡漢民下令討伐叛軍，6月10號，東征軍到達廣州，11號，東征軍主力黃埔學生軍猛烈進攻叛軍，配合其他部隊同時發動總攻擊，劉震寰楊希閔叛軍2萬餘人被殲滅，叛亂結束，二人潛逃英國殖民地香港，得以終老，並且長命百歲。

1925年5月16號，南方國民黨決定接受孫中山遺囑，將其作為黨嘅最高指導原則。孫文死前立下遺囑，由汪精衛執筆記錄，講明「革命尚未成功，凡我同志，務須依照余所著《建國方案》、《建國大綱》、《三民主義》及《第一次全國代表大會宣言》，繼續努力，以求貫徹目標。」

從此之後，國民黨高層每次開會之前，都會由大會主席領讀《總理遺囑》一次，造神運動正式響孫文死後開始，整個國民黨亦建立起一套紀念孫文嘅意識形態制度，增強向心力同組織力，「國父」之名亦快將誕生。造神運動以個體出發，以一個人嘅豐功偉績作為其他人嘅指導性原則或行動綱領，基本上係一個操控民衆意識形態嘅玩法，畢竟要大眾去明白去相信一套理念或一個「主義」，會係一個好漫長嘅教育滲透過程，與其係咁，不如去相信一個「人」，相信一個「領袖」、一位「神」或一個「先知」。

以一個個體作為民眾集體信仰嘅「記號」，用「一個人」 去代替整個理念（-ism）或整個集團利益，事實上同封建帝王制度完全一樣，明君現世，國泰民安，你衹要相信就得，具體內容及實際操作你根本唔需要知道，或者你亦冇咁高嘅智慧去知道或領悟。施教者技術簡單，領受者心安理得，大家清楚易明，真真正正何樂而不為？

個人崇拜係馬克思主義者最反對嘅嘢之一，但後嚟由馬克思主義者一手促成近代一次又一次嘅個人崇拜高峰之舉，歷史弔詭，又一例證。

#常威💀 #大軍閥平反系列 #大軍閥 #民國歷史

【常威近代史】（四百五十二回）
省港澳大罷工前奏曲

「工人運動」係馬克思主義、共產主義運動嘅主軸，1848年歐洲大革命遍地開花爆發時響倫敦出版嘅《共產黨宣言》——由馬克思恩格斯執筆、共產主義一篇最重要嘅政治文獻——最後一段亦講明：

「共產黨人不屑於隱瞞自己的觀點和意圖。他們公開宣布：他們的目的只有用暴力推翻全部現存的社會制度才能達到。讓统治階級在共產主義革命面前發抖吧。無產者在這場革命中失去的只是鎖鏈。他們獲得的將是整個世界。全世界無產者，聯合起來！」

《共產黨宣言》裡面所講嘅無產階級，就係城市產業鏈中工作嘅工人階級，並非農民，產業工人擁有階級覺悟性，明白自己嘅悲苦處境皆因來自資本家同統治階層所建立嘅剝削制度，亦即係資本主義制度同資本主義生產方式，要實現解放全世界無產階級嘅宏愿，就必須推翻現存所有社會制度，而採用嘅手法係暴力，並冇其他。有人可能會問，改變社會制度有冇可能喺和平狀態中產生或透過協商談判手段達成？其實唔係話唔得，不過喺歷史上真係好少見啫。

其實我個人感覺，20世紀初期由滿清王朝過渡到中華民國共和政體，已經係世界上極少數嘅社會制度「和平轉移」，傷亡人數其實好少，不過一直冇乜人講咁就算把啦，關於滿清的一切，都是屎，大家明白的。

1925年前，「第三國際」向中華民國（呢個可能係當時世界上最多無產階級數目嘅國家）輸出革命，一切非常順暢，有錢使得鬼推磨，孫文南方政府聯俄容共，共產黨勢力迅速擴大，成功響每個重要城市放下革命樁腳，即係成立工會團結工人階級起事，中共亦開始滲透農村，總之一個講明為窮人奮鬥同戰鬥嘅政黨或理念，自然一呼百應。你坐住架法拉利帶住隻撈，去到一班窮L面前話同佢哋爭取利益，場戲真係好難叫人信服，諗深一層，世界上每一個問題都係「關公問題」，能夠深切認識三國戰神關雲長，自然大徹大悟。

1925年年中，一場醞釀多時嘅「省港澳大罷工」，終於爆煲，之前嘅日子，工人有工會撐腰，有共產黨人串聯，聲勢日漸坐大，勞資糾紛不斷，衝突同罷工差唔多每一天都發生！勞資糾紛，係一個永遠都唔可以解決嘅問題——作為老闆當然想賺多啲，剝削你勁啲；作為打工仔一定想有多啲福利同人工；用左派術語，資產階級同無產階級根本係一個對立嘅「階級鬥爭」狀態，所以最實際嘅方法係，通過鬥爭手段消除資產階級，一切產業收歸國有，歸公家管理，「老闆」變成國家，賺到嘅錢係「公數」，冇個別人士或團體可以獨佔利益，咁就大家都公平喇，冇曬爭拗，整個世界清靜曬——應該就係共產主義描述中嘅烏托邦和諧世界，或中國儒家哲學所描述嘅大同世界。不過依類想法，用左派術語，又叫「左派幼稚病」，列寧話嘅。

1925年5月15號，上海由日商經營嘅紗廠工潮不斷，工人發動罷工抗議廠方無故開除工會領袖，日本商人雇用嘅保安竟然開槍殺人，殺死共產黨員顧正紅，打傷工人十名。事件發生後，引發全上海工人學生同市民嘅憤怒，5月16號中共中央向全國黨員通告，要求發動各地各界上街示威，聲援上海紗廠工人。28號，中共中央召開會議，決定於5月30下午，喺上海租界舉行反帝大型示威遊行。

5月30號，上海各大院校2000多名學生喺租界派發傳單、發表演講，進行反帝反資宣傳，因為人數太多，租界巡捕房做嘢，拘捕近百名進行宣傳演講嘅學生哥，拘捕行動立刻激起民憤，超過一萬名上海市民包圍巡捕房要求釋放被捕學生，事實上類似嘅事件，每一次都係咁發生，就睇吓有冇人擦槍走火將事件升級，而今次真係擦槍走火，英國巡捕暴力鎮壓，開槍射擊群眾，當場打死13人，打傷數十人，並且拘捕多53人！史稱「五卅慘案」！

當晚中共中央召集緊急會議，應對當前情況，決定發動上海三罷，全市商人罷市、工人罷工、學生罷課！咁熟口熟面嘅？都係嗰幾招啦！大家應該唔會陌生。

6月1號上海全市三罷！有人響應就能夠成事！上海總工會提出嚴辦兇手，賠償損失等七大訴求，統治階級當然睬你都有味，但係亦唔敢再將鎮壓暴力手段升級，去到6月4號，全上海罷工工人嘅數目達到18萬！而且所謂「五卅運動」迅速由上海蔓延到全國各地，全國二十多個大中型城市舉行三罷，聲援上海罷工工人同學生抗爭！情況一發不可收拾！

5月尾發生「五卅慘麼」，其實5月頭仲有一件大事發生，就係5月1號，農民大王彭湃等人喺廣東成立首個「省農民協會」，由1922年6月開始，彭湃喺常公子鄉下海豐領導組織農民運動，海豐農會會員人數已經達到十萬人，國共合作後，彭湃擔任國民黨中央農民部秘書長，名正言順領導農民運動，之前已經講過，佢開辦咗「廣州農民運動講習所」，開壇説法，積極培養農民運動幹部，廣東全省農會會員好快暴增一倍至20萬！成為一股空前龐大嘅民間力量！5月1號勞動節，廣東省「第一次農民代表大會」喺廣州召開，彭湃及中共黨員主持，成立「廣東省農民協會」，浩浩蕩蕩的農民運動，踏出歷史性嘅第一步！

#常威💀 #大軍閥平反系列 #大軍閥 #民國歷史

✅本土唯一香港土話近代史文本

❤【常威近代史】第一部《大清亡國關慈禧蛋牛治》，全面開放，免費下載， #freedownload！

Free下載連結🔽

https://play.google.com/store/books/details?id=C3hjDwAAQBAJ

【常公子歷史頻道326回：替大軍閥平反系列之 #第三次革命】

♏評論時局，有一派叫「陰謀派」，就係話你知整個世界充滿陰謀，永遠背後有一對手或者有一群人甚至一個神秘組織操縱成個世界嘅政局，以前叫「共濟會」，今日叫「深層國家」（Deep state），好似最近新型冠狀病毒肆虐全球，陰謀派就會話你知背後係一個大陰謀，目的係製造全球經濟大衰退，以到達某種目的，目的有好多種，例如加強操控全球人民，又或者製造大洗牌或世界戰爭，reset成個世界，重頭開始。

♈我唔暪大家，我都係陰謀派嘅忠實擁躉，凡係陰謀派嘅文章或評論我都唔會放過，因為故事情節的確引人入勝，而且往往由結果推敲原因，都顯得非常合情合理；而整個世界政治同經濟背後有一班人控制，亦都非常合乎普通人嘅想像框架，尤其是打工仔，因為打工仔都係俾老細控制，老細就俾背後個老細控制，一層壓一層，直至去到上帝旁邊？

⛎不過老實講，我都好希望陰謀論係真；正如一個比喻，我希望有鬼，因為有鬼，就代表死後有另一個世界存在，並非一了百了。我希望整個世界背後真係有一個「深層國家」運籌帷幄，至少有人話事。最可怕嘅現實係，整個世界，根本大家都係學鄧小平話齋「摸著石頭過河」，大家見一步行一步，見招拆招，兵來將擋，水來土掩。於是乎一場新型冠狀病毒，殺所有人一個措手不及，摧毁全球經濟，波及範圍同損毀情況、如果持續多一年半載，可能仲差過二次世界大戰。

⛎現實始終係現實，陰謀係存在，但陰謀論好難涵蓋整個世界，世事係處於一個散離混雜嘅境況，好多時候處於顛倒虛妄之中，冇人能夠預計，亦冇人能夠知道明天發生乜嘢事……

♑【常威近代史】第五部《霹靂大忠臣對決無敵大買辦》電子書上架（條download link在下面），請大家課金支持我一直走落去，直至劉少奇骨灰到達北京王光美手上…

♎【#常公子近代史】語音導航！請大家幫手「#訂閱」我條常公子YoutubeChannel！同埋介紹多啲人睇睇！衝上4000訂戶！

✅https://youtu.be/KCulhrAeFq8

幫推
作者電子書：https://play.google.com/store/books/details/%E5%A4%A7%E6%B8%85%E4%BA%A1%E5%9C%8B%E9%97%9C%E6%85%88%E7%A6%A7%E8%9B%8B%E7%89%9B%E6%B2%BB?id=C3hjDwAAQBAJ&hl=zh_HK
幫推香港作者，你我有責～

【常威近代史】（四百五十三回）
大罷工大鎮壓

「五卅慘案」發生之後，工潮蔓延全國，工人階級為咗爭取自己嘅合理權益，全力以抗爭手段同資產階級進行鬥爭，情況一發不可收拾，中國共產黨響今次全國性嘅工運中，擔當著重要領導角色，哪裏有剝削，哪裏便有鬥爭，金科玉律到咗今日都冇變過。

其時，北京中央政府以復出嘅皖系段祺瑞話事，真正大佬係奉系張作霖，東北王張作霖嘅幕後老細，係大日本帝國，之前已經講過，大正民主時代嘅日本，改變咗侵略中國嘅手段，主要以經濟滲透模式逐步蠶食中國內政，暫時扯低咗赤裸裸侵略者嘅面具，學習大英帝國之前七十年嘅玩法——全面控制咗你經濟脈博，又唔需要負上侵略者嘅惡名，食盡油水——當然可惜嘅係，日本人始終唔係英國人，演技未及英國人五成功力，況且「時間窗口」大家唔同，其實唔可以比較。

打完「第二次直奉戰爭」，1925年5月，張作霖立刻向日本借錢維持其軍事實力，以「奉天省貸款」名義，向日本借100萬日元，年息9厘，用吉林長春鐵路餘款為擔保。

事實上自從張作霖擔任奉天巡閱使，控制整個東北以後，東北各省就不斷向日本人借錢經營，不斷做大個餅，從1916年到1919年間，一共就借咗7220多萬元。1920年12月，吉林督軍鮑貴卿（1867-1934）以吉林銀行資產作擔保，向日本人借款200萬；1922年10月吉林省政府財政廳向日本人借款100萬；1925年10月，張作霖又以吉敦鐵路收入為擔保，向日本人借款1000萬元；同月，又用呼海鐵路局收入做擔保，借多227萬元；1926年2月，吉敦鐵路第二期貸款又借得278萬；1927年10月，第三期貸款又再借915萬元，從上述數字你可以睇到，根本由始至終，張作霖嘅幕後金主就係日本人，唔需要否認，每一股勢力背後都有金主，孫文背後老細係「第三國際」，直系背後金主係美國人。

大英帝國退場後，去到1920年代，整個中國基本上係由背後三股勢力（金主）瓜分，分別係日本、美國同蘇聯，直至1949年前，之後橫跨30年嘅中國近代史，都係由依三股勢力互相牽引、拉扯及鬥爭而產生。「外國勢力干預中國內政」，其實從來未停止過，由1840年第一次鴉片戰爭開始，去到1949年中華人民共和國誕生，前後足足一個世紀，而依100年左右嘅時間，用一般嘅歷史眼光去睇，亦都係中國人民最水深火熱嘅100年，當然真相係唔係咁？就需要由你自己獨立思考去判斷。

省港大罷工發生之前，仲有一件事需要補充，1925年5月，上海《文學週刊》開始連載《子愷漫畫》，作者係豐子愷（1898-1975），呢一日亦都係中國第一次出現「漫畫」依個字，係一個文化史上重要嘅里程碑。

豐子愷，浙江人，原名豐潤，佢除咗係中國第一個漫畫家，亦都係散文家、畫家、文學家、美術家與音樂教育家，多才多藝，師從弘一法師（李叔同，1880-1942），以中西融合畫法創作漫畫及散文而著名，大量注入佛學元素，係中國漫畫藝術先驅者同奠基者，漫畫造形簡約，畫風樸實，饒富童趣，獨樹一格，影響幾代中國人，絕對係大師級人馬。

1925年6月1號，上海總工會成立，中共一個重要嘅領導人李立三（1899-1967）擔任委員長，李立三領導上海全市實行三罷反帝行動，癱瘓城市經濟，6月3號，北京有30000名學生加入罷課行動，舉行遊行示威，聲援上海反帝運動。

6月5號，由香港華商總會創辦嘅《華僑日報》喺香港創刊，從此風行港澳七十年，成為香港一份重要嘅民間喉舌。

6月7號，段祺瑞想辦法平息工潮，派出特使到上海調查「五卅事件」，同日上海工商學聯合會成立，提出「五三慘案」17項交涉條件，交畀北京特派員。局勢動盪，6月13號，奉軍張作霖之子張學良帶領2000軍人進駐上海戒備。6月16號，英國駐京公使警告北京中央政府，要求嚴厲取締各省排英運動，並且鎮壓工運，火上加油。

6月19號，為聲援上海五卅運動，英國殖民地香港工人舉行大罷工。五卅運動爆發後，中華全國總商會派鄧中夏到香港，聯合林偉民、蘇兆征、楊殷等組織「香港工團聯合會」，指揮大罷工。本日，香港海員、電車、印務等工會開始發動罷工，情況不斷蔓延，一星期後，全港大罷工發生，整個城市接近癱瘓，6月21號廣州工人開始罷工！

6月23號，由香港行路到廣州嘅罷工工人、廣州罷工工人以及廣州各界20萬人喺東較場舉行誓師大會。大會舉行後，工人、商人、學生及黃埔軍校軍人舉行遊行示威，目的地係廣州嘅英租界，當遊行隊伍行經沙面租界對面嘅沙基西橋口時，被英國同法國嘅海軍陸戰隊以機關槍掃射，當場打死52人，170人受重傷！

6月11號，英國水兵亦響漢口開槍攻擊示威嘅中國民眾，當日武漢三鎮學生聯合會舉行大規模遊行示威，聲援五卅運動，當隊伍行經漢口英租界時，英國水兵開槍射擊群衆，打死打傷數十人，當晚漢口市民為抗議太古公司毒打工人，聚集到太古碼頭示威，被軍警迫進租界，英軍再次開槍射擊群眾，當場擊斃數十人，無數人受槍傷！

血肉橫飛，下次再續……

#常威💀 #大軍閥平反系列 #大軍閥 #民國歷史

【常公子歷史頻道327回：替大軍閥平反系列之 #十大訴求】

♏距離美國總統大選仲有幾日，一場可能影響世局至深嘅選舉，即將揭盎，目前共和黨特朗普同民主黨拜登支持度旗鼓相當，最後無論邊個獲勝？相信都會掀起一番法律訴訟，兩個都未必會承認選舉結果，尤其係尋求連任嘅特朗普，佢在任期間四年已經委任咗三個保守派大法官進入聯邦最高法院，無論能否連任，對共和黨未來發展或者傳統白人嘅保守勢力嚟講，都已經係豐功偉績。

♐「中國威脅論」亦響特朗普過去四年任期中成為美國人主流思流，就算拜登上臺都不能輕易逆轉情況，中國對美國有幾大威脅？有冇真實根據冇人知？但關公技倆，特朗普的確係超人，表象係一個狂人，內裡深謀遠慮，城府極深，如果佢做多四年，中美關係發展會不堪想像。不過，特朗普做嘅嘢，可能只係加速事情發生，而事情總會發生，早發生好過遲發生，無謂再拖，再拖情況只有愈壞。

⛎因為由二次世界大戰以後建立而來嘅美國霸權，二十一世紀後，的確出現動搖同不穩，1991年蘇聯解體之後，美國獨大嘅單邊主義體系難以維繫世界秩序，終於到達中國國力崛起，新冷戰格局再出現，如果樂觀去睇——又假設大家都唔夠膽發生熱戰同搏牌——世界局面好有可能回復到七八十年代嘅「璧壘分明」雙邊平衡狀態。

♐我始終都係嗰句，如果印銀紙可以解決問題，世界上就無問題。但係過去嘅日子，大家只係懂得用印銀紙解決問題，因為呢個原因，大壞事總會發生，遲早都會發生，一直拖落去一直印落去，情況只會更壞。

♑【常威近代史】第五部《霹靂大忠臣對決無敵大買辦》電子書上架（條download link在下面），請大家課金支持我一直走落去，直至劉少奇骨灰到達北京王光美手上…

♎【#常公子近代史】語音導航！請大家幫手「#訂閱」我條常公子YoutubeChannel！同埋介紹多啲人睇睇！衝上4000訂戶！

✅https://youtu.be/v7-nwRbHTlU

【常威近代史】（四百五十四回）
邵氏兄弟

慘！慘！慘！由「五卅慘案」到「漢口慘案」到「沙面大屠殺」！工人爭取權益抗爭，但係俾資本家同帝國主義者開槍屠殺，見到啲咁嘅畫面，當時嘅人唔左傾都唔得喇！毛主席講得無錯，世界上真係冇無緣無故嘅愛，亦都冇無緣無故嘅恨。

「沙面大屠殺」發生之後，廣東國民政府向英法駐京公時提出強烈抗議，不過中國人嘅命，喺當時嚟講，係石梨背水塘馬騮嘅命，唔值錢嘅。6月26號，「廣州罷工工人代表大會」成立，行動升級，6月31號，「省港罷工委員會」成立，成為指揮罷工抗爭嘅最高領導機關，領導工人階級繼續同帝國主義者抗爭，委員會進一步組織化規範化，組成工會糾察隊，封鎖香港及沙面租界，抵制英貨出入口，唔畀人返工做生意，令英國殖民地香港陷入一片混亂同停擺吊鹽水就態，廣州國民政府亦對省港罷工給予正面支持同幫助，每月撥出一萬元經費畀罷工委員會運作所用！

大家應該記得，之前香港殖民地政府支持過陳炯明同廣州商團軍對付孫文廣州國民政府，今次實行以眼還眼，玩殘你香港依個英式革命輸出總基地！

6月15號，國民黨中執會任命蔣介石兼廣州衛戍司令，蔣介石軍權在握，權力進一步上昇，同時中國國民黨中央舉行全體會議，作出改組大元帥府為國民政府等決議，同時發表致全國人民書，主張迅速取替各項不平等條約，驅逐帝國主義者及交還各地租界治權等訴求。

呢段時間，亦係「第一次國共合作」嘅高潮，共同反對帝國主義外來侵略者，當然大矛盾中亦有小矛盾，打走外人就會搞自己友，如果中國人真係咁容易團結，之後亦唔會發生咁多事同死咁多人。

6月30號，北京召開「世界被壓迫民族國民大會」，到會人數成十萬人，德國、朝鮮、土耳其、印度等國家代表出席發表演說，背後嘅搞手當然就係The Third International啦。

同日，佔領天津嘅奉系軍閥李景林（1885-1931）亦響天津拘捕百幾個共產黨人，蘇俄公使加拉罕向北京中央政府外交部提出嚴正抗議。亦喺同一時間，被趕出北京紫禁城嘅末代皇帝溥儀抵達天津，奉系大佬張作霖喺天津磕頭迎接聖駕，真係爛船都仲有三分釘，皇帝嘅身份始終有利用價值，當時張作霖根本係成個中國最有軍事實力嘅人，竟然卑躬屈膝叩頭迎接落難嘅黃子華？溥儀好嘢！

6月底，四川發生嚴重旱災同瘟疫，30萬人餓死，20萬人死於瘟疫（今日嘅新型冠狀病毒其實係濕濕碎，不過現代人條命就係值錢啲），災情遍及37個縣。

你以為係天災咁簡單，其實又係人禍，四川發生嘅飢荒原因在於川省各防區軍閥勒令民間種烟草（鴉片？），因為經濟理由嘛，烟草值錢，唔通種番薯咩？但就直接導致秋收期間糧食供應銳減，加上四川連年內亂，軍閥互相攻伐，妨礙農民耕作，又抽壯丁入伍，又抽丁糧補給，苛斂無厭，軍人更加強搶人民糧食，結果農民冇糧儲蓄過冬，加上蜀中地帶險要，山賊土匪108個好漢特別多，你又搶我又搶，軍人搶匪打劫又唔耕田，最後仆街嘅又係農民，天下點解唔可以亂？就係咁解。

其實自1911年中華民國建立以來，饑荒瘟疫無處不在，四川死50萬人當然有記載，但其他地方餓死幾千人就當冇件事喎，都係常態，中國人太多，死唔係問題，天災人禍根本從來未停止過，國家未能統一，地方軍閥各自為政，各有各搞各有各搶，其實都幾大件事。四川發生飢荒，亦都意味住天下快將大亂，所謂天下未亂蜀先亂，真係冇錯！

不過中國真係好L大，人口亦都好L多，到咗現在，如果你仍將「中國」視作一個「整體」去考量同觀察，好多時候就會出現偏頗嘅見解，正如好多人認為「美國」好富裕，人人有間獨立house住佢老母幾千呎有車房有個小花園BBQ煎牛扒（荷里活電影畀我哋嘅印象），但其實美國大L把窮人，七成人冇攞護照，因為成世人都唔會出國；香港都係the same，香港咁細，麥當勞道同天水圍已經兩個世界，祇不過窮人你未必見到太多，黑暗嘅事物通常棲身於黑暗處，但見唔到唔等於唔存在喎。

四川大飢荒，工人被帝國主義者冷血屠宰，但上海仍然Boom吒吒風花雪月，1925年6月，以發揚中國文化，力避歐化為宗旨嘅「天一影片公司」喺上海創立。創辦係浙江寧波人清末民國上海大顏料商邵玉軒（1866-1920年）四個仔——邵醉翁（1896-1975）四兄弟，邵醉翁係大佬，本身係律師，喺商界搵錢後轉投娛樂事業，與兄弟邵邨人（1898-1973）、邵山客（1901-1985）、邵逸夫（1907-2014）創辦天一電影公司，公司創辦後，喺上海以拍攝民間故事同古裝片大受歡迎，當中女明星胡蝶（1908-1989）、電影皇后邵醉翁之妻陳玉梅（1901-1985）名噪一時。

之後嘅事大家都清楚，邵氏兄弟成為中國電影界嘅中流砥柱，亦成為香港電影嘅神級人物，邵逸夫後來更響香港創辦電視廣播有限公司TVB，影響力延續到21世紀先收皮，邵氏兄弟真係百年傳奇，影響力其實不下於任何一個政治人物。

貧富懸殊係一個冇辦法解決嘅問題，但當時中國人、甚至全世界人都相信有一劑靈丹妙藥可以藥到病除，依劑藥叫「共產主義」，Communism！

#常威💀 #大軍閥平反系列 #大軍閥 #民國歷史